Tsholofelo E e Sa Tshwaneng le Epe!
“Mongwe le mongwe yo o tshelang e bile a supa tumelo mo go nna ga a kitla a swa ka gope.”—JOHANE 11:26.
1. Dimilione tse gone jaanong di suleng di tla tsosediwa mo tikologong e e ntseng jang?
FA DIMILIONE tsa batho di tsoga mo baswing, ga di kitla di tsogela mo lefatsheng le le lolea. (Ditiro 24:15) Ba tla tsogela mo tikologong e ntle e e tlhabolotsweng mme ba tla fitlhela ba baakanyeditswe matlo, diaparo le dijo tse dintsintsi. Ke bomang ba ba tla ba baakanyetsang dilo tseno? Ga go na pelaelo gore go tla bo go na le batho ba ba tshelang mo lefatsheng le lesha pele ga baswi ba tsosiwa. Mme ke bomang batho bao?
2-4. Ke tsholofelo efe e e sa tshwaneng le epe e batho ba ba tshelang mo “malatsing a bofelo” ba nang le yone?
2 Boporofeti jwa Baebele jo bo ntseng bo direga bo supa gore re tshela mo “malatsing a bofelo” a tsamaiso eno ya dilo.a (2 Timotheo 3:1) Go ise go ye kae Jehofa Modimo o tla bo a tsenya letsogo mo dikgannyeng tsa batho mme a fedisa boikepo jotlhe mo lefatsheng. (Pesalema 37:10, 11; Diane 2:21, 22) Ka nako eo, go tla direga eng ka batho ba ba direlang Modimo ka boikanyegi?
3 Jehofa ga a kitla a fedisa basiami le baikepi. (Pesalema 145:20) Ga a ise a ko a tsamaye a dire selo se se ntseng jalo e bile ga a kitla a dira jalo fa a tlosa boikepo mo lefatsheng. (Bapisa Genesise 18:22, 23, 26.) Tota e bile, buka ya bofelo ya Baebele e bua ka “boidiidi jo bogolo jo go seng motho ope yo o neng a kgona go bo bala, bo tswa mo merafeng yotlhe le ditso le batho le diteme,” ba tswa mo “pitlaganong e kgolo.” (Tshenolo 7:9-14) Ee, matshwititshwiti a batho a tla falola pitlagano e kgolo e go tla fedisiwang lefatshe la gone jaanong le le boikepo ka yone mme ba tla tsena mo lefatsheng le lesha la Modimo. Mo go lone, thulaganyo e e molemo ya Modimo ya go golola batho mo boleong le mo losong e tla ba solegelwa molemo ka botlalo. (Tshenolo 22:1, 2) Ka gone, go ka direga gore “boidiidi jo bogolo” jwa batho bo se ka jwa swa ka gope. A tsholofelo e e sa tshwaneng le epe ruri!
4 A re ka tshepa tsholofelo eo e e gakgamatsang? Ee ruri! Jesu Keresete ka boene o ile a bontsha gore go ne go tla nna le nako e batho ba neng ba tla tshela ba sa swe ka gope. Pele fela ga gore Jesu a tsose tsala ya gagwe e bong Lasaro, o ile a raya Maratha a re: “Mongwe le mongwe yo o tshelang e bile a supa tumelo mo go nna, le mororo aa swa, o tla tshela.”—Johane 11:26.
Le Wena o ka Tshelela Ruri
5, 6. O tshwanetse go dira eng fa e le gore o batla go tshelela ruri mo Paradaiseng mo lefatsheng?
5 A o batla go tshelela ruri mo Paradaiseng mo lefatsheng? A o eletsa go boa o bona baratiwa ba gago gape? He o tshwanetse go nna le kitso ka Modimo le maikaelelo a gagwe. Fa Jesu a ne a rapela Modimo, o ile a re: “Seno se raya botshelo jo bo sa khutleng, go anya ga bone kitso kaga gago, Modimo o o osi wa boammaaruri, le kaga yo o mo rometseng, Jesu Keresete.”—Johane 17:3.
6 Modimo o rata gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Timotheo 2:3, 4) Eno ke nako ya gore gone jaanong o ithute gore o ka dira eng gore o tshelele ruri mo Paradaiseng mo lefatsheng wena le dimilione tse dingwe tsa batho ba ba setseng ba dira thato ya Modimo. Basupi ba ga Jehofa ba tla itumelela go go thusa go ithuta go le gontsi ka Modimo le dilo tse a di batlang. Ke eng fa o sa ikgolaganye le bone kwa Holong ya Bogosi e e gaufi le wena kana o kwalele kwa atereseng e e gaufi le wena mo go tse di tlhomagantsweng mo tsebeng e e latelang?
[Ntlha e e kwa tlase]
a Bona buka ya Kitso E E Isang Botshelong Jo bo Sa Khutleng, ditsebe 98-107, e e gatisitsweng ke Watchtower Bible and Tract Society of New York, Inc.
[Setshwantsho mo go tsebe 31]
Go ka direga gore “boidiidi jo bogolo” jwa batho bo se ka jwa swa ka gope