Kgaolo 72

Jesu o Roma Ba Ba 70

KE LETLHABULA la 32 C.E., dingwaga tse di tletseng di le tharo fa esale Jesu a kolobediwa. Ene le barutwa ba gagwe ba ne ba sa tswa go nna gone mo Modirong wa Metlaagana mo Jerusalema, mme go bonala ba santse ba le gautshwane le koo. Tota, Jesu o dirisa bontsi jwa nako e e setseng ya dikgwedi tse thataro tsa bodihedi jwa gagwe ekane e le mo Judea kana go kgabaganya Noka ya Joredane mo kgaolong ya Perea. Kgaolo eno le yone e tshwanetse go akarediwa.

Ka boammaaruri, morago ga Tlolaganyo ya 30 C.E., Jesu o ne a fetsa dikgwedi tse di ferang bobedi a ntse a rera mo Judea. Mme fa Bajuda ba sena go leka go mmolaya koo ka Tlolaganyo ya 31 C.E., o ne a fetsa ngwaga o o latelang le sephatlo sa one a ntse a ruta segolo bogolo mo Galilea. Mo lobakeng loo, o ne a bona setlhopha se segolo, se se katisitsweng sentle le se se rulagantsweng sentle sa bareri, sengwe se a neng a sena naso pele ga foo. Ka jalo, jaanong o simolola tiro e e nonofileng e kgolo ya go neela bosupi mo Judea.

Jesu o tsweledisa tiro eno ka go tlhopha barutwa ba le 70 le go ba roma ka bobedi le bobedi. Ka jalo, gotlhe fela go na le ditlhopha di le 35 tsa bareri ba Bogosi ba ba tla berekang mo tshimong eo. Bano ba etelela Jesu pele go ya mo motseng mongwe le mongwe le mo lefelong lengwe le lengwe leo, Jesu, a rulaganyetsang go ya kwa go lone le baaposetoloi ba gagwe.

Go na le gore a laele ba ba 70 go ya kwa disenagogeng, Jesu o ba raya a re ba ye kwa magaeng a batho, a ba tlhalosetsa jaana: “Me ntlo e lo tsènañ mo go eōna leha e ka nna ehe, e re pele, lo re, A kagishō e nnè le ntlo e. Me ha morwa kagishō a le gōna, kagishō ea lona e tla nna mo go eōna.” Molaetsa wa bone ke ofe? “Lo ba reè, lo re,” Jesu a ba bolelela jalo, “Bogosi yoa Modimo bo lo atametse.” Mabapi le tiro eno ya ba ba 70 bao, Matthew Henry’s Commentary e bega jaana: “Fela jaaka Morena wa bone, gongwe le gongwe kwa ba neng ba etela gone, ba ne ba rera ka ntlo le ntlo.”

Ditaolo tse Jesu a di fileng ba ba 70 di tshwana le tse a neng a di neela ba ba 12 fa a ne a ba roma go ya go rera mo Galilea mo e ka nnang ngwaga pelenyana ga foo. Ga a tlhagise ba ba 70 bano ka kganetso e ba neng ba tla lebagana le yone fela, a ba baakanyetsa kafa ba neng ba tla bua molaetsa ka gone go beng ba matlo, mme o ba fa nonofo ya go fodisa balwetsi. Ka jalo, fa Jesu ka bokhutshwane a goroga morago, batho ba le bantsi ba ne ba tla bo ba iketleeditse go kopana le Morena yoo barutwa ba gagwe ba kgonang go dira dilo tse di gakgamatsang tseno.

Thero ya ba ba 70, le tiro ya ga Jesu ya go ba latela di tsaya lobaka lo lokhutshwane fela. Ka bonakonyana fela ditlhopha tse 35 tsa bareri ba Bogosi di simolola go boela kwa go Jesu. “Morèna,” ba bolela jalo ka boitumelo, “badimo le bōnè ba re utlwa ka leina ya gago.” Pego e e ntseng jalo ya tirelo ruri e itumedisa Jesu thata, ka go bo o araba a re: “Ke bonye Satane a wa yaka logadima kwa legodimoñ. Bōnañ, ke lo neile thata ea go gata dinōga le diphepheñ.”

Jesu o itse gore morago ga go tsalwa ga Bogosi jwa Modimo ka nako ya bokhutlo, Satane le badimona ba gagwe ba ne ba tla piriganngwa kwa legodimong. Mme jaanong go kgaramelediwa ntle gono ga badimona ba ba sa bonaleng ba kgaramelediwa ntle jalo ke batho fela go gatelela gape gore seo se tla diragala. Ka jalo, Jesu o bua ka go digwa ga ga Satane mo nakong e e tlang a digwa kwa legodimong gore ke selo se se tla diragalang eleruri. Jalo he, ke tshwantshetso fela fa go twe ba ba 70 ba fiwa thata ya go gata dinoga le diphepheng. Lefa go le jalo, Jesu a re: “Lo se ka loa itumèlèla mouō go re, meōea ea lo utlwa; me lo itumèlè go re, maina a lona a kwadilwe kwa legodimoñ.”

Jesu o itumetse tota mme o baka Rraagwe phatlalatsa ka ntlha ya go dirisa batlhanka bano ba gagwe ba ba nyatsegang ka tsela e e nonofileng jaana. Fa a retologela kwa barutweng ba gagwe, a re: “Go segō matlhō a a bōnañ dilō tse lo di bōnañ; Gonne kea lo raea, baperofeti ba le bantsi ba eleditse, le dikgosi, go bōna dilō tse lo di bōnañ, me ba se ka ba di bōna; le go utlwa dilō tse lo di utlwañ, me ba se ka ba di utlwa.” Luke 10:1-24; Mathaio 10:1-42; Tshenolō 12:7-12.

▪ Jesu o ne a ya go rera kae mo dingwageng tsa ntlha tse tharo tsa bodihedi jwa gagwe, mme o akaretsa tshimo efe mo dikgweding tse thataro tsa gagwe tsa bofelo?

▪ Jesu o kaela ba ba 70 go ya kae gore ba bone batho?

▪ Ke ka ntlhayang fa Jesu a ne a re o bone Satane a setse a digilwe kwa legodimong?

▪ Ba ba 70 ba ka kgona go gata dinoga le diphe-pheng ka tsela efe?