Dijo Tsa Morena Tsa Maitseboa

Pelenyana mo maitseboeng ao, Jesu o ne a ruta baaposetoloi ba gagwe thuto ya go nna boikokobetso ka go ba tlhapisa dinao. Gone jaanong, gongwe fa ba sena go ja Tlolaganyo, o nopola mofoko a boporofeti a ga Dafide a a reng: “Motho yo ke tshelang le ene ka kagiso, yo ke neng ke mo ikantse, yo o neng a ja le nna, o ntlhanogetse.” Go tswa foo o tlhalosa jaana: “Mongwe wa lona o tla nthekisa.”—Pesalema 41:9; Johane 13:18, 21.

Baaposetoloi ba a lebana mme mongwe le mongwe a bo a mmotsa a re: “Morena, ga se nna gakere?” Judase Isekariota le ene o a mmotsa. Johane o ntse gaufi le Jesu fa tafoleng, ka jalo Petere o mo rotloetsa gore a botse Jesu gore o bua ka mang. Johane o ikaega ka Jesu a bo a mmotsa jaana: “Morena, ke mang?”—Mathaio 26:22; Johane 13:25.

Jesu o araba a re: “Ke yo ke tla mo nayang senkgwe seno se ke se inang mo sopong.” Jesu o ina senkgwe mo sejaneng se se mo tafoleng a bo a se naya Judase, a re: “Morwa motho o a tsamaya, fela jaaka go kwadilwe ka ga gagwe. Le fa go ntse jalo, ruri monna yoo yo o rekisang Morwa motho o tla tlelwa ke ditlamorago tse di botlhoko! Go ka bo go nnile botoka fa monna yoo a ka bo a sa tsholwa.” (Johane 13:26; Mathaio 26:24) Satane o tsena mo go Judase. Jaanong monna yono yo o setseng a le bosula, o ineela go dira thato ya ga Diabolo a bo a fetoga “morwa tshenyego.”—Johane 6:64, 70; 12:4; 17:12.

Jesu o raya Judase a re: “Se o se dirang, se dire ka bonako thata.” E re ka Judase a ne a tshwara letlole la madi, baaposetoloi ba bangwe ba ithaya ba re Jesu o mo raya a re: “‘Reka dilo tse re di tlhokelang moletlo,’ kgotsa gore a neye bahumanegi sengwe.” (Johane 13:27-30) Go na le moo, Judase o a tsamaya o ya go rekisa Jesu.

Fa Judase a sena go tsamaya, Jesu o simolola moletlo o mosha o o farologaneng thata le wa Tlolaganyo. O tsaya senkgwe, o a rapela, o a se ngathoganya a bo a se naya baaposetoloi gore ba je. O ba raya a re: “Seno se kaya mmele wa me, o o tla ntshiwang mo boemong jwa lona. Nnang lo dire seno e le go nkgopola.” (Luke 22:19) Senkgwe seno se se ngathogantsweng se a fetisiwa mme baaposetoloi ba a se ja.

Jaanong Jesu o tsaya senwelo se se nang le beine, o a rapela a bo a se ba naya. Mongwe le mongwe wa bone o nwa mo senwelong seno se Jesu a buang jaana ka sone: “Beine e e mo senwelong seno e kaya kgolagano e ntšha e e tla simololang fa ke tsholola madi a me, a a tla tshololelwang lona.”—Luke 22:20.

Ka jalo, Jesu o rulaganya segopotso sa loso lwa gagwe se balatedi ba gagwe ba tla se tshwarang ngwaga le ngwaga ka Nisane 14. Se tla ba gopotsa se Jesu le Rraagwe ba se dirileng go thusa batho ba ba nang le tumelo gore ba gololesege mo boleong le mo losong. Sa botlhokwa le go feta, se tla tlisetsa batho kgololesego ya mmatota, go farologana le Tlolaganyo ya Bajuda.

Jesu a re madi a gagwe “a tla tshololelwa batho ba le bantsi gore ba itshwarelwe maleo.” Bangwe ba batho bao ba bantsi ba ba tla itshwarelwang maleo, ke baaposetoloi ba gagwe ba ba ikanyegang le barutwa ba bangwe. Ke bone ba ba tla bong ba busa le ene mo Bogosing jwa ga Rraagwe.—Mathaio 26:28, 29.