Kgaolo Ya Borobongwe

Maatla a Tsholofelo ya Tsogo

1. Fa e ka bo e se ka tsogo, go ka bo go na le tebelelo efe ka batho ba ba suleng?

A O KILE wa swelwa ke batho ba o ba ratang? Fa e ne e se ka tsogo, go ka bo go se na tsholofelo epe ya gore o ka tsamaya o ba bona gape. Ba ne ba tla nna ba le mo seemong se Baebele e se tlhalosang fa e bolela jaana: “Fa e le baswi bone, ga ba itse sepe gotlhelele, . . . gonne ga go na tiro le fa e le go loga maano le fa e le kitso le fa e le botlhale kwa Sheole [lebitla], lefelo le o yang kwa go lone.”—Moreri 9:5, 10.

2. Tsogo e dira gore batho ba nne le tebelelo efe e e molemolemo?

² Ka bopelotlhomogi, Jehofa o dirile gore ka tsogo matshutitshuti a batho ba ba suleng ba nne le sebaka sa gore ba tsoge mo baswing mme ba tshele ka bosakhutleng. Seno se bolela gore o ka nna le tsholofelo e e itumedisang ya gore letsatsi lengwe, mo lefatsheng la Modimo le lesha, o tla boa o kopana le baratiwa ba ba robetseng mo losong.—Mareko 5:35, 41, 42; Ditiro 9:36-41.

3. (a) Tsogo e ile ya itshupa e le botlhokwa ka ditsela dife mo go diragadiweng ga boikaelelo jwa ga Jehofa? (b) Tsholofelo ya tsogo e re naya maatla segolobogolo mo maemong afe?

³ Ka ntlha ya tsogo, ga re tlhoke go boifa loso lebaibai. Jehofa a ka kgona go dumelela Satane a dira sengwe le sengwe se a se batlang go leka go supa maiphako a gagwe a bopelompe a gore “sengwe le sengwe se monna a nang le sone o tla se ntsha mo boemong jwa moya wa gagwe” mme ga a na a letla gore batlhanka ba gagwe ba ba ikanyegang ba gobalele ruri. (Jobe 2:4) Jesu o ne a ikanyega mo Modimong go fitlha a swa, mme ka gone Modimo o ne a mo tsosa gore a ye go tshela kwa legodimong. Ka jalo, Jesu o ne a kgona go isa boleng jwa setlhabelo sa botshelo jwa gagwe jo bo itekanetseng fa pele ga setulo sa ga Rraagwe sa bogosi sa selegodimo, mme seo sa re solegela molemo ka gonne se boloka matshelo a rona. Ka tsogo, ba “letsomanyane,” e le babusimmogo le Keresete, ba na le tsholofelo ya go kopana le ene kwa Bogosing jwa selegodimo. (Luke 12:32) Ba bangwe bone ba na le tsholofelo ya go tsosediwa kwa botshelong jo bo sa khutleng mo lefatsheng la paradaise. (Pesalema 37:11, 29) Bakeresete botlhe ba fitlhela tsholofelo ya tsogo e ba naya maatla “a a fetang a a tlwaelegileng” fa ba kopana le diteko tse di dirang gore ba lebane le loso.—2 Bakorintha 4:7.

Lebaka La go Bo e Le Botlhokwa mo Tumelong ya Bokeresete

4. (a) Tsogo ke “thuto ya motheo ya ntlhantlha” ka tsela efe? (b) Tsogo e kaya eng mo bathong ka kakaretso?

⁴ Jaaka go boletswe mo go Bahebera 6:1, 2, tsogo ke “thuto ya motheo ya ntlhantlha.” Ke karolo ya motheo wa tumelo e, fa re ne re se na yone, re neng re ka se ka ra nna Bakeresete ba ba godileng. (1 Bakorintha 15:16-19) Le fa go ntse jalo, thuto ya Baebele ya tsogo ga e a tlwaelega mo dikakanyong tsa batho mo lefatsheng ka kakaretso. E re ka batho ba bantsi thata ba sa kgatlhegele dilo tsa semoya, ba bona botshelo jono e le jone fela jwa mmatota. Ka gone, ba tshelela go ijesa monate. Gape go na le batho ba ba mo ditumelong tse di sa bolong go nna di amogelwa go tloga bogologolo—mo teng le ka kwa ntle ga Labokeresete—ba ba akanyang gore ba na le moya o o sa sweng. Mme tumelo eo ga e tsamaisane le thuto ya Baebele ya tsogo, ka gonne tsogo e ne e ka se tlhokege fa batho ba ka bo ba na le moya o o sa sweng. Go leka go dumalanya dikgopolo tseno tse pedi go tlhakanya tlhogo mo boemong jwa go naya tsholofelo. Re ka thusa jang batho ba ba dipelo di ikanyegang ba ba batlang go itse boammaaruri?

5. (a) Pele motho a ka tlhaloganya tsogo, o tshwanetse go itse eng? (b) O ne o ka dirisa ditemana dife go tlhalosa moya? seemo sa baswi? (c) Go ka dirwang fa mongwe a dirisa thanolo ya Baebele e go lebegang e bipa boammaaruri?

⁵ Pele batho bano ba ka tlhaloganya gore tsogo ke thulaganyo e e molemo go le kana kang, ba tshwanetse go tlhaloganya kgang ya moya le ya seemo sa baswi sentle. Gantsi, ditemana di sekae fela di lekane go dira gore dintlha tseno di utlwale sentle mo mothong yo o nyoretsweng boammaaruri jwa Baebele. (Genesise 2:7; Pesalema 146:3, 4; Esekiele 18:4) Le fa go ntse jalo, dithanolo dingwe tsa Baebele tsa segompieno le dikgatiso tse di e tlhalosang ka mafoko a mangwe di bipa boammaaruri kaga moya. Ka jalo go ka nna ga tlhokega gore re sekaseke mafoko a a dirisitsweng mo dipuong tsa ntlhantlha tsa Baebele.

6. O ne o ka thusa motho jang go tlhaloganya gore moya ke eng?

⁶ Thanolo ya Lefatshe le Lesha e thusa thata mo ntlheng eno ka gonne ka metlha e ranola lefoko la Sehebera e leng neʹphesh le le le tsamaisanang le lone la Segerika e leng psy·kheʹ e re “moya.” Mametlelelo ya thanolo eno e na le lenaane la ditemana di le dintsi tse di nang le mafoko ano. Dithanolo tse dingwe di le dintsi tsa Baebele ga di ranole ka mafoko a a tshwanang ka dinako tsotlhe mme di ka ranola mafoko ano a puo ya ntlhantlha go nna “moya” mme gape le “sebopiwa,” “setshedi,” “motho,” le “botshelo”; “neʹphesh ya me” e ka ranolwa go twe “nna,” mme “neʹphesh ya gago” e ka ranolwa go twe “wena.” Go bapisa dithanolo tse dingwe tsa Baebele le Thanolo ya Lefatshe le Lesha go tla thusa moithuti yo o peloephepa go tlhaloganya gore mafoko a puo ya ntlhantlha a a ranotsweng go twe “moya” a dirisiwa fa go buiwa ka batho mmogo le ka diphologolo. Mme mafoko ano le ka motlha ga a fe kgopolo ya gore moya ke sengwe se se sa bonaleng, se se sa tshwaregeng se se ka tswang mo mmeleng fa motho a swa mme se bo se tswelela se tshela felo gongwe.

7. O ne o ka dirisa Baebele jang go tlhalosa boemo jwa batho ba ba leng kwa Sheole? kwa Hadese? kwa Gehena?

⁷ Gape Thanolo ya Lefatshe le Lesha ka metlha e dirisa lefoko “Sheole” go ranola lefoko la Sehebera sheʼohlʹ le “Hadese” go ranola lefoko la Segerika haiʹdes le “Gehena” go ranola lefoko la Segerika geʹen·na. “Sheole” ke lefoko le le tsamaisanang le “Hadese.” (Pesalema 16:10; Ditiro 2:27) Baebele e bontsha sentle gore Sheole le Hadese di kaya lebitla la batho le le tlwaelegileng e bile di amana le loso, e seng botshelo. (Pesalema 89:48; Tshenolo 20:13) Dikwalo gape di naya tsholofelo ya gore batho ba tla boa kwa lebitleng le le tlwaelegileng ka go tsosiwa. (Jobe 14:13; Ditiro 2:31) Mme ba ba yang kwa Gehena bone ga ba newe tsholofelo epe ya go tshela mo isagweng, mme le gone koo ga go ke go buiwa ka moya go twe o tswelela pele o tshela teng.—Mathaio 10:28.

8. Go tlhaloganya tsogo sentle go ka tlhotlheletsa boikutlo le ditiro tsa motho jang?

⁸ Fa dintlha tseo di tlhalositswe sentle, ke gone motho a ka thusiwang go tlhaloganya gore tsogo e ka mo ama jang. A ka simolola go anaanela lorato lo Jehofa a lo bontshitseng ka go dira thulaganyo e e molemo eno. Khutsafalo ya ba ba swetsweng ke baratiwa ba bone e ka kokobediwa ke go lebelela ka boitumelo kwa nakong e ka yone ba tla bong ba kopana le bone gape kwa lefatsheng la Modimo le lesha. Go tlhaloganya dintlha tseno gape go re thusa go tlhaloganya se loso lwa ga Keresete lo se kayang. Bakeresete ba lekgolo la ntlha la dingwaga ba ne ba lemoga gore tsogo ya ga Jesu Keresete e botlhokwa mo tumelong ya Bokeresete, e bulela ba bangwe tsela ya gore ba tsosiwe. Ba ne ba rera ka tsogo ya ga Jesu ka tlhoafalo le tsholofelo eo e e nayang. Ka jalo le gompieno batho ba ba anaanelang tsogo ba tlhoafalela go bolelela ba bangwe boammaaruri jono jo bo tlhwatlhwakgolo.—Ditiro 5:30-32; 10:42, 43.

Go Dirisa ‘Selotlolo sa Hadese’

9. Jesu o dirisa jang “dilotlolo tsa loso le tsa Hadese” la ntlha?

⁹ Botlhe ba ba tlileng go nna le Keresete mo Bogosing jwa gagwe jwa selegodimo ba tshwanetse ba swa kgabagare. Mme ba itse sentle kgothatso eo a ileng a e bolela fa a ne a re: “Ke ne ka swa, mme, bona! ke tshela ka bosaengkae le go ya go ile, mme ke na le dilotlolo tsa loso le tsa Hadese.” (Tshenolo 1:18) O ne a kaya eng? O ne a bua ka se se mo diragaletseng. Le ene o ne a kile a swa. Mme Modimo ga a ka a mo tlogela kwa Hadese. Ka letsatsi la boraro, Jehofa ka boene o ne a mo tsosetsa mo botshelong jwa semoya mme a mo naya bosasweng. (Ditiro 2:32, 33; 10:40) Mo godimo ga moo, Modimo o ne a mo naya “dilotlolo tsa loso le tsa Hadese” gore a di dirisetse go golola ba bangwe mo lebitleng le le tlwaelegileng la batho le mo diphelelong tsa boleo jwa ga Adame. E re ka Jesu a na le dilotlolo tseo, o kgona go tsosa balatedi ba gagwe ba ba ikanyegang mo baswing. La ntlha o tsosa maloko a phuthego ya gagwe a a tloditsweng ka moya, a ba naya mpho e e tlhwatlhwakgolo ya go tshela ba sa swe kwa legodimong, fela jaaka Rraagwe a mo e neile.—Baroma 6:5; Bafilipi 3:20, 21.

10. Tsogo ya Bakeresete ba ba ikanyegang ba ba tloditsweng e diragala leng?

¹⁰ Bakeresete ba ba ikanyegang ba ba tloditsweng ba ne ba tla bona go tsosediwa kwa legodimong jalo leng e le la ntlha? Baebele e bontsha gore go setse go simologile. Moaposetoloi Paulo o ne a tlhalosa gore ba ne ba tla tsosiwa ‘ka nako ya go nna gone ga ga Keresete,’ mo go simologileng ka ngwaga wa 1914. (1 Bakorintha 15:23) Fa batlodiwa ba ba ikanyegang ba wetsa tiro ya bone ya mo lefatsheng gone jaanong mo nakong ya go nna gone ga gagwe, ga ba tlhoke go nna ba sule go fitlha Morena wa bone a boa. Fela fa ba sena go swa, ba tsosiwa mo moyeng, ba “fetolwa, ka nakwana, ka ponyo ya leitlho.” A bo ba itumela jang ne, e re ka ditiro tse di molemo tse ba di dirileng “di tsamaya le bone”!—1 Bakorintha 15:51, 52; Tshenolo 14:13.

11. Batho ka kakaretso ba tla nna le tsogo efe, mme e tla simolola leng?

¹¹ Mme tsogo ya baruaboswa ba Bogosi go ya botshelong jwa selegodimo ga se yone fela tsogo e e tla diragalang. Lebaka la go bo e bidiwa ‘tsogo ya ntlha’ mo go Tshenolo 20:6 le bontsha gore go na le e nngwe e e tla e latelang. Ba ba solegelwang molemo ke tsogo eno ya bofelo ba tla nna le tsholofelo e e itumedisang ya botshelo jo bo sa khutleng mo lefatsheng la paradaise. Yone e tla diragala leng? Buka ya Tshenolo e bontsha gore e tla nna morago ga “lefatshe le legodimo”—tsamaiso e e boikepo ya jaanong ya dilo, le babusi ba yone—di sena go tlosiwa. Bokhutlo joo jwa tsamaiso ya bogologolo bo gaufi thata. Morago ga moo, ka nako ya Modimo e e tshwanetseng, tsogo ya mo lefatsheng e tla simolola.—Tshenolo 20:11, 12.

12. Go tla akarediwa bomang mo bathong ba ba ikanyegang ba ba tla tsosediwang go tla go tshela mo lefatsheng, mme ke ka ntlha yang fa eo e le tebelelo e e kgatlhang?

¹² Go tla tsosiwa bomang mo tsogong eo ya mo lefatsheng? Bangwe ba bone e tla bo e le batlhanka ba ba ikanyegang ba ga Jehofa go tswa metlheng ya bogologolo, banna le basadi ba ka ntlha ya tumelo ya bone e e nonofileng mo tsogong, ba neng “ba ka se ka ba amogela kgololo ka thekololo nngwe.” Ka mantswe a mangwe, ba ne ba ka se ka ba latlha boikanyegi jwa bone mo Modimong e le fela gore ba se ka ba swa loso lo lo botlhoko le go swa e ise e nne nako. A bo go tla itumedisa jang ne go ba itse ka namana le go ba utlwa ba re bolelela ka namana dintlha ka botlalo tsa dilo tse di begilweng go se kae fela mo Baebeleng! Ba bangwe gape ba ba tla tsosediwang go tla go tshela mo lefatsheng e tla bo e le Abele, mosupi wa ntlha yo o ikanyegang wa ga Jehofa; Enoke le Noa, baboledi ba ba pelokgale ba molaetsa wa Modimo wa tlhagiso pele ga Morwalela; Aborahame le Sara, ba ba neng ba tlhokomela baengele; Moshe, yo Molao o neng wa newa ka ene kwa Thabeng ya Sinai; baporofeti ba ba pelokgale ba ba jaaka Jeremia, yo o neng a bona fa Jerusalema e senngwa ka 607 B.C.E.; le Johane Mokolobetsi, yo o neng a utlwa Modimo ka boene a bolela fa Jesu e le Morwawe. Gape go tla bo go na le banna le basadi ba ba ikanyegang ba le bantsi ba ba suleng mo metlheng eno ya bofelo ya tsamaiso eno e e boikepo ya dilo.—Bahebera 11:4-38; Mathaio 11:11.

13, 14. (a) Go tla diragalang ka Hadese le baswi ba ba mo go yone? (b) Go tla tsosiwa le bomang, mme ka ntlha yang?

¹³ Fa nako e ntse e ya, go tla tsosiwa le ba bangwe gape mo baswing kwantle ga batlhanka ba ba ikanyegang ba Modimo, mme ga go ne go sala ope mo lebitleng le le tlwaelegileng la batho. Selekanyo se lebitla leno le tlhotlhoriwang baswi ba lone ka sone se bonwa mo tseleng e Jesu a tla dirisang ‘selotlolo sa Hadese’ ka yone mo bathong. Seno se bontshiwa mo ponatshegelong e e neng ya newa moaposetoloi Johane, e mo go yone a neng a bona Hadese a “latlhelwa mo bodibeng jwa molelo.” (Tshenolo 20:14) Seo se kayang? Se kaya gore Hadese, lebitla le le tlwaelegileng la batho, le senyediwa ruri. Ga le tlhole le nna teng, go ntshitswe baswi ba lone botlhe, ka gonne mo godimo ga go tsosa baobamedi ba ga Jehofa botlhe ba ba ikanyegang, Jesu gape o tla tsosa le ba ba sa siamang tota. Lefoko la Modimo le re tlhomamisetsa jaana: “Go tlile go nna le tsogo ya ba ba siameng mmogo le ba ba sa siamang.”—Ditiro 24:15.

¹⁴ Ga go bape ba batho bano ba ba sa siamang ba ba tla tsosediwang fela gore ba atlholelwe loso gape. Mo tsamaisong ya tshiamo e e tla bong e le teng mo lefatsheng lotlhe mo Bogosing jwa Modimo, ba tla thusiwa go tshela tumalanong le ditsela tsa ga Jehofa. Ponatshegelo e ne ya bontsha gore “lokwalo lwa momeno lwa botshelo” lo tla bulwa. Ka gone, ba tla nna le sebaka sa gore maina a bone a tsenngwe mo go lone. Ba tla “atlholwa mongwe le mongwe go ya ka ditiro tsa bone” tse ba di dirileng morago ga go tsosiwa. (Tshenolo 20:12, 13) Ka jalo, fa go iwa ka seemo sa bone kwa bofelong, ya bone e ka nna ‘tsogo ya botshelo’ mme ga e kitla e nna ‘tsogo ya katlholo [e e botlhoko]’ e go se nang gore ba ka e tila.—Johane 5:28, 29.

15. (a) Ke bomang ba ba se kitlang ba tsosiwa? (b) Go itse boammaaruri kaga tsogo go tshwanetse ga re ama jang?

¹⁵ Le fa go ntse jalo, ga go ne go tsosiwa botlhe fela ba ba kileng ba tshela ba bo ba swa. Bangwe ba dirile maleo a go ka se kang ga kgonega gore a itshwarelwe. Bano ga ba kwa Hadese, mme ba kwa Gehena, kwa ba senyediwang ruri teng. Bangwe ba bone e tla bo e le ba ba bolailweng kwa ‘pitlaganong e kgolo,’ e e leng gaufi. (Mathaio 12:31, 32; 23:33; 24:21, 22; 25:41, 46; 2 Bathesalonika 1:6-9) Ka gone, le fa Jehofa a bontshitse bopelotlhomogi jo bogolo ka go ntsha baswi kwa Hadese, tsholofelo ya tsogo ga e dire gore gone jaanong re tshele ka tsela ya go se kgathale. Ba ba tsuologelang bolaodi jwa ga Jehofa ka boomo fela ba ka se tsosiwe. Kitso eno e tshwanetse ya re rotloetsa go bontsha gore ruri re anaanela bopelonomi jwa Modimo jo bo sa re tshwanelang ka go tshela go dumalana le thato ya gagwe.

Go Nonotshiwa ke Tsholofelo ya Tsogo

16. Tsholofelo ya tsogo e ka re nonotsha thata jang?

¹⁶ Rona ba re dumelang mo tsholofelong ya tsogo re kgona go nonotshiwa thata ke yone. Gone jaanong, fa re tsofala, re itse gore re ka se ka ra suteletsa loso kwa morago go ya go ile—le fa re ka dirisa kalafi ya mofuta ofe. (Moreri 8:8) Fa re ile ra direla Jehofa le phuthego ya gagwe ka boikanyegi, re ka leba kwa isagweng ka tsholofelo e e tletseng. Re itse gore ka tsogo, re tla kgona go tshela gape, ka nako ya Modimo e e tshwanetseng. Mme a bo e tla nna botshelo jo bo itumedisang jang ne! “Botshelo jwa mmatota,” jaaka moaposetoloi Paulo a ne a bo bitsa.—1 Timotheo 6:19; Bahebera 6:10-12.

17. Ke eng se se ka re thusang go nna re ikanyega mo go Jehofa?

¹⁷ Go itse gore go na le tsogo le go itse Ene yo e leng motswedi wa thulaganyo eo go a re nonotsha mo tumelong. Seno se re nonotsha gore re ikanyege mo Modimong tota le fa re tshosediwa ka go bolawa ke ba ba re bogisang setlhogo. Satane ga a bolo go dirisa poifo ya go tshaba go swa loso lwa tshoganetso go boloka batho ba le mo bokgobeng. Mme Jesu o ne a se na poifo e e ntseng jalo. O ne a ikanyega mo go Jehofa go fitlha losong. Jesu o ne a dirisa setlhabelo sa gagwe sa thekololo gore ba bangwe le bone ba tswe mo poifong e e ntseng jalo.—Bahebera 2:14, 15.

18. Ke eng se se thusitseng batlhanka ba ga Jehofa gore ba nne ba ntse ba ikanyega jaana?

¹⁸ Ka ntlha ya tumelo ya bone mo thulaganyong ya setlhabelo sa ga Keresete le mo tsogong, batlhanka ba ga Jehofa ba ile ba itirela hisitori e e tlhomologileng ya go nna babolokabothokgami. Fa ba gateletswe, ba ile ba supa gore ‘ga ba rate meya ya bone’ go feta Jehofa. (Tshenolo 12:11) Ba dirisa botlhale ka gonne ga ba tlole melaometheo ya Bokeresete ba leka go boloka botshelo jwa bone jwa jaanong. (Luke 9:24, 25) Ba itse gore le fa ba ka swa gone jaanong ka ntlha ya go tshegetsa bolaodi jwa ga Jehofa ka boikanyegi, o tla ba duela ka go ba tsosa. A o na le tumelo e e ntseng jalo? O tla nna le yone fa ruri o rata Jehofa le fa o isa pelong se tsholofelo ya tsogo tota e se kayang.

Motlotlo wa Poeletso

• Ke eng fa motho a tshwanetse go tlhaloganya moya le boemo jwa baswi pele a ka anaanela tsogo?

• Ke bomang ba ba tla tsogang mo baswing, mme kitso eno e tshwanetse ya re ama jang?

• Tsholofelo ya tsogo e re nonotsha jang?

[Setshwantsho mo go tsebe 84, 85]

Jehofa o solofetsa gore go tla nna le tsogo ya basiami mmogo le basiamolodi