Ke Eng fa Batsadi Ba me Ba sa Tlhaloganye?

GONGWE o kile wa nna mo boemong jo bo tshwanang le jono. Le fa kgang e ka tswa e ne e le nako e o tshwanetseng gore o bo o le mo gae ka yone, mmino o o o reetsang, ditsala tsa gago kgotsa diaparo tsa gago, batsadi ba gago ba ne ba go beela melao mme ba ne ba sa ikaelela go e fetola. Ka sekai:

“Fa mmè a sena go nyalwa gape, rre wa me wa bobedi o ne a simolola go tshwaya diphoso mefuta yotlhe ya mmino e ke neng ke e rata. Kwa bofelong ke ne ka tshwanelwa ke go latlha di-CD tsa me tsotlhe!”—Brandon.a

“Mmè o ntshwaya phoso ka gonne ke se na ditsala. Mme fa ke mo kopa go itsalanya le mongwe, o a gana ka gonne a sa itse motho yoo. Seo se mpetisa pelo tota!”—Carol.

“Rre le mmè wa me wa bobedi ba batla ke apara fela dikipa tse nna ke bonang di le ditona mo go nna. Mme rre o ema ka la gore fa borokgwe jo bokhutshwane bo le fa godimo ga mangole, bo bokhutshwane thata!”—Serena.

O ka dirang fa wena le batsadi ba gago lo sa dumalane? A lo ka tlotla ka gone? Joanne wa dingwaga tse 17 a re: “Gantsi batsadi ba me ga ba batle go ntheetsa.” Amy wa dingwaga tse 15 a re: “Fa ke bona e kete batsadi ba me ga ba ntlhaloganye, ke a itidimalela.”

Mme o se ka wa itlhoboga ka bonako jalo! Batsadi ba gago ba ka tswa ba iketleeleditse go go reetsa go feta kafa o akanyang ka teng.

Akanya ka seno: Tota le Modimo o a reetsa fa batho ba mo tlhalosetsa seemo sa bone. Ka sekai, Jehofa o ne a reetsa Moshe fa a ne a buelela Baiseraele ba ba sa utlweng.—Ekesodo 32:7-14; Duteronome 9:14, 19.

O ka nna wa akanya gore batsadi ba gago ga ba tekatekano jaaka Modimo. Mme ke boammaaruri gore go na le pharologano e kgolo magareng ga fa Moshe a ne a bua le Jehofa ka isagwe ya setšhaba sotlhe le fa wena o bua le Rrago kgotsa Mmago ka go boela gae tharinyana. Le fa go ntse jalo, maemo ano a tshwana ka selo se le sengwe:

Fa o na le sengwe se se utlwalang se o batlang go se bua, batho ba ba nang le taolo—mo kgannyeng eno ke batsadi ba gago—ba ka nna ba batla go go reetsa.

Se se ka go thusang go atlega ke tsela e o bayang kgang ya gago ka yone! Dikgato tse di latelang di tla go thusa go dira seo ka katlego:

1. Lemoga bothata. Fa tlase fano, kwala kgang e wena le batsadi ba gago lo sa dumalaneng ka yone.

2. Lemoga tsela e o ikutlwang ka yone. Fa tlase fano, kwala mafoko a a tlhalosang kafa tsela e batsadi ba gago ba lebang kgang eno ka yone e dirang gore o ikutlwe ka teng—e ka tswa e dira gore o utlwe botlhoko, o hutsafale, o tlhabiwe ke ditlhong, o ikutlwe o sa tshepiwe kgotsa o na le maikutlo a mangwe. (Sekai: Mo tiragalong e e kwa tshimologong ya setlhogo seno, Jim a re lebaka la go bo batsadi ba gagwe ba batla gore a boe ka nako e e rileng le mo tlhabisa ditlhong fa pele ga ditsala tsa gagwe.)

3. Itsenye mo ditlhakong tsa motsadi. A re re o na le ngwana wa dingwaga tsa bolesome yo o nang le bothata jo bo tshwanang le jo o bo kwadileng mo Kgato 1. Fa e ne e le wena motsadi, ke eng se o neng o tla tshwenyega thata ka sone mme ka ntlha yang? (Sekai: Mo tiragalong e e kwa tshimologong ya setlhogo seno, batsadi ba ga Jim ba ka tswa ba ne ba tshwenyegile ka pabalesego ya gagwe.)

4. Sekaseka kgang eno gape. Araba dipotso tse di latelang:

   O akanya gore o ka solegelwa molemo jang ke tsela e batsadi ba gago ba lebang dilo ka yone?

   O ka dirang go ba thusa gore ba se ka ba tshwenyega thata?

5. Tlotla le batsadi ba gago ka kgang eno mme lo senke tharabololo mmogo. Fa o dirisa dikgato tse di bontshitsweng fa godimo—le go akanyetsa dikakantsho tse di mo lebokosong le le reng “Dintlha Tse di ka Thusang mo Puisanong”—o ka nna wa fitlhela gore o ka kgona go tlotla le batsadi ba gago ka tsela e e bontshang gore o godile. Kellie o na le kamano e e ntseng jalo le rraagwe le mmaagwe. A re: “Go nganga ga go thuse ka sepe, e bile o ka se fenye kgang. Se se nthusang ke gore ke tlotla le batsadi ba me ka kgang e re sa dumalaneng ka yone go bona tharabololo. Mme gantsi re dira tshwetso e rotlhe re dumalanang ka yone.”