Kgaolo 91

Fa Lasaro A Tsosiwa

JESU, mmogo le bao ba tsamayang nae, jaanong o fitlha kwa phupung ya ga Lasaro. Totatota, ke logaga leo go beilweng letlapa mo matsenong a lone. “Tlosañ letlapa,” ga rialo Jesu.

Maratha o a gana, a ise a tlhaloganye seo Jesu a ikaeletseng go se dira. “Morèna,” a rialo, “gompiyeno o setse a nkga: gonne o tlhotse malatsi a le manè a shule.”

Mme Jesu o botsa ka go re: “A ga kea gu raea, ka re, ha u nu u dumèla, u tla bōna kgalalèlō ea Modimo?”

Ka jalo letlapa le a tlosiwa. Morago ga moo Jesu o a lelala a bo a rapela a re: “Rara, kea gu leboga ka u nkutlwile: Me ke ne ke itse ha u nkutlwa galè: me ka bo ke buisiwa ke bontsi yoa batho yo bo emeñ ha ba ntikanyeditse, ka re, ba tlè ba dumèlè ha u nthomile.” Jesu o rapela a utlwiwa ke mongwe le mongwe gore batho ba tle ba itse gore seo a tlileng go se dira se tla diragadiwa ka thata e e tswang kwa Modimong. Ka jalo o goa jaana ka lentswe le legolo: “Lasaro, cwa.”

Fa a bua jalo, Lasaro o a tswa. Matsogo a gagwe le maoto a gagwe a santse a bofilwe ka matsela a phitlho, le sefatlhego sa gagwe se santse se bofilwe ka matsela. “Mo hapololeñ, lo mo lesè a tsamaeè,” ga rialo Jesu.

Bontsi jwa Bajuda bao ba neng ba tlile go gomotsa Maria le Maratha fa ba bona kgakgamatso eno, ba dumela mo go Jesu. Lefa go ntse jalo, ba bangwe ba ya go bolelela Bafarisai ka seo se diragetseng. Mme bone le baperisiti ba bagolo ka bonako fela ba rulaganyetsa kopano ya kgotlatshekelo e kgolo ya Bajuda, ebong Sanehederine.

Sanehederine e tlhamilwe ka moperisiti yo mogolo mo nakong eo, ebong Kaiafase, le Bafarasai le Basadukai, le baperisiti ba bagolo, le baperisiti ba bagolo ba pele. Mme bone ba le mo khutsafalong ba bolela ba re: “Re dihañ? gonne monna eo o diha dichupō di le dintsi. Ha re mo lesa hèla yana, batho botlhe ba tla dumèla mo go èna; me Baroma ba tla tla ba tlosa bonnō yoa rona, le morahe oa rona.”

Lemororo baeteledipele bano ba bodumedi ba dumela gore Jesu “o diha dichupō di le dintsi,” selo se le sengwe fela seo ba amegileng ka sone ke boemo jwa bone le bolaodi jwa bone. Go tsoga ga ga Lasaro go ama segolobogolo Basadukai mo go botlhoko, ereka ba sa dumele mo tsogong.

Kaiafase, yo gongwe eleng Mosadukai, jaanong a re: “Ga lo itse sepè, Le gōna ga lo tlhokomele ha go ka nna molemō mo go lona gore motho a le moñwe hèla a shwèlè seshaba, e señ morahe otlhe go nyèlèla.”

Modimo o ne o tlhotlheletsa Kaiafase gore a bolele seno, ka gonne moaposetoloi Johane o ne a kwala jaana moragonyana: “Me yana go mo [Kaiafase] a bo a sa go bue hèla ka esi.” Seo Kaiafase a neng tota a se bolela e ne e le gore Jesu o tshwanetse a bolawa go Mo thibela gore a seka a nna bodiphatsa mo maemong a bone le mo seriting sa bone. Lefa go le jalo, go ya ka Johane, ‘Kaiafase o ne a bolelela pele gore Jesu o ne a tla swela morafe, mme eseng morafe oo o le osi, mme le gone e le gore a tle a phuthele gongwe bana ba Modimo ba ba faletseng.’ Eleruri, ebile ke boikaelelo jwa Modimo gore Morwawe a swe jaaka thekololo ya botlhe.

Kaiafase jaanong o a atlega mo go tlhotlheletseng Sanehederine gore e dire dithulaganyo tsa go bolaya Jesu. Mme Jesu, yo go bonalang a ne a utlwile ka dithulaganyo tseno go tswa mo go Nikodimo, ebong leloko la Sanehederine leo le neng le le botsalano go ene, o tswa mo lefelong leo. Yohane 11:38-54.

▪ Ke ka ntlhayang fa Jesu a rapela mo kutlong ya mongwe le mongwe pele ga a tsosa Lasaro?

▪ Bao ba ileng ba bona tsogo eno ba ne ba arabela jang?

▪ Ke eng seo se senolang boikepo jwa maloko a Sanehederine?

▪ Kaiafase o ne a ikemiseditse eng, mme Modimo o ne wa mo dirisa gore a bolelele pele eng?