Kgaolo Ya Lesomepedi

Bokao Jwa Kolobetso ya Gago

1. Ke ka ntlha yang fa mongwe le mongwe wa rona a tshwanetse a kgatlhegela go kolobediwa mo metsing?

JESU o ne a kolobediwa ka ngwaga wa 29 C.E., a inwa mo Nokeng ya Joredane ke Johane Mokolobetsi. Jehofa ka boene o ne a lebeletse mme a bolela fa a mo amogela. (Mathaio 3:16, 17) Ka go rialo Jesu o ne a tlhoma sekao se barutwa ba gagwe botlhe ba neng ba tla se latela. Dingwaga di le tharo le sephatlo morago ga moo, Jesu o ne a naya barutwa ba gagwe ditaelo tseno: “Taolo yotlhe ke e neilwe kwa legodimong le mo lefatsheng. Jalo tsamayang mme lo dire batho ba ditšhaba tsotlhe barutwa, lo ba kolobetse mo leineng la Rara le la Morwa le la moya o o boitshepo.” (Mathaio 28:18, 19) A o kolobeditswe go dumalana le se Jesu a neng a se laela foo? Fa go sa nna jalo, a o ipaakanyetsa go dira jalo?

2. Ke dipotso dife tse di tlhokang go arabiwa malebana le kolobetso?

² Le fa boemo e ka tswa e le bofe, go botlhokwa gore mongwe le mongwe yo o batlang go direla Jehofa le go tshela mo lefatsheng la gagwe le lesha la tshiamo a tlhaloganye kolobetso ka botlalo. Dipotso tse di tshwanetseng go arabiwa di akaretsa tseno: A kolobetso ya Bokeresete gompieno e na le bokao jo bo tshwanang le jwa kolobetso ya ga Jesu? Go kaya eng go kolobediwa “mo leineng la Rara le la Morwa le la moya o o boitshepo”? Go tshela tumalanong le se kolobetso ya Bokeresete ya mo metsing e se tshwantshetsang go akaretsa eng?

Dikolobetso Tsa ga Johane

3. Kolobetso ya ga Johane e ne e le ya bomang fela?

³ Dikgwedi di ka nna thataro pele Jesu a kolobediwa, Johane Mokolobetsi o ne a tsamaya a rera mo nageng ya Judea, a re: “Ikwatlhayeng, gonne bogosi jwa magodimo bo atametse.” (Mathaio 3:1, 2) Batho ba ne ba utlwa se Johane a neng a se bolela mme ba se tsaya tsia. Ba ne ba ipolela maleo a bone phatlalatsa, ba a ikwatlhaela, ba bo ba tla kwa go Johane gore a ba kolobetse mo Nokeng ya Joredane. Kolobetso eo e ne e le ya Bajuda.—Luke 1:13-16; Ditiro 13:23, 24.

4. Ke ka ntlha yang fa Bajuda ba lekgolo la ntlha la dingwaga ba ne ba tlhoka go ikwatlhaya ka bonako?

⁴ Bajuda bao ba ne ba tlhoka go ikwatlhaya ka bonako. Ka 1513 B.C.E., kwa Thabeng ya Sinai, bagologolwane ba bone ba ne ba tsene mo kgolaganong—mo tumalanong e e masisi—e Jehofa Modimo a neng a e dirile le setšhaba. Mme ka ntlha ya maleo a bone a a masisi, ga ba a ka ba diragatsa maikarabelo a bone mo kgolaganong eo, mo e leng gore e ne e senola diphoso tsa bone. Mo motlheng wa ga Jesu boemo jwa bone bo ne bo le maswe thata. “Letsatsi le legolo le le le boitshegang la ga Jehofa” le Malaki a neng a le boleletse pele le ne le le gaufi. Ka 70 C.E., “letsatsi” leo le ne la tla fa masole a Roma a ne a senya Jerusalema, tempele ya yone le Bajuda ba feta milione. Johane Mokolobetsi, ka tlhoafalo ya gagwe ya kobamelo ya boammaaruri, o ne a romelwa pele ga tshenyo eo, go tla “go etleeletsa Jehofa setlhopha sa batho ba ba baakantsweng.” Ba ne ba tlhoka go ikwatlhaela maleo a ba neng ba a dira ka go tlola kgolagano ya Molao wa ga Moshe mme ba iketleetse go amogela Morwa Modimo, Jesu, yo Jehofa a neng a mo romela kwa go bone.—Malaki 4:4-6; Luke 1:17; Ditiro 19:4.

5. (a) Fa Jesu a ne a tla go kolobediwa, ke eng fa Johane a ne a belaela? (b) Kolobetso ya ga Jesu e ne e tshwantshetsa eng?

⁵ Mongwe wa ba ba neng ba tla kwa go Johane gore a kolobediwe e ne e le Jesu ka boene. Mme ka ntlha yang? E re ka Johane a ne a itse gore Jesu o ne a se na maleo a a ka a ipolelang, o ne a re: “Ke nna yo ke tlhokang go kolobediwa ke wena, mme a o tla mo go nna?” Mme kolobetso ya ga Jesu e ne e tla tshwantshetsa sengwe se sele. Ka jalo Jesu o ne a araba jaana: “Mma go nne jalo, mo nakong eno, gonne ka tsela eo go a tshwanela gore re diragatse gotlhe mo go siameng.” (Mathaio 3:13-15) E re ka Jesu a ne a se na boleo, kolobetso ya gagwe e ne e sa tshwantshetse go ikwatlhaela boleo; le gone o ne a sa tlhoke go ineela mo Modimong, ka gonne e ne e le leloko la setšhaba se se neng se setse se ineetse mo go Jehofa. Go na le moo, go kolobediwa ga gagwe a na le dingwaga di le 30 e ne e le ga mofuta wa gone fela, mme go ne go tshwantshetsa gore o itlhagisa mo go Rraagwe wa selegodimo gore a dire thato ya Gagwe go ya pele.

6. Jesu o ne a tlhoafetse go le kana kang ka go dira thato ya Modimo?

⁶ Thato ya Modimo ka Keresete Jesu e ne e akaretsa tiro e e malebana le Bogosi. (Luke 8:1) Gape e ne e akaretsa setlhabelo sa botshelo jwa gagwe jwa motho yo o itekanetseng e le thekololo e bile e le motheo wa kgolagano e ntšha. (Mathaio 20:28; 26:26-28; Bahebera 10:5-10) Jesu o ne a tsaya bokao jwa kolobetso ya gagwe ya mo metsing bo le masisi thata. O ne a sa itlogelele gore a itewe tsebe ke dilo tse dingwe. O ne a tswelela pele a dira thato ya Modimo go fitlha kwa bokhutlong jwa botshelo jwa gagwe jwa mo lefatsheng, a dira gore tiro ya go rera ka Bogosi jwa Modimo e nne yone tiro ya gagwe ya konokono.—Johane 4:34.

Go Kolobediwa ka Metsi ga Barutwa ba Bakeresete

7. Fa e sa le ka Pentekosete ya 33 C.E., Bakeresete ba ne ba tewa gore ba dire eng malebana le kolobetso?

⁷ Barutwa ba ntlha ba ga Jesu ba ne ba kolobediwa ka metsi ke Johane mme ba isiwa kwa go Jesu e le ba ba tla nnang maloko a Bogosi jwa legodimo. (Johane 3:25-30) Ba kaelwa ke Jesu, barutwa bano le bone ba ne ba a tle ba kolobetse ka kolobetso e e neng e na le bokao jo bo tshwanang le jwa kolobetso ya ga Johane. (Johane 4:1, 2) Le fa go ntse jalo, go simologa ka Pentekosete ya 33 C.E., ba ne ba simolola go diragatsa thomo ya go kolobetsa “mo leineng la Rara le la Morwa le la moya o o boitshepo.” (Mathaio 28:19) O tla fitlhela go le mosola thata go tlhatlhoba bokao jwa seo.

8. Go kolobediwa “mo leineng la Rara” go kaya eng?

⁸ Go kolobediwa “mo leineng la Rara” go kaya eng? Go kaya go amogela leina la gagwe, maemo a gagwe, taolo, boikaelelo le melao ya gagwe. Ela tlhoko gore seno se akaretsa eng. (1) Pesalema 83:18 e bolela jaana ka leina la gagwe: “Wena, yo leina la gago e leng Jehofa, wena o le esi o Mogodimodimo yo o okametseng lefatshe lotlhe.” (2) Malebana le maemo a gagwe, 2 Dikgosi 19:15 ya re: “Ao Jehofa . . . , wena o le nosi o Modimo wa boammaaruri.” (3) Tshenolo 4:11 e bolela jaana ka taolo ya gagwe: “O a tshwanela, Jehofa, wena Modimo wa rona, go amogela kgalalelo le tlotlo le maatla, ka gonne o bopile dilo tsotlhe, mme ka ntlha ya thato ya gago di ne tsa nna gone e bile di ne tsa bopiwa.” (4) Gape re tshwanetse ra dumela gore Jehofa ke Moneibotshelo, yo o ikaeletseng go re namola mo boleong le mo losong: “Poloko ke ya ga Jehofa.” (Pesalema 3:8; 36:9) (5) Re tshwanetse ra amogela gore Jehofa ke Moneimolao yo Mogolo: “Jehofa ke Moatlhodi wa rona, Jehofa ke Moneimolao wa rona, Jehofa ke Kgosi ya rona.” (Isaia 33:22) E re ka a le dilo tseno tsotlhe, re rotloediwa jaana: “O rate Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago.”—Mathaio 22:37.

9. Go kolobediwa “mo leineng . . . la Morwa” go kaya eng?

⁹ Go kolobediwa “mo leineng . . . la Morwa” go kaya eng? Go kaya go tlotla leina, maemo le taolo ya ga Jesu Keresete. Leina la gagwe, Jesu, le kaya gore “Jehofa ke Poloko.” O na le maemo a a nang le one ka gonne e le Morwa Modimo yo o tsetsweng a le esi, sebopiwa sa ntlha sa Modimo. (Mathaio 16:16; Bakolosa 1:15, 16) Johane 3:16 e re bolelela jaana ka Morwa yono: “Modimo o ratile lefatshe [la batho ba ba ka rekololwang] mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” E re ka Jesu a sule a ikanyega, Modimo o ne a mo tsosa mo baswing mme a mo naya taolo e ntšha. Go ya ka moaposetoloi Paulo, Modimo “o ne a . . . godisetsa [Jesu] kwa boemong jo bo kwa godimo” mo lobopong, a fetwa ke Jehofa fela ka maemo. Ke gone ka moo “ka leina la ga Jesu lengole lengwe le lengwe le [tla obamang] le loleme longwe le longwe lo [tla bolelang] ka phuthologo fa lo dumela gore Jesu Keresete ke Morena kgalalelong ya Modimo Rara.” (Bafilipi 2:9-11) Seno se kaya go ikobela ditaelo tsa ga Jesu, tse di tswang kwa go Jehofa ka boene.—Johane 15:10.

10. Go kolobediwa “mo leineng . . . la moya o o boitshepo” go kaya eng?

¹⁰ Go kolobediwa “mo leineng . . . la moya o o boitshepo” go kaya eng? Go kaya go amogela seabe le tiro ya moya o o boitshepo. Mme moya o o boitshepo ke eng? Ke maatla a ga Jehofa a a dirang, ao a a dirisang go diragatsa maikaelelo a gagwe. Jesu o ne a raya balatedi ba gagwe a re: “Ke tla kopa Rara mme o tla lo naya mothusi yo mongwe gore a nne le lona ka bosaengkae, e leng moya wa boammaaruri.” (Johane 14:16, 17) Moya ono o ne o tla ba thusa gore ba kgone go dira eng? Jesu o ne a tswelela pele a ba raya a re: “Lo tla amogela maatla fa moya o o boitshepo o goroga mo go lona, mme lo tla nna basupi ba me mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.” (Ditiro 1:8) Jehofa o ne a dirisa moya o o boitshepo gape go tlhotlheletsa go kwalwa ga Baebele: “Ga go ka nako epe boporofeti bo neng jwa tlisiwa ka thato ya motho, mme batho ba ne ba bua se se tswang kwa Modimong e re ka ba ne ba tlhotlhelediwa ke moya o o boitshepo.” (2 Petere 1:21) Ka jalo re amogela seabe sa moya o o boitshepo fa re ithuta Baebele. Tsela e nngwe e ka yone re amogelang moya o o boitshepo ke ka go kopa Jehofa gore a re thuse go nna le “maungo a moya,” a e leng “lorato, boipelo, kagiso, bopelotelele, bopelonomi, molemo, tumelo, bonolo, boikgapo.”—Bagalatia 5:22, 23.

11. (a) Bokao jwa boammaaruri jwa kolobetso ke bofe mo motlheng wa rona? (b) Kolobetso e tshwana le go swa le go tsosiwa ka tsela efe?

¹¹ Batho ba ntlha go kolobediwa go ya ka ditaelo tsa ga Jesu e ne e le Bajuda le basokologela Sejudeng, go simologa ka 33 C.E. Moragonyana fela ga foo, tshiamelo ya go nna barutwa ba ga Keresete e ne ya newa le Basamarea. Go tswa foo, ka 36 C.E., taletso eno e ne ya akaretsa le Baditšhaba ba ba sa rupang. Pele ba kolobediwa, Basamarea le Baditšhaba ba ne ba tshwanetse go ineela mo go Jehofa motho ka namana gore ba tla mo direla e le barutwa ba Morwa wa gagwe. Joo e sa ntse e le jone bokao jwa kolobetso ya Bakeresete ya mo metsing le mo motlheng wa rona. Go inwa gotlhelele mo metsing ke tshwantshetso e e tshwanelang ya boineelo jono jwa motho ka namana, ka gonne kolobetso ke phitlho ya tshwantshetso. Go tsena kwa tlase ga metsi a kolobetso go tshwantshetsa go swa mo botshelong jwa gago jwa pele. Go inolwa mo metsing go tshwantshetsa gore o tsosediwa gore o dire thato ya Modimo. “Kolobetso e le nngwe” eno e dirwa mo bathong botlhe ba ba nnang Bakeresete ba boammaaruri. Fa ba kolobediwa ba nna Basupi ba Bakeresete ba ga Jehofa, badiredi ba ba tlhomilweng ba Modimo.—Baefeso 4:5; 2 Bakorintha 6:3, 4.

12. Kolobetso ya Bakeresete ya metsi e tshwana le eng, mme jang?

¹² Kolobetso e e ntseng jalo e na le mosola o mogolo wa go boloka mo matlhong a Modimo. Ka sekai, fa moaposetoloi Petere a sena go umaka go aga araka ga ga Noa, e mo go yone ene le lelapa la gagwe ba neng ba bolokwa mo Morwaleleng, o ne a kwala jaana: “Se se tshwanang le seno le sone jaanong se a lo boloka, e leng, kolobetso, (e seng go tlosiwa ga leswe la nama, mme go lopa segakolodi se se molemo mo Modimong,) ka tsogo ya ga Jesu Keresete.” (1 Petere 3:21) Araka e ne e le bosupi jo bo phepafetseng jwa gore Noa o ne a dirile tiro e a neng a e abetswe ke Modimo ka boikanyegi. Fa tiro ya go aga araka e sena go fela, “lefatshe la nako eo le ne la senngwa . . . fa le ne le rwalelelwa ka metsi.” (2 Petere 3:6) Mme Noa le lelapa la gagwe, “meya e le robedi, ba [ne] ba rwalwa ka pabalesego go ralala metsi.”—1 Petere 3:20.

13. Mokeresete o bolokwa mo go eng ka go kolobediwa mo metsing?

¹³ Gompieno, batho ba ba ineelang mo go Jehofa ka ntlha ya go dumela mo go Keresete yo o tsositsweng, ba kolobediwa go tshwantshetsa boineelo joo. Go tswa foo ba dira se Modimo a batlang re se dira mo metlheng eno mme ba bolokwa mo lefatsheng le le boikepo la jaanong. (Bagalatia 1:3, 4) Ga ba tlhole ba lebane le go senngwa mmogo le tsamaiso ya jaanong e e boikepo ya dilo. Ba bolokwa mo tshenyegong eo mme Modimo o ba naya segakolodi se se phepa. Moaposetoloi Johane o tlhomamisetsa batlhanka ba Modimo jaana: “Lefatshe le a feta le keletso ya lone, mme yo o dirang thato ya Modimo o ntse ka bosaengkae.”—1 Johane 2:17.

Go Diragatsa Maikarabelo a Rona

14. Ke ka ntlha yang fa kolobetso ka boyone e sa re tlhomamisetse gore re tla bolokwa?

¹⁴ E tla bo e le phoso go akanya gore kolobetso ka boyone e ka re tlhomamisetsa poloko. E na le mosola fa fela motho a ineetse mo go Jehofa ka boammaaruri ka Jesu Keresete a bo a dira thato ya Modimo, a ikanyega go ya bokhutlong. “Yo o itshokileng go ya bokhutlong ke ene yo o tla bolokwang.”—Mathaio 24:13.

15. (a) Gompieno thato ya Modimo ke efe ka Bakeresete ba ba kolobeditsweng? (b) Go nna barutwa ba Bakeresete go tshwanetse ga nna botlhokwa go le kana kang mo matshelong a rona?

¹⁵ Thato ya Modimo ka Jesu e ne e akaretsa tsela e a neng a dirisa botshelo jwa gagwe ka yone e le motho. O ne a tshwanetse go swa gore a bo ntshe setlhabelo. Fa e le ka rona, mebele ya rona e tshwanetse ya newa Modimo, mme re tshwanetse ra tshela botshelo jwa go intsha setlhabelo ka go dira thato ya Modimo. (Baroma 12:1, 2) Ruri re tla bo re sa dire thato ya Modimo fa e le gore ka boomo fela re a tle re itshware jaaka lefatshe le le re dikologileng kgotsa re tshelela dikeletso tsa bopelotshetlha, re direla Modimo ka go ikgolola fela. (1 Petere 4:1-3; 1 Johane 2:15, 16) Fa Mojuda mongwe a ne a botsa gore o tshwanetse a dirang gore a bone botshelo jo bo sa khutleng, Jesu o ne a bontsha botlhokwa jwa go tshela botshelo jo bo phepa mo boitsholong. Mme go tswa foo o ne a tlhalosa sengwe se se botlhokwa le go feta: gore o tlhoka go nna morutwa wa Mokeresete, molatedi wa ga Jesu. Ke sone se e tshwanetseng ya nna selo sa konokono mo botshelong. Ga se a tshwanela go tla morago ga go latelela dithoto.—Mathaio 19:16-21.

16. (a) Bakeresete botlhe ba na le boikarabelo bofe malebana le Bogosi? (b) Jaaka go tshwantshitswe mo go tsebe 116 le 117, dingwe tsa ditsela tse di mosola tse re ka dirang tiro ya Bogosi ka tsone ke dife? (c) Seabe se re nnang naso ka pelo yotlhe mo tirong ya go neela bosupi se supa eng?

¹⁶ Go tshwanetse ga gatelelwa gape gore thato ya Modimo ka Jesu e ne e akaretsa tiro ya botlhokwa malebana le Bogosi jwa Modimo. Jesu ka boene o ne a tloleditswe go nna Kgosi. Mme fa a ne a le mo lefatsheng, gape o ne a neela bosupi a tlhoafetse malebana le Bogosi. Re na le tiro e e tshwanang ya go neela bosupi e re tshwanetseng ra e dira, mme re na le mabaka a a utlwalang a go e dira ka pelo yotlhe. Fa re dira jalo re bontsha gore re anaanela bolaodi jwa ga Jehofa e bile re rata bangwe ka rona. (Mathaio 22:36-40) Gape re a bo re bontsha gore re utlwana le badumedi ka rona ba ba mo lefatsheng lotlhe, ba botlhe e leng baboledi ba Bogosi. Rotlhe, ka kutlwano ya mo lefatsheng lotlhe, re gagamalela kwa mokgeleng wa go tshelela ruri mo lefatsheng mo Bogosing joo.

Motlotlo wa Poeletso

• Kolobetso ya ga Jesu le kolobetso ya mo metsing ya gompieno di tshwana ka eng mme di farologana ka eng?

• Go kolobediwa “mo leineng la Rara le la Morwa le la moya o o boitshepo” go kaya eng?

• Go diragatsa maikarabelo a kolobetso ya Bokeresete ya mo metsing go akaretsa eng?

[Ditshwantsho mo go tsebe 116, 117]

DITSELA DINGWE TSA GO BOLELA KA BOGOSI

Ka ntlo le ntlo

Mo go ba losika

Mo go ba re berekang le bone

Mo go ba re tsenang sekolo le bone

Mo mebileng

Ka go boela kwa go ba ba kgatlhegang

Kwa dithutong tsa magae tsa Baebele