Basha ba Botsa Jaana

Nka Dirang go Nametsega Morago ga Gore re Kgaogane?

“Re ne re ntse re intsha ka dikgwedi di le thataro e bile re ne re le ditsala ka dingwaga di le tlhano. Fa a ne a batla go fedisa thatano ya rona o ne a bile a sa kgone go nteba mo matlhong. O ne a tlogela fela go tlhola a bua le nna. Ke ne ke ikutlwa ke kgobegile marapo. Ke ne ke fekeeditswe ke maikutlo a go swaba. Ke ne ke ipotsa gore ‘Ke dirile eng se se phoso?’”—Rachel.a

GO KGAOGANA le mongwe yo o mo ratang go ka senya boitumelo jwa gago mme ga dira gore o sale o tlaletswe e bile o lela. Akanya ka Jeff le Susan, ba ba neng ba ratana ka dingwaga di le pedi. Mo nakong eo, lorato lwa bone lo ne lwa gola. Letsatsi lotlhe, Jeff o ne a romelela Susan melaetsa e e mmontshang gore o a mo rata. Nako le nako o ne a mo naya dimpho tse di mmontshang gore o ne a akantse ka ene. Susan a re: “Jeff o ne a dira ka natla gore a ntheetse le go ntlhaloganya. O ne a dira gore ke ikutlwe ke le motho yo o botlhokwa.”

Go ise go ye kae, Jeff le Susan ba ne ba bua ka kgang ya go nyalana le gore ba ne ba tla nna kae fa e setse e le monna le mosadi. Jeff o ne a bile a botsa gore Susan o rwala palamonwana e e kana kang. Mme a sa lebelela, Jeff o ne a fedisa thatano ya bone! Susan o ne a utlwile botlhoko thata. O ne a tswelela ka ditiro tsa letsatsi le letsatsi, mme o ne a gamaregile thata. A re: “Ke ne ka ikutlwa ke lapile mo mogopolong le mo mmeleng.”b

Lebaka La go Bo go Le Botlhoko

Fa o kile wa nna mo seemong se se tshwanang le sa ga Susan, o ka nna wa ipotsa gore ‘A ke tla kgona go tswelela ka botshelo jwa me?’ (Pesalema 38:6) Go a tlhaloganyesega go bo o tlaletswe ka tsela e e ntseng jalo. Go kgaogana le mongwe yo o mo ratang e ka nna boitemogelo jo bo botlhoko go gaisa jo o kileng wa tshwanela ke gore o bo itshokele. Tota e bile, bangwe ba kile ba bolela gore fa o kgaogana le mongwe yo o mo ratang go nna jaaka e kete karolo nngwe ya gago e a swa. O ka nna wa bo wa iphitlhela o na le maikutlo ano a go hutsafala gongwe le ditsela tse dingwe tsa go hutsafala e leng:

Go sa dumele. ‘Go ka se ka ga bo go fedile. O tla fetola mogopolo mo letsatsing le le lengwe kgotsa a mabedi.’

Go galefa. ‘Ke eng a ntira jaana? Ga ke batle le go mmona!’

Go tshwenyega thata mo maikutlong. ‘Ga ke ratege. Ga go na ope yo o tla tlholang a nthata.’

Go amogela. ‘Ke tla siama. Go kgaogana ga rona go botlhoko, mme ke ikutlwa botoka.’

Dikgang tse di molemo ke gore o ka kgona go fitlha mo boemong jwa go amogela. Gore go tla go tsaya nako e e kana kang gore o amogele go ikaegile ka mabaka a le mmalwa, a a akaretsang gore lo na le nako e e kana kang lo ratana le gore thatano ya lona e fitlhile bokgakaleng bofe. Fa go sa ntse go ntse jalo, o ka kgona jang go lepalepana le kutlobotlhoko ya gago?

Go Tswelela ka Botshelo

Gongwe o ka tswa o utlwile batho ba re, E a tla e re fa nako e ntse e ya dintho di fole. Fa e sa ntse e le gone lo kgaoganang, mafoko ao a ka tswa a sa go kgothatse. Seno ke ka go bo go feta ga nako ke karolo fela ya tharabololo ya bothata. Ka sekai: Fa o segilwe, letlalo la gago le tla fola fa nako e ntse e tsamaya mme go botlhoko gone jaanong. O tlhoka gore o emise go dutla ga madi mme o okobatse botlhoko. Gape o tlhoka gore o dire gore ntho eno e se ka ya tsenwa ke megare. Seno ke se se diregang le ka ntho e e mo maikutlong. E botlhoko gone jaanong. Mme go na le dikgato tse o ka di tsayang go fokotsa botlhoko le go dira gore o se ka wa shakgala. Nako e tla dira tiro ya yone, mme wena o ka dira ya gago jang? Leka go dira dilo tse di latelang.

◼ Itetle go hutsafala. Ga go na sepe se se phoso ka go lela. Kana e bile Baebele ya re go na le “nako ya go lela” le “nako ya go hutsafala.” (Moreri 3:1, 4) Go lela ga go reye gore o motho yo o bokoa. Tota le Dafide yo e neng e le lesole le le pelokgale fa a ne a le mo tlalelong e kgolo o ne a dumela jaana: “Ka masigo otlhe ke kolobetsa bolao jwa me ka ntlha ya go lela; ke kolobetsa mosamo wa me ka dikeledi.” (Pesalema 6:6, Today’s English Version.)

◼ Tlhokomela boitekanelo jwa gago jwa mmele. Go ikatisa mmele le go ja dijo tse di nang le dikotla go tla go thusa go busetsa maatla a a go latlhegetseng ka ntlha ya kutlobotlhoko ya go kgaogana. Baebele ya re: “Go thapisa mmele go tswela mosola.”—1 Timotheo 4:8.

Ke dilo dife tse di amang boitekanelo jwa gago tse o tlhokang go di tlhokomela?

․․․․․

◼ Nna o na le se o ka se dirang. O se ka wa tlogela go dira dilo tse o neng o ntse o di kgatlhegela. Tota e bile gone jaanong go feta le fa e le leng pele, o se ka wa itlhaola. (Diane 18:1) Go nna le kamano le batho ba ba amegang ka wena go tla dira gore o nne le sengwe se se molemo se o ka tlhomang mogopolo mo go sone.

Ke mekgele efe e o ka ipeelang yone gore o nne o ntse o na le se o ka se dirang?

․․․․․

◼ Rapela Modimo malebana le maikutlo a gago. Seno e ka nna kgwetlho. Morago ga go kgaogana le mongwe yo ba neng ba mo rata, batho ba bangwe ba ikutlwa e kete Modimo o ba tsieditse. Ba re, ‘Ke rapetse ka makgetlho gore ke bone mongwe yo nka ratanang le ene, mme jaanong bona gore go diragetse eng!’ (Pesalema 10:1) Le fa go ntse jalo, a go tla bo go siame go akanya gore Modimo ke ene a kopanyang batho? Le e seng, tota e bile ga se ene a dirang gore mongwe wa lona a batle go fedisa thatano ya lona. Se re se itseng ka Jehofa ke gore “O a [go] kgathalela.” (1 Petere 5:7) Ka jalo, mmulele mafatlha a gago ka thapelo. Baebele ya re: “Mo go sengwe le sengwe ka thapelo le mokokotlelo mmogo le go ntshiwa ga ditebogo a dikopo tsa lona di itsisiwe Modimo; mme kagiso ya Modimo e e gaisang kakanyo yotlhe e tla disa dipelo tsa lona le maatla a lona a mogopolo ka Keresete Jesu.”—Bafilipi 4:6, 7.

Ke dilo dife tse di kgethegileng tse o ka di rapelelang mo go Jehofa fa o ntse o lwa le go lepalepana le go tlalelwa ka ntlha ya go kgaogana ga lona?

․․․․․

Go Leba Kwa Pele

Fa o sena go nna le nako ya go wela makgwafo, go ka nna molemo gore o sekaseke se se diragetseng mo thatanong ya lona. Fa o setse o siametse go dira jalo, o ka nna wa fitlhela gore go kwala dikarabo tsa gago tsa dipotso tse di latelang go tla go thusa.

◼ A o go neile lebaka la go bo lo tshwanetse go kgaogana? Fa go ntse jalo, kwala lebaka leo fa tlase, go sa kgathalesege gore o akanya gore le a utlwala kgotsa nnyaa.

․․․․․

◼ O akanya gore ke mabaka afe a mangwe a a ka tswang a dirile gore lo kgaogane?

․․․․․

◼ Fa o akanya ka se se diragetseng, a go na le sengwe se o ka bong o se dirile gore o fetole se se ileng sa diragala? Fa e le gore go ntse jalo, ke eng?

․․․․․

◼ A maitemogelo ano a bontsha ditsela dingwe tse o ka batlang go gola mo semoyeng le mo maikutlong ka tsone?

․․․․․

◼ Fa go ne go na le sengwe se o neng o tla se dira ka tsela e e farologaneng mo thatanong ya gago e e latelang e ne e tla nna eng?

․․․․․

Gone ke boammaaruri gore thatano ya gago ga ya ka ya nna se o neng o se solofetse. Mme gone gakologelwa seno: Ka nako ya setsuatsue, go motlhofo go tlhoma mogopolo mo marung a mantsho le mo puleng. Le fa go ntse jalo, kgabagare pula e a kgaotsa mme loapi lo bo lo apoga. Basha ba ba umakilweng pelenyana mo setlhogong seno ba ne ba fitlhela gore fa nako e ntse e ya, ba ne ba kgona go tswelela ka botshelo jwa bone. Tlhomamisega gore go ka nna jalo le ka wena!

Go na le ditlhogo tse di oketsegileng tsa “Basha ba Botsa Jaana” tse o ka di bonang mo atereseng eno ya Internet www.watchtower.org/ype

[Dintlha tse di kwa tlase]

DILO TSE O KA AKANYANG KA TSONE

◼ O ithutile eng ka ga gago mo thatanong ya gago e e fetileng?

◼ O ithutile eng ka batho ba bong bo sele?

◼ Ke mang yo o ka mmulelang mafatlha fa o ikutlwa o tlalelwa ka ntlha ya go kgaogana ga lona?

[Lebokoso mo go tsebe 20]

KAKANTSHO

Susan yo o umakilweng pelenyana o ne a dira lenaane la makwalo mme a nna a ntse a le gaufi gore a a bale fa a palelwa ke go laola maikutlo a gagwe. Gongwe le wena o ka dira ka tsela e e tshwanang ka makwalo mangwe a a umakilweng mo setlhogong seno.

[Setshwantsho mo go tsebe 19]

Go kgaogana le mongwe yo o mo ratang go tshwana le fa o segilwe—go botlhoko mme fa nako e ntse e ya go tla fola