Basha ba Botsa Jaana

Nka Dira Jang Gore go Bala Baebele go Itumedise?

O bala Baebele ga kae? (Tshwaya e le nngwe)

□ Letsatsi le letsatsi

□ Beke nngwe le nngwe

□ Tse dingwe ․․․․․

□ Feleletsa seele se se latelang.

Gantsi fa ke sa itumelele go bala Baebele e a bo e le ka ntlha ya gore  . . (Tshwaya tse di go amang)

□ Ga ke kgatlhegele se ke se balang

□ Ke tlhakana tlhogo

□ Ke iteega tsebe

□ Tse dingwe

A GA o kgatlhegele go bala Baebele? Fa go ntse jalo, o tla dumalana le Will wa dingwaga di le 18 fa a ne a re: “Baebele e ka nna ya bonala e sa kgatlhe.” Le fa go ntse jalo, o oketsa ka gore: “Seo se direga fela fa o sa itse gore o tshwanetse go e bala jang.”

Ke eng fa o tshwanetse go ithuta gore o ka bala jang Baebele? A gone o ka rata go itse gore o ka

◼ dira jang ditshwetso tse di siameng?

◼ nna jang le ditsala tsa boammaaruri?

◼ emelana jang le go ikutlwa o gateletswe thata mo maikutlong?

Baebele e na le matlotlo a botlhale mo dikgannyeng tse di ntseng jalo le tse dingwe. Gone ke boammaaruri gore go bona matlotlo ano go tlhoka matsapa. Mme go tsaya matsapa jalo go tshwana le go batla letlotlo: Fa seno se gwetlha thata o tla itumelela se o tla se fitlhelang!—Diane 2:1-6.

O ka kgona go bona jang matlotlo a a leng mo Baebeleng? Tsebe e e kafa mojeng e o ka kgonang go e segolola e tla go thusa gore o ka bala Baebele jang le—kafa morago—gore o ka e bala ka tatelano efe. Mme gape, leka dikakantsho tse di mo ditsebeng tse di latelang tse wena o ka di kgatlhegelang.

Go na le ditlhogo tse di oketsegileng tsa “Basha ba Botsa Jaana” tse o ka di bonang mo atereseng eno ya Internet www.watchtower.org/ype

Fa o kgona go dirisa Internet o ka nna wa bala Baebele mo go yone mo atereseng eno www.watchtower.org/e/bible

DILO TSE O KA AKANYANG KA TSONE

Ga twe o bona matswela a maiteko a gago go ya ka matsapa a o a tsereng.

◼ Seo se boammaaruri jang mo kgannyeng ya go bala Baebele?

◼ O ka dira leng nako ya go bala Baebele o le esi?

[Lebokoso/Setshwantsho mo go tsebe 23]

KAFA O KA BALANG BAEBELE KA GONE

Pele ga o bala . . .

◼ Tlhomamisa gore lefelo le o balelang mo go lone le didimetse gore o kgone go tsepamisa mogopolo.

◼ Rapelela gore o tlhaloganye.

Fa o ntse o bala . . .

◼ Dirisa dimmapa le ditshwantsho tsa dipego tsa Baebele go go thusa gore o kgone go bona ditiragalo tsa Baebele mo mogopolong.

◼ Akanya ka tiragalo e o e balang mme o bo o sekaseka dintlha ka botlalo.

◼ Leba dintlha tse di kwa tlase le ditshupiso.

◼ Ipotse dipotso tse di jaaka:

DINTLHA TSE DI KA SE GANEDIWENG: Go diragetse leng? Ke mang yo o buileng mafoko ano? O ne a bua le mang?

GO RAYA ENG: Nka tlhalosetsa motho yo mongwe seno jang?

MOSOLA: Ke ka ntlha yang fa Jehofa Modimo a ne a akaretsa pego eno mo Lefokong la gagwe? E bontsha eng ka botho jwa gagwe kgotsa tsela ya gagwe ya go dira dilo? Ke dithuto dife tse nka di dirisang mo botshelong jwa me?

Fa o sena go bala . . .

◼ Dira dipatlisiso tse di oketsegileng. Dirisa dibuka tse di gatisitsweng ke Basupi ba ga Jehofa tse di jaaka Insight on the Scriptures le “Lokwalo Longwe le Longwe Lo Tlhotlheleditswe ke Modimo Ebile Lo Mosola,” fa di le teng ka puo ya gago.

◼ Rapela gape. Bolelela Jehofa gore o ithutile eng le gore o ikaeletse go se dirisa jang. Mo lebogele Lefoko la gagwe, e bong Baebele.

[Lebokoso/Setshwantsho mo go tsebe 24]

O TLA BALA BAEBELE KA TATELANO EFE?

Kafa o ka go dirang . . .

□ Bala Baebele go ya kafa dibuka tsa yone di latelanang ka teng.

□ E bale go ya ka tatelano ya ditiragalo, gongwe ka tsela e di kwadilweng ka yone mo Baebeleng kgotsa ka tsela e di diragetseng ka yone.

□ Letsatsi le letsatsi bala karolo e e farologaneng ya Dikwalo.

Mantaga: Hisitori e e tletseng ka ditiragalo tse di kgatlhang (Genesise go ya go Esethere)

Labobedi: Botshelo jwa ga Jesu le dithuto tsa gagwe (Mathaio go ya go Johane)

Laboraro: Phuthego ya Bokeresete ya bogologolo (Ditiro)

Labone: Boporofeti le kaelo malebana le boitsholo (Isaia go ya go Malaki, Tshenolo)

Labotlhano: Dipoko le dipina tse di amang maikutlo (Jobe, Pesalema, Sefela sa Difela)

Matlhatso: Botlhale jo bo thusang mo botshelong (Diane, Moreri)

Sontaga: Makwalo a a yang go diphuthego (Baroma go ya go Jude)

Go sa kgathalesege gore o tlhopha go dirisa thulaganyo efe, tlhomamisa gore o itse gore o badile ka eng! Baya letshwao la ✔ gaufi le kgaolo nngwe le nngwe fa o se na go e fetsa, kgotsa ka tsela nngwe kwala rekoto ya dikgaolo tse o setseng o di badile.

Segolola lebokoso leno o bo o le baya mo Baebeleng ya gago!

[Lebokoso/Setshwantsho mo go tsebe 24]

DIRA GORE DIKWALO DI NNE LE BOTSHELO!

Batla ditsela tse o ka dirang gore se o se balang se kgatlhe. Ka sekai:

□ Dira tšhate ya manaane a maina a ba lelapa.

□ Dira ditaekerama. Ka sekai, fa o bala ka motho yo o ikanyegang, amanya dinonofo tsa motho yoo le ditiro tsa gagwe le ditshegofatso tse a di boneng.—Diane 28:20.

[Setshwantsho]

Tsala ya Modimo

↑ Kutlo

↑ kanyegang

↑ ↑

Aborahame

□ Torowa ditshwantsho go bontsha pego.

□ Torowa motseletsele wa ditshwantsho tse di bontshang tatelano ya ditiragalo. Tlhalosa se se diragalang mo tiragalong nngwe le nngwe.

□ Itirele sekaelo se sennye se se jaaka araka ya ga Noa—Ka sekai, bona Tsogang! ya January 2007, tsebe 22.

□ Balela kwa godimo le ditsala kgotsa ba lelapa. Kakantsho: Kopa gore mongwe a bale kanelo. Ba bangwe ba ka nna ba abelwa go bala dikarolo tsa batho ba go balwang ka bone.

□ Tlhopha pego e e rileng, mme o e bale jaaka pego ya dikgang. Bega tiragalo eo ka go botsa batho ba ba farologaneng o akaretsa “go botsolotsa” batho ba ba amegileng le batho ba ba boneng se se diragetseng.

□ Tlhopha pego e motho a dirileng tshwetso e e seng botlhale mme o bo o akanya ka phelelo e e farologaneng! Ka sekai, akanya ka nako ya fa Petere a ne a itatola Jesu. (Mareko 14:66-72) Petere o ne a ka bo a dirile eng fa a ne a le mo boemong jo bo thata jono?

□ Leba kgotsa reetsa dikgatiso tsa diterama tsa Baebele.

□ Ikwalele terama ya gago. Akaretsa dilo tse di ka ithutiwang mo pegong eo.—Baroma 15:4.

KGOPOLO: Tshameka terama eno le ditsala tsa gago di le mmalwa.

[Lebokoso/Setshwantsho mo go tsebe 25]

GO ROTLOETSEGA

◼ Ipeele mokgele! Kafa tlase fano kwala letlha le o ka ratang go simolola thulaganyo ya gago ya go bala Baebele ka lone.

․․․․․

◼ Tlhopha karolo ya Baebele e e go kgatlhang. (Bona lebokoso la setlhogo se se reng “O Tla Bala Baebele ka Tatelano Efe?”) Mme kafa tlase fano kwala gore ke karolo efe ya Baebele e o tla e balang pele.

․․․․․

◼ Simolola ka go dirisa nako e khutshwane. Tota le fa o dirisa metsotso e le 15 o bala Baebele, go botoka go na le go sa e bale gotlhelele. Kafa tlase fano kwala gore o tla beela kwa thoko nako e e kana kang ya go bala Baebele.

․․․․․

Kakantsho: Dira gore o nne le Baebele e o e dirisetsang go ithuta. Kwala dintlha mo go yone. Tshwaya ditemana tse di nang le bokao jo bo kgethegileng mo go wena.

[Lebokoso/Ditshwantsho mo go tsebe 25]

SE BALEKANE BA GAGO BA SE BOLELANG

“Ke leka go bala go le gonnye mo Baebeleng bosigo bongwe le bongwe pele ke robala. Seno se dira gore ke nne le sengwe se se itumedisang se ke akanyang ka sone fa ke robala.”—Megan.

“Ke tlhoma mogopolo mo temaneng e le nngwe ka metsotso e 15. Ke bala dintlha tsotlhe tse di kwa tlase, ditshupiso tsotlhe, mme ke dira dipatlisiso tse di oketsegileng. Ka dinako dingwe ga ke fetse temana e le nngwe ka gangwe, mme ke ithuta mo gontsi ka go dirisa mokgwa ono wa go bala!”—Corey.

“Ka lekgetlho lengwe ke ne ka bala Baebele ka dikgwedi di le lesome. Ka lobelo lo ke badileng ka lone ke kgonne go bona kafa dikarolo tse di farologaneng tsa Baebele di amanang ka teng ka tsela e ke neng ke ise ke e lemoge pele.”—John.

[Lebokoso mo go tsebe 25]

O KA ITLHOPHELA!

□ Tlhopha tiragalo. Baebele e na le dipego tse dintsi tsa mmatota tse di kgatlhang. Tlhopha pego e e go kgatlhang, mme o bo o e bala go tswa kwa tshimologong go fitlha kwa bofelong.

Kakantsho: Gore o bone dikakantsho tsa kafa o ka ithutang mo go oketsegileng ka pego e e rileng, bona tsebe 292 ya buka ya Dipotso Tse Basha ba di Botsang—Dikarabo Tse di Nang le Tharabololo, Bolumo ya 2, e e gatisitsweng ke Basupi ba ga Jehofa.

□ Tlhopha Efangele. Bala Mathaio (Efangele e e kwadilweng pele), Mareko (e e itsegeng ka go tlhalosa ditiragalo tse dintsi tse di kgatlhang tse di diregileng ka bofefo), Luke (e e buang thata ka thapelo le basadi) kgotsa Johane (e e sa bueng thata ka dilo tse go builweng ka tsone mo Diefangeleng tse dingwe).

Kakantsho: Pele o bala, batla ka bonako tshedimosetso e e tlhalosang ka buka eo ya Baebele le mokwadi wa yone gore o kgone go tlhaloganya botoka gore ke eng se se dirang gore Efangele eo e farologane le tse dingwe.

□ Tlhopha pesalema. Ka sekai:

Fa o ikutlwa o le nosi e bile o se na ditsala, bala Pesalema 142.

Fa o ikutlwa o kgobegile marapo ka ntlha ya bokoa bongwe jwa gago, bala Pesalema 51.

Fa o belaela mosola wa melao ya Modimo, bala Pesalema 73.

Kakantsho: Itirele lenaane la dipesalema tse o di badileng tse di go kgothaditseng thata.

[Lebokoso mo go tsebe 26]

BATLELA KWA TENG

◼ Akanyetsa tiragalo e o balang ka yone. Tlhatlhoba nako, lefelo le maemo a a neng a le teng fa go kwalwa temana eo.

Sekai: Bala Esekiele 14:14. Daniele o ne a ka bo a na le dingwaga di le kae fa Jehofa a ne a mo umaka e le sekao se se molemo mmogo le Noa le Jobe?

Ntlha e e ka thusang: Esekiele kgaolo ya 14 e ne ya kwalwa dingwaga di le tlhano fela morago ga gore Daniele a isiwe botshwarwa kwa Babelona—gongwe a sa ntse a le mo dingwageng tsa bolesome.

Letlotlo le le fitlhegileng: A Daniele o ne a le monnye thata gore Jehofa a ka ela tlhoko go ikanyega ga gagwe? Ke ditshwetso dife tse di siameng tse a neng a di dira tse di dirileng gore a segofadiwe? (Daniele 1:8-17) Sekao sa ga Daniele se ka go thusa jang gore o dire ditshwetso tse di siameng?

◼ Sekaseka dintlha ka botlalo. Ka dinako dingwe lefoko le le lengwe kgotsa a mabedi a ka nna botlhokwa.

Sekai: Bapisa Mathaio 28:7 le Mareko 16:7. Ke ka ntlha yang fa Mareko a ne a umaka ntlha ya gore go ise go ye kae Jesu o ne a tla bonala kwa barutweng ba gagwe “le kwa go Petere”?

Ntlha e e ka thusang: Mareko e ne e se mosupi yo o boneng ditiragalo tseno ka matlho; ga go na pelaelo gore tshedimosetso eo e ne e tswa kwa go Petere.

Letlotlo le le fitlhegileng: Ke ka ntlha yang fa Petere a tshwanetse a bo a ile a tlhomamisega fa a utlwa gore Jesu o batla go mmona gape? (Mareko 14:66-72) Jesu o itshupile jang e le tsala e e molemo ya ga Petere? O ka etsa jang Jesu mme wa nna tsala e e molemo mo go ba bangwe?

◼ Dira dipatlisiso tse di oketsegileng. Batla ditlhaloso mo dikgatisong tsa Baebele.

Sekai: Bala Mathaio 2:7-15. Balepadinaledi ba etetse Jesu leng?

Ntlha e e ka thusang: Bona Tora ya Tebelo ya January 1, 2008, tsebe 31 e e gatisitsweng ke Basupi ba ga Jehofa.

Letlotlo le le fitlhegileng: Go lebega Jehofa a ne a tlamela jang lelapa la gaabo Jesu ka dilo tse ba di tlhokang fa ba le kwa Egepeto? Go ikanya Jehofa go ka go thusa jang fa o lebane le maemo a a ngomolang pelo?—Mathaio 6:33, 34.