Mabenya a Loapi Lwa Afrika
Ka mmegadikgang wa Tsogang! kwa Kenya
NAGA e e lebala ya Afrika e omeletse e bile e setlhafetse, e besitswe thata ke letsatsi le le mogote la ekhweitha. Re leka go sutlhelela mo gare ga ditlhare tsa mongana le dikhi tse di ditshetlho.
Ka tshoganetso fela ke fa re tshwanelwa ke go ema. Re ne re gapilwe ke go bona go tsabakela ga mebalabala. Nonyane e nngwe e nnye e e neng e na le mebalabala jaaka e kete letsatsi le ne le teneditswe mo teng ga diphofa tsa yone tse dinnye e ne ya tla go tlhoma mo kaleng ya setlhatshana se se neng se thunya sa acacia. Ga se fela sebenya seno se se fofang se bidiwang semonamone (sunbird).
Diipone Tsa Tshipi
Go na le mefuta e e fetang lekgolo ya dinonyane tsa semonamone. Bontsi jwa yone e bonwa kwa dinageng tsa boboatsatsi tsa Afrika, mme di ka nna tsa bonwa gape le kwa Asia, Australia le e leng kwa ditlhaketlhakeng tsa Pacific. Fela jaaka di le dintle ka go farologana ga tsone, dinonyane tsa semonamone di a tsabakela mo letsatsing fela jaaka diipone tse dinnye tsa tshipi, di bontsha motshe wa godimo wa mebala e e kgatlhang: bohibidu, bosetlha, bobududu le botala le methalo ya koporo.
Dinonyane tsa dimonamone gantsi di tshwantshiwa le di-hummingbird tsa kwa Amerika. Di na le mebalabala e bile di ikotla ka tswina fela jaaka dinonyane tsa hummingbird. Le fa go ntse jalo, di feta dinonyane tsa hummingbird e bile ga di na botswerere jwa go fofa jaaka balekane ba tsone ba kwa Amerika Bokone.
Gantsi nonyane ya semonamone e ntsha tswina ya yone ka go kotama mo sethunyeng mme e dirise molomo wa yone o moleele, o o segogoropo go fitlhelela kwa tengteng ga sethunya. Le fa go ntse jalo, fa e le gore sethunya se se bopegileng jaaka tšhupu se seleele thata gore e ka se fitlhelela, nonyane ya semonamone e ka nna ya phunya sethunya seno kwa tlase mme e gope diteng tsa sone tse e di ratang. Gape di ja ditshenekegi tse di di nopolang mo dithunyeng le mo matlhareng a a gaufi.
Gape tse di tonanyana ke ditswerere mo go opeleng. Botswerere jwa tsone bo farologana go tloga ka molodi o mosesane wa tssp wa nonyane e ntle ya semonamone go ya go tsik-tsik-tsik-tsik-tsit tree-tree-turrrr mo go dirwang ke nonyane ya semonamone e e mmala o bohibidu jo bo letlhololo ya kwa Afrika Botlhaba. Gantsi pina ya tsone ke yone e supetsang baithutadinonyane gore e teng mo sekgweng se se kitlaneng. Le fa go ntse jalo, fa e setse e bonwe, go nna motlhofo go e bona sentle mo tlhageng ya Afrika e e omileng e e tshetlha.
E Dira ka Natla Mme Fela ga e Maphatshiphatshi
Le fa gone go kgatlha go bona le go reetsa nonyane e tonanyana ya semonamone, e e namagadi yone e nnye e bile ga e a kgaba ka mmala. Ka gone gantsi baithutadinonyane le boraditshwantsho ga ba e ele tlhoko. Tota e bile, gantsi e lemogiwa fela fa e tsamaya le e tonanyana. Le fa go ntse jalo, selo se e namagadi e se nang sone mo mmaleng, ruri e na le sone mo go direng ka natla.
Go le gantsi e e namagadi ke yone e agang sentlhaga le go dira tiro e ntsi ya go godisa ditsuane. Fa e ntse e tshwaragane le ditiro tsa mo sentlhageng, e e tonanyana yone e nna e disitse, e ipaakanyeditse go koba dilo tse di iphagang dikoro mo lefelong la sentlhaga.
Dintlhaga Tse di Lepeletseng
Le fa go ntse jalo, dintlhaga tsa nonyane ya semonamone ga di dintle. Gantsi o ka ba wa re ke matlakala fela a a tserweng ke phefo e e fetang mme ya a sukunyetsa mo setlhareng se se mitlwa sa acacia. Sentlhaga sa nonyane ya semonamone se dirilwe ka tlhale ya dijalo e e logilweng kgotsa e e kopantsweng mme ya tshwaraganngwa ka bobi jwa segokgo, mme se tshwana fela le kausu e e lepeletseng, e e jaaka lerothodi la monyo. Bokafantle jwa sentlhaga bo kgabisitswe sentle ka dikalanyana, matlhare a a omeletseng, magaga mme gantsi le sephotlwa se le sengwe kana di le pedi tse di lepeletseng gore se tiye sentle.
Ka fa gare, sentlhaga seno se adilwe dijalo fa fatshe, bojang jo bo boleta, mafofa le dilo tse dingwe tse di boletanyana. Kgoro ya sone ke khuti e nnye mo letlhakoreng le le lengwe, go ela kwa godimo. Gantsi nonyane e e namagadi e elama e le nosi. Fa e dutse mo teng ga sentlhaga sa yone se se jaaka pere, molomo wa yone o o makoro gantsi o ka bonala kwa ntle ka kgoro ya sentlhaga. E beela lee le le lengwe kana a mabedi, a a tla thuthusang mo malatsing a le 14. Fa ditsuane di tswa mo sentlhageng, di a bo di na le mmala o o letobo fela jaaka mmatsone. Le fa go ntse jalo, fa tse ditonanyana di gola, di simolola go nna le diphuka tse di mebalabala tse ka letsatsi lengwe le tsone di tla itshupang e le dinonyane tsa letsatsi.
Nonyane ya semonamone ke sekai se sengwe fela sa go bontsha kafa Motlhami yo o botlhale a leng pelotshweu e bile a ratang dilo tsa methalethale ka gone. Mmala wa tsone o montle le boitsholo jwa tsone jo bo tlhomologileng di re tlhotlheletsa go anaanela Mmopi wa tsone thata. Ka gone dinonyane tsa dimonamone di gareng ga dilo tse Baebele e di laelang jaana: “Bakang Jehofa lo le mo lefatsheng, . . . dilo tse di gagabang le dinonyane tse di fofang.” “A dilo tsotlhe fela tse di nang le mowa di bake Jehofa.” (Pesalema 148:7, 10; 150:6) Dilo tseno tse di kgatlhang tsa loapi lwa Afrika di tshwanetse tsa re tlhotlheletsa rotlhe gore re galaletse Mmopi yo o lorato yo o di dirileng.