Jesu O A Oketsega Mme Johane O A Fokotsega

Fa Jesu le barutwa ba gagwe ba sena go keteka Tlolaganyo ka dikgakologo tsa ngwaga wa 30 C.E., ba tswa kwa Jerusalema. Mme ga ba boele kwa magaeng a bone kwa Galalea. Ba ya kwa nageng ya Judea, mme fa ba le koo ba kolobetsa batho ba le bantsi. Johane Mokolobetsi o na le mo e ka nnang ngwaga a ntse a dira tiro eno ya go kolobetsa, mme a ka tswa a e dira kwa mokgatšheng wa Noka ya Joredane. Bangwe ba barutwa ba gagwe ba sa ntse ba na le ene.

Jesu ga a kolobetse ope, mme o laela barutwa ba gagwe gore ba dire jalo. Ka nako eno ya bodiredi jwa ga Jesu, ene le Johane ba ruta Bajuda ba ba ikwatlhaetseng maleo a ba a dirileng ka go tlola kgolagano ya Molao wa Modimo.—Ditiro 19:4.

Le fa go ntse jalo, barutwa ba ga Johane ba a fufega, e bile ba ngongorega ka Jesu ba re: “Monna [Jesu] yo o neng a na le wena . . . o a kolobetsa e bile batho botlhe ba ya kwa go ene.” (Johane 3:26) Mme Johane ene ga a fufege. O itumelela go bo Jesu a atlega mo tirong e a e dirang mme o batla gore barutwa ba gagwe le bone ba itumelele seo. Johane o ba gopotsa sengwe a re: “Lona ka bolona lo basupi ba gore ke ne ka re, ‘Ga ke Keresete, mme ke rometswe kwa pele ga gagwe.’” O ba thusa go tlhaloganya ntlha eno ka go ba direla setshwantsho seno: “Ope fela yo o nang le monyadiwa ke monyadi. Mme fa tsala ya monyadi e ema gaufi le monyadi e bo e mo utlwa a bua, e itumela thata. Ka tsela e e tshwanang, le nna ke itumetse thata.”—Johane 3:28, 29.

Fela jaaka tsala ya monyadi, Johane o ile a itumela dikgwedi di se kae pelenyana fa a itsise ditsala tsa gagwe Jesu. Bangwe ba bone ba ile ba nna balatedi ba ga Jesu mme fa nako e ntse e ya, ba ne ba tla tlodiwa ka moya o o boitshepo. Johane o batla gore barutwa ba a nang le bone gone jaanong le bone ba nne balatedi ba ga Jesu. Tota e bile, boikaelelo jwa ga Johane ke go baakanyetsa Keresete tsela gore a simolole bodiredi jwa gagwe. Johane a re: “Keresete ene tiro ya gagwe e tshwanetse go tswelela e oketsega, mme nna tiro ya me e tshwanetse go tswelela e fokotsega.”—Johane 3:30.

Johane yo mongwe, yo pelenyana a ileng a nna molatedi wa ga Jesu, moragonyana o ile a kwala ka kgang ya gore Jesu o tswa kae le seabe se a nang le sone gore batho ba bolokwe, a re: “Motho yo o tswang kwa godimo, o kwa godimo ga ba bangwe botlhe. . . . Rara o rata Morwa e bile o mo neile taolo mo dilong tsotlhe. Yo o dumelang mo go Morwa o tlile go bona botshelo jo bo sa khutleng; yo o sa utlweng Morwa ga a kitla a bona botshelo, mme bogale jwa Modimo bo tla nna bo le mo go ene.” (Johane 3:31, 35, 36) Ruri jono ke boammaaruri jwa botlhokwa jo batho botlhe ba tlhokang go bo itse!

Nakwana fela fa Johane Mokolobetsi a sena go tlhalosa gore seabe sa gagwe le tiro ya gagwe di tshwanetse go fokotsega, Kgosi Herode o mo tsenya mo kgolegelong. Herode o tsere Herodiase, mosadi wa ga mogolowe e bong Filipo, a bo a mo nyala. Fa Johane a tlhalosa gore se Herode a se dirileng ke boaka, Herode o mo tsenya mo kgolegelong. Fela fa Jesu a utlwa gore Johane o tshwerwe, o tswa kwa Judea le barutwa ba gagwe mme ‘o ya kwa Galalea.’—Mathaio 4:12; Mareko 1:14.