Sephiri 5: Go Nna Tekatekano

“A go nna tekatekano ga lona go itsiwe.”—Bafilipi 4:5.

Se seno se se kayang. Mo malapeng a a atlegileng, banna le basadi ba nna ba ntse ba itshwarelana diphoso tsa bone. (Baroma 3:23) Mme gape ga ba gagamatse letsogo ka tsela e e feteletseng mo baneng ba bone e bile ga ba letlelele sengwe le sengwe fela. Ba tlhoma melao e e lekalekaneng ya lelapa. Fa go tlhokega kgalemelo, ba e neela ka “selekanyo se se tshwanetseng.”—Jeremia 30:11.

Lebaka la go bo seno se le botlhokwa. Baebele e bolela gore “botlhale jo bo tswang kwa godimo . . . bo tekatekano.” (Jakobe 3:17) Modimo ka boene ga a lebelela gore batho ba ba sa itekanelang ba itekanele, ka gone le banyalani ga ba a tshwanela go batla gore balekane ba bone ba itekanele. Tota e bile, go tshwayatshwaya diphoso ka ntlha ya melato e mennye go dira fela gore motho a kgopisege go na le gore a tokafatse. Go botoka go amogela boammaaruri jwa gore “rotlhe re a kgotšwa makgetlo a le mantsi.”—Jakobe 3:2.

Batsadi ba ba atlegileng ba tekatekano fa ba dirisana le bana ba bone. Kotlhao ya bone ga se e e feteletseng mme ga go “thata go ba itumedisa.” (1 Petere 2:18) Ba naya basha ba dingwaga tsa bolesome kgololesego fa ba itshupa ba na le maikarabelo. Ga ba leke go laola sengwe le sengwe mo matshelong a bana ba bone ba dingwaga tsa bolesome. Buka nngwe ya ditshupiso e bolela gore go leka go laola sengwe le sengwe mo botshelong jwa ngwana wa dingwaga tsa bolesome “go tshwana le go bina ka matlhagatlhaga go dira gore pula e ne. Pula e ka se ka ya na, mme wena o tla lapa thata.”

Leka se se latelang. Sekaseka gore o tekatekano go le kana kang ka go araba dipotso tse di latelang.

◼ Ke leng la bofelo o ileng wa akgola molekane wa gago?

◼ Ke leng la bofelo o ileng wa tshwaya molekane wa gago phoso?

Dira tshwetso. Fa e le gore go ne go le thata gore o arabe potso ya ntlha mo setlhogwaneng se se reng, “Leka se se latelang” se se tsamaisanang le setlhogo seno mme go ne go se thata gore o arabe ya bobedi, akanya ka mokgele o o ka o ipeelang malebana le go nna tekatekano.

Ke eng o sa tlotle le molekane wa gago malebana le ditshwetso tse lo ka di dirang lo le babedi?

Akanya ka ditsela tse o ka nayang ngwana wa gago wa dingwaga tsa bolesome kgololesego ka tsone fa a ntse a itshupa gore o na le maikarabelo.

Ke eng o sa tlotle ka kgololesego le ngwana wa gago wa dingwaga tsa bolesome ka dikgang tse di jaaka nako e a e beetsweng ya go tla gae?

[Setshwantsho mo go tsebe 7]

Jaaka mokgweetsi yo o kelotlhoko, leloko la lelapa le le tekatekano le letla ba bangwe gore fa go kgonega e nne bone ba ntlha