Jesu Keresete E ne E le Mang?

Mo nakong eno ya ngwaga mo dinageng di le dintsi lefatshe ka bophara, go ketekwa Keresemose. Makgolo a a dimilione a batho ba dumela gore Jesu Keresete o ne a tsholwa ka December 25, dingwaga di ka nna 2000 tse di fetileng. Mo ditshwantshong tse di takilweng le mo ditshwantshong tse di betlilweng, o tshwantshitswe ka ditsela tse di farologaneng e le ngwana a beilwe mo bojelong jwa diphologolo. Mme gone, o ne a gola a nna monna mme a tshela mo lefatsheng ka dingwaga di le 33 1/2.

A O KILE wa ipotsa gore Jesu o ne a lebega jang fa a setse a godile? O ne a na le lobala lo lo ntseng jang? A o ne a le dinama e bile a bogega, kana a o ne a bonala a le sekoa e bile a lebega a lwala, jaaka bataki ba ba farologaneng ba ne ba mmontsha mo makgolokgolong a dingwaga? A o ne a se na ditedu kana o ne a na le tsone? A o ne a na le moriri o motelele?

Gape, a Jesu o ne a na le sengwe se se neng se mmontsha gore o boitshepo, jaaka bataki bangwe ba ile ba bontsha kgalalelonyana e e dirang lebante mo tlhogong ya gagwe? Kana o ne a farologane le seo—gore o ne a se na ditebego tseo tse di tlhomologileng le gore o ne a sa tlhomologa ka sepe fa a ne a le mo gare ga boidiidi jwa batho?

Bakwalahisitori ba lefatshe le bataki go ralala dingwaga ba ile ba nna le dikgopolo tse di sa tshwaneng malebana le tsela e Jesu a neng a lebega ka yone. Mo godimo ga moo, go na le tshedimosetso e e ka ikanngwang ya dipego tsa batho ba ba boneng ka matlho tse di buang ka ene, e e neng ya kwalwa ke bakwadi ba Baebele ba ba neng ba tshela mo lekgolong la ntlha la dingwaga le ba ba neng ba nna le ene.

Le fa go ntse jalo, dipotso tse di botlhokwa thata go feta gore o ne a lebega jang ke tseno: Tota Jesu Keresete e ne e le mang? O na le seabe sefe mo boikaelelong jwa Modimo? A o diragaditse seabe seo? Gompieno o dira eng, le gone o kae? A o na le boemo jo bo botlhokwa thata jaana mo e leng gore bo ama batho botlhe, tota le ba bantsi ba ba suleng?

Sa ntlha, a re tlhatlhobeng bosupi jo bo malebana le tsela e Jesu a lebegang ka yone. O ne a ntse jang?