FA O SIMOLOLA MOTLOTLO
THUTO 4
Nna Boikokobetso
Molaomotheo: “Ikokobetseng e bile lo tlotle ba bangwe go feta tsela e lo itlotlang ka yone.”—Bafil. 2:3.
Se Paulo a Ileng a se Dira
1. Lebelela BIDIO, kgotsa bala Ditiro 26:2, 3. Go tswa foo, ipotse dipotso tse di latelang:
Paulo o ile a bontsha jang gore o boikokobetso fa a ne a bua le Kgosi Ageripa?
Paulo o ile a dira eng gore batho ba se ka ba tlhoma mogopolo mo go ene, mme ba o tlhome mo go Jehofa le mo Lefokong la Gagwe?—Bona Ditiro 26:22.
Re Ithuta Eng mo go Paulo?
2. Fa re le boikokobetso e bile re bua ka tlotlo, batho ba tla kgatlhegela molaetsa wa rona.
Etsa Paulo
3. Bua ka tlotlo. O se ka wa dira gore motho a akanye gore o itse sengwe le sengwe mme ene ga a itse sepe.
4. Dira gore go bonale gore se o se rutang se tswa mo Baebeleng. Lefoko la Modimo le ka fetola tsela e motho a akanyang ka yone le e a ikutlwang ka yone. Fa re le dirisa, re tla thusa batho gore ba nne le tumelo.
5. Nna o ritibetse. Fa motho a sa dumalane le wena, o se ka wa nnela go leka go mmontsha gore se o se buang ke boammaaruri. Ga re a tshwanela go ngangisana le batho. Bontsha gore o boikokobetso ka go nna o ritibetse, mme fa go tlhokega o itsamaele. (Diane 17:14; Tito 3:2) Fa o araba ka bonolo, gongwe motho yoo o tla reetsa molaetsa wa rona mo nakong e e tlang.