Ditiragalo Tsa Lefatshe

◼ Mo dipatlisisong tse di dirilweng mo bathong ba le 2 000 ba kwa Jeremane, mo e batlang e le diperesente di le 40 tsa basha ba dingwaga di le 14 go ya go di le 19 ba ne ba akanya gore go siame go fedisa thatano ya bone ka go romela molaetsa ka founo ya selula kgotsa ka e-mail. Diperesente tse di fetang 80 tsa batho ba dingwaga di le 50 le go feta ba tsaya seno se sa siama gotlhelele.—FRANKFURTER NEUE PRESSE, GERMANY.

◼ Go fopholediwa gore ka 2008, go ne ga romelwa melaetsa e e kwadilweng ka founo e le ditrilione di le 2,3.—HITU NEWS, TAHITI.

◼ “Go goga motsoko go fokotsa botshelo jwa motho go le kana kang? Ka palogare ya dingwaga di le tlhano go ya go di le lesome.” —UC BERKELEY WELLNESS LETTER, U.S.A.

◼ Go fopholediwa gore diperesente di le 60 tsa dikhomputara tse di dirisiwang mo diofising kwa United States di tlogelwa di sa timiwa bosigo. Ka ntlha ya seno, diteishene tsa motlakase di ntshetsa ditone di le dimilione di le 14,4 tsa gase ya khabonetaeokosaete mo lefaufaung go sa tlhokege.—WORLD WATCH, U.S.A.

Dibese di Rotloetsa Bolatolamodimo

“Gongwe ga go na Modimo. Ka jalo, o se ka wa tshwenyega mme itumelele botshelo jwa gago.” Lokwalodikgang lwa The Guardian lo bega gore moano ono o ne o beilwe mo dibeseng tse 200 kwa Lontone, kwa Engelane; le mo dibeseng tse dingwe tse 600 go ralala naga; le mo dikirining tse pedi tse dikgolo kwa Seterateng sa Oxford kwa Lontone. Batho ba ba simolotseng moano ono ba re letsholo la bone le tsibogela diphasalatso tsa bodumedi tse di neng di re batho ba ba sa dumeleng ba tlile go sha mo molelong wa dihele. Lefoko “gongwe” le dirisitswe e le go tsamaisana le melao ya Britain’s Advertising Standards Authority, e re ka go sa kgonege go ntsha bosupi jwa gore ga go na Modimo. Maikaelelo mangwe a letsholo leno ke go rotloetsa balatolamodimo ba ba oketsegileng gore “ba itlhagise,” go ntsha maikutlo a bone.

Dikotsi Tsa go Dira Gore Motho a Belege Pele ga Nako

Kwa United States, masea a a oketsegileng a tsholwa pele ga nako—ka go dira gore motho a nne le ditlhabi tsa pelegi kgotsa ka karo—e le ka go rata. Le fa go ntse jalo, lokwalodikgang lwa The Wall Street Journal lwa re: “Dibeke tsa bofelo tsa boimana di botlhokwa thata go feta kafa go neng go akanngwa ka teng.” Patlisiso nngwe e e dirilweng mo maseeng a a sa tswang go tsholwa a le 15 000 e ne ya bontsha gore beke nngwe le nngwe e ngwana a nnang a ntse mo popelong mo dibekeng tse di fa gare ga ya bo32 le ya bo39, go nna le go fokotsega ka diperesente di le 23 tsa go idibala, bolwetse jwa jaundice, mathata a go hema le go tshologela ga madi mo bobokong. Bana ba ba tsholwang mo dibekeng tsa bo32 go ya go tsa bo36 ba mo kotsing ya go nna le mathata ka tsela e ba itshwarang ka yone le a boboko. Ka jalo, lokwalodikgang lwa Journal lo bolela gore, American College of Obstetricians and Gynecologists e akantsha gore go se ka ga dirwa gore bana ba belegwe “pele ga dibeke di le 39 kwantle fela ga fa go na le mabaka a kalafi a go dira jalo.”

Go Palama Ditepisi go Tokafatsa Botsogo

Makasine wa kalafi wa kwa Boritane wa The Lancet o bega gore “go palama ditepisi ka metlha ke tsela e e motlhofo le e e mosola ya go tokafatsa botsogo.” Babatlisisi ba ne ba kopa badiri ba le 69 ba ba berekang ba dutse gore ba dirise fela ditepisi kwa tirong mme ba se ka ba dirisa dilefiti. Morago ga dibeke di le 12, selekanyo se mmele wa badiri bano o dirisang okosejene ka sone se ne sa oketsega ka diperesente di le 8,6 mme seno se ne sa “fokotsa kotsi ya go swa ka diperesente di le 15.” Gape badiri bano ba ne ba bona go tokafala ga “kgatelelo ya madi, kholeseterole, boima jwa mmele, mafura a a mo mmeleng le go fokotsega mo lethekeng.”