Plovdiv—Toropo e Ntšha e e Nang le Dingwao Tsa Bogologolo

Plovdiv—Toropo e Ntšha e e Nang le Dingwao Tsa Bogologolo

KA MOKWADI WA TSOGANG! KWA BULGARIA

TOROPO ya Plovdiv ke ya bogologolo go feta Roma, Carthage, kgotsa Constantinople. Toropo eno e na le batho ba ba ka nnang 350 000 ba ba nnang mo go yone gompieno, mme e itsharolotse go ralala dithabana tse supa tse di mo borwabogare jwa Bulgaria.

Fa o tsamaya o ralala diterata tsa bogologolo tsa toropo eno o tla bona bosupi jo bontsi jwa hisitori e e itumedisang mme gone e tlhakatlhakane. O ka bona dikago tse di agilweng ke Ba-Thrace e leng morafe o o neng o boifiwa thata o o neng o tshela dingwaga di le makgolokgolo pele ga Motlha o o Tlwaelegileng, gape le dipilara tsa Segerika, mafelo a bobogelo a Seroma le ditora tsa Bamoseleme tsa Se-Turkey.

“Toropo e Ntle go di Gaisa Tsotlhe”

Dilo tse di ribolotsweng mo teng ga toropo eno le go e dikologa di bontsha fa toropo eno e ne e na le baagi dingwaga tse dintsi pele ga mileniamo wa ntlha B.C.E. Mokwalahisitori wa Moroma e bong Ammianus Marcellinus o ne a kwala gore pele ga lekgolo la bonè la dingwaga B.C.E., lefelo le le sireleditsweng la Se-Thrace le le neng le bidiwa Eumolpias le ne le le fa toropo ya Plovdiv e leng gone gompieno. Ka 342 B.C.E., Eumolpias e ne ya gapiwa ke Philip II wa kwa Makedonia, yo e neng e le rraagwe Alexander yo Mogolo. Philip o ne a fetola leina la toropo eo go nna Philippopolis.

Fa Baroma ba ne ba gapa toropo eo ka 46 C.E, ba ne ba e bitsa Trimontium mme ba e dira motsemogolo wa Thrace. Baroma ba ne ba batla go nna ba laola toropo eno, ka gonne Via Diagonalis e e leng makopanelo a ditsela a a botlhokwa a a mo kgaolong ya Balkan e ne e feta mo go yone. Baroma ba ne ba oketsa ka setadiamo, lefelo le legolo la bobogelo (le le fa godimo), dibata di le dintsi le meago e mengwe e mentsi e e neng e tlwaelegile kwa Roma.

Lucian wa kwa Samosata o ne a tlhalosa bontle jwa toropo eno e e leng fa gare ga dithabana tse tharo mme e le kwa tlase ga Dithaba tsa Rhodope. (Bona lebokoso la setlhogo se se reng “Toropo ya Dithabana Tse Supa,” le le mo tsebeng ya 18.) E gaufi le Noka ya Maritsa mme dipoa tsa Thrace tse di nonneng di ikadile go bapa le yone. Lucian o ne a kwala gore Trimontium e ne e le “toropo e kgolo le e ntle go di gaisa tsotlhe!”

Morago ga go wa ga Roma mo go se se neng se bidiwa Metlha ya Lefifi, Ba-Slav ba ne ba nna mo kgaolong eno. Mo makgolong a dingwaga a le mmalwa a a latelang, balwelatumelo ba ne ba thukutha toropo eno ka makgetlho a a farologaneng a le manè. Morago ga foo, mo lekgolong la bo14 la dingwaga, go ne ga nna le diphetogo tsa sepolotiki fa toropo eno e ne e gapiwa ke Ba-Turkey. Ba ne ba fetola leina la toropo eno go nna Philibé mme ba ne ba nna ba e laola go fitlha ka 1878. Jumaia Mosque e e nang le tora le tshupanako e e laolwang ke letsatsi, e sa ntse e re gakolola nako eo.

Fa Russia e ne e fenya Turkey ka 1878, leina la toropo le ne la fetolwa go tswa go Philibé go nna Plovdiv. Ikonomi ya toropo eno e ne ya tokafadiwa ka 1892 fa dipontsho tsa kgwebo di ne di tshwarelwa kwa go yone. Go tloga ka nako eo, Plovdiv e ne ya nna lefelo le legolo la kgwebo kwa Bulgaria. Ka nako ya ntwa ya bobedi ya lefatshe, Banasi ba ne ba laola toropo eno ka nakwana mme ba ne ba lelekwa ke Ba-Soviet ka 1944. Mme ka 1989, Plovdiv e ne ya somoga mo diatleng tsa mmusomogolo o mongwe gape o o maatla fa Soviet Union e ne e phutlhama. Bangwe ba batho ba ba neng ba busa Plovdiv mo nakong e e fetileng ba ka tswa ba ne ba le peloephepa; le fa go ntse jalo, ba ne ba kgorelediwa ke go se itekanele go go bonalang mo dipusong tsa batho.

Dikgang Tse di Molemo di Tla Kwa Plovdiv

Mo e ka nnang ka 1938, go ne ga tlhomiwa lekgotla le le bidiwang Nabludatelna Kula (Watch Tower) mme le ne la kwadisiwa semolao. Le ne la gatisa le go anamisa Dibaebele le dibuka tsa Baebele kwa Bulgaria. Go sa kgathalesege maiteko a puso ya Bokomonise a go ba gatelela, Basupi ba ga Jehofa ba ne ba tswelela ba bolelela baagi ba Plovdiv dikgang tse di molemo tsa puso e e tlang e e itekanetseng ya kwa legodimong. (Mathaio 24:14) Ba le mmalwa ba ne ba simolola go kgatlhegela molaetsa. Gone jaanong kwa Plovdiv go na le batho ba ba fetang 200 ba ba dumelang mo go Jehofa e bile ba bolelela ba bangwe ka ene mme ba mo diphuthegong di le pedi tsa Basupi ba ga Jehofa.

Bontsi jwa Basupi bano ke Ba-Bulgaria. Mme go dumalana le hisitori ya toropo eno ya go nna le ditšhaba di le dintsi, go na le batho ba ditšhaba tse dingwe tse dintsi mo gare ga bone. Go na le Baamerika, Baboritane, Ba-Canada, Ba-Moldovia, Bantadiana le Ba-Poland. Batho bano ba dira mmogo go bolelela baagelani ba bone ka tsholofelo ya go busiwa ke bogosi jo bo itekanetseng. Ka nako eo, e seng baagi ba kwa Plovdiv fela mme le batho ba lefatshe lotlhe ba tla ipelela tshireletsego, “mongwe le mongwe kafa tlase ga mofine wa gagwe le kafa tlase ga setlhare sa gagwe sa mofeige, mme go tla bo go se na ope yo o ba boifisang.”—Mika 4:4.

[Lebokoso/Setshwantsho mo go tsebe 18]

“TOROPO YA DITHABANA TSE SUPA”

Fa motho a etela toropo eno ya Plovdiv gone jaanong o tla fitlhela go le thata go bona dithabana tse di itsegeng thata tse supa tsa toropo eno kgotsa di-tepe jaaka di bidiwa. Dingwaga di le lekgolo tse di fetileng nngwe ya dithabana tseno e leng Markovo Tepe, e ne ya thubiwa fa toropo eno e ne e okediwa. Go sa ntse go setse dithabana di le thataro tse di neelang bosupi jwa hisitori ya bogologolo ya Plovdiv.

Tse tharo tse di bonalang motlhofo fela mo mothong yo o etileng ke: Bunardjik Tepe, Djendem Tepe, le Sahat Tepe e e neng ya newa leina leo ke Ba-Turkey ka gonne go ne go agilwe tora e e nang le tshupanako mo thabaneng eno. Trimontium e Baroma ba neng ba e bitsa Plovdiv, e na le dithabana tse dingwe gape di le tharo e leng: Djambaz Tepe, thabana e kgolo go gaisa e bile e le kwa godimo thata; Taksim Tepe; le Nebet Tepe, e ka Se-Turkey e kayang “Thabana ya Molebeledi.”

Fa o tsamaya ka dinao go ralala kgaolo ya Trimontium o tla fitlha kwa gare ga nngwe ya dikarolo tsa bogologolo tsa Plovdiv, go tswa go matlotla le mabota a bogologolo a Philippopolis go ya go lefelo la bobogelo la Seroma le le sa ntseng le dirisiwa. Se sengwe gape se se kgatlhang ke matlo a a tlhokometsweng sentle a motlha wa Bulgarian National Revivalist a a agilweng go bapa le diterata tse di tshesane tse di dirilweng ka matlapana.

[Motswedi wa Setshwantsho]

[Mmapa mo go tsebe 16]

(Go bona mokwalo o o feletseng, leba kgatiso)

BULGARIA

SOFIA

Plovdiv

[Metswedi ya Ditshwantsho mo go tsebe 17]