Motaki yo o Tlhokomologilweng go Gaisa Botlhe mo Motlheng wa Rona

“Tlhago ke tiro ya Modimo ya botaki.”—Sir Thomas Browne, ngaka ya lekgolo la bo17 la dingwaga.

LEONARDO DA VINCI, Rembrandt, van Gogh—ano ke maina a a itsiweng ke dimilionemilione tsa batho. Lefa o ise o bone setshwantsho sepe sa tsa ntlhantlha tse ba di takileng, o itse banna bano e le bataki ba bagolo. Tiro ya bone ya botaki ka tsela nngwe e dirile gore go nne e kete ba santse ba tshela.

Ba ne ba taka motho a nyenya ka tsela e e kgatlhang mo letseleng, setshwantsho se se amang maikutlo, bontle jwa popo, jo bo santseng bo ama maikutlo a motho yo o bo lebileng. Re kgatlhiwa ke dilo tse di neng tsa ba kgatlha—le mororo ba tshedile makgolokgolo a dingwaga pele ga rona.

Re ka nna ra bo re se bataki kana bakanoki ba dilo tse di takilweng, mme gone, re santse re ka kgona go lemoga bontle jwa botaki. Fela jaaka re itumelela dilo tse di takilweng tsa motaki, re dirilwe re kgona go anaanela dilo tse dintle. Re ka nna ra bo re sa tseye tsia thata tsela e re ratang mebala, dipopego, tsela e dilo di dirilweng ka yone le lesedi, mme gone ke dilo tse e leng karolo ya botshelo jwa rona. Ga go na pelaelo gore re rata go kgabisa magae a rona ka dilo kana ditshwantsho tse di kgatlhang matlho a rona. Le mororo re rata dilo tse di sa tshwaneng, go rata dilo tse dintle ke mpho e batho botlhe ba nang le yone. Mme ke mpho e e ka re tsalanyang thata le Mmopi wa rona.

Mpho ya Bontle

Go kgatlhegela dilo tse dintle ke nngwe ya dinonofo tse dintsi tse di farologanyang batho le diphologolo. Buka ya Summa Artis—Historia General del Arte (Kgang e e Tseneletseng Kaga Botaki—Hisitorikakaretso Kaga Botaki) e tlhalosa gore “motho a ka tlhalosiwa e le phologolo e e kgatlhegelang bontle.” Ka gonne re sa tshwane le diphologolo, re leba popo ka tsela e e farologaneng le tsone. A ntša e tle e itumelele phirimo e ntle ya letsatsi?

Ke mang yo o re dirileng jalo? Baebele e tlhalosa gore “Modimo wa tlhola motho mo setshwanong sa one tota, wa mo tlhola mo setshwanong sa Modimo.” (Genesise 1:27) Ga se gore batsadi ba rona ba ntlha ba ne ba na le ditebego tse di tshwanang le tsa Modimo, go na le moo, Modimo o ne o ba dirile ba na le dinonofo tse a nang le tsone. Nngwe ya tsone ke go kgatlhegela dilo tse dintle.

Boboko jwa motho bo kgona go tlhaloganya bontle jwa selo ka tsela e go leng thata go e tlhaloganya. Sa ntlha, methapo ya rona ya kutlo e kgona go romela tshedimosetso kwa bobokong kaga medumo, menko, mebala le dipopego tsa dilo tse di re kgatlhang. Lefa go ntse jalo, bontle ga bo amane fela le ditsibosi tsa dieleketerone tsa dikhemikale tse di re itsiseng fela kaga se se diregang go re dikologa. Ga re bone setlhare, sethunya kana nonyane ka tsela e phologolo e di lebang ka yone. Le mororo re ka se bone molemo ope mo go tsone ka tlhamalalo, dilo tseno di a re itumedisa. Boboko jwa rona bo re thusa gore re lemoge bontle jwa tsone.

Seno se ama maikutlo a rona se bo se dira gore re itumele mo botshelong. Mary, yo o nnang kwa Spain, o gakologelwa sentle maitseboa mangwe a November dingwaga di sekae tse di fetileng fa a ne a dutse go bapa le letsha lengwe le le kwa kgakala a lebile phirimo ya letsatsi. A re: “Digopagopa tse di sa feleng tsa megolodi di ne di fofela ntlheng ya me di bitsana ka melodi. Diketekete tsa dinonyane tseno di ne di itirile mola o moleele go ralala loapi lo lo bohibidu jo bo mokgona e kete ke digokgo. Mosepele wa tsone wa ngwaga le ngwaga wa go fuduga go tswa kwa Russia le Scandinavia o ne o di lerile mo Spain go tla go ikhutsa. Tiragalo eo e ne e le ntle thata mo ke neng ka lela.”

Ke Eng fa re Filwe Mpho Eno ya Bontle?

Mo bathong ba le bantsi, nonofo e re nang le yone ya go kgatlhegela bontle e supa sentle gore go na le Mmopi yo o lorato yo o batlang gore dibopiwa tsa gagwe tse di botlhale di itumelele tiro ya gagwe ya botaki. A bo e le selo se se utlwalang jang ne go dumela gore nonofo eno ya go kgatlhegela bontle re e tsentswe ke Mmopi wa rona yo o lorato. Baebele e tlhalosa gore “Modimo o lorato,” mme selo se se nonotshang lorato ke go le abela ba bangwe. (1 Johane 4:8; Ditiro 20:35) Jehofa o ile a itumelela go re abela ditiro tsa gagwe tsa botaki. Fa motho a tlhamile mmino o o monate mme a sa o utlwise ba bangwe kana a takile setshwantsho se sentle mme a sa se bontshe ba bangwe, bontle jwa tsone bo ne bo se kitla bo thusa sepe. Tiro ya botaki e direlwa go bontshiwa batho le go e itumelela le bone—ga e kgatlhe fa go sena yo o e lebang.

Ee, Jehofa o bopile dilo tse dintle ka maikaelelo—gore batho ba di bontshane le go di itumelela. Tota e bile, legae la batsadi ba rona ba ntlha e ne e le paraka e kgolo ya paradaise e e bidiwang Etene—mo go rayang “Boipelo.” Modimo ga a tlatsa lefatshe fela ka ditiro tsa gagwe tsa botaki mme gape o dirile batho ba na le kgono ya go lemoga dilo tseno le go di itumelela. Mme a bo go na le dilo tse dintsintsi jang ne tse dintle tse re ka di lebang! Go ntse fela jaaka fa Paul Davies a ne a re, “ka dinako tse dingwe go lebega e kete tlhago ‘e ne e tsaya matsapa a magolo tota’ go dira lobopo lo lo kgatlhang le lo lo mosola.” Re lemoga gore lobopo lo a kgatlha e bile lo mosola segolobogolo ka gonne Jehofa o ne a ‘tsaya matsapa a magolo tota’ go re bopa re na le kgono ya go ka le ithuta le go le itumelela.

Ga go gakgamatse go bo batho ba ditso tsotlhe—go tloga ka bataki ba bogologolo ba ba neng ba taka mo magageng go ya go Bataki ba maemo a a kwa godimo—ba supa go kgatlhegela bontle jwa tlhago le keletso ya go e etsa. Dingwaga di le diketekete tse di fetileng, baagi ba karolo e e kwa bokone ya Spain ba ne ba taka ditshwantsho tse di bonalang sentle tsa diphologolo mo magageng a Altamira, kwa Cantabria. Mo e ka nnang mo lekgolong le le fetileng la dingwaga, Bataki ba maemo a a kwa godimo ba ne ba tswa mo ditidiong tsa bone go ya go leka go taka mebala e e galalelang ya dithunya kana go leka go taka tsela e lesedi le fetofetogang ka teng fa le phatsima mo metsing. Tota le bana ba bannye ba rata dilo tse dintle thata. Tota e bile, bontsi jwa bone fa ba neilwe kerayone le pampiri ba rata go taka sengwe le sengwe se ba se akanyang.

Gompieno bagolo ba le bantsi ba rata go tsaya senepe sa mafelo a a ileng a ba kgatlha gore ba nne ba a gakologelwa. Mme gone, megopolo ya rona e kgona go gakologelwa dilo tse dintle tse re ka tswang re ile ra di bona masomesome a dingwaga a a fetileng le mororo re sena khemera. Go phepafetse gore Modimo o re dirile gore re kgone go ipelela legae leno la rona la lefatshe le a le kgabisitseng ka ditsela tse di kgatlhang. (Pesalema 115:16) Lefa go ntse jalo, go na le lebaka le lengwe la go bo Modimo a re dirile re kgona go kgatlhegela dilo tse dintle.

‘Dinonofo Tsa Gagwe di Bonala Sentle’

Fa re godisa tsela e re itumelelang ditiro tsa tlhago tsa Mmopi wa rona ka yone, seo se ka re thusa gore re mo itse, ene yo ditirotiro tsa gagwe di re dikologileng. Nako nngwe Jesu o ne a laela barutwa ba gagwe gore ba sekaseke dithunya tsa naga tse di tlhogang kwa Galilea ka kelotlhoko. O ne a re: “Akanyang dithunya tsa masoma a naga, ka fa di golang ka teng: ga di dire, ga di otlhe. Le fa go ntse jalo ke a lo raya, le e leng ene Solomone mo kgalalelong yotlhe ya gagwe, o ne a sa kgabe jaaka sengwe sa tsone tseo.” (Mathaio 6:28, 29) Bontle jwa sethunyanyana sa naga se e seng sa sepe bo ka re gakolola gore Modimo a ka se itlhokomolose dilo tse batho ba di tlhokang.

Jesu gape o ne a re go ka lemogwa se motho a leng sone ka “maungo,” kana ditiro tsa gagwe. (Mathaio 7:16-20) Ka gone, re ka lebelela gore ditiro tsa botaki tsa Modimo di tla re lemotsha botho jwa gagwe. Dingwe tsa ‘dinonofo tsa gagwe tse di bonalang sentle go tloga kwa tlholegong ya lefatshe’ ke dife?—Baroma 1:20, NW.

Mopesalema o ne a khutsa jaana: “Jehofa ana ditiro tsa gago di methalethale jang! O di dirile ka botlhale tsotlhe fela.” (Pesalema 104:24) Re ka lemoga botlhale jwa Modimo tota le mo mebaleng e a e dirisitseng go “penta” dimela le diphologolo tsa lefatshe. “Mebala e dira gore mogopolo le matlho a motho di itumele thata,” go ne ga tlhalosa jalo Fabris le Germani mo bukeng ya bone ya Colore, Disegno ed estetica nell’arte grafica (Mmala—Tebego le Bontle mo Dilong Tse di Takilweng). Re bona mebala e e tsamaelanang le e e farologanang ka tsela e e kgatlhang matlho le mogopolo gongwe le gongwe. Lefa go ntse jalo, gongwe mebala e e kgatlhang go gaisa yotlhe—ke mebala e e phatshimang e e tshwanang le ya mola wa godimo—bosupi jwa gore e dirilwe ke mongwe yo o botlhale.

Mebala eo e e tshwanang le ya mola wa godimo re e bona thatathata mo mefuteng ya dinonyane tse di bidiwang di-hummingbird.a Ke eng se se dirang gore diphuka tsa tsone tsotlhe di phatsime thata jalo? Nngwe tharong ya diphuka tsa tsone tse di kwa godimo tse di sa tlwaelegang di fetola marang a letsatsi gore a lebege jaaka mebala e e farologaneng ya mola wa godimo—fela jaaka porisimi e dira. Maina a a tlwaelegileng a dinonyane tseno tsa di-hummingbird, a a jaaka ruby, sapphire le emerald, a tlhalosa sentle mebala e mehibidu, e mebodudu le e metala e e kgabisang dinonyane tseno tse di phatsimang thata. Sara Godwin o botsa jaana mo bukeng ya gagwe ya Hummingbirds: “Ke eng fa ditshedinyana tseno di kgabisitswe ka bontle jo bo kana kana?” O araba ka gore: “Go ya kafa saense e supang ka teng, ga go na lebaka lepe le lengwe fa e se fela gore di tle di kgatlhe motho yo o di lebileng.” Eleruri, ga go na motaki ope wa motho yo o ka kgonang go dira selo se sentle sa mebalabala e e ntseng jalo!

Re kgona go bona maatla a Modimo mo maphothophothong a magolo a metsi, makhubu a a bilogang le modumo o mogolo wa metsi a lewatle kana mo ditlhareng tse di goletseng kwa godimo thata tsa sekgwa tse di ntseng di ikobakoba ka ntlha ya phefo e e maatla thata. Bokgoni jo bo kalo jwa botaki bo kgatlha tota fela jaaka pono e e kgatlhang. Ratlhago yo o itsegeng thata wa Moamerika e bong John Muir o ne a tlhalosa kafa setsuatsue se kileng sa tsubutla ditlhare tsa Douglas fir kwa Sierra Nevada kwa California jaana:

“Le mororo di ne di santse di le dinnye thata, di ne di le boleele jwa dikgato di le 100 [dimetara tse 30] mme dikala le matlhare a tsone a e keteng diborashe di ne di obegela kwa le kwa. . . . Dikala tsa teng tse ditshesane tsa kwa godimo di ne di tsubutlelwa kwa pele le kwa morago di tla di obegela kwa thoko le kwa tlase.” Jaaka fa mopesalema a ile a kwala diketekete tsa dingwaga tse di fetileng, ‘phefo e e matsubutsubu e baka Jehofa’—e re bontsha kafa a nang le maatla a magolo ka teng.—Pesalema 148:7, 8.

Mo Bajapaneng, nonyane ga e bolo go nna sesupo sa lorato. Ke mogolodi wa Japane o o itseng go bina ka tsela e e kgatlhang fela jaaka tanse epe fela ya mmamodikwadikwane. Dinonyane tseno tse di binang bontle di tseelwa kwa godimo tota kwa Japane mo e bileng di dirilweng karolo ya “sefikantswe se se tlhomologileng sa tlhago.” E re ka mogolodi o kgona go tshela botshelo jotlhe le molekane wa one e bile o kgona go tshela dingwaga di le 50 kana go feta, Bajapane ba o tsaya e le one sekao se sentle sa boikanyego mo lenyalong.

Go tweng ka lorato lwa Modimo? Selo se se kgatlhang ke gore, Baebele e tshwantshanya tsela e Jehofa a sireletsang batho ba ba mo ikanyang ka yone le nonyane e e tleng e dirise diphuka tsa yone go sireletsa mamphorwana a yone mo dikotsing. Duteronome 32:11 e bua ka ntswi yo o “tleng a fudue setlhaga sa gagwe a bokabokele mo godimo ga mamphorwana a gagwe, ene a ba tsharololele diphuka tsa gagwe, a ba tsaya, a ba rwala mo diphukeng tsa gagwe.” Ntswi ono o mogolo o dira jalo gore mamphorwana a gagwe a tswe mo sentlhageng a fofe. Ga twe bontswi ba tle ba thuse mamphorwana a bone ka go ba tsenya mo diphukeng tsa bone le mororo seno se ka bonwa sewelo fela.—Pesalema 17:8.

Fa re ela tlhoko dilo tsa tlholego tse di re dikologileng, re lemoga melaometheo mengwe e e senolang botho jwa Modimo.

Go Farologana ga Dilo go Natetsha Botshelo

O kgona go lemoga sentle kafa Modimo a dirileng dilo di farologana ka teng mo dilong tse a di dirileng. Tsela e dimela, dinonyane, diphologolo le ditshenekegi di farologanang ka yone e gakgamatsa tota. Heketara e le nngwe fela ya sekgwa sa boboatsatsi e ka nna le mefuta e le 300 ya ditlhare le mefuta e le 41 000 ya ditshenekegi; disekwerekilometara di le tharo fela di ka nna legae la mefuta e le 1 500 ya dirurubele; mme setlhare se le sengwe fela se ka nna legae la mefuta e le 150 ya dikhukhwana! Fela jaaka go sena batho bape ba babedi ba ba tshwanang kgo, go ntse jalo le ka ditlhare tsa oak kgotsa dinkwe. Botswerere jwa go itlhamela dilo, e leng nonofo e bataki ba batho ba e tseelang kwa godimo, ke sengwe sa dilo tsa tlhago tse di kgatlhang tota.

Ke boammaaruri gore, re umakile dilo di sekae fela tsa botaki jwa tlhago. Fa re e sekaseka ka kelotlhoko thata, re tla lemoga dilo tse dingwe tse dintsi tse di supang botho jwa Modimo. Mme gore re kgone go dira jalo, re tshwanetse go dirisa nonofo e Modimo a re neileng yone ya go kgatlhegela dilo tse dintle. Re ka ithuta go itumelela dilo tse Motaki yo mogolo go gaisa botlhe a di takileng jang?

[Ntlha e e kwa tlase]

[Lebokoso mo go tsebe 23]

Re Tshwanetse go Itse Gore re Beilwe ke Mang Fano

Moranodi wa Baebele e bong Ronald Knox o kile a tlotla ka bodumedi le John Scott Haldane yo e leng rasaense. Haldane o ne a re, “A ga go bonale go utlwala go dumela gore, mo lobopong lo lo tletseng ka dimilionemilione tsa dipolanete, e ne e le tshwanelo gore go nne le botshelo bobotlana mo go nngwe ya tsone?”

Knox o ile a mo araba jaana: “Rrawee, fa Scotland Yard e ne e ka fitlhela setopo mo therankeng ya gago a o ne o ka ba raya wa re: ‘Go na le dimilionemilione tsa ditheranka mo lefatsheng—ka jalo, ke tshwanelo gore nngwe ya tsone e nne le setopo mo teng?’ Ke akanya gore ba ne ba tla batla go itse gore ke mang yo o se tsentseng mo teng.”—The Little, Brown Book of Anecdotes.

  Kwantle fela ga gore re batla go itse, go santse go na le lebaka le lengwe le le re dirang gore re batle go itse gore re beilwe ke mang mo—gore re Mo neye tlotlo e e mo tshwanetseng. Motaki yo o setswerere o ne a ka ikutlwa jang fa motho mongwe yo o tshwayang diphoso a ikgogomosa a re setshwantsho sa gagwe se a se takileng se ipone fela se le mo lebenkeleng la dilo tse di takilweng? Fela jalo, ke selo sefe se se botlhoko go gaisa go nyatsa Mmopi wa lobopo ka go bolela gore ditiro tsa gagwe tse dintlentle di itlhagetse fela?

[Motswedi wa Setshwantsho]

Courtesy of ROE/Anglo-Australian Observatory, photograph by David Malin

[Ditshwantsho mo go tsebe 24]

Megolodi e fofa

Ditshwantsho tse di takilweng mo magageng kwa Altamira kwa Spain

[Ditshwantsho mo go tsebe 25]

Ditolofine, di-hummingbird le maphotophoto a metsi, tsotlhe di senola botho jwa Motaki yo Mogolo

[Metswedi ya Ditshwantsho]

Godo-Foto

Godo-Foto

G. C. Kelley, Tucson, AZ