Kgopolo E e Mo Baebeleng

A Lefatshe la Rona le Tla Senngwa ke Masetlapelo a Lobopo?

KA March 12, 1998, ditlhogo tsa dikgang, dithelebishene le diaterese tsa Internet mo lefatsheng lotlhe di ne tsa anamisa dikgang tseno tse di sa jeseng diwelang: “Naledi ya asteroid e e bogolo jwa dikilometara di le 1,5 e mo tseleng ya go batla go thulana le Lefatshe.” Baitsesaense le batho fela ba tshwara ba tlogela, ba leka go bona kotsi e seno se ka e bakang. Go ise go ye kae baithutadinaledi ba ne ba bolela gore seno se ne se ka se direge.

Le fa go ntse jalo, mo gare ga tlhakatlhakano eno go lemogilwe sengwe se sesha. U.S.News & World Report e boletse jaana: “Selo se se gakgamatsang thata ka mokgosi ono o o neng o tshosa fela, e ka nna gore, le fa gone o ne o tshosa thata, batho ba bantsi ga ba ka ba o gakgamalela thata. Kgopolo ya gore rona mo Lefatsheng re tshwanetse go nna re lebeletse dilo tse di ntseng jaana—re bo re rulaganyetse go dira sengwe ka tsone—e ne e tla utlwala e le e e sa tlwaelegang dingwaga di le lesome kana go feta tse di fetileng, mme gone jaanong baitsesaense le e leng boradipolotiki ba bangwe ba akanya gore matshosetsi ano, le fa gone a le mannye, ke a dilo tse ruri di ka diregang.”

Baithutadinaledi bangwe ba dumela gore mo e ka nnang dipopo tsa magodimo di le 2000 tse dikgolo thata mo di ka bakang matlhotlhapelo mo lefatsheng lotlhe di taboga mo ditselaneng tse di kgabaganyang mola o lefatshe le dikologang mo go one kana di tsamaya gaufi thata le one. Babatlisisi ba bolela gore le e leng le fa e nnye thata ya tsone e ka itaya lefatshe, go thunya ga teng go ka lekana le ga dibetsa tse dintsi tsa nuklea fa di thunya ka nako e le nngwe fela. Go thulana gono go ne go tla baka matlhotlhapelo mo polaneteng ya rona le banni ba yone, batho le diphologolo ka go tshwana.

Kgopolo e gantsi e itlhokomolosiwang fa go bolelelwa pele e bile go batlisisiwa ka dilo tseno tse di kgobang marapo, ke ya Mmopi wa lobopo e bong Jehofa Modimo. (Pesalema 8:3; Diane 8:27) Mo Baebeleng o re itsisitse go rata ga gagwe le maikaelelo a gagwe ka lefatshe le ka batho ka tsela e e utlwalang sentle. A o tla letlelela gore lefatshe la rona le senngwe ka masetlapelo a lobopo?

Lobopo lo lo Laolwang ke Modimo

E re ka Jehofa e le Mmopi mothatayotlhe wa lobopo, go a utlwala go konela ka gore o kgona go laola maatla otlhe a a tsamaisang dipopo tsa magodimo ka botlalo. Kgosi Solomone yo o botlhale o ne a bolela gore Jehofa o ‘tlhomamisitse magodimo ka tlhaloganyo.’ (Diane 3:19) Moporofeti Jeremia o ne a bolela gore Modimo “o tsharolotse magodimo ka tlhaloganyo ya gagwe.”—Jeremia 51:15, NW.

Jehofa o tlhomile melao le maatla a a laolang tsela e dipopo tsa magodimo di tsamayang ka yone, go akaretsa dinaledi, dipolanete, dinaledi tsa motshotshonono le tsa asteroid. (Isaia 40:26) Le fa go ntse jalo, go bonala e kete o letlelela gore dinaledi le dipolanete di tsamaye modikologo wa tsone wa tlholego wa go tsalwa ka tsela ya tshwantshetso, go tshela le go swa, a sa nne a tsenatsenana le tsone. Seno se akaretsa le go thulana mo go tshosang ga dipopo tse dingwe tsa magodimo. Sekai sengwe sa bosheng jaana ke go thulana go go diragetseng ka July 1994 fa dikarolwana tsa naledi ya motshotshonono ya Shoemaker-Levy 9 di ne tsa itaanyegela mo polaneteng ya Jupiter.

Go na le bosupi jwa jeoloji jo bo bontshang matlapa a magolo a a tswang kwa lefaufaung a a neng a wela mo lefatsheng mo nakong ya pele ga motho a nna teng. Mme a tiragalo e e ntseng jalo e tla tsamaya e diragala mo polaneteng ya rona e e agilweng? Ka sekai, go ka diragalang fa naledi ya asteroid ya bogolo jwa dikilometara di le 1,5 e ka thulana le lefatshe? Moithutadinaledi e bong Jack Hills o bolelela pele gore thulano eno e ne e ka nna le maatla a a fetang bomo e e neng ya lalaanya Hiroshima ka makgetlo a le dimilionemilione. Fa e ne e ka wela mo lewatleng, makhubu a metsi a ne a ka rwalelela mafelo a a mo losing lwa lewatle. Hills o bolela jaana: “Mo ditoropokgolo di leng teng, e ka nna mokoa wa seretse fela.” Tiragalo e e maswe go di feta tsotlhe e e boleletsweng pele ke ya gore e ne e ka nyeletsa batho gotlhelele. Ponelopele eno ya letsatsi la tshenyego e dumalana jang le thato ya Mmopi wa rona ka lefatshe? Baebele e bontsha gore Jehofa o na le maikaelelo a a kgethegileng ka polanete eno.

Lefatshe la Rona—Le Dirilwe ka Maikaelelo

Mopesalema o boletse seno malebana le polanete ya rona: “Magodimo ke magodimo a ga Jehofa; mme lefatshe o le neile bana ba batho.” (Pesalema 115:16) Isaia o tlhalosa Jehofa gore ke “o o bopileng lefatshe . . . , o ne wa le tlhomamisa, o ne o se ka wa le tlholela lefela, wa le bopela go ungwa.” (Isaia 45:18) Lefatshe ke boswa jo Jehofa a bo neileng batho. Mme e re ka Mmopi wa rona a batlela batho ba ba boifang Modimo isagwe e e sa khutleng, lefatshe le tla nna e le legae la batho ka bosakhutleng. Pesalema 104:5 e re solofetsa jaana: “[Jehofa] yo o beileng metheo ya lefatshe, gore le tle le se ka la tshikinngwa ka bosakhutleng.”

Ke boammaaruri gore Modimo o ne wa letlelela masetlapelo a magolo mo polaneteng ya rona, mo go neng ga felela ka gore go swe batho ba bantsintsi fela. Mangwe a masetlapelo ano—a a jaaka dintwa, mauba le malwetse—otlhe kana mangwe a one a ne a bakiwa ke bopelotshetlha, boeleele le bosetlhogo jwa batho. (Moreri 8:9) A mangwe one—a a jaaka dithoromo tsa lefatshe, go phatloga ga makgwamolelo, merwalela le diphefo tsa matsubutsubu—a ne a bakiwa ke dilo tsa tlholego tse motho le ene a sa di tlhaloganyeng sentle. Go farologana le maikaelelo a Modimo a kwa tshimologong, batho ga ba tlhole ba itekanetse; ba na le boleo. Ka ntlha ya seno, rona ka bongwe, gone jaanong ga re ka ke ra lebelela gore Modimo a re sireletse mo masetlapelong a go tweng ke a tlholego.

Le fa go ntse jalo, Jehofa ga a ise a ke a letlelele gore go nna teng ga motho mo lefatsheng go nne mo kotsing ka tsela e e masisi. Fa e sa le motho a bopiwa, hisitori ga e na tiragalo epe fela ya masetlapelo a tlholego a a kileng a tshosetsa go nna teng ga batho botlhe.a

Go Falola ga Motho go Tlhomamisitswe

Go tloga kwa tshimologong ya hisitori ya motho, Mmopi wa rona o ne a ikaeletse gore motho a ‘tlale ka lefatshe, a le fenye.’ (Genesise 1:28; 9:1) O solofeditse gore “basiami ba tlaa rua lefatshe, ba tlaa aga mo go lone ka bosakhutleng.” (Pesalema 37:9, 11, 22, 29) Jehofa o tlhomamisa jaana malebana le ditsholofetso tsa gagwe: “Kgakololo ya me e tlaa ema, ke tlaa dira go kgatlhega ga me gotlhe fela.”—Isaia 46:10; 55:11; Pesalema 135:6.

Baebele ga e gane gotlhelele gore go ka kgonega gore lefatshe le welwe ke masetlapelo mangwe a mannye a a bakiwang ke tiragalo nngwe mo lobopong. Le fa go ntse jalo, re ka tlhomamisega gore Jehofa ga a kitla a letlelela gore kotsi ya masetlapelo e fedise maikaelelo a gagwe ao a a boletseng ka lefatshe le batho. Go ya ka se Baebele e se solofetsang, re ka tlhomamisega gore polanete ya rona e tla nna le batho ba ba nnang mo go yone ka bosakhutleng—ee, e tla nna legae la motho ka bosaengkae!—Moreri 1:4; 2 Petere 3:13.

[Ntlha e e kwa tlase]