Go Batlisisa ka Bontle Jo bo Sa Bolong go Nna Teng Jwa Logong

Ka mmegadikgang wa Tsogang! kwa New Zealand

LOGONG, segolobogolo mefuta e e farologaneng ya mo lefelong leno, ka bonako lo simolola go bonwa sewelo. Dikgwa di nyelediwa ka bonako jo bo boifisang kwa mafelong a le mantsi mo lefatsheng. Go tlhaela ga logong go dira gore tlhwatlhwa ya lone e nne kwa godimo thata, e le sengwe sa dilo tse di dirisiwang thata mo lefatsheng le tse pele di neng di bonwa ka bontsi thata.

Go a gakgamatsa gore mo New Zealand go na le ditlhare tse di ntseng di oketsega tsa radiata pine, tse di neng tsa jalwa la ntlha mono ka bo1930, le fa go ntse jalo ditlhare di le dintsi tse di tlholegileng mo nageng eno, tse di jaaka rimu, kauri, monyena le kahikatea, di ntse di fokotsega.

Logong lo lo Thata Lo lo Sa Bolong go Nna lo Kgatlha ka Lobaka lo Loleele

Ka diketekete tsa dingwaga, motho o ntse a ipelela go seta logong go dira didirisiwa ka mefutafuta ya tsone. Gantsi batho ba ile ba kgatlhiwa thata ke mmala wa mefuta e mentsi ya logong, dikarolo tsa lone tse di lo tlhaolang mo go a mangwe le e leng monko wa lone. Ba ile ba kgotsofadiwa ke didirisiwa tse di farologaneng tse di dirilweng ka lone ka dingwaga di le dintsi mme mo mabakeng a mangwe ka makgolo a le mantsi a dingwaga.

Fa e sa le go tloga bogologolo, go ntse go dirisiwa fanitšhara e e dirilweng ka logong lo lo thata kwa magaeng. Banna le basadi ba ile ba bontsha talenta le bokgoni tse ba nang le tsone mo go direng dilo tse di tlhokegang tse di jaaka ditafole, megopo, dibanka, difaki, mabokose le ditulo.

Boranyane jwa saense jwa segompieno bo dirile gore gompieno dilo tseno di dirwe ka bonako. Didirisiwa tsa motlakase tse di jaaka disaga, diboro, dilo tse di setang le tse di gotlhang logong, le fa gone di le leratla, di ka kgona go seta logong lo lo sa dirwang sepe tsa lo dira fanitšhara e e thata e e dirilweng ka logong. Dinaga di le dintsi di kgona go ikgantsha ka gore di na le madirelo a a kgonang go dira fanitšhara ka tlhwatlhwa e e kwa tlase.

Mme gantsi fanitšhara eo ga e thata ka gonne go ka tswa go dirisiwa (1) dilo tse e seng logong lwa mmatota (logong lwa boleng jo bo kwa tlase thata, lomatsana fela lo lo dirilweng ka pampiri) mo boemong jwa logong lo lo thata kana (2) fa di lomaganngwa, go dirisiwa mokgwa o o bonako thata wa go di kopanya, go dirisiwa metšhini e e dirisang diseteipolara kana ditshwarisi kana dipekere.

Go Boela Kwa Petlong

E le go leka go rarabolola se go bonalang e kete ke mathata mo dilong tsa boranyane jwa saense jwa segompieno, bangwe ba batla go boela kwa go diriseng gape sedirisiwa sa bogologolo sa go gaba logong—petlo. E tlhalosiwa e le “sedirisiwa se se segang se se nang le legare le le obegileng le le mo ntlheng ya matshwaro mme e dirisiwa segolobogolo go seta logong.” Kwa New Zealand, Ba-Maori ba ne ba dirisa petlo e e dirilweng ka leje go betla mekoro le go seta dikota tse di tlhokang go gabiwa. Le fa go ntse jalo, gompieno bontsi jwa dipetlo ke tsa tshipi.

Mo makgolong a a fetileng a dingwaga, babetli ba logong ba ne ba dirisa petlo go seta le go lekalekanya letlhomeso fa go agiwa ntlo le fa go dirwa sekepe. Ba seta dipolanka ba di tshwere mo gare ga maoto, ba dirisa legare le le obegileng la petlo go dira dikhuti mo godimo ga logong.

Molekane wa Yone—Thipa e e Tshwarwang mo Ntlheng Tsoopedi

Sedirisiwa se sengwe se se botlhokwa thata se se thusang go dira gore selo seno se se dirwang se nne sentle le go feta, e bile se dira jaaka molekane wa petlo, ke thipa e e tshwarwang mo ntlheng tsoopedi. Thipa eno e dirisiwa go sega metsu kana karolo e e kafa thoko ya logong. Petlo le thipa e e tshwarwang mo ntlheng tsoopedi di tshwanetse tsa nna di le bogale tsoopedi.

Fa o setse o na le didirisiwa tseno, dikgato tse di latelang ke go senka logong lo lo iseng lo dirisiwe mme, go tswa foo, o lo dire fanitšhara nngwe le nngwe fela e o batlang go e dira ka lone. Ke gone fano, go ya ka babetli ba logong, mokgwa ono wa bogologolo, o o sa raraanang wa go dira fanitšhara o nang le melemo e mentsi thata go feta mekgwa e e tlwaelegileng ya go dira fanitšhara.

Dipolanka tse di magwata, fa di omile mme di sa rojwa kgotsa di sa ojwa, go ka dirwa fanitšhara e e thata le e ntle ka tsone. Dipolanka tseno di ka bonwa go tswa mo dilong tse di farologaneng: mo difanitšhareng tse di latlhilweng (dioteropo, ditlhogo tsa malao, ditafole), mabokose a bogologolo a a dirilweng ka dipolanka a go pakelwang dilo mo go one, dipolanka tse di tswang mo dikagong tse di rutlolotsweng le dikota tsa bogologolo tsa legora.

Logong lo lo Dirisiwang Gape —Lo Dirisiwa ka Mokgwa o o Farologaneng

Logong lwa bogologolo lo lo iseng lo jewe ke diboko kana lo lo iseng lo bole, fa lo tshwerwe ke motho yo o setswerere lo ka boa lwa dirwa go nna selo se se kgatlhang le se sentlentle.

Dipadi, dikhuti tsa dipekere le go khobetsega di ka dira gore logong lo lo dirisiwang gape go dira fanitšhara lo nne le dikarolo dingwe tse di sa tlwaelegang. Fa e tlogetswe e ntse fela jaaka e ntse kana e pentilwe le go tshasiwa, fanitšhara e o itiretseng yone e tla go kgotsofatsa le go go itumedisa e le selo se se dirilweng ka botswerere le se se tla nnang lobaka lo loleele.

Fela jaaka molemi yo o lemang mmu, mmopi yo o dubang seretse le mologi yo o logang tlhale, mmetli wa logong yo o setang le go kgabisa logong a dirisa petlo kana thipa e e tshwarwang mo ntlheng tsoopedi o go fitlhela go duela fela thata. Ee, ke tiro e e bokete. Ee, e tlile go tsaya lobaka lo loleele go feta mekgwa e e dirisiwang gompieno. Le fa go ntse jalo, go lemoga gore tiro eno e o e dirileng ka natla e tla go kgotsofatsa le gore fanitšhara e o e dirileng ka botswerere e tla solegela motho yo o tla e dirisang molemo ka dingwaga di le dintsi go dira gore o nne le boitumelo jo bo sa bolong go nna bo ntse bo le teng jwa go dira ka logong.

Dintlha Malebana le Kafa go ka Berekwang ka Lone ka Teng

Petlo ga e dirisiwe mo logong longwe le longwe. Difaeba tse di bonwang mo dikgonnyeng tse di thata tsa kwa boboatsatsi gantsi legare la petlo ga le kgone go di sega. Ka kakaretso, logong lo lo bonolo, lo lo sitsweng sentle lo tla setega botoka ka petlo. Matlhokotlo ga a tshwanela go nna bothata. Fa o dirisa segaba (petlwana e e obegileng), o ka kgona go a ntsha, ka go dira jalo o dira sengwe se se kgethegileng mo logong le o dirang ka lone.

Mengwe ya mebala e mentle thata e bonwa gantsi mo dipolankeng tse di shagilweng go tswa mo botennyeng jwa setlhare. Fanitšhara e e dirilweng go tswa mo karolong eno ga se gantsi e tlhokang go pentiwa. Le fa go ntse jalo, fa e le gore gongwe o batla gore mmala le dikarolo tse dingwe tse di tlhaolang logong lono lo lo se nang mokgabiso ope di bonale sentle, go na le mefuta e e farologaneng ya dipente e o ka tlhophang mo go yone.

Le one mokgwa ono ga o tlhoke go ja madi a mantsi. Bangwe ba ne ba tshasa kirisi ya dikoloi mo logong lo lo nang le mmala o o galalelang kana lo lo setlhafetseng mme ba fitlhetse gore e dira gore selo seno se ba se betlileng ka botswerere jaana se nne sentle thata.

Fa o batla go kgabisa fanitšhara ya gago sentle, go na le mefuta e e farologaneng ya di-polyurethane kana di-lacquer tse o ka di dirisang go gasagasa kana go tshasa fanitšhara. Fa o batla go tshasa logong lono ka tsela e e tla lo otlang go na le gore e le kane, o ka lo tshasa oli e e politšhang e e dirilweng ka dilo tse di latelang: dikarolo di le tlhano tsa aseine, dikarolo di le nnè tsa teramotene, dikarolo di le pedi tsa oli ya linseed e e sa tswakwang le sepe le karolo e le nngwe ya methylated spirits. Tlhaolosetsa boka mo motswakong ono wa gago mme o o tlogele gore o tsenelele mo logong ka malatsi a le mmalwa.

Tiro ya Diatla e e Kgotsofatsang

Fanitšhara ya logong lo lo thata e e dirilweng ke diatla tsa gago ka botswerere e tla nna e ntse e le ntle ka metlha fa e ntse e le mo lefelong le o le ratang la ntlo ya gago, le fa e ka tswa e le ya maemo a a kwa tlase go le kana kang. Mo lefatsheng lotlhe, kwa dikagong tse dikgolo le tse di nnye, o ka fitlhela dikao di le dintsi tse di kgatlhang, tsa difanitšhara tse di dirilweng ka diatla, ka dinako dingwe e le tsa makgolokgolo a a fetileng a dingwaga. Tseno eleruri ke bosupi jwa botswerere, bokgoni le bopelotelele jwa batho ba ba di dirileng. Ba ne ba kgotsofadiwa le go itumelela go dira dilo tse di ileng tsa tlhokomelwa sentle tse di nang le boleng jo bogolo e bile di le dintle thata. Dilo tseno di kgabisa lefelo le di leng mo go lone.

Mo motlheng ono o go tletseng thata dilo tse di dirilweng ka polasetiki le monokane mo go one, mpho e Mmopi wa rona a re fileng yone ya setlhare e sa ntse e dirisediwa dilo di le dintsi tse di molemo. Nngwe ya dimpho tseno ke go re neela logong lo lo thata lo lo dirang gore mmetli yo o tlhoafetseng a lo fetole go le dira fanitšhara e ntle e e dirilweng ka logong.

[Ditshwantsho mo go tsebe 23]

“Rimu”

“Tawa”

Eikere

“Radiata pine” e e legotlhoko

Phaene e e pentilweng ka pente ya logong

Phaene e e tshasitsweng kirisi

Phaene e e pentilweng ka pente ya mmala o o sa galaleleng

[Ditshwantsho mo go tsebe 24]

Go dirisa petlo

le thipa e e tshwarwang ntlheng tsoopedi

[Setshwantsho mo go tsebe 25]

Raka e e dirilweng ka diatla

[Setshwantsho mo go tsebe 25]

Raka ya mo sekhutlong