Botshelo le Bodihedi tsa ga Jesu

JESU o lemotsha gore fa e le gore o leleka badimona ka maatla a ga Satane, he Satane o kgaogane ka boene. “Dihañ setlhare se nnè molemō, le louñō loa shōna le nnè molemō,” oa tswelela, “kgotsa dihañ setlhare se nnè boshula, le louñō loa shōna lo nne boshula; gonne setlhare se itsiwe ka louñō la shōna.”

Go boeleele go atlhola gore loungo lo lo molemo lwa gore Jesu a bo a leleka badimona ke ka go bo a direla Satane. Fa loungo lo le molemo, setlhare ga se kake sa nna bosula. Mo letlhakoreng le lengwe, loungo lo lo bosula lwa Bafarasai lwa ditatofatso tse di senang tlhaloganyo le go ganetsa Jesu mo go senang mabaka ke bosupi jwa gore bone ka bobone ba bosula. “Lotsalō loa dinōga ke lona,” Jesu o a tsibosa, “lo ka bua yañ dilō tse di molemō, lo le boshula? gonne molomo o bua se se cwañ mo botlaloñ yoa pelo.”

Ereka mafoko a rona a senola boemo jwa dipelo tsa rona, se re se buang se neela motheo wa katlholo. “Me ke lo raea, ke re,” Jesu o a bolela, “Lehoko leñwe le leñwe ya boithamakō ye batho ba tla le buañ, ba tla le bodiwa mo motlheñ oa tshèkō. Gonne u tla atlholèlwa ka mahoko a gago, le ka mahoko a gago u tla sekisiwa.”

Go sa kgathalesege ditiro tsotlhe tse di nonofileng tsa ga Jesu, bakwadi le Bafarasai ba kopa jaana: “Moruti, re rata go bōna seshupō señwe mo go wena.” Lemororo banna bano ba Jerusalema ba ka ne ba ise ba ke ba bone dikgakgamatso tsa gagwe ka bobone, go na le bosupi jwa tsone jo bo bonweng ka matlho jo bo ka sekang jwa ganediwa. Jalo Jesu o raya baeteledipele ba Bajuda a re: “Losika lo lo boshula le loa boaka lo batla seshupō; me ga lo ketla lo nèwa seshupō sepè, hae se seshupō sa moperofeti Yona.”

Fa a tlhalosa gore o rayang, Jesu o tswelela jaana: “Gonne yaka Yona a kile a nna mo mpeñ ea leruarua ka malatsi a le mararo le masigo a le mararo; Morwa Motho le èna o tla nna mo peduñ ea lehatshe ka malatsi a le mararo le masigo a le mararo.” Morago ga go mediwa ke tlhapi, Jona o ne a tswela kwantle jaaka ekete o tsositswe mo baswing, jalo Jesu o bolelela-pele gore o ne a tla swa a ba a tsosiwa mo letsatsing la boraro. Lefa go le jalo baeteledipele ba Bajuda, le eleng fa e re moragonyana Jesu a bo a tsosiwa mo baswing, ba gana “seshupō sa moperofeti Yona.”

Ka gone Jesu o bolela gore banna ba Ninife ba ba neng ba ikotlhaya fa ba ne ba rerelwa ke Jona ba ne ba tla tsoga mo letsatsing la katlholo mme ba atlhola Bajuda ba ba ganang Jesu. Ka mo go tshwanang, o tshwantshanya seo le mohumagadi wa Sheba, yo o neng a tswa dikhutlong tsa lefatshe go tla go utlwa botlhale jwa ga Solomone mme a gakgamalela se a neng a se bona le se a se utlwileng. “Me bōnañ,” Jesu o a lemotsha, “eo mogolo go heta Solomone o hano.”

Jesu jaanong o neela setshwantsho sa monna yo moya o o bosula o tswang mo go ene. Lefa go ntse jalo, monna yo ga a tlatse sebaka seno ka dilo tse di molemo ka jalo a tsenwe ke meya e e bosula e mengwe e supa. “Go tla nna yalo hèla le losika lo, lo lo boshula,” Jesu o a bolela. Morafe wa Iseraele o ne o phephafaditswe mme o itemogetse diphetogo​—jaaka go tswa ga nakwana ga moya o o busula. Mme go gana ga morafe ono baperofeti ba Modimo, mo go felelang ka go gana ga bone Keresete ka boene, go senola gore boikepo jwa one bo bosula fela thata go feta kwa tshimologong.

Fa Jesu a ntse a bua, mmaagwe le bomonnawe ba a goroga mme ba nna ka kwa morago ga batho. Jalo mongwe a re: “Bōna, mmago le bomonnao ba emetse ka kwa thokō, ba eletsa go bua nau.”

“Mmè ke mañ? le bonnake ke bomañ?” Jesu a botsa. A otlolola letsogo la gagwe go supa barutwa ba gagwe, a re: “Bōnañ mmè le bonnake. Gonne leha e le mañ eo o tla dihañ go rata ga Rrè eo o kwa legodimoñ, ke èna nnake, le kgantsadiake, le mmè.” Ka tsela e Jesu o bontsha gore go sa kgathalesege gore katamalano ya gagwe le balosika la gagwe e ne e ratega go le kana-kang, botsalano jwa gagwe le barutwa ba gagwe e ne e le jo bo rategang segolo. Mathaio 12:33-50; Mareko 3:31-35; Luke 8:19-21.

◆ Bafarasai ba reteletswe jang ke go dira gore setlhare le loungo lwa sone di nne molemo?

◆ “Seshupō sa moperofeti Yona” e ne e le eng, mme se ne sa ganwa jang?

◆ Morafe wa Iseraele o ne o tshwana jang le monna yo moya o o bosula o neng wa tswa mo go ene?

◆ Jesu o ne a gatelela jang botsalano jwa gagwe jo bo atamalaneng le barutwa ba gagwe?