Dikakgelo Tsa Babadi
Go Batla Tiro le go Dira Gore E se Ka ya Go Latlhegela (July 8, 2005) Ke ratile kakantsho ya lona ya gore ke leke tiro nngwe le nngwe, tota le fa e bonala e le tiro ya maemo a a kwa tlase. Bosheng jaana ke ne ke batla go tlogela tiro ya me ya nako e e tletseng mme ke dire tiro ya nakwana gore ke dirise nako e ntsi mo bodireding jwa me jwa Bokeresete. Mme bothata jwa me e ne e le gore ke ne ke tlhopha ditiro. Ke ne ka newa tiro nngwe, e ke neng ka e amogela. Ga se tiro ya maemo, mme ke leka go e itumelela. Sengwe se sentle ke gore fa ke boela gae ke a bo ke sa lapa mo mogopolong, mme ke kgona go tlhoma mogopolo mo go ithuteng ga me Baebele.
M. I., kwa Japane
Letsatsi la Badiri—Le Rayang mo go Wena? (April 22, 2005, ka Seesemane) Ke mo mophatong o o kwa godimo mo sekolong sa rona se segolo, mme sekolo sa rona se keteka Letsatsi leno la Badiri ngwaga le ngwaga. Go a tle go nne le ikatiso ya motshameko wa terama go aperwe ka tsela e go tlileng go aparwa ka yone mo terameng, mme baithuti botlhe mo sekolong se segolo le sa bogare ba kopiwa gore ba tle go lebelela. Pelepele ke ne ke tle ke ye go bogela ikatiso eno, mme nkgonne ene o ne a re segakolodi sa gagwe ga se mo letle go nna teng mo meketeng eno. Setlhogo seno se ne sa dira gore ke bone gore o bua boammaaruri! Ke lo leboga go menagane. Setlhogo seno se tlile ka nako e e tshwanetseng tota!
C. C., kwa United States
Go Itshokela Bolwetse Mme ke Ntse ke Itumetse (April 22, 2005, ka Seesemane) Mo dingwageng di le thataro tse di fetileng ke ntse ke itshoketse kankere ya dikgeleswa tsa mae, mme ke setse nkile ka ya karong le kalafing ya dikhemikale makgetlho a le mmalwa. Mme fela jaaka Conchi, ke leka go tshegetsa phuthego ya rona le go nna teng mo dipokanong le mo dikopanong tsotlhe fa ke kgona. Kankere ke bolwetse jo bo botlhoko thata, ka jalo ke rata mafoko a ga Conchi fa a bua ka tsela ya go itshokela dikgang tse di bosula tse go bonalang e kete rona batho ba ba tshwerweng ke kankere re aga re ntse re di bolelelwa ke dingaka. Maitemogelo a ga Conchi a nkgothaditse tota!
B. F., kwa United States
Ke tshwerwe ke bolwetse jwa lupus jo bo senyang letlalo mme nako nngwe nkile ka bo ka latlhegelwa ke tlhaloganyo ka lobakanyana. Fa ke ntse ke kokotlegela, ke ne ke ntse ke leka go nna ke itumetse. Bosheng jaana fa ke robetse kwa bookelong ka ntlha ya go ruruga ga dinama tsa mala, ke ne ke ntse ke leka go nna ke itumetse. Ke dumalana le mafoko a ga Conchi fa a re, “Go lwala ga se matshamekwane, mme gone o tshwanetse go leka go nna o itumetse.”
M. A., kwa Venezuela
Ditiragalo Tsa Lefatshe (July 8, 2005, ka Seesemane) Malebana le ntlha ya setlhogo se se reng “Ditlaleletsa Tsa Dibitamine le Kankere,” ke rata go tlhalosa gore se se buiwang ke Dr. Sullivan jaaka a nopotswe mo setlhogong seno ga se maikutlo a baitseanape botlhe ba tsa dikotla. Dipego tse di kwadilweng mo dibukeng tse dintsintsi tsa saense le dipatlisiso tse dintsintsi tse di dirilweng di bontshitse gore diokobatsi tse lo di umakileng mo setlhogong seno di thusitse thata mo go thibeleng—le mo go alafeng—mefuta mengwe ya kankere. Ke akanya gore go gatisa tshedimosetso e e tshegetsang letlhakore le le lengwe fela jaana go ka dira gore Tsogang! e se ka ya tlhola e bonala e le e e sa tseyeng letlhakore.
A. B., Netherlands
“Tsogang!” e a araba: Jaaka fa mmadi yono a tlhalosa, go bonala dipatlisiso di ile tsa bontsha gore diokobatsi tse di umakilweng mo setlhogong seno di ile tsa thusa batho bangwe ba ba tshwerweng ke kankere. Re maswabi gore go nnile le bangwe ba ba sa kang ba tlhaloganya sentle ntlha e re e gatisitseng mo setlhogong seno. “Tsogang!” ga e tseye letlhakore fa go tsenwa mo kgannyeng ya tsa kalafi. Lebaka la go bo re gatisitse tshedimosetso nngwe ka tsa kalafi gore babadi ba makasine ono ba e bale ga le reye gore re a e buelela. Gape, fa re nopola buka nngwe kgotsa moitse mongwe mo karolong nngwe ya kitso, re tlhaloganya gore—jaaka go ntse mo makgetlong a le mantsi—dibuka tse dingwe le baitse ba bangwe ba ka nna ba bo ba leba dilo ka tsela e sele. Kgang ya go dira tshwetso mo dilong tsa boitekanelo re e tlogelela babadi ba makasine ono.