Maatla a a Tsietsang a Dipapatso

KA MOKWADI WA TSOGANG! KWA POLAND

Tomek o lebeletse thelebishene a kgatlhegile tota. O reeditse ka tlhoafalo fa melaetsa ya papatso e ntse e kgothaletsa bareetsi jaana: “Fa morwao a ka apara selo seno o tla nna maatla le matlhagatlhaga e bile o tla ratwa ke ditsala tsa gagwe. O tshwanetse go se reka!” Tomek o tabogela kwa go rraagwe, a ntse a opela pina e e rategang e a e utlwileng mo papatsong. Mme o botsa rraagwe jaana: “Papa a o tla se nthekela?”

◼ Ke eng fa bana ba batla dilo tse di tlhagisiwang mo dipapatsong? Morutisi mongwe yo o nopotsweng mo makasineng wa kwa Poland wa Rewia o ne a tlhalosa jaana: “Ba di batla ka gonne ba bona ba bangwe ba na le tsone. Ba batla go tswelela ba ratiwa ke ditsala tsa bone.” Fa bana ba nnela go kopa, ba lela e bile ba tsupa melomo, gantsi batsadi ba ineela ba bo ba ba rekela dilo tse ba di batlang.

Ke eng se se dirang gore dipapatso tse di dirilweng ka maikaelelo a go ngokela bana e nne tse di tsietsang jaana? Moithutatlhaloganyo mongwe e bong Jolanta Was o ne a bolela jaana: “Ga di bue thata ka tlhwatlhwa, boleng kgotsa mosola wa se se bapatswang.” Dipapatso di diretswe “go ama maikutlo.” Was o akgela jaana: “Bana ba bannye ga ba ke ba sekaseka kgang e ba e utlwang mo dipapatsong. . . . Ga ba bapise tshedimosetso e ba e utlwang le tsela e ba tlhaloganyang dilo ka yone.” Tota le fa ba ne ba ka leka go dira jalo, ka ntlha ya kitso ya bone e e potlana ba ka tswa ba sa kgone go sekaseka selo se se bapatswang.

Ke jang o ka sireletsang ngwana wa gago mo maatleng a a tsietsang a dipapatso? Makasine wa Rewia o ne wa tlhalosa gore, sa ntlha, “o tshwanetse go fetsa nako e ntsi le ngwana wa gago mme o nne o ntse o mo tlhalosetsa gore boleng jwa motho ga bo lekanngwe ka gore o rwala ditlhako [kgotsa o apara diaparo] tsa leina lefe.” Ruta ngwana wa gago gore a ka kgona go itumelela bongwana jwa gagwe ntle le ditshamekisi tsa bosheng. Sa bobedi, batsadi ka bobone ba tshwanetse go ela tlhoko kafa dipapatso di ka nnang le tlhotlheletso mo baneng ba bone ka gone. Was o akantsha jaana, sa botlhokwa ke gore “re se ka ra letla dipapatso go re bolelela gore ke eng se se siametseng bana ba rona.”

Sa bofelo, batsadi botlhe ba ka solegelwa molemo ke kgakololo e e mo Baebeleng. Moaposetoloi Johane o ne a kwala jaana: “Sengwe le sengwe se se mo lefatsheng—keletso ya nama le keletso ya matlho le go bontsha ka mabela se motho a nang le sone mo botshelong—ga se tswe mo go Rara, mme se tswa mo lefatsheng.”—1 Johane 2:15, 16.

A ga o dumele gore bontsi jwa dipapatso di ngoka “keletso ya matlho” le go rotloeletsa bagolo mmogo le bana go “bontsha ka mabela se motho a nang le sone mo botshelong”? Se se kgatlhang ke gore Johane o tsweletsa kgakololo ya gagwe jaana: “Lefatshe le a feta le keletso ya lone, mme yo o dirang thato ya Modimo o ntse ka bosaengkae.”—1 Johane 2:17.

Batsadi ba ba fetsang nako ba tlotla le bana ba bone ka metlha, ka metlotlo e e agang, ba ka kgona go jalelela kwa teng melaometheo ya bomodimo le mekgwa e mentle e e ka sologelang bana ba bone molemo. (Duteronome 6:5-7) Ka jalo, bana ga ba ne ba tlhotlhelediwa motlhofo fela ke dipapatso tse di tsietsang tsa lefatshe leno tse di diretsweng gore ba pateletse batsadi ba bone gore ba ba rekele dilo tse di bapatswang.