Gutenberg—Kafa A Humisitseng Lefatshe ka Teng!
KA MMEGADIKGANG WA TSOGANG! KWA JEREMANE
E ENG se se neng sa tlhamiwa mo dingwageng di le sekete tse di fetileng se se tlhotlheleditseng botshelo jwa gago fela thata? A ke thelefouno, thelebishene kana koloi? Gongwe ga se sepe sa dilo tseno. Go ya ka baitseanape ba le bantsi e ne e le go gatisa ka motšhini. Monna yo go bolelwang fa e le ene motlhami wa mokgwa ono wa ntlha o o molemo ke Johannes Gensfleisch zur Laden yo o itsegeng thata e le Johannes Gutenberg. O ne a tswa kwa lelapeng la maemo a a kwa godimo ka jalo ga a ka a tlhoka go ithuta tiro ya diatla jaaka go ne go tlwaelegile.
Bokgoni jwa ga Gutenberg jwa go tlhama dilo fa a sa ntse a le ngwana bo ne jwa tlhalosiwa e le “selo se segolo se Jeremane e se dirileng go tlisa tlhabololo.” Khopi nngwe le nngwe e e sa ntseng e le teng ya botswerere jwa gagwe jwa go gatisa—e e bidiwang Baebele ya ga Gutenberg ya mela e le 42—ke letlotlo eleruri.
Mainz e e Atlegileng
Gutenberg o tsholetswe kwa Mainz, mo e ka nnang ka ngwaga wa 1397. Mainz, e ka nako eo e neng e na le baagi ba le 6000, e mo losing lwa Noka ya Rhine. E ne e itsege e le Mainz e e Atlegileng, ka go bo e ne e le lefelo la konokono mo gare ga ditoropo tse dintsintsi tse di e potologileng. Babishopobagolo ba kwa Mainz e ne e le bone ba tlhophang maloko a Puso e e Boitshepo ya Roma. Mainz e ne e itsege thata ka badiri ba yone ba gauta. Johannes yo mmotlana o ne a ithuta go le gontsi ka go dira ka tshipi, go akaretsa le go seta ditlhaka mo tshiping. O ne a tshabela kwa Strasbourg ka dingwaga di le mmalwa ka ntlha ya dikgotlhang tsa dipolotiki, koo a neng a sega majana a a tlhokegang e bile a ruta le ba bangwe go dira jalo gone. Mme se a neng a tshwaregile thata ka sone e ne e le tiro ya gagwe e a neng a e direla mo sephiring ya go tlhama sengwe se sesha. Gutenberg o ne a leka go tokafatsa botswerere jwa go gatisa ka motšhini.
Bokgeleke Jwa ga Gutenberg le Madi a ga Fust
Gutenberg o ne a boela kwa Mainz mme a tswelela ka ditekeletso tsa gagwe. O ne a bona madi mo go Johann Fust yo o neng a mo adima di-gulden di le 1600—e leng madi a ka nako eo a neng a le mantsi thata ka gonne motho yo o setswerere mo go direng ka diatla o ne a amogela fela di-gulden di le 30 ka ngwaga. Fust e ne e le rrakgwebo yo o leferefere yo o neng a bona poelo mo tirong eno. Gutenberg o ne a akantse go dira eng?
Gutenberg o ne a lemogile gore go na le dilo dingwe tse di neng di dirwa ka bontsi, mme di tshwana. Ka sekai, madi le marumo a ne a dirwa ka tshipi. Ka jalo ke ka ntlha yang fa motho a sa gatise dipampiri di le makgolokgolo tse di tshwanang tse di kwadilweng mme a rulaganye ditsebe tsa tsone ka go latelana ga tsone gore o dire dibuka tse di tshwanang? Dibuka dife? O ne a akantse ka Baebele, buka e e neng e tura thata jaana mo e leng gore e ne e le batho ba ba rileng fela ba ba neng ba na le dikhopi tsa yone. Gutenberg o ne a ikaeletse go dira Dibaebele tse dintsi thata tse di tshwanang, le go di dira gore di bonwe ka tlhwatlhwa e e kwa tlase thata go feta dikhopi tse di kwadilweng ka letsogo, mme di sa le di ntse di na le bontle jwa tsone. O ne a tla kgona go dira seno jang?
Bontsi jwa dibuka di ne di kwalolotswe ka letsogo, e leng selo se se neng se tlhoka gore mokwalolodi a nne matsetseleko e bile se tlhoka le nako. Go ne go dirisiwa dibetlela tsa logong tse di setilweng ka letsogo go gatisa, sebetlela sengwe le sengwe se na le tsebe e e kwadilweng. E bile monna mongwe wa kwa China yo o bidiwang Pi Sheng o ne a ba a dira ditlhaka ka letsopa gore di dirisiwe go gatisa. Kwa Korea, go ne go dirisiwa ditlhaka tse di dirilweng ka kopore go gatisa dilo tsa puso. Mme go gatisa ka motšhini wa ditlhaka tsa metale tse di bewang ka letsogo—ditlhaka tse di itiretsweng ka letsogo mme di kgona go rulaganngwa sesha nako le nako fa go dirwa tsebe e ntšha—go ne go tlhoka ditlhaka tse dintsi thata mme go ne go se na motho yo o kileng a tlhama mokgwa wa go di dira. E ne e le tiro e e tlogeletsweng Gutenberg.
E re ka e ne e le mothudi wa tshipi yo o nang le maitemogelo, o ne a lemoga gore go gatisa go ka dirwa botoka thata ka ditlhaka tsa metale tse di bewang ka letsogo tse di dirilweng, e seng ka letsopa kana ka logong, mme ka tshipi. Di ne di betlwa mo foromong, e seng gore di gabiwe kana di besiwe mo pesetsong. Gutenberg o ne a tlhoka diforomo tseno tsa tshipi tse a neng a ka dira ditlhaka tsotlhe tse 26 ka tsone—ditlhaka tse dinnye le tse dikgolo—mmogo le ditlhaka tse di kopaneng, matshwao a puiso, matshwao le dinomoro. O ne a lemoga gore go tlhokega ditlhaka tsotlhe tse di farologaneng di le 290, tse nngwe le nngwe ya tsone e neng e tlhoka go dirwa gantsintsi fela.
O Simolola Tiro ya Gagwe
Gutenberg o ne a tlhopha go dirisa mokwalo wa Gothic ka Selatine mo bukeng ya gagwe, o o neng o dirisiwa ke baitlami fa ba kwalolola Baebele. O ne a dirisa maitemogelo a gagwe a go thula tshipi go gaba ditshwantsho tsa tlhaka nngwe le nngwe le letshwao mo sebetleleng sa tshipi, ka mantswe a mangwe a dira selo se se jaaka setempe mo godimo ga tshipi eno. (Setshwantsho 1) Jaanong setempe seno sa tshipi se ne sa dirisiwa go dira setshwantsho mo tshiping e nnye e e seng thata, e ka tswa e le kopore kana kgotlho. Seno se ne sa dira setshwantsho sa mmatota sa tlhaka e e phunyeleditsweng mo tshiping eno e e seng thata, e e bidiwang sebeelo (matrix).
Kgato e e latelang e ne e akaretsa go bopa ditlhaka tseno ka tshipi, e leng yone karolo e Gutenberg a neng a e itse sentle. Foromo eno e e bopang ditlhaka e ne e lekana le lebole la motho mme e ne e bulwa kwa godimo le kwa tlase. Sebeelo sa tlhaka se ne se bewa kafa tlase ga foromo eno mme go tshelwe tshipi e e gakolositsweng mo godimo. (Setshwantsho 2) Motswako ono wa tshipi—thini, lloto, antimony le bismuth—o ne o tsidifala ka bonako mme o nne thata.
Motswako ono wa tshipi o o tserweng mo foromong eno o ne o na le setshwantsho sa tlhaka mo letlhakoreng le lengwe mme o ne wa bidiwa tlhaka ya metale. Tiro eno e ne ya nna ya boelediwa jalo go fitlha go dirwa palo e e tlhokegang ya tlhaka eo. Go tswa foo sebeelo seno se ne se tlosiwa mo foromong mme go tsenngwa sebeelo sa tlhaka e e latelang. Ka jalo, palo epe fela ya dikarolwana tsa tlhaka nngwe le nngwe ya metale le letshwao lengwe le lengwe di ne di ka dirwa mo nakong e khutshwane fela. Ditlhaka tsotlhe tsa metale di ne di lekana ka bogolo, fela jaaka Gutenberg a ne a di batla.
Jaanong go ne go ka simololwa go gatisa. Gutenberg o ne a tlhopha temana ya Baebele e a neng a batla go e kopolola. A tshwere dithupa tse a neng a rulaganya ditlhaka ka tsone, o ne a dirisa ditlhaka tsa metale go dira mafoko le go rulaganya mafoko gore a dire mola wa temana. (Setshwantsho 3) Mola mongwe le mongwe o ne o rulaganngwa sentle, ke gore, o ne o dirwa gore ditlhaka tsa mola oo di lekane sentle. O ne a dira gore mela e nne dikholomo ka galley, tsebe nngwe le nngwe e na le dikholomo di le pedi. (Setshwantsho 4)
Tsebe eno e e nang le ditlhaka e ne e kgomarediwa mo karolong e e sephara ya bogatisetso mme e bo e tshasiwa ka enke e ntšho. (Setshwantsho 5) Bogatisetso jono—fela jaaka jo bo dirisiwang go dira beine—bo ne bo fetisetsa enke e e mo ditlhakeng tsa metale mo pampiring. E bo e le fa go tlhaga tsebe e e gatisitsweng. Go ne ga dirisiwa enke le pampiri tse dintsi mme tiro eno ya nna ya boaboelediwa jalo go fitlha go gatisitswe dikhopi tse di tlhokegang. E re ka ditlhaka tseno tsa metale e ne e le tse o kgonang go di sutisa, di ne di ka dirisiwa gape go dira tsebe e nngwe.
Botswerere jo Bogolo Jwa go Gatisa
Bodirelo jwa ga Gutenberg, jo a neng a thapile batho ba le 15 go ya go ba le 20 mo go jone, bo ne jwa fetsa go gatisa Baebele ya ntlha ka 1455. Go ne ga dirwa dikhopi di ka nna 180. Baebele nngwe le nngwe e ne e na le ditsebe di le 1282, mme tsebe nngwe le nngwe e na le mela e le 42 e e gatisitsweng mo dikholomong di le pedi. Go rokelelwa ga dibuka—Baebele nngwe le nngwe e ne e na le dibolumo di le pedi—le go taka ka letsogo ditlhogo le ditlhaka tsa ntlha tsa kgaolo nngwe le nngwe go ne go dirwa moragonyana ke ba bangwe, e seng mo bodirelong jwa ga Gutenberg.
A re ka akanya fela gore go ne go tlhokega ditlhaka di le kae tsa metale gore go gatisiwe Baebele? Tsebe nngwe le nngwe e ne e na le ditlhaka di ka nna 2600. Fa re tsaya gore Gutenberg o ne a na le metšhine e le merataro ya go gatisa, mme mongwe le mongwe wa yone o gatisa ditsebe di le tharo ka nako e le nngwe, e ne e tla tlhoka ditlhaka tseno di ka nna 46 000. Re kgona go bona gore foromo e e dirang ditlhaka ya ga Gutenberg e ne e tlhokega tota gore go gatisiwe ka ditlhaka tse di kgonang go sutisiwa.
Batho ba ne ba gakgametse tota fa ba bapisa Dibaebele tseno: Lefoko lengwe le lengwe le ne le le mo lefelong le le tshwanang. O ne o ka se ka wa dira selo seno ka dikwalo tse di kopolotsweng ka letsogo. Günther S. Wegener o ne a kwala gore Baebele ya mela e le 42 e ne e “tshwana kgo e bile e lekalekana, e dumalana e bile e le ntle tota, mo e leng gore bagatisi ka metlha ba ne ba sala ba gakgamaditswe ke botswerere jo bo kanakana.”
Mathata a Madi
Le fa go ntse jalo, Fust ene o ne a sa kgatlhegele go le kalo go dira tiro e ntle eno mme o ne a ipatlela madi fela. Poelo e a neng a e lebeletse e ne e tsaya lobaka lo loleele go feta kafa a neng a lebeletse ka teng. Badirimmogo bano ba ne ba kgaogana mme ka 1455—fela ka nako ya fa Dibaebele di ne di wediwa—Fust o ne a emisa go tlhola a mo adima madi. Gutenberg ga a ka a kgona go duela madi ao mme o ne a latlhegelwa mo kgetsing ya kgotlatshekelo e e neng ya latela morago ga moo. O ne a patelesega go neela Fust mo e ka nnang metšhine mengwe ya gagwe ya go gatisa le ditlhaka tsa metale tsa Baebele. Fust o ne a itshimololela bogatisetso jwa gagwe mmogo le modiri mongwe wa ga Gutenberg yo o neng a le bothakga e bong Peter Schöffer. Kgwebo ya bone, Fust and Schöffer, e ne ya nna le leina le le molemo le tota le simolotsweng ke Gutenberg mme ya nna bogatisetso jwa ntlha jo bo dirang madi a mantsi mo lefatsheng.
Gutenberg o ne a leka go tswelela ka tiro ya gagwe ka go dira bogatisetso jo bongwe gape. Bakanoki bangwe ba bolela gore ke ene yo o neng a gatisa dilo dingwe tsa bogologolo tse e ka nnang tsa lekgolo la bo15 la dingwaga. Mme gone ga go na epe ya tsone e e tshwanang le Baebele ya mela e le 42 ka bontle le bokgeleke. Ka 1462 o ne a welwa ke bomadimabe gape. Ka gonne ditlhopha tsa baruti ba Katoliki di ne di lwela go busa, Mainz e ne ya jewa ka molelo le go gapiwa. Gutenberg o ne a latlhegelwa ke bodirelo jwa gagwe ka lekgetlo la bobedi. O ne a swa dingwaga di le thataro morago ga moo, ka February 1468.
Boswa Jwa ga Gutenberg
Selo se Gutenberg a neng a se tlhamile se ne sa anama ka bonako. Ka ngwaga wa 1500 go ne go setse go na le metšhini e e gatisang kwa ditoropong di le 60 tsa kwa Jeremane le tse dingwe di le 12 kwa dinageng tse dingwe tsa Yuropa. The New Encyclopædia Britannica e bolela jaana: “Go tlhamiwa ga motšhini o o gatisang go ne ga dira gore go nne le phetogo e kgolo mo go tsa tlhaeletsano. Go ne ga tokafadiwa dilo di le dintsi thata mo mokgweng wa go gatisa mo dingwageng di le 500 tse di neng tsa latela, mme motheo e ne e ntse e le one wa ntlha.”
Go gatisa go ne ga fetola botshelo jwa batho ba kwa Yuropa ka gonne jaanong kitso e ne e sa tlhole e le ya batho ba ba lesego fela. Dikgang le tshedimosetso di ne tsa simolola go fitlha kwa bathong, mme ba simolola go lemoga dilo tse di diragalang go ba dikologa. Go gatisa go ne ga dira gore go tlhokege gore nngwe le nngwe ya dipuo tsa batho di nne le mokgwa o o rileng wa go kwalwa o mongwe le mongwe a neng a ka o tlhaloganya. Ka gone dipuo tsa Seesemane, Sefora le Sejeremane di ne tsa nna le mokgwa wa tsone wa go kwalwa mme wa bolokwa o ntse jalo. Batho ba le bantsi thata ba ne ba simolola go batla tshedimosetso e e balwang. Pele ga Gutenberg go ne go na le mekwalo ya seatla e le dikete di le mmalwa fela kwa Yuropa; dingwaga di le 50 morago ga loso lwa gagwe go ne go na le dibuka di le dimilione.
Phetogo e Kgolo e e diragetseng mo lekgolong la bo16 la dingwaga e ka bo e sa diragala fa go ne go se na metšhini e e gatisang. Baebele e ne ya ranolelwa kwa dipuong tsa Se-Czech, Se-Dutch, Seesemane, Sefora, Sejeremane, Sentadiana, Se-Poland le Se-Slavonia mme metšhini e e gatisang e ne ya tlhofofatsa tiro ya go gatisa dikhopi tseno di le dikete di le masome. Martin Luther o ne a dirisa metšhini ya go gatisa go anamisa molaetsa wa gagwe. O ne a atlega mo maitlhomong a gagwe fa batho ba bangwe, ba ba tshedileng pele ga motšhini wa go gatisa wa ga Gutenberg, bone ba reteletswe. Ke ka ntlha ya moo Luther a neng a tlhalosa motšhini wa go gatisa a re ke tsela ya Modimo “ya go anamisa bodumedi jwa boammaaruri mo lefatsheng lotlhe”!
Dikhopi Tse di sa Ntseng di le Teng Tsa Baebele ya ga Gutenberg
Ke Dibaebele di le kae tsa ga Gutenberg tse di sa ntseng di le teng? Go tla go fitlha bosheng fela jaana go ne go dumelwa gore di 48—dingwe tsa tsone di sa felela—tse di gasameng kwa Yuropa le kwa Amerika Bokone. Nngwe ya dikhopi tseno e e kgatlhang thata ke Baebele e e dirilweng ka letlalo e e leng kwa Library of Congress kwa Washington, D.C. Mme gape, ka 1996, go ne ga ribololwa selo sengwe se sentle thata: Go ne ga fitlhelwa karolo e nngwe ya Baebele ya ga Gutenberg mo lefelong le go bewang makwalo mo go lone mo kerekeng nngwe kwa Rendsburg kwa Jeremane.—Bona Tsogang! (ya Seesemane) ya January 22, 1998, tsebe 29.
A bo re leboga jang ne go bo jaanong Baebele e bonwa ke mongwe le mongwe! Gone mme ga go reye gore jaanong re ka ya go reka buka ya ga Gutenberg ya mela e le 42! E le nngwe ya yone e ka ja bokae? Gutenberg Museum kwa Mainz o ne wa reka khopi e le nngwe ka 1978 ka di-deutsche mark di le dimilione di le 3,7 (gompieno e ka nna diranta di le dimilione di le 12). Jaanong Baebele eno e setse e tura go feta moo.
Ke eng se se dirang gore Baebele ya ga Gutenberg e nne e e tlhomologileng jaana? Porofesa Helmut Presser, yo o kileng a nna motsamaisi wa Gutenberg Museum, o bolela gore go ka tswa go na le mabaka a le mararo. La ntlha, Baebele ya ga Gutenberg e ne e le buka ya ntlha go gatisiwa ya ditlhaka tse di kgonang go sutisiwa kwa Bophirima. La bobedi, e ne ya nna Baebele ya ntlha go gatisiwa. La boraro, e ntle thata. Porofesa Presser o kwadile gore mo Baebeleng ya ga Gutenberg, re bona “bontlentle jwa mokwalo wa Gothic.”
Batho ba ditso tsotlhe ba tshwanetse go leboga bokgeleke jwa ga Gutenberg. O ne a dirisa foromo e e bopang ditlhaka, motswako wa tshipi e e gakolotsweng, enke le motšhini. O ne a dira gore go gatisiwe ka motšhini mme a humisa lefatshe.
[Ditshwantsho mo go tsebe 28]
1. Setempe sa tshipi se ne sa dirisiwa go dira setshwantsho sa tlhaka mo sebeelong sa kopore
2. Motswako wa tshipi e e gakolositsweng o ne wa tshelwa mo godimo ga foromo e e bopang ditlhaka. Fa motswako ono wa tshipi o setse o le thata, tlhaka ya metale e e ntshiwang moo e na le setshwantsho sa tlhaka e e batlegang
3. Tlhaka ya metale e ne e bewa mo thupeng e e di rulaganyang go dira mafoko, e dira mola wa temana
4. Mela eno e ne e dirwa gore e nne dikholomo ka “galley”
5. Tsebe e e nang le mafoko a a kwadilweng e ne e bewa mo karolong e e sephara ya bogatisetso
6. Poleite ya kopore e e gabilweng ya ga Gutenberg, ya 1584
7. Gompieno, khopi e le nngwe ya Baebele ya ga Gutenberg e ja diranta di le dimilione
[Motswedi wa Setshwantsho]
Pictures 1-4, 6, and 7: Gutenberg-Museum Mainz; picture 5: Courtesy American Bible Society
[Motswedi wa Setshwantsho mo go tsebe 28]
Background: By Permission of the British Library/Gutenberg Bible