Ga ba A ka Ba Diragatsa Maikano a Bone

Jehofa o ne a raya Moshe a re: ‘Tlhatlogela kwano mo thabeng. Ke tla kwala melao ya me mo matlapeng ke bo ke go a naya.’ Moshe o ne a palama thaba mme a nna koo malatsi a le 40. Fa a le koo, Jehofa o ne a kwala Melao e e Lesome mo matlapeng a mabedi mme a a naya Moshe.

Fa nako e ntse e ya, Baiseraele ba ne ba simolola go akanya gore Moshe ga a kitla a boa. Ba ne ba raya Arone ba re: ‘Re batla motho yo o ka re etelelang pele. Re direle modimo!’ Arone o ne a ba raya a re: ‘Tlisang gauta ya lona.’ O ne a gakolosa gauta a bo a dira setshwantsho sa namane ka yone. Batho ba ne ba re: ‘Namane eno ke Modimo wa rona yo o re ntshitseng kwa Egepeto!’ Ba ne ba obamela namane eo ba bo ba dira moletlo. A seo se ne se le phoso? Ee, ka gonne ba ne ba ikanne gore ba tla obamela Jehofa fela. Mme jaanong ba ne ba sa dire se ba se solofeditseng.

Jehofa o ne a bona se se neng se direga a bo a raya Moshe a re: ‘Fologa o ye go bona gore Baiseraele ba dirang. Ba tlola melao ya me e bile ba obamela modimo wa maaka.’ Moshe o ne a fologa thaba a tshwere matlapa a mabedi.

Fa a ntse a atamela, o utlwa batho ba opela. Fa a leba o bona ba bina e bile ba obama fa pele ga namane. Moshe o ne a galefa tota. O ne a latlhela matlapa ao fa fatshe mme a thubega a bo a senya setshwantsho seo sa bone ka yone nako eo. Go tswa foo, o ne a botsa Arone a re: ‘Go tlile jang gore o feleletse o dirile selo se se maswe jaana?’ Arone o ne a mo raya a re: ‘O se ka wa galefa. O a itse gore batho bano ba ntse jang. Ba ne ba batla modimo, ka jalo, ke ne ka latlhela gauta ya bone mo molelong mme ga tswa namane eno!’ Arone o ne a sa tshwanela go bo a dirile jalo. Moshe o ne a boela kwa godimo ga thaba a bo a kopa Jehofa gore a itshwarele Baiseraele.

Jehofa o ne a itshwarela batho ba ba neng ba ikemiseditse go mo reetsa. Baiseraele ba tshwanetse ba bo ba ne ba bone botlhokwa jwa go reetsa moeteledipele yo Modimo a neng a mo tlhomile.