Kgogometso e Ntle — LAEBORARI YA MO INTERNET

Kgogometso e Ntle

KA MOKWADI WA TSOGANG! KWA MEXICO

MO GARE ga Mexico le seodi sa Baja California go na le Kgogometso ya California e e bobududu jo bo tseneletseng (e e bontshitsweng kwa tlase), e tota kwa tshimologong e neng e itsege jaaka Lewatle la Cortés. Bogolo jwa kgaolo eno e e nang le losi lo lo sekaka le ditlhaketlhake tse di tletseng ka maje e kailwe ke United Nations Educational, Scientific, and Cultural Organization e le Lefelo le le Itlhaolang ka Bontle Jwa Lone mo Lefatsheng. Ke ka ntlha yang fa lefelo leno le kgethegile jaana?

Kgogometso ya California le mafelo a a e dikologileng a a ka nnang boleele jwa dikilometara di le 1 000 le bophara jwa dikilometara di le 153, a mantle e bile a nyeuma ka botshelo. Kgogometso eno gape e na le makhubu a lewatle a magolo thata mo polaneteng mme kwa ntlheng e e kwa bokone ya yone, makhubu ano a fitlha go dimetara di le robongwe. Letsatsi le lentsi le metsi a mantsi a a nang le dikotla a dira gore go nne le bontsintsi jwa ditshedi le dijalo tse dinnye tsa mo lewatleng le mefutafuta e e sa tlwaelegang ya ditshedi. Fa Jacques-Yves Cousteau yo o ithutang ka ditshedi tsa lewatle a bona mabaka a a tlhalositsweng fa godimo le metsi a a phepa mo lefelong leno, o ne a tlhotlheletsega go bitsa kgogometso eno a re ke “akwariamo ya lefatshe.”

E re ka kgogometso eno e na le mefuta ya ditlhapi e e fetang 890, mme e e ka nnang 90 e fitlhelwa mo kgaolong eno fela, lefelo leno le bidiwa laboratori ya tlholego ya go ithuta ka botshelo jwa ditshedi tsa lewatle. Le fa go ntse jalo, ka maswabi mefuta e mentsi ya ditlhapi e a nyelela, go akaretsa le mofuta o monnye wa dolofine o o sa bonweng bonolo o o bidiwang vaquita, e leng lefoko la Se-Spain le le rayang “kgongwana.”

Mofuta o monnye ono wa dolofine o o bidiwang vaquita, o gola go fitlha mo e ka nnang boleele jwa disentimetara di le 150. Mmala wa letlalo la yone o farologana go tswa go mmala o moputswa go ya go o borokwa jo bosetlha, mme e na le marontho a mantsho go dikologa matlho. E re ka e fitlhelwa fela mo metsing a a seng boteng, a a leswe, a kgogometso e e fa gaufi le molomo wa Noka ya Colorado, phologotswana eno e e ditlhong ga se gantsi e bonwa, e bile go itsiwe go le gonnye fela ka botshelo jwa yone. Tota e bile, e ne ya bonwa la ntlha morago ga 1958, fa go ne go fitlhelwa magata a le mararo mo losing lwa Baja California.

E re ka palo ya tsone e le kwa tlase ga 600, vaquita e mo lenaaneng la ditshedi tse di mo kotsing ya go ka nyelela. Le fa go ntse jalo, ngwaga le ngwaga bontsi jwa tsone bo nwelelela mo matloweng a a beilweng ke batshwari ba ditlhapi. Go netefatsa gore diamusi tseno tse di sa bonweng motlhofo di nna di babalesegile, naga ya Mexico e tlhomile mafelo a tshireletso ya ditshedi a a akaretsang bonno jwa di-vaquita tseno. Diphologolo tse dingwe tse di nnang mo kgogometsong eno le tse di etang di akaretsa maruarua, di-manta ray tse dikgolo thata, dikhudu tsa lewatle tsa leatherback, manyebi, mefuta ya di-marlin le digopa tsa ditlhapi tsa tuna.

Baitsesaense ba fitlhetse mofuta o o sa tlwaelegang wa ditshedi o o iseng o bonwe ke batho ba le bantsi, kwa botengteng mo karolong e e kwa borwa ya kgogometso eno. Lebaka ke gore ditshedi tseno di nna mo moseleng wa Guaymas o o ka nnang boteng jwa dimetara di le 2 000. Mo moseleng ono o o boteng go na le metsi a a bothitho a a thusang ditshedi tse di sa ikaegang ka maatla a letsatsi go tshela, mme di ikaegile ka hydrogen sulfide. Setshedi sengwe se se tshelang gaufi le metsi a a bothitho ano ke tube worm. Ditshedi tseno ga di na molomo le mala. Di na le karolo e e boleta e khibitswana kwa godimo mme di nna mmogo di bapile. Di ema di tlhamaletse karolo e nngwe ya tsone e itshwareletse mo boalong jwa lewatle, mme jaaka dithupana di temeka go tswa mo metsing a a tsididi a a tswang mo lewatleng go ya go a a bolelo a a tswang mo moseleng. Nngwe le nngwe ya di-tube worm e na le dibakateria mo mmeleng tse di e thusang go tswelela e tshela. Karolo e e boleta e e khibitswana ya yone tota ke lekgwafo la yone.

Tota le fa ditshedi tse di farologaneng tsa mo kgogometsong eno di le mo kotsing, isagwe ya tsone e a phatsima. Jang? Ka gonne Mmopi o a amega. Tota e bile, o amega thata jaana ka lefatshe lotlhe mo e leng gore gautshwane jaana o tla le sireletsa gore le se ka la tlhole le senngwa, a bo a le busetsa mo maemong a a neng a a ikaeletse kwa tshimologong. (Genesise 1:26-28; Tshenolo 11:18) Ga re kgone go akanya gore Kgogometso ya California e tla bo e ntse jang ka nako eo. Tota e bile, lefoko “bontle” ga le ka ke la tlhalosa boemo jo e tla bong e le mo go jone.

[Setshwantsho mo go tsebe 25]

“Fin whale”

[Setshwantsho mo go tsebe 25]

“Di-tube worm”

[Motswedi wa Ditshwantsho mo go tsebe 24]

[Motswedi wa Ditshwantsho mo go tsebe 25]