A O Tla Ngaparela Boammaaruri?

FA E LE gore o setse o simolotse go ithuta Bibela le Basupi ba ga Jehofa, potso ya botlhokwa eo o tshwanetseng go e ipotsa go ikgotsofatsa ke, a seno ke boammaaruri? Fa o bona e le boammaaruri, a o tla bo ngaparela? Dipotso tse di tshwanang di ne di lebanye batho mo metlheng ya ga Jesu Keresete le baaposetoloi ba gagwe.

Fa baaposetoloi ba ne ba rera kaga Jesu, batho ba ne ba ikutlwa jang? Mme kana, dikgang mabapi le Bogosi jwa ga Keresete, dikgakgamatso tsa gagwe, setlhabelo sa gagwe sa thekololo, tsogo ya gagwe, le botshelo jo bosakhutleng di ne di utlwala di le molemo, mme ba bantsi ba ne ba amogela se ba neng ba se utlwa jaaka boammaaruri. Mme ba bantsi ba ne ba seka ba dira jalo. Ebile tota, phuthego ya Bokeresete ya nako eo e ne e “nyadiwa” gongwe le gongwe. (Ditihō 28:22) Jalo go amogela boammaaruri jo bo neng bo rerwa ke barutwa ba ga Jesu go ne go raya go nna kgatlhanong le boikutlo jo bo tlwaelegileng le go lebana le kganetso. Ka gone batho ba ba kgatlhegang ba ne ba tshwanelwa ke go supa ka mo go ba kgotsofatsang gore dithuto tsa Bokeresete e ne e le boammaaruri. Ke gone fela ba neng ba ka tsaya kgato e e gagametseng.

Fa Paulo le Barenabase ba ne ba etela Antioka mo Asia Minor, batho ba le bantsi ba ne ba reetsa molaetsa wa bone ka kgatlhego e kgolo. Pego ya Bibela ya re: “Me ea re ba cwa, ba rapèla gore mahoko auō a buiwè le ka sabata o moñwe. Me ea re ka sabata o moñwe, motse otlhe oa batla go phuthèga, ba tla go utlwa lehoko ya Modimo.” (Ditihō 13:42, 44) Mme kgatlhego eno ya kwa tshimologong e ne ya fokotsega mo bathong ba le bantsi fa ba utlwa baganetsi ba maikutlo a a gogomogileng ba bua kgatlhanong le baaposetoloi.

Temana 45 ya Ditihō kgaolo 13 ya re: “Me ea re Bayuda ba bōna machutichuti a batho, ba tlala lehuha, me ba ganetsa dilō tse di builweñ ke Paulo, ba tlhapatsa.” Mme Dit 13 temana 50 e tswelela ka gore: “Me Bayuda ba tlhotlheletsa bahumagadi ba ba rapèlañ Modimo, le magōsana a motse, me ba cosetsa Paulo le Barenabase pogishō, ba ba lèlèka mo melelwaneñ ea bōnè.” Batho ba ba kgatlhegang ba ne ba tshwanelwa ke go dira phetso ya gore a ba ne ba tla tswelela ba reetsa balatedi ba ga Jesu go sa kgathalesege kganetso. Ba ne ba tshwanelwa ke go amogela seo ba neng ba se utlwa gore ke boammaaruri kana go se gana.

Kganetso Gompieno

Fela jaaka Bakeresete ba ne ba ganediwa mo lekgolong lantlha la dingwaga C.E., jalo go na le baganetsi ba motlha wa segompieno ba ba lekang go thibela batho ba ba kgatlhegang go utlwa boammaaruri jwa Dikwalo jo bo rutwang ke Basupi ba ga Jehofa. Ditsala, balosika le baeteledipele ba bodumedi gantsi ba leka fela thata go kgoba ba ba kgatlhegang marapo gore ba seka ba ithuta Bibela le Basupi. Kwantle ga bosupi jwa Dikwalo, baganetsi ba ganetsa se se rutwang ba bo ba dira ditatofatso tse di seng boammaaruri.

Ke eng se batho ba ba kgatlhegang ba tshwanetseng go se dira? A ba tshwanetse go letlelela mafoko a baganetsi go tswala megopolo ya bone le ditsebe jaaka bangwe ba ne ba dira mo Antioka? Kana a ba tshwanetse go itseela bosupi mo Bibeleng gore a se ba se ithutang ke boammaaruri kana nnyaa?

Batho ba ba pelo dintle ba motse wa Berea ba ne ba akgolwa ka gonne ba ne ba lotolotsa mo Dikwalong go bona gore a se Paulo a neng a se ba bolelela e ne e le boammaaruri. Fa ba sena go bona gore o ne a bua boammaaruri, ba ne ba tsaya kgato e e tlhomameng malebana le jone. Re a bolelelwa: “[Baberea] ba ne ba tsalegile bogolo go ba ba kwa Thesalonika, ka ba amogetse lehoko ka pelo e e etleetsegileñ, ba lotolotsa mo dikwaloñ ka malatsi aotlhe, ha dilō tse di nntse yalo.”​—Ditihō 17:10, 11.

Batho ba Berea ba ne ba seka ba letlelela dipolelo tsa baganetsi go thibela megopolo ya bone go amogela mafoko a a molemo. Go na le moo, ba ne ba lotolotsa Dikwalo ka malatsi otlhe go tlhomamisa gore se ba neng ba se utlwa e ne e le boammaaruri. Ba ne ba bone letlotlo le legolo mme ba ne ba ka seke ba lese baganetsi go ba faposa mo go lone. A seno ga se tsela e e utlwalang eo o ka e tsayang mabapi le mafoko a a molemo a a tshwanang a a bolelwang ke Basupi ba ga Jehofa gompieno?

Lebaka la go bo Bangwe ba Ganetsa

Fa gongwe baganetsi ke ba-losika ba ba nang le maikaelelo a mantle bao o ba ratang le go ba tlotla, mme o na le mabaka a a utlwalang a go dumela gore ruri ba go eleletsa molemo. Mme o tshwanetse go akanyetsa gore ke ka ntlha yang fa ba sa dumalane le go ithuta ga gago Bibela le Basupi ba ga Jehofa. A ba na le bosupi jo bo kwenneng jwa Dikwalo jwa gore seo o se ithutang ga se boammaaruri? Kana a kganetso ya bone e bakwa ke seo bangwe ba se ba boleletseng? A ba tlhaela kitso ya boammaaruri ya seo Basupi ba se rutang? Bontsi jwa bao ba neng ba ganetsa Jesu ba ne ba dira jalo ka go tlhoka kitso ya seo a neng a se ruta le ka ntlha ya gore ba ne ba dumela ditatofatso tse di seng boammaaruri tsa baganetsi.

Fa Jesu a ne a lepeletse mo thupeng ya tlhokofatso, batho ba ba neng ba feta ka tsela ba ne “ba mo kgala, ba tshikinya ditlhōgō, ba re, Ahè, wèna eo u senyañ tempèla, u ba u e aga ka malatsi a le mararo, Ipolokè, me u hologè mo mokgoroñ. Hèla yalo ditlhōgō tsa baperisiti di na le bakwadi, ba ne ba na le chotlō kaga gagwè, ba re, O na a boloka ba bañwe: èna ka esi ga a kake a ipoloka. A èna Keresete, Kgosi ea Iseraela, a kè a hologè yana mo mokgoroñ, gore re bōnè, re dumèlè.” (Mareko 15:29-32) Lebaka la boikutlo jo bo maswe jono e ne e le eng?

Batho ba ne ba letleletse mogopolo wa bone kaga Jesu go laolwa ke baeteledipele ba bodumedi ba ba neng ba mo ila ka gonne a ne a ba senotse jaaka baruti ba maaka ba ditiro tsa bone di neng di sa dumalane le maiphako a bone a gore ke baemedi ba Modimo wa boammaaruri. Kwantle ga go loba, Jesu o ne a ba reile a re: “Ke go reñ ha le lona lo tlola molaō oa Modimo ka ntlha ea mekgwa ea lona? Baitimokanyi ke lona, Isaia o boletse sentlè kaga lona, a re, Chaba e, e ntlotla ka dipounama; me dipelo tsa bōnè di kgakala le nna. Me ba nkōbamèlèla lehèla, ka ea tle e re ba ruta, dithutō tsa bōnè e be e le dipolèlō tsa batho hèla.”​—Mathaio 15:3, 7-9.

Baeteledipele ba bodumedi ba ne ba ila Jesu fela thata le boammaaruri jo a neng a bo ruta mo e leng gore ba ne ba rerisanya go mmolaya ba bo ba dira maiteko otlhe a go faposa batho mo go ene. Gompieno, baeteledipele ba bodumedi ba le bantsi ba ganetsa Basupi ba ga Jehofa ka tlhagafalo e e tshwanang. Mme jaaka go ne go ntse ka Bakeresete ba pele, Basupi ba “nyadiwa” gongwe le gongwe. Mme a go botlhale go letlelela kganetso eno e e tlwaelegileng go laola mogopolo wa gago?

Boammaaruri jwa Dikwalo jo bo tshwanang kaga Bogosi jwa Modimo jo bo neng bo rerwa ke Jesu le baaposetoloi ba gagwe bo bolelwa ke Basupi ba ga Jehofa gompieno. Dikete tse di makgolo-kgolo tsa batho go dikologa lefatshe di amogela mahoko ano a a molemo go sa kgathalesege go ganediwa mo go golo ke ditsala, balosika, le baeteledipele ba bodumedi. Bao ba amogelang molaetsa wa Bogosi ba iponetse bosupi ka mo go kgotsofatsang gore ke boammaaruri, mme ba ikemiseditse go bo ngaparela.

Jalo go reng o dira jaaka batho ba lekgolo lantlha bao ba neng ba letlelela ba bangwe go ba faposa mo boammaaruring jo bo nayang botshelo jwa Dikwalo jo ba neng ba bo tlisediwa ke balatedi ba ga Jesu Keresete bao ba neng ba sa ratiwe? Go na le moo, tswelela o ithuta Bibela le Basupi, o dirisa Lefoko le le kwadilweng la Modimo go itseela bosupi go ikgotsofatsa gore seo o se ithutang ruri ke boammaaruri. (Yohane 8:32) Mme ka thuso ya Modimo ngaparela boammaaruri.