Dikakgelo Tsa Babadi

Ga ke Tlhole ke le Lekgoba la Bojalwa (May 2007) Ka dinako dingwe ke a tle ke bale dimakasine tsa lona fa Basupi ba ntlisetsa tsone. Ke akanya gore ditlhogo tseno di a lapolosa fa ke di bapisa le dikgang tse di leng mo thelebisheneng le mo makwalodikgannyeng. Ga ke ise ke nne le bothata jwa go tshwakgolwa ke bojalwa, mme gone ke na le ba le mmalwa ba maloko a lelapa le ditsala ba ba nang le bothata joo. Monna yo o umakilweng mo setlhogong se se fa godimo o bolela gore o ne a sa tlhole a nwa bojalwa morago ga dikgwedi di le tharo. Seno se tla morago ga go boga dingwaga di le dintsi ka ntlha ya go nwa bojalwa ka tsela e e feteletseng. Le fa ke mo akgola, ke akanya gore tota ga se sekao se se boammaaruri, mme ke akanya gore seno se ka kgoba batho ba ba nang le bothata joo marapo. Gantsi motho yo o tshwakgotsweng ke bojalwa o nna le poelomorago fa a ntse a leka go fenya bothata.

G. A., United States

Tsogang! e a araba: Re ne re sa reye gore go ikgolola mo go tshwakgolweng ke bojalwa ke sengwe se se motlhofo. Re dumalana le wena gore batho ba le bantsi ba ba kgaratlhelang go fenya go tshwakgolwa ke bojalwa ba nna ba boela morago kwa mokgweng oo mme ba nna ba kgobega marapo fa ba le mo loetong lwa go tokafala. Tota le ba ba tlogelang go nwa ka bonako fela mme ba sa tlhole ba lemaletse bojalwa ba tshwanetse go nna kelotlhoko gore ba se ka ba boela gape kwa mokgweng oo. Ka jalo, fela jaaka setlhogo seno se tlhalositse, morago ga gore motho a tshwakgolwe ka dingwaga di le lesome, motho yo pele e neng e le “lekgoba la bojalwa” o ne a dumela jaana: “Batho ba le bantsi ga ba itse gore ke lole ntwa e e kana kang mme go nwa gangwe fela go ka dira gore ke boele kwa mekgweng ya me ya bogologolo. Keletso ya go batla go nwa bojalwa e sa ntse e le teng mo go nna. Go tlhokega thapelo e e boteng le go ikemisetsa go nna le maatla a go gana.” Ka go ikaega ka Modimo le ka thapelo, batho ba le bantsi ba ile ba kgona go tlogela go nna makgoba a bojalwa.—Pesalema 55:22.

A o Ka Ikanya Baebele? (November 2007) Ke na le dingwaga di le 12 mme ke rata go lo leboga ka kgatiso e e kgethegileng ya Tsogang! e e kgatlhang le e e rutang. Ke itumeletse thata karolo e e mo tsebe 7 e e neng e bua ka go dumalana ga Baebele. E ne ya bolela ka dilo tse ke neng ke ise ke akanye ka tsone. Ke setse ke letetse kgatiso e e kgethegileng e e latelang ka tlhoafalo.

D. F., United States

Dilo Tse o ka Akanyang ka Tsone Ke rata go lo leboga ka tsela e ntšha e Tsogang! e dirwang ka yone. Dipotso tse di bodiwang kwa bofelong jwa ditlhogo tse dingwe di nthusitse thata. Di nthusitse gore ke nne ke gakologelwa tshedimosetso e ke ithutileng yone le go nna ke tlhatlhanya ka setlhogo seo. Mo malatsing ano re tshela botshelo jwa go tshwarega mo e leng gore re ka palelwa ke go lemoga dintlha dingwe tse di botlhokwa fa re bala.

M.A.S., Brazil

A Loso Tota ke Bokhutlo? (December 2007) Dikgwedi di le thataro tse di fetileng ke ne ka tlhokafalelwa ke mmè mo kotsing e e botlhoko. Go ne go kgothatsa tota go bala setlhogo seno, se se neng sa nonotsha tsholofelo ya me ya gore ke tla mmona gape mo tsogong. Ke leboga go menagane.

L.L.R., Brazil

Basha ba Botsa Jaana . . . Ke Eng fa ke Tshwanetse go Tshela ka Melao E e Mo Baebeleng? (November 2007) Ke ne ke akanya gore fa fela ke sa dire boitsholo jo bo maswe jwa tlhakanelodikobo, go ne go se na sepe se se phoso ka go intsha le mongwe. Mme gone ke ne ka simolola go batla se se fetang fela go fetsa nako le lekau le ke neng ke ratana le lone. Ke ne ka simolola go nna le dikeletso tse di sa siamang tsa senama. Ke leboga thata go bo lo tlhalosa dithuto tsa Baebele ka tsela e e motlhofo e e tlhaloganngwang ke basha ba ba se nang maitemogelo.

E. F., Japan