Modimo o Golola Baiseraele mo Bokgobeng

BOMORWA Iseraele ba ne ba nna mo Egepeto dingwagangwaga, ba atlega e bile ba oketsega. Le fa go ntse jalo, go ne ga tlhomiwa mmusi yo mosha. Mmusi yono o ne a sa itse Josefa. E re ka mmusi yono yo o setlhogo a ne a boifa tsela e Baiseraele ba neng ba oketsega ka yone, o ne a ba dira makgoba mme a laela gore bana botlhe ba bone ba basimane ba ba sa tswang go tsholwa ba latlhelwe mo Nokeng ya Nile. Le fa go ntse jalo, mmè mongwe yo o pelokgale o ne a sireletsa losea lwa gagwe lwa mosimane, a lo fitlha mo serotong mo gare ga matlhaka. Morwadia Faro o ne a bona ngwana yoo, a mmitsa Moshe, mme a mo godisetsa mo lelapeng la segosi la Egepeto.

Fa Moshe a le dingwaga di le 40, o ne a tsena mo mathateng gonne a ne a sireletsa lekgoba la Moiseraele mo mokgerising mongwe wa Moegepeto. Moshe o ne a tshabela kwa lefatsheng lengwe le le kgakala, kwa a neng a nna gone e le motshabi. Fa Moshe a le dingwaga di le 80, Jehofa o ne a mo laela gore a boele kwa Egepeto mme a bolelele Faro gore a golole batho ba Modimo.

Faro o ne a gana a tiisitse. Ka jalo, Modimo o ne a itaya Baegepeto ka dipetso di le lesome. Nako le nako fa Moshe a tla mo go Faro go tla go mo naya tshono ya go tila petso e e latelang, Faro o ne a nna tlhogoethata, a nyatsa Moshe le Modimo wa gagwe e bong Jehofa. Kgabagare, petso ya bolesome e ne ya bolaya maitibolo otlhe a naga eo—kwantle ga malapa a a neng a ikobela taelo ya ga Jehofa ya gore ba tshwaye mephakalego ya dikgoro tsa bone ka madi a kwana e e ntshitsweng setlhabelo. Moengele wa Modimo yo o neng a tlile go diragatsa katlholo o ne a tlola magae a a neng a tshwailwe. Morago ga moo Baiseraele ba ne ba keteka go gololwa jalo ka tsela ya kgakgamatso ka go tshwara moletlo wa ngwaga le ngwaga o o bidiwang moletlo wa Tlolaganyo.

Fa Faro a sena go swelwa ke morwawe wa leitibolo, o ne a laela Moshe le Baiseraele botlhe gore ba tswe mo Egepeto. Ka bonako fela ba ne ba dira dithulaganyo tsa gore matshutitshuti a Baiseraele a tswe mo Egepeto. Mme Faro o ne a fetola mogopolo. O ne a ba lelekisa ka batlhabani ba le bantsi le ka dikara tsa ntwa. Go ne go bonala Baiseraele ba gaeletswe fa lotshitshing lwa Lewatle le Lehibidu. Jehofa o ne a kgaoganya Lewatle le Lehibidu, mme Baiseraele ba kgabaganya mo boalong jo bo omileng jwa lewatle, fa gare ga mabota a mabedi a metsi! Fa Baegepeto ba ntse ba ba lelekisitse, Modimo o ne a dira gore metsi a kopane gape, mme metsi ao a khurumetsa Faro le masole a gagwe.

Moragonyana fa Baiseraele ba ntse ba thibeletse mo Thabeng ya Sinai, Jehofa o ne a dira kgolagano le bone. Modimo o ne a dirisa Moshe gore e nne motsereganyi le go naya Baiseraele melao e e neng e ka ba kaela le go ba sireletsa mo karolong nngwe le nngwe ya matshelo a bone. Fa fela Baiseraele ba ne ba ka ikobela bolaodi jwa ga Jehofa ka boikanyegi, Jehofa o ne a tla nna le bone mme a dire gore batho ba ditšhaba tse dingwe ba itshegofatse ka setšhaba seo.

Le fa go ntse jalo, bontsi jwa Baiseraele ba ne ba bontsha go tlhoka tumelo mo Modimong. Ka ntlha ya seo, Jehofa o ne a dira gore kokomana eo e kgarakgatshege mo sekakeng ka dingwaga di le 40. Morago ga moo, Moshe o ne a laela monna yo o ikanyegang e bong Joshua gore a mo tlhatlhame. Kgabagare, Iseraele e ne e siametse go tsena mo lefatsheng le Modimo a le solofeditseng Aborahame.

—E tswa mo go Ekesodo; Lefitiko; Dipalo; Duteronome; Pesalema 136:10-15; Ditiro 7:17-36.