O Golela Kwa Nasaretha

Jesu o golela kwa Nasaretha, e leng motse o monnye wa maemo a a kwa tlase. Motse ono o kwa bokone jwa Judea, kwa kgaolong e e dithaba e e bidiwang Galalea, kwa bophirima jwa letšha le legolo le le bidiwang Lewatle la Galalea.

Fa Josefa le Marea ba tswa kwa Egepeto ba tla go nna fano, gongwe Jesu a ka tswa a na le dingwaga di le pedi. Ka nako eno, go lebega Jesu e le ene fela ngwana wa bone. Mme moragonyana o nna le bomonnawe ba basimane—Jakobe, Josefa, Simone le Judase. Gape Josefa le Marea ba nna le bana ba basetsana. Jesu o na le bomonnawe ba ka nna barataro.

Jesu o na le masika a mangwe. Re setse re itse ka Elisabetha le morwawe e bong Johane. Ba nna kgakala kwa borwa jwa Judea. Go na le yo mongwe yo o nnang gaufi le bone mo Galalea. Ke Salome, yo go lebegang e le monnawe Marea, ka jalo ke mmangwanaagwe Jesu. Monna wa ga Salome ke Sebede. Go raya gore barwa ba bone e bong Jakobe le Johane, ke bontsalae Jesu ba ba atamalaneng thata le ene ka losika. Ga re itse gore a Jesu o ne a fetsa nako e ntsi le basimane bano fa ba ntse ba gola, mme gone ba ile ba nna ditsala tsa gagwe tse dikgolo e bile ba ne ba nna baaposetoloi ba gagwe.

Josefa o tshwanetse go bereka ka natla gore a tlamele lelapa la gagwe. Ke mmetli. O godisa Jesu jaaka ngwana wa gagwe, ke gone ka moo Jesu a bidiwang “morwa mmetli.” (Mathaio 13:55) Josefa o ruta Jesu tiro ya go betla, mme Jesu o dira tiro eno bontle. Tota e bile, moragonyana fa batho ba bua ka Jesu ba re: ‘Yono ke mmetli.’—Mareko 6:3.

Selo sa botlhokwa thata mo lelapeng la ga Josefa ke go direla Jehofa. Josefa le Marea ba ikobela taelo ya Modimo ya gore ba rute bana ba bone ka Modimo ‘fa ba le mo ntlong le fa ba tsamaya mo tseleng le fa ba rapama le fa ba tsoga.’ (Duteronome 6:6-9) Go na le sinagoge kwa Nasaretha. Ga go pelaelo gore Josefa o tsamaya le ba lelapa la gagwe ka metlha gore ba ye go obamela koo. Moragonyana Baebele e ne ya re Jesu o ne a ya kwa sinagogeng ka gonne ‘o ne a tlwaetse go dira jalo ka letsatsi la Sabata.’ (Luke 4:16) Gape lelapa leno le itumelela go ya kwa tempeleng ya ga Jehofa kwa Jerusalema ka metlha.