DIKGWA

Go Direga Eng ka Dikgwa?

Ngwaga le ngwaga, batho ba rema ditlhare di le dintsintsi gore ba kgone go lema dijalo tse di jewang. Go simologa mo e ka nnang dingwaga tse 75 tse di fetileng, halofo ya dikgwa tse pula e nang thata kwa go tsone e nyeletse.

Fa sekgwa se remiwa, dimela tsotlhe le diphologolo tse di leng mo go sone, di a amega.

Lefatshe le Bopetswe Gore le Nnele Ruri

Dikgwa tse di ileng tsa remiwa di kgona go gola gape. Bosheng jaana batho ba ba ithutang ka dimela, diphologolo le tikologo ya tsone, ba ile ba gakgamala thata fa ba ne ba lemoga gore dikgwa tse di ileng tsa remiwa, di ne tsa kgona go gola di bo di kitlana gape. Ela tlhoko dikai tse di latelang:

• Babatlisisi ba lemogile se se diregang ka dikgwa tse batho ba ileng ba di rema gore ba leme dijo mme moragonyana ba bo ba emisa go lema. Patlisiso ya bone ka dikgwa tse di ntseng jalo di le 2 200 tse di kwa Amerika le kwa Afrika Bophirima, e bontshitse gore dikgwa di kgona go gola gape mo lobakeng lo lo kwa tlase ga dingwaga di le lesome.

• Go ya ka patlisiso nngwe e e neng ya kwalwa mo makasineng wa Science, babatlisisi ba fopholetsa gore mo dingwageng di ka nna 100, dikgwa tseo di ka kgona go nna jaaka di ne di ntse pele ga di remiwa.

• Bosheng jaana, baitsesaense ba kwa Brazil ba ile ba dira dipatlisiso go bona gore a dikgwa di tla gola ka bonako fa go dirwa maiteko a go jala ditlhare mo mafelong a go neng go remilwe ditlhare mo go one.

• National Geographic e bega jaana ka baitsesaense bao: “Ba ile ba itumela fa ba lemoga gore ga ba tlhoke go jala ditlhare tse disha.” Mo dingwageng di le tlhano fela, mafelo a a neng a tlhophilwe gore go dirwe dipatlisiso mo go one, “a ne a tlhogile ditlhare tse dintsi tse di neng di tlhola di tlhoga mo go one” ntle le gore go jwalwe ditlhare tse disha.

Se Batho ba Lekang go se Dira go Rarabolola Bothata Jono

Mo lefatsheng lotlhe, go ntse go di dirwa maiteko a go sireletsa dikgwa tse di le teng le go tsosolosa tse di remilweng. Ka ntlha ya seo, go ya ka motswedi mongwe wa United Nations, “go remiwa ga dikgwa mo lefatsheng lotlhe, go fokotsegile ka diperesente di feta 50” mo dingwageng tse 25 tse di fetileng.

Mme gone maiteko ano a go leka go sireletsa dikgwa, ga a a lekana. Pego nngwe e e gatisitsweng ke mokgatlho wa Global Forest Watch e a re: “Palo ya dikgwa tse pula e nang thata kwa go tsone tse di remiwang, ga e a fetoga go le kalo mo dingwageng di le mmalwa tse di fetileng.”

Dikhampani tse di remang ditlhare ntle le tetla ya puso gore di dire dipolanka, di dira didolara di le dibilione mme ka ntlha ya seo batho ba rema dikgwa tseno ba tlhotlhelediwa ke bogagapa.

Se Baebele e se Buang

“Jehofaa Modimo o ne a dira gore mmu o tlhogise setlhare sengwe le sengwe se se neng se kgatlha fa se lebilwe e bile se le molemo go ka jewa.”​—Genesise 2:9.

Mmopi wa dikgwa o di bopile ka tsela e e dirang gore di tswelele di re solegela molemo. O batla go sireletsa dikgwa le gore di tswelele di le gone, mmogo le thulaganyo e ntle e dimela le diphologolo di dirisanang ka yone mo tikologong e di leng mo go yone.

Modimo ga a kitla a letla batho ba ba pelotshetlha gore ba senye lefatshe le ditshedi tsotlhe tse di tshelang mo go lone. Bona setlhogo se se reng, “Modimo a re Lefatshe le Tla Nnela Ruri,” se se mo tsebe 15.