Mesola ya Dikgwa Tsa Pula

KA 1844, mokanoki wa Segerika e bong Konstantin von Tischendorf o ne a bona ditsebe di le 129 tsa mekwalo ya bogologolo mo nkgwaneng ya metsi mo lefelong lengwe la baitlami. Tischendorf o ne a tswa a tshotse ditsebe tseo tse di botlhokwatlhokwa mme gone jaanong ke karolo ya Codex Sinaiticus—nngwe ya mekwalo ya Baebele e e itsegeng go gaisa yotlhe mo lefatsheng.

Dikwalo tseo tse di botlhokwatlhokwa di ne tsa namolwa ka nako e e tshwanetseng. Dikgwa tsa pula tsone—tse boleng jwa tsone gantsi bo tlhokomologiwang—ga di lesego go le kalo. Ngwaga le ngwaga ka setlha sa komelelo, diketekete tsa melelo e e tshubiwang ke baruakgomo le balemi e bonesa loapi lwa boboatsatsi. Al Gore, yo gone jaanong e leng motlatsaporesidente wa United States, yo o neng a bona molelo o o ntseng jalo kwa kgaolong ya Amazon, o ne a re: “Tshenyo eno e boitshega tota. Ke nngwe ya masetlapelo a magolo go gaisa otlhe mo hisitoring.”

Gantsi ga re ke re fisa selo se re itseng gore se botlhokwa thata. Selo se se utlwisang botlhoko ka dikgwa tseno tsa pula ke gore, di nyelediwa le pele ga re tlhaloganya kafa di leng botlhokwa ka teng, pele ga re tlhaloganya kafa di dirang ka teng, le e leng pele ga re itse gore di na le eng. Go ja dikgwa tsa pula ka molelo go tshwana fela le go fisa laeborari gore o thuthafatse ntlo—o sa leba diteng tsa dibuka tseo.

Mo dingwageng tsa bosheng jaana borasaense ba ile ba simolola go sekaseka “dibuka” tseno, tshedimosetso e e boitshegang e dikgwa tseno tsa pula di nang le yone. Di na le “tshedimosetso” e e kgatlhang thata.

Sekgwa Se se Sa Tshwaneng le Sepe

Raditiragalo mongwe wa kwa Spain e bong Gonzalo Fernández de Oviedo o ne a khutsa jaana ka 1526: “Ditlhare tsa kwa Indies ke selo se motho a ka se kgoneng go se tlhalosa, fa o akanya ka bontsintsi jwa tsone.” Mafoko a gagwe a santse a le boammaaruri le fa go fetile makgolo a dingwaga a le matlhano a sena go bua jalo. Mokwadi mongwe e bong Cynthia Russ Ramsay, o ne a kwala jaana: “Dikgwa tsa pula ke tikologo e e raraaneng le e e nang le mefutafuta ya ditshedi le e e sa tlhaloganngweng go gaisa tsotlhe mo lefatsheng.”

Moitsethutotshelo ya boboatsatsi e bong Seymour Sohmer a re: “Le ka motlha re se ka ra lebala gore re itse go le gonnye fela kana ga re itse sepesepe fela malebana le tsela e bontsi jwa dikgwa tse di bongola tsa boboatsatsi di bopegileng ka yone le e di dirang ka yone, re sa bue sepe ka mefutafuta ya tsone ya ditshedi.” Dipalo tse di boitshegang tsa mefuta ya ditshedi tsa tsone le tsela e e raraaneng e di tshedisanang mmogo ka yone e dira gore tiro ya batho ba ba dirang dipatlisiso ka tsone e nne e e boitshegang.

Heketara nngwe le nngwe ya sekgwa sa mafelo a themperetšha e e magareng e ka nna le mefuta e sekae fela ya ditlhare. Halofo ya heketara ya sekgwa sa pula yone e ka nna le mefuta e e farologaneng e le 80 le mororo palogotlhe ya ditlhare mo heketareng nngwe le nngwe e ka nna 700 fela. E re ka tiro ya go farologanya mefutafuta eno e ka nna e e lapisang le e e ngomolang tlhogo, ke dikgwa di sekae fela tsa pula tse karolo ya tsone e e ka lekanang le heketara e le nngwe, di ileng tsa sekasekwa. Le fa go ntse jalo, tse di ileng tsa sekasekwa di senotse matswela a a gakgamatsang.

Mo mefutafuteng eo e mentsi ya ditlhare go nna palo e e boitshegang ya ditshedi tsa sekgwa—go feta kafa motho ope fela a ileng a akanya ka teng. National Academy of Sciences ya United States e bolela gore disekwerekilometara di le lesome fela tsa sekgwa sa pula se se santseng se siame di ka nna le mefuta e ka nna 125 ya diamusi tse di farologaneng, mefuta e le 100 ya digagabi, ya dinonyane e le 400, le ya dirurubele e le 150. Fa re bapisa, re fitlhela gore karolo yotlhe ya Amerika Bokone e na le, kana e etelwa ke mefuta ya dinonyane e le 1000 fela.

Le mororo mefuta e le mentsi ya dimela le diphologolo e ka fitlhelwa mo mafelong a a katoganeng a sekgwa sa pula, e mengwe yone e remeletse mo karolong e le nngwe fela ya loropo lwa dithaba. Ke sone se se dirang gore di nne mo kotsing thata jaana. E ne ya re fa baremi ba dikgong ba fetsa go khumola ditlhare mo thabeng nngwe kwa Ecuador dingwaga di sekae tse di fetileng, ke fa mefuta e le 90 ya dimela tse di fitlhelwang fela koo e setse e nyeletse.

Ka ntlha ya masetlapelo a a ntseng jalo, United States Interagency Task Force e e malebana le Dikgwa Tsa Boboatsatsi e tlhagisa jaana: “Fa e le gore batho ba dinaga tse di farologaneng ba batla gore mo masimologong a lekgolo le le latelang la dingwaga ba bo ba namotse dikuno tseno tse di tseelwang kwa tlase le tse gongwe di ka se keng tsa tlhola di nna teng, ba tla tshwanelwa ke go itlhaganelela go fenya bothata jono ka bonako le ka go dirisana mmogo.”

Le fa go ntse jalo, potso e ka nna ya tlhaga: A dikuno tseno tsa tlholego di botlhokwa go le kalo? A go nyelela ga dikgwa tsa pula go ka ama matshelo a rona thata?

Dijo, Moya o o Phepa le Melemo

A o simolola moso ka go ja mogopo wa di-cornflake, gongwe lee le le apeilweng le kopi ya kofi e e molelo? Fa e le gore go ntse jalo, o ja maungo a mantsintsi a dikgwa tsa boboatsatsi. Mmidi, dinawa tse di dirang kofi, kgogo e e beelang mae le e leng kgomo e e ntshang mashi—tsotlhe fela di tswa mo dimeleng le mo diphologolong tsa dikgwa tsa boboatsatsi. Mmidi o tswa kwa Amerika Borwa, kofi e tswa kwa Ethiopia, dikgogo tse di ruiwang di tswa mo dikgogong tsa kwa nageng tsa Asia mme dikgomo tsa mashi di tswa mo dikgomong tse di nyelelang tsa naga tsa Borwabotlhaba jwa Asia. Buka ya Tropical Rainforest e bolela jaana: “Diperesente di le 80 tsa dilo tsotlhe tse re di jang di simologile kwa boboatsatsi.”

Motho ga a tshwanela go itlhokomolosa gore dijo tse a di jang di tswa kae. Dimela le diruiwa di ka koafadiwa ke go parwa thata le tse dingwe. Dikgwa tsa pula ka bontsintsi jwa mefuta ya tsone ya ditshedi di ka tlamela dimela kana diphologolo tseno ka mefutafuta ya dijini tse di ka di nonotshang. Ka sekai, moithutadimela wa kwa Mexico e bong Rafael Guzmán o ne a ribolola mofuta o mosha wa tlhaga o o amanang ka losika le mmidi o re nang le one gompieno. Tlhaga eno (Zea diploperennis) e a e ribolotseng e ne ya ngoka kgatlhego ya balemi thata ka gonne e kgona go emelana le malwetse a le tlhano mo go a le supa a magolo a a tshwenyang dijalo tsa mmidi. Borasaense ba solofetse go dirisa mofuta ono o mosha wa tlhaga go tlhagisa mefuta e e farologaneng ya mmidi o o kgonang go emelana le malwetse ano.

Ka 1987 puso ya Mexico e ne ya simolola go sireletsa loropo lwa dithaba lo mmidi ono wa naga o neng wa fitlhelwa mo go lone. Le fa go ntse jalo, e re ka dikgwa tse dintsi di senngwa, ga go na pelaelo gore mefuta e e botlhokwatlhokwa ya ditshedi e e jaaka eno e tla nyelela le e leng pele ga e ribololwa. Kwa dikgweng tsa Borwabotlhaba jwa Asia, go na le mefuta e sekae ya dikgomo tsa naga tse di ka dirisiwang go nonotsha lotsalo lwa dikgomo tse di ruilweng. Le fa go ntse jalo, mefuta eno yotlhe e tloga e nyelela ka ntlha ya go senngwa ga mafelo a e nnang mo go one.

Moya o o phepa le one o botlhokwa fela jaaka dijo tse re di jang. Fela jaaka mongwe le mongwe yo o ratang go tsamayatsamaya mo sekgweng a ile a lemoga, ditlhare di na le seabe se segolo mo go direng gore loapi lo tlale ka okosejene. Mme fa di jewa ka molelo, go tlala khabone e le mo sebopegong sa khabonetaeokosaete le khabonemonokosaete. Digase tseno ka bobedi di baka mathata.

Batho bangwe ba fopholetsa gore ditiro tsa motho di setse di okeditse khabonetaeokosaete e e mo atemosefereng ya lefatshe ka selekanyo se se gabedi. Le mororo go akanngwa gore kgotlelo e e bakwang ke diintaseteri ke yone selo se segolo se se bakang bothata jono, go bolelwa gore go tshuba dikgwa go nna le seabe mo go tlhagiseng diperesente di le 35 tsa khabonetaeokosaete yotlhe e e leng teng. Fa khabonetaeokosaete e setse e le mo atemosefereng, e baka selo se se bidiwang gore ke greenhouse effect, e leng se borasaense ba le bantsi ba bonelang pele gore se tla baka gore lefatshe le gotele thata.

Khabonemonokosaete yone e maswe le go feta. Ke yone botlhole jo bogolo go gaisa jo bo fitlhelwang mo mosing o o tshwenyang metse ya ditoropokgolo. Le fa go ntse jalo, James Greenberg, yo e leng modiradipatlisiso o ne a gakgamala thata fa a ne a fitlhela gore “dikgwa tsa kwa Amazon di na le khabonemonokosaete e ntsi thata fela jaaka metse ya ditoropo tsa kwa United States.” Go fisa dikgwa tsa Amazon kwantle ga go akanya go kgotletse atemosefere e ditlhare tseno di neng di diretswe gore di e phepafatse!

Kwantle ga gore dikgwa tseno tsa pula ke motswedi wa dijo le moya o o phepa, gape e ka nna motswedi wa mefutafuta ya melemo. Kwatara ya diokobatsi tsotlhe tse dingaka di alafang batho ka tsone, di tswa mo dimeleng tse di tlhogang kwa dikgweng tsa boboatsatsi. Quinine, e e dirisediwang go alafa malaria e tswa kwa dikgweng tse di ratwang ke pula tsa kwa Andes; curare, e e dirisiwang go sidila mesifa ka nako ya karo e tswa kwa kgaolong ya Amazon; mme periwinkle e e khibitswana e bogalaka jwa yone bo kgonang go fodisa balwetse ba le bantsi ba lukemia, yone e tswa kwa Madagascar. Le mororo go na le matswela a a ntseng jalo a mantle, ke diperesente di le 7 fela tsa dimela tsa boboatsatsi tse di ileng tsa tlhatlhobiwa go bona gore a di ka dirisiwa mo kalafing. Mme nako yone e a fela. United States Cancer Institute e tlhagisa gore “go nyelediwa go go anameng ga dikgwa tse di bongola tsa boboatsatsi go ka baka poelomorago e kgolo thata mo letsholong la go lwantsha kankere.”

Go na le ditiro tse dingwe tse di botlhokwa thata tse dikgwa tsa pula di di dirang—le mororo botlhokwa jwa tsone bo se ke bo lemogiwa go fitlha dikgwa di setse di nyeletse. Dingwe tsa tsone ke go laola pula le themperetšha le go sireletsa mmu gore o se ke wa gogolega. Buka ya The Emerald Realm: Earth’s Precious Rain Forests e bega jaana: “Dikuno tsa dikgwa tsa boboatsatsi tsa lefatshe di dintsi thata go feta kitso e gone jaanong re nang le yone ka tsone. Le fa go ntse jalo, tota le gone jaanong re a itse gore di botlhokwa go se kana ka sepe.”

“Re Tla Ngomaela Fela Se re Se Ratang”

Ruri ke boeleele go senya dikuno tse di kgonang go re tlamela ka dilo tse dintsintsi jaana. Mo e ka nnang dingwaga tse di fetang 3000 tse di fetileng, Modimo o ne a laela Baiseraele go ngomaela ditlhare tsa maungo fa ba tlhasela metse ya baba. Lebaka le a ba neileng lone le motlhofo: “Di lo tlamela ka dijo.” Mo godimo ga moo, “ditlhare tseo ga se batho mo lo ka di tlhaselang.” (Duteronome 20:19, 20, The New English Bible) Go ka buiwa se se tshwanang le ka dikgwa tsa pula tse di tlhasetsweng.

Go bonala fa dikgwa tsa pula, fela jaaka ditlhare tsa maungo, di le botlhokwa thata fa di tlogetswe di eme go na le fa di rapaladitswe. Le fa go ntse jalo, mo lefatsheng la gompieno dilo tse di nang le melemo ya nakwana di tsewa tsia go feta tse di nang le molemo wa lobaka lo loleele. Le fa go ntse jalo, go ruta batho go ka fetola maikutlo a bone. Moitseikholoji mongwe wa kwa Senegal e bong Baba Dioum o tlhalosa jaana: “Totatota re tla ngomaela fela se re se ratang; re tla rata fela se re se tlhaloganyang; mme re tla tlhaloganya fela se re se rutilweng.”

Tischendorf o ne a utswa mekwalo eo ya bogologolo kwa Sekakeng sa Sinai ka gonne a ne a rata mekwalo ya bogologolo thata e bile o ne a batla go e sireletsa. A fa go ntse go ya bontsi jwa batho bo tla ithuta go rata dikgwa tsa pula mme ba di namole?

[Mafoko a a mo go tsebe 27]

Go ja dikgwa tsa pula ka molelo go tshwana fela le go fisa laeborari gore o thuthafatse ntlo—o sa leba diteng tsa dibuka tseo

[Lebokoso/Ditshwantsho mo go tsebe 24, 25]

Go Ngomaela Ditshedi Tsa Dikgwa

JESÚS ELÁ o ne a fetsa dingwaga di ka nna 15 a tsoma dikorila le diphologolo tse dingwe tsa sekgwa sa pula sa mo Afrika. Mme ga a tlhole a di tsoma. Gone jaanong ke motsamaisabaeng kwa phakeng ya dilo tsa tlholego e e diretsweng go sireletsa dikorila di le 750 tse di nnang mo go seng dithaba teng kwa Equatorial Guinea.

Jesús o tlhalosa jaana: “Ke ipelela sekgwa seno sa pula thata fa ke sa tsome. Mo go nna sekgwa seno se ntse jaaka e kete ke motse wa me ka gonne ke ikutlwa ke phuthologile thata mo go sone e bile se ntlamela ka sengwe le sengwe se ke se tlhokang. Re tshwanetse go dira gotlhe mo re ka go kgonang go ngomaelela bana ba rona sekgwa seno.”

Jesús, yo o tlhagafalelang go bolelela batho ba bangwe kafa a ratang sekgwa seno ka teng, o lesego. Gone jaanong o amogela madi a mantsi ka go sireletsa dikorila go feta fa a ne a di tsoma. E re ka baeti ba itumelela go duelela tshiamelo ya go bona diphologolo tse di ntseng jalo di le mo nageng, diphaka di ka kgona go nna le madi a go tlhokomela batho ba koo le go dira gore baeti ba nne le tshono ya go bona bontsintsi jo ba se kitlang ba bo lebala jwa ditshedi. Le fa go ntse jalo, buka ya Tropical Rainforest e tlhalosa gore go ngomaela “mafaratlhatlha ano a ditshedi” a a jesang kgakge go batla “mafelo a a di tshwanelang tota, a a akaretsang mathudi otlhe a metsi a di a ratang thata.”a

Ke eng fa diphaka di tshwanetse go nna dikgolo thata jaana gore di kgone go sireletsa ditshedi sentle? John Terborgh, mo bukeng ya gagwe ya Diversity and the Tropical Rain Forest, o lekanyetsa gore palo e e lekaneng sentle ya dijakwa (mo e ka nnang tse di tsalang di le 300) di tlhoka mo e ka nnang disekwerekilometara di le 7500. O bolela gore, “go ya ka tekanyetso eno, go na le diphaka di sekae fela mo lefatsheng tse di ka kgonang go nna le lefelo le le lekaneng go tshola dijakwa.” Dinkwe tsone di ka batla lefelo le legolo go feta leo. Moraka wa dinkwe tse di tsalang (di ka nna 400) o ka tlhoka lefelo le le bogolo jwa disekwerekilometara di le 40 000.

Fa go ka dirwa mafelo a magolo a go boloka dibatana tse di jaaka tseno, dibata tsotlhe tsa dikgwa tsa pula le tsone di tla sireletsega. Mme mosola o mongwe ke gore, diphologolo tseno di na le seabe se segolo mo go direng gore losika lotlhe loophologolo lo tshele sentle.

[Ntlha e e kwa tlase]

[Lebokoso/Ditshwantsho mo go tsebe 24, 25]

Ditshedi Tse Dikgolo le Tse Dinnye

1. Bontsi jwa ditsiakgope tsa dikgwa tsa pula di na le mebala e mentle. Ditshenekegi tse dingwe di na le mebala e e bofitlha jaana mo o sa kgoneng go ka di lemoga sentle

2. Dirurubele ke tsone ditshedi tse di lemotshegang sentle le tse dintle thata tsa dikgwa tsa pula

3. Segopa sa ditshwene se se tabogang se ya kwa le kwa ke sengwe sa dilo tse di ntshang bodutu thata mo dikgweng tseno

4. Le mororo jakwa e le kgosikgolo ya dikgwa tsa pula tsa Amerika, baithutatlholego ba le bantsi ga ba ke ba bona le fa e le nngwe mo sekgweng

5. Dithunya tse dintle tsa orchid di kgabisa dikgwa tsa maru tse di ikadileng ka dithaba tsa boboatsatsi

6. Go na le dinkwe di ka nna 5000 fela tse di santseng di setse mo nageng

7. Khukhwana ya lonaka lwa tshukudu ya Afrika Bophirima e leina la yone le e tshwanelang sentle e na le dinaka tse di tshosang mme tota ga e kotsi

8. Le mororo dikorila e le dingwe tsa ditshedi tse di sireleditsweng, o santse o ka fitlhela nama ya tsone mo marekisetsong a mo Afrika. Mekaloba eno e e kgatlhang e ja ditlhatshana e bile e rata go sasanka mo sekgweng ka digopa

9. Katse ya naga e e bidiwang ocelot e batlile e nyelela ka ntlha ya go tsomelwa letlalo la yone le lentle

10. Dipapalagae ke dingwe tsa dinonyane tse di modumo le tse di botsalano thata mo dikgweng tseno

11. Galago e fula bosigo fela jaaka matlho a yone a magolo a bontsha

[Motswedi wa Setshwantsho]

Foto: Zoo de Baños

Foto: Zoo de la Casa de Campo, Madrid

[Motswedi wa Setshwantsho]

Foto: Zoo de Baños

[Ditshwantsho mo go tsebe 23]

Dikgwa tsa pula di tlhagisa (1) khaokhao, (2) “periwinkle” e khibitswana e e dirisiwang go alafa lukemia le (3) oli ya “palm.” (4) Go khumola dikgwa go dira gore lefatshe le gosomane