Jesu O Romela Barutwa Ba Le 70 Gore Ba Ye Go Rera

Jaanong ke kwa bowelong jwa 32 C.E., dingwaga di ka nna tharo fa e sa le Jesu a kolobediwa. Bosheng jaana ene le barutwa ba gagwe ba ntse ba le kwa Moletlong wa Metlaagana kwa Jerusalema. Ba ka tswa ba sa ntse ba le mo metsaneng e e gaufi. (Luke 10:38; Johane 11:1) Jesu o fetsa bontsi jwa dikgwedi tsa gagwe tsa bofelo tse thataro a rera mo Judea kgotsa ka kwa letlhakoreng le lengwe la Noka ya Jordane mo kgaolong ya Perea. Batho ba mafelo ano le bone ba tlhoka go rerelwa.

Pelenyana, morago ga Tlolaganyo ya 30 C.E., Jesu o ne a fetsa dikgwedi a rera mo Judea e bile a tsamaya mo Samarea yotlhe. Morago ga moo, ka Tlolaganyo ya 31 C.E., Bajuda kwa Jerusalema ba ne ba leka go mmolaya. Mo ngwageng o o latelang le halofo, Jesu o ne a fetsa nako e ntsi a rera kwa Galalea. Mo nakong eo batho ba le bantsi ba ne ba nna balatedi ba gagwe. Fa a le kwa Galalea o ne a katisa baaposetoloi ba gagwe, go tswa foo a bo a ba laela a re: “Lo rere lo re: ‘Bogosi jwa magodimo bo atametse.’” (Mathaio 10:5-7) Gone jaanong o rulaganya letsholo la go rera mo Judea.

Jesu o simolotse letsholo leno ka balatedi ba gagwe ba le 70 mme a bo a ba romela ka bobedi le bobedi. Go na le ditlhopha tse 35 tsa bareri ba dikgang tsa Bogosi mo tshimong e e nang le ‘thobo e kgolo, mme badiri ba le mmalwa.’ (Luke 10:2) Ba tla ya kwa mafelong a Jesu a tlileng go ya kwa go one. Balatedi bano ba tshwanetse go fodisa batho le go rera molaetsa o Jesu a ntseng bua ka one.

Ga ba rute mo di sinagogeng. Jesu o ba laela gore ba latele batho kwa matlong a bone. O ba raya a re, “Fa lo tsena mo ntlong epe fela, lo bue pele lo re: ‘A ntlo eno e nne le kagiso.’ Mme fa motho yo o ratang kagiso a le gone, kagiso ya lona e tla nna mo go ene.” Ba tshwanetse go rera molaetsa ofe? Jesu o ba raya a re: “Lo re: ‘Bogosi Jwa Modimo bo atametse.’”—Luke 10:5-9.

Ditaelo tse Jesu a di nayang balatedi ba gagwe ba ba 70, di tshwana le tse a kileng a di naya baaposetoloi ba gagwe ba ba 12 ngwaga pelenyana. O ba tlhagisa gore ga se batho botlhe ba ba tla ba amogelang. Le fa go ntse jalo, tiro e ba e dirang e tla thusa batho ba ba reetsang molaetsa gore fa Jesu a tla moragonyana, bontsi jwa bone ba bo ba ikemiseditse go mo amogela le go ithuta mo go ene.

Go ise go ye kae, bareri bano ba Bogosi ba ba 70 ba boela kwa go Jesu. Ba mmolelela jaana ba itumetse: “Morena, tota le madimona re kgona go a leleka re dirisa leina la gago.” Pego eno e itumedisa Jesu thata a bo a re: “Ke bona Satane a setse a ole jaaka legadima a tswa kwa legodimong. Bonang, ke lo neile taolo ya gore lo gatake dinoga le diphepheng.”—Luke 10:17-19.

Jesu o tlhomamisetsa barutwa ba gagwe gore ba tla fenya dilo tse di ka ba gobatsang; ka tsela ya tshwantshetso ba tla bo ba gataka dinoga le diphepheng. Mo godimo ga moo, ba ka tlhatswega pelo gore mo nakong e e tlang Satane o tla wa go tswa kwa legodimong. Gape Jesu o thusa balatedi bano ba gagwe gore ba lemoge gore selo sa botlhokwa thata ke sefe. O ba raya a re: “Lo se ka lwa itumelela gore lo kgona go leleka madimona, go na le moo, itumeleleng gore maina a lona a kwadilwe kwa magodimong.”—Luke 10:20.

Jesu o phophoma ka boitumelo a bo a baka Rraagwe ka go bo a dirisitse batlhanka bano ba ba boikokobetso ka tsela e e maatla. Go tswa foo, o leba barutwa ba gagwe a bo a ba raya a re: “Go itumela batho ba ba bonang dilo tse lo di bonang. Gonne ke a lo bolelela, baporofeti ba le bantsi le dikgosi ba ne ba eletsa go bona dilo tse lo di bonang, le fa go ntse jalo ga ba a ka ba di bona, e bile ba ne ba eletsa go utlwa dilo tse lo di utlwang, le fa go ntse jalo ga ba a ka ba di utlwa.”—Luke 10:23, 24.