Kgaolo 81

Maiteko a Mangwe a go Bolaya Jesu

EREKA e le nako ya mariga, Jesu o tsamaya fa loobong lo lo bidiwang mathudi a ga Solomone. Le bapile le tempele. Bajuda ba mo phuthaganela fano ba bo ba simolola go re: “U tla re akgaakga mo pelaeloñ ka lobaka lo lo kaee? Ha u le èna Keresete, re bolèlèlè ka thanolō.”

“Ke lo boleletse,” Jesu o a araba, “me ga lo dumele.” Jesu o ne a sa ba bolelela ka tlhamalalo gore ke ene Keresete, jaaka a ne a bolelela mosadi wa Mosamaria kwa sedibeng. Lefa go le jalo, totatota o ne a setse a senotse gore ke mang fa a ne a ba tlhalosetsa gore o ne a tswa kwa legodimong le gore o ne a nnile gone pele ga Aberahame.

Lefa go ntse jalo, Jesu, o batla gore batho ba itirele tshwetso ka bobone gore ke ene Keresete ka go bapisa ditiro tsa gagwe le seo Bibela e se boleletseng pele gore se tla diragadiwa ke Keresete. Ke gone ka moo a neng a bolelela barutwa ba gagwe pele ga foo gore ba seka ba bolelela ope gore ke ene Keresete. Mme ke gone ka moo jaanong a tswelelang ka go bolelela Bajuda bano ba ba galefileng a re: “Ditihō tse ke di dihañ ka leina ya ga Rrè, cōna di shupa kaga me. Me ga lo dumele.”

Ke ka ntlhayang fa ba sa dumele? A ke ka ntlha ya go bo go se na bosupi jwa gore Jesu ke ene Keresete? Nnyaa, mme ke ka ntlha ya lebaka leo Jesu a le ba nayang fa a ba raya a re: “Ka go bo lo se ba dinku tsa me. Dinku tsa me di utlwa lencwe ya me, me kea di itse, me di ntshale moragō: Me ke di naea botshelō yo bo sa khutleñ; me ga di ketla di nyèlèla gopè, e bile ga go opè eo o tla di phamolañ mo seatleñ sa me. Rrè eo o di nneileñ, o mogolo go botlhe; me ga go opè eo o nonohileñ go di phamola mo seatleñ sa ga Rara.”

Jesu jaanong o tlhalosa go atamalana ga gagwe thata le Rraagwe fa a tlhalosa jaana: “Nna le Rara re moñwe hèla.” Ereka Jesu a le mo lefatsheng mme Rraagwe a le kwa legodimong, seno ka phepafalo ga se reye gore totatota ene le Rraagwe, ka sebele, ba bangwe fela. Go na le moo, o raya gore ba boikaelelo bongwe fela, ba a utlwana.

Ba galefisitswe ke mafoko a ga Jesu, Bajuda ba sela maje go mmolaya, fela jaaka ba ile ba dira pelenyana, ka nako ya Moletlo wa Metlaagana kana ya Diobo. Jesu o bolelela bao e tlileng go nna babolai ba gagwe ka bopelokgale, a re: “Ke lo bontshitse ditihō di le dintsi tse di molemō tsa ga Rara; lo nkgobotleletsa tihō efe ea cōna?”

“Ga re gu kgobotleletse tihō e e molemō,” ba araba jalo, “ha e se tlhapaco, le ka ntlha ea go bu u re u le motho, u itiha Modimo.” Ereka Jesu a ise a ko a iphake gore ke modimo, ke ka ntlhayang fa Bajuda ba bua seno?

Ka phepafalo ke ka gonne Jesu a bolela gore o na le dinonofo tseo ba dumelang gore ke Modimo fela a ka nnang natso. Ka sekai, o fetsa go re ka “dinku,” “ke di naea botshelō yo bo sa khutleñ,” eleng selo seo motho ope a ka se kang a se dira. Lefa go ntse jalo, Bajuda, ba itlhokomolosa lebaka la gore Jesu o bolela fa a newa maatla ke Rraagwe.

Go bontsha gore Jesu o itsaya a sa lekane le Modimo, o bontsha seo morago ka go ba botsa a re: “A ga goa kwalwa mo molaoñ [mo go Pesalema 82:6] oa lona, ga twe, Ke rile, Lo medimo? Ha a biditse bōnè medimo ba lehoko ya Modimo le tsileñ kwa go bōnè . . . A lo raea èna eo Rara o mo itshepisitseñ, a mo roma mo lehatshiñ, loa re, Ua tlhapatsa; ka go bo ke rile Ke Morwa Modimo?”

Ereka Dikwalo di bitsa le eleng baatlhodi ba batho ba ba sa siamang “medimo,” Bajuda bano ba ka bona Jesu molato jang fa a re, “Ke Morwa Modimo”? Jesu o oketsa jaana: “Ha ke sa dihe ditihō tsa ga Rrè, lo se ka loa ntumèla. Me ha ke diha cōna, leha lo sa dumele nna, dumèlañ ditihō; gore lo itse, lo bo lo tlhaloganyè, ha Rara a le mo go nna, le nna mo go Rara.”

Fa Jesu a bua seno, Bajuda ba leka go mo tshwara. Mme o falola jaaka a falotse pelenyana kwa Moletlong wa Metlaagana. O tswa mo Jerusalema a bo a kgabaganya Noka ya Joredane go ya koo Johane a neng a simolola go kolobetsa gone mo e ka nnang dingwaga di ka nna nnè tse di fetileng. Go lebega ekete lefelo leno ga le kgakala le lotshitshi lo lo kafa borwa jwa Lewatle la Galilea, mo e ka nnang mosepele wa malatsi a le mabedi go tswa mo Jerusalema.

Batho ba le bantsi ba tla kwa go Jesu mo lefelong leno ba bo ba simolola go re: “Le galè Yohane ga a ka a diha seshupō sepè: me dilō cotlhe hèla tse Yohane o di buileñ kaga monna eo, e ne e le boamarure.” Ka jalo ba le bantsi fano ba dumela mo go Jesu. Yohane 10:22-42; 4:26; 8:23, 58; Mathaio 16:20.

▪ Jesu o ne a batla gore batho ba supe fa e le Keresete ka eng?

▪ Jesu le Rraagwe ba bangwe fela ka tsela efe?

▪ Ke ka ntlhayang fa Bajuda ba bolela gore Jesu o itira modimo?

▪ Fa Jesu a tsopola mo go Dipesalema o bontsha jang gore ga a iphake gore o lekana le Modimo?