A Botsogo jo bo Itekanetseng ke Toro Fela?
A O KILE wa lwala thata kana wa dirwa karo e e masisi? Fa e le gore go ntse jalo, gongwe gone jaanong o ka tswa o anaanela botshelo go gaisa pele. Mme gone, le fa o ka tswa o na le botsogo jo bo ntseng jang, a o a dumela gore go a kgonega gore batho ba nne le botsogo jo bo itekanetseng? Seno se ka bonala se se boammaaruri ka ntlha ya malwetse a a anameng a a koafatsang a a jaaka kankere kana bolwetse jwa pelo. Bontsi jwa rona re lwala gangwe le gape. Le fa go ntse jalo, go nna le botsogo jo bo molemo ga se toro fela.
Motho o ne a bopetswe go nna le botsogo jo bo itumedisang e seng go mekamekana le malwetse le loso. Ke gone ka moo Jehofa a ileng a re neela tsela ya go dira gore re nne le botsogo jo bo itekanetseng le botshelo jo bo sa khutleng ka go dirisa thekololo ya setlhabelo sa ga Keresete Jesu e le go fedisa bolwetse le loso. “Modimo o ratile lefatshe mo go kalo mo o bileng wa ntsha Morwaone yo o tsetsweng a le esi, e le gore mongwe le mongwe yo o supang tumelo mo go ene a tle a se ka a senngwa mme a nne le botshelo jo bo sa khutleng.” (Johane 3:16) Batho ba ba tla tshelang mo lefatsheng le lesha le Modimo o le solofeditseng ga ba kitla ba tsenwa ke malwetse kana go tsofala. Fa e le gore go ntse jalo, go tla diragala eng ka bogole?
Go Gololwa mo Bolwetseng
Tsela e Jesu Keresete a neng a fodisa balwetse ka yone e re tlhomela sekao. Go ne ga bolelwa jaana ka diphodiso tse di ntseng jalo: “Difofu di bona gape, le ditlhotsa di a tsamayatsamaya, balepero ba a ntlafadiwa le bosusu ba a utlwa, mme baswi ba a tsosiwa, le bahumanegi ba bolelelwa dikgang tse di molemo.” (Mathaio 11:3-5) Ee, batho botlhe ba ba neng ba golafetse ba ba neng ba tla mo go Jesu “ba ne ba fodisiwa ka mo go feletseng.” (Mathaio 14:36) Ka ntlha ya moo, “boidiidi bo ne jwa ikutlwa bo maketse fa bo bona dimumu di bua le ditlhotsa di tsamaya le difofu di bona, mme ba galaletsa Modimo wa Iseraele.”—Mathaio 15:31.
Ruri, le fa gompieno go se na ope yo o ka kgonang go fodisa jaana, re ka tlhomamisega gore mo pusong ya Modimo batho ba tla itekanedisiwa, ba tla fodisiwa malwetse otlhe a tlhaloganyo le a mmele. Tsholofetso ya Modimo e boletswe mo go Tshenolo 21:3, 4: “Bona! Tente ya Modimo e mo bathong, mme o tla aga le bone, mme ba tla nna batho ba one. Mme Modimo ka boone o tla nna le bone. Mme o tla phimola keledi nngwe le nngwe mo matlhong a bone, mme loso lo tla bo lo seyo, lefa e le khutsafalo lefa e le selelo lefa e le botlhoko di tla bo di sa tlhole di le gone. Dilo tsa pele di fetile.”
Akanya fela lefatshe le sa tlhole le tlhoka go nna le madirelo a melemo kana maokelo, dikaro kana kalafi! Mo godimo ga moo, mo Paradaiseng e e tsosolositsweng, go tshwenyega thata mo maikutlong le malwetse a tlhaloganyo e tla bo e le dilo tsa nako e e fetileng. Botshelo bo tla nna monate tota; mme boitumelo e tla nna selo sa ka bosakhutleng. Ee ruri, maatla a magolo a Modimo a tla dira gore mmele o kgone go boa o intšhafatsa mme matswela a thekololo a tla fedisa dilo tse di koafatsang mmele tse di bakwang ke boleo. “Monni wa gona ga a ketla a re: ‘Ke a bobola.’”—Isaia 33:24.
A tsholofelo e e molemo ruri—go nna le botsogo jo bo molemo jwa mmele le jwa semoya mo Bogosing jwa Modimo! Fa o ntse o lwela go nna le tekatekano mo tseleng e o tshelang ka yone le go nna le botsogo jo bo molemo, tlhoafalela masego a Modimo a lefatshe le lesha. E kete Jehofa a ka ‘kgorisa legano la gago ka dilo tse di molemo; bokau jwa gago boo bo tle bo šafadiwe bo nne jaaka jwa ntswi yo motona’!—Pesalema 103:5.