Morati wa Letsatsi—Sireletsa Letlalo la Gago!
KA MMEGADIKGANG WA TSOGANG! KWA BRAZIL
A O RATA go ya kwa lotshitshing lwa lewatle fa o le mo malatsing a boikhutso? Go tweng ka go itlhabisa phefo kwa dithabeng? He o mongwe wa dimilionemilione tsa batho tse di itumelelang dilo tse di sa direlweng mo gae. Le fa go ntse jalo, tlhagiso ke eno: Gantsi seno se raya gore motho a nne nako e ntsi a le mo letsatsing. A mme go kotsi? Fa go le jalo, o ka itshireletsa jang?
Dr. W. Mitchell Sams, Jr., o ne a kwala jaana: “Letlalo la gago ke sengwe sa dirwe tse dikgolo thata le tse di bonalang thata mo mmeleng wa gago.” Letlalo le thusa go sireletsa mmele wa gago gore o se ka wa felelwa ke metsi e bile le a go thutafatsa. Le go thusa go lemoga gore go serame, go mogote, go botlhoko le gore sengwe se a roroma, mmogo le go go thusa go lemoga dilo tse di magwata le tse di borethe. Gape letlalo la gago le thusa thata mo go dirweng ga bithamine ya D, e e thusang go nonotsha marapo. Letsatsi ke lone le le thusang gore bithamine ya D e dirwe.
Le fa go ntse jalo, go na le kotsi e kgolo fa o ka lebagana le marang a letsatsi ka nako e telele. Marang a letsatsi a a fitlhang mo lefatsheng a akaretsa marang a a mmala o mohibidu le a lesedi le le bonalang, mmogo le marang a ultraviolet a A le B (UVA le UVB). Ka lesego, atemosefere e monya marang a cosmic, marang a gamma le a di-X ray a a tswang mo letsatsing. Boalo jwa atemosefere jwa ozone bo thibela marang a ultraviolet C (UVC) ka botlalo bo bo bo dira gore bontsi jwa marang a UVA le UVB bo aname. Ka maswabi, boalo jono jwa ozone bo a senyega. Borasaense ba le bantsi ba bona bothata jono bo bakiwa ke dilo dingwe tse di fokotsang mogote le digase tsa dikhemikale. Legale, go nna mo letsatsing nako e telele go setse go le kotsi thata mo botsogong jwa gago.
Mo godimo ga gore marang a ultraviolet a ka go fisa, gape a ka dira marontho a a borokwa mo letlalong la gago le gore le nne thata le go omelela. Gape marang a ultraviolet a ka koafatsa dintlhana tsa gago tsa letlalo, mme seo se dire gore o tsofale ka bonako, le go nna le matsutsuba a a boitshegang. Se se maswe le go feta, go lebagana le marang a ultraviolet ka nako e telele go ka kgoreletsa tsela e mmele wa gago o lwantshang malwetse ka yone mme seno se ka ntsha dintho mo letlalong le gore o tshwarwe ke kankere ya letlalo. Mo godimo ga moo, go senyega letlalo kana go lwala bolwetse jwa letlalo go senya tebego ya gago mme, mo mabakeng a mangwe, go ka dira gore o se ka wa itshepa le e leng go tshwenyega thata mo maikutlong.
Ke Eng Se o Ka se Dirang?
Letlalo la gago le tlhoka gore o le sireletse mo letsatsing ka dinako tsotlhe fela jaaka go tlhokega gore o le sireletse le fa o le mo go lone ka nako e khutshwane. Ke eng se o ka se dirang? Mo godimo ga go apara diaparo tse di go sireletsang mo letsatsing le go se nne nako e telele mo go lone, o ka latela kgakololo ya bomankge ba ba akantshang gore go dirisiwe sunscreen. O ka itse jang sunscreen e e sireletsang thata? Leba maatla a yone a tshireletso (sun protection factor [SPF]) a a supilweng ke badiri ba yone. Fa palo eo e le kgolo, e tla go sireletsa thata. Batho ba mmala o moswaana ba tlhoka go itshasa sunscreen e e nang le selekanyo se se kwa godimo ya SPF go feta ba mmala o motshwana. Tlhagiso ke eno: SPF e bolela selekanyo se sunscreen e sireletsang ka sone kgatlhanong le marang a UVB fela. Ka gone, tlhopha di-sunscreen tse di ka go sireletsang kgatlhanong le marang a a farologaneng, tse gape di sireletsang thata kgatlhanong le marang a UVA.
Bana, segolobogolo ba mmala o moswaana, ba sha thata fa ba le mo letsatsing. Mo godimo ga moo, buka ya Fotoproteção (Tshireletso mo Leseding) e bontsha gore gantsi bana ba nna mo letsatsing thata go feta bagolo. Go tsaya kgato ya go sireletsa letlalo la ngwana wa gago mo letsatsing mo dingwageng tsa gagwe tsa ntlha tse 18 go ka fokotsa thata kgonego ya gore a nne le kankere ya letlalo, go bolela jalo Fotoproteção.
Marang a letsatsi a botlhokwa thata mo botshelong mo lefatsheng. Mme ke mang yo o sa itumeleleng maemo a bosa a a apogileng? Mme o se ka wa tsiediwa ke go bona go tlotlomadiwa batho ba ba letlalo le lerokwa go twe ke bone ba bantle e bile ba basha! Sireletsa botsogo jwa gago—sireletsa letlalo la gago mo letsatsing le le fisang thata.
[Lebokoso mo go tsebe 17]
Sireletsa Letlalo la Gago!
1. Itshireletse mo letsatsing segolobogolo fa gare ga 10:00 a.m. le 4:00 p.m., e leng nako e marang a letsatsi a leng bogale thata ka yone.
2. Tota le fa go le maru, itshase sunscreen e e sireletsang marang a UVA le UVB e selekanyo sa yone sa go itshireletsa mo letsatsing e leng 15 kana go feta moo.
3. Fa o se mo gae itshase sunscreen mo diureng dingwe le dingwe tse pedi, segolobogolo fa o thuma kana o fufulelwa.
4. Apara diaparo tse di sireletsang mo letsatsing, tse di logilweng. Diaparo tse di nang le mebala e e lotobo ke tsone tse di sireletsang thata mo letsatsing.
5. Rwala hutshe ya moribego wa disentimetara di ka nna lesome le digalase tsa letsatsi tse di nang le digalase tse di sireletsang matlho kgatlhanong le marang a letsatsi a ultraviolet.
6. Fa go kgonega nna mo moriting.
7. Tila dilo tse di phatsimang, tse di jaaka metsi, motlhaba le semathane tse di tsabakelang marang a letsatsi a a senyang.
[Motswedi wa Setshwantsho]
(Se theilwe mo bukeng ya Skin Savvy, e e gatisitsweng ke American Academy of Dermatology)
[Ditshwantsho mo go tsebe 17]
Sireletsa botsogo le tebego ya gago—sireletsa letlalo la gago
O tshwanetse wa tlhokomela thata dilo tse di dirang gore marang a letsatsi a tsabakele thata