THUTO 9
Re ka Baakanyetsa Jang Dipokano ka Tsela e e Tla re Solegelang Molemo?
Cambodia
Ukraine
Fa o ithuta Baebele le mongwe wa Basupi ba ga Jehofa, o tshwanetse wa bo o leka go baakanyetsa go sa le gale se lo tlileng go ithuta sone. Gore o tle o tlhaloganye sentle, go botlhokwa gore o dire se se tshwanang pele ga o tla kwa dipokanong tsa phuthego. O tla solegelwa molemo thata fa o na le thulaganyo e e tlhomameng.
Tlhopha nako le lefelo le le siametseng go ithuta. Ke leng o kgonang go tlhoma mogopolo sentle fa o ithuta? A ke mo mosong thata pele ga o simolola tiro ya letsatsi, kgotsa maitseboa fa bana ba setse ba robetse? Le fa o sa kgone go ithuta nako e telele, itlhophele gore o tla dirisa nako e e kae mme o se ka wa letla sepe se go kgoreletsa. Batla lefelo le le seng modumo mme o tlose dilo tsotlhe tse di ka go itayang tsebe tse di jaaka radio, thelebishene kgotsa founo ya selula. Go simolola thuto ya gago ka thapelo go tla go thusa gore o se ka wa tshwenyega ka ditlhobaelo tsa letsatsi mme o kgone go tlhoma mogopolo mo Lefokong la Modimo.—Bafilipi 4:6, 7.
Tshwaya dikarabo mme o ipaakanyetse go nna le seabe. Simolola pele ka go leka go tlhaloganya kgang e go buiwang ka yone. Akanya ka setlhogo kgotsa kgaolo e go tlotliwang ka yone, leka go bona gore setlhogwana se amana jang le se go tlotliwang ka sone mme o lebe ditshwantsho le dipotso tsa poeletso tse di gatelelang dintlha tsa botlhokwa. Go tswa foo, bala dirapa tsotlhe o ntse o batla karabo ya potso e e tlhagang mo go tsone. Batla ditemana tse di umakilweng mme o di bale o ntse o akanya gore di tshegetsa jang kgang e go buiwang ka yone. (Ditiro 17:11) Fa o bona karabo, e thalele kgotsa o tshwaye mafoko kgotsa dipolelwana di se kae tse di mo serapeng tse di tla go gopotsang karabo. Mme fa o le kwa dipokanong o ka emisa seatla fa o kgona mme o arabe ka bokhutshwane ka mafoko a gago.
Go sekaseka ditlhogo tse di farologaneng tse go tlotliwang ka tsone beke le beke kwa dipokanong go tla go thusa go tsenya megopolo e mesha mo ‘bobolokelong jwa gago’ jwa kitso ya Baebele.—Mathaio 13:51, 52.
O ka itirela thulaganyo efe gore o kgone go baakanyetsa dipokano?
O ka ipaakanyetsa jang go akgela kwa dipokanong?