Thuso mo go Direng Diphetso tse di Botlhale

ALICE o ne a dira phetso e e seng botlhale e e neng ya felela ka matlhotlhapelo “Ke ne ka ikaroganya le Jehofa gammogo le phuthego ya gagwe,” o a dumela. Lemororo a ile a boa labofelo, go ne ga mo tsaya dingwaga di feta 13 go dira jalo​—o di bitsa “dingwaga tsa matlhomola.”

Mokeresete ga tshwanela go tlhaetsa matlho kotsi ya go dira diphetso tse di seng botlhale mabapi le tirelo ya gagwe mo Modimong. Ga se gore diphetso tse di sa siamang di dirwa ka boomo morago ga go elatlhoko mabaka a a tshwanetseng Ka dinako tse dingwe di dirwa fela ka ntlha ya motheo wa dikarabelo tsa tlholego. Fela fa maikutlo a atlega mo go hupetseng kgang mme pelo e e sa itekanelang e tsenya tlhotlheletso e e sa siamang mo kgonong ya go akanya, mefuta yotlhe e e borai le bohutsana e ka nna ya nna matswela.

Ruri, “pelo e boherehere bogolo go dilō cotlhe.” (Yeremia 17:9) Lefa go ntse jalo, Bibela e re bolelela ka mo re ka itshireletsang ka gone. “Gonne botlhale bo tla gu tsèna mo peduñ,” ya rialo, “Tlhalemaleye e tla gu tlhodumèla, tlhaloganyō e tla gu boloka.” (Diane 2:10, 11) Mme re dira jang gore botlhale bo tsene mo dipelong tsa rona?

Ithute Mo Dilong tsa Bogologolo

Lekeletsa seno. A ke o itsenye mo seemong sa batlhanka ba Modimo ba pele ba ba neng ba lebagana le maemo a a lekang a a tshwanang le a gago. A re re, ka sekai, seemo mo phuthegong ya Bokeresete ya lefelo la gaeno se a go tshwenya. Leka go akanya ka seemo se se tshwanang le se se umakilweng mo Bibeleng.

Go tweng ka phuthego ya Bokeresete ya lekgolo la ntlha la dingwaga kwa Korintha? A re re o leloko la phuthego ya Korintha. O ntse o le Mokeresete ka dingwaga tse pedi kana tse tharo. Abo e ne e le boipelo jang ne go nna le kitso ya boammaaruri mo nakong ya fa Paulo a ne a le koo dikgwedi di le 18! Mme jaanong, dilo di lebega di le maswe.

Mokgwa wa go ipopa ka makoko le makgaoganyane o tsosa dikgang mo phuthegong, o kgoreletsa kutlwano ya yone. (1 Bakorintha 1:10, 11) Go leseletsa boitsholo jo bo sa siamang go tsenya bomoya jwa yone mo kotsing. (1 Bakorintha 5:1-5) Go isa dikgang tsa go tlhoka kutlwisisano kwa dikgotla-tshekelong tsa lefatshe tsa molao ga maloko a phuthego go senya leina le lentle la yone.​—1 Bakorintha 6:1-8.

Fa o santse o akanya o le kwa Korintha wa bogologolo, o amegile ka gore maloko mangwe a phuthego ka metlha ba kgakgauthanela dikgang tse di seng mosola mo go kalo. (Bapisa 1 Bakorintha 8:1-13.) O sulafatswa mogopolo ke kilo, lefufa, kgakalo, le tlhakatlhakano e o e bonang. (2 Bakorintha 12:20) Ruri, ga o jesiwe di welang ke ba sekae ba ba boikgodiso ba ba dirang gore botshelo jwa Bokeresete bo nne bokete ka mo go sa tshwanelang (1 Bakorintha 4:6-8) O utlwisiwa botlhoko ke go utlwa gore bangwe ebile ba tlhaetsa matlho boemo jwa ga moaposetoloi Paulo le taolo ya gagwe, ba dira dikgalo tse di sa tshwanelang, le go mo nyatsa ka ntlha ya go bo e se sebui se se nonoñleng. (2 Bakorintha 10:10; 12:16) O tshoga gore bao ba godisang dipono tsa botho mo pontsheng ba tloga ba nyatsa tumelo ya phuthego ya Efangele ya motheo.​—1 Bakorintha 15:12.

Go Lebagana le Phetso

‘Seno ruri ga se a tshwanela go nna jaana,’ o a fegelwa. ‘Ke eng fa bagolwane ba sa baakanye dilo? Sengwe ruri se senyegile.’

A o tla tlogela phuthego e e mo Korintha, o fetsa ka gore go tla bo go le botoka o direla Modimo golo gongwe? Kana gongwe o tla fetsa ka gore go botoka go emisa go kopanela le Bakeresete-ka-wena gotlhelele? A o tla letlelela mathata ano go hupetsa boipelo jwa gago le tumelo ya gago ya gore Jehofa Modimo le Jesu Keresete ke bone beng ba dilo? A o tla nna le moya wa go kgala, le go ngongorega, o o go dirang gore o nne le dipotso mabapi le maikaelelo a Bakeresete-ka-wena? A o tla goga dinao mo tirong ya go rera, o akanya gore ga go na lebaka lepe le le utlwalang la go kaela ba ba kgatlhegang kwa phuthegong ya go nna jalo?

Fa o leba seemo o wetse dibete o thusiwa ke pono ya seemo sa gompieno, o ka nna wa go ñtlhela go le motlhofo gore phetso ya gago e ka bo e ile ya nna go nna boikanyego mo phuthegong ya Modimo, go sa kgathalesege makoa a yone. Mme fa o lebagane le seemo se se tshwanang gompieno, a o ne o tla kgona go tshegetsa mogopolo o o phepa le pelo e e ritibetseng? A o ne o ka fetsa gompieno jaana jaaka o akanya gore o ne o ka dira phetso fa o ne o tshela ka nako eo?

Go Solegelwa Molemo Ke Kgakololo e e Botlhale

Bakeresete ba Korintha ba ba neng ba dira phetso e e botlhale e ne e le bao ba neng ba nna gaufi le phuthego. Ba ne ba ikutlwa jaaka Petere a ne a ikutlwa pelenyana. Fa bangwe ba barutwa ba ne ba tlogela go kopanela le Jesu, Petere o ne a re: “Morèna, ana re ka ea kwa go mañ? wèna u na le mahoko a botshelō yo bo sa khutleñ. Me re dumetse, re bile rea itse ha e le wèna Moitshepi oa Modimo.” (Yohane 6:68, 69) Ka mo go phepafetseng, ke fela fa re nna gaufi le phuthego ya Modimo re ka solegelwang molemo ke kgakololo ya yone.

Mo diphuthegong tse disha, jaaka ele ya bogologolo ya Korintha, ke selo se se tlwaelegileng gore bosaitekanelang jwa setho bo tsose mathata a a ka tlhokang kgakololo e e nonoñleng. Mme fa a ne a neela Bakeresete ba Korintha kgakololo, Paulo o ne a gakologelwa gore bontsi-ntsi jwa bone e ne e santse e le “baratwa.” (1 Bakorintha 10:14; 2 Bakorintha 7:1; 12:19) O ne a seka a lebala gore Jehofa o ne a isa bopelonomi jo bo sa tshwanelang le boitshwarelo kwa go bao ba arabelang mo kaelong ya gagwe.​—Pesalema 130:3, 4.

Legale, ereka phuthego ya Bokeresete e oka batho ba mefuta yotlhe, bangwe ba tsaya nako e telele go arabela mo kaelong eno go na le ba bangwe. Seno se boammaaruri ka ntlha ya mabaka a mantsinyana. Diphetogo dingwe di bokete go dirwa go na le tse dingwe. Gape, mongwe le mongwe o farologana mo mmeleng le mo tlhaloganyong, tikologo, tlhago, le maemo. Ka gone abo go le botlhale jang ne go tila go kgala thata mme o gakologelwe gore “lorato lo tlo lo bipe bontsi yoa dibe”! (1 Petere 4:8) Tota ebile, fa Jehofa le Morwawe ba ikemiseditse go itshokela bosaitekanelang jwa batho le go sa nonofa mo phuthegong ya bone, a ga re a tshwanela go bontsha moya o o tshwanang?​—1 Bakorintha 13:4-8; Baefesia 4:1, 2.

Fa o ne o le mo phuthegong ya Korintha ya bogologolo, o reeditse kgakololo e e lorato mme e nitame ya ga Paulo go ne go tla go gakolola gore Keresete, jaaka tlhogo ya phuthego ya Bokeresete, o kgatlhega thata mo go atlegeng ga yone. (Mathaio 28:20) E ne e tla nonotsha tumelo ya gago mo tsholofetsong ya ga Jesu ya go boloka balatedi ba gagwe ba utlwana jaaka ba ile ba arabela mo thusong e e tlametsweng ka “motlhanka eo o boikañō le eo o botlhale.” (Mathaio 24:45-47; Baefesia 4:11-16) Ee, le mafoko a ga Paulo a ne a tla bo a go thusitse go boloka boipelo le tlhomamo le e leng tlaseng ga maemo a a lekang. O ne o tla nna le tumelo ya gore Modimo o ne o tla go neela maatla a go lebagana le bothata bope joo a neng a ka bo letlelela go nna gone ka nakwana.

Seno ga se reye gore Mokeresete ga tshwanela go dira sepe fa maemo a a sa siamang a nna gone mo phuthegong. Bogologolo mo Korintha, banna ba ba nonofileng jaaka Setefanase, Foretunato, Akaiko, le bangwe ba ntlo ya ga Keloe, ba ne ba tsaya kgato. Go lebega ba ile ba gakolola Paulo kaga seemo. (1 Bakorintha 1:11; 5:1; 16:17) Mme fela fa ba sena go dira jalo, ba ne ba tlogela sengwe le sengwe mo diatleng tsa gagwe ka tumelo. Tlhagafalelo ya tshiamo ga e a ka ya ba dira gore ba latlhegelwe ke tumelo mo botlhogong jwa ga Keresete kana go ‘tšararegela Jehofa.’​—Diane 19:3.

Go tlhagafalela tshiamo ga rona gompieno go tla re thibela go akanya ka go itlhophela go goga dinao mo kabelong ya rona e re e filweng ke Modimo ya go rera mafoko a a molemo. Go dira jalo go tla bo go supa go tlhaela ga kamego ka botshelo jwa ba bangwe ebile e tla bo e le go palelwa go dira se Keresete a batlang gore re se dire. “Me ke gōna ba ga echō ba ba ratègañ,” Paulo o ne a gakolola, “lo tlhōmamè, lo nitamè, lo nntse lo totahetse mo tihoñ ea Morèna ka metlha eotlhe, ka lo itse ha tihō ea lona e se ketla e nna lehèla mo Moreneñ.”​—1 Bakorintha 15:58.

O Seka wa Tlhoka go Itse Maano a ga Satane

Mathata a phuthego a a tshwanang le a a neng a le teng mo Korintha fa gongwe a ka nna bokete thata go dirisana le one go gaisa pogiso e e setlhogo. Satane o dirisa maemo a a ntseng jalo mo boitekong jwa go re dirisa diphetso tse di sa siamang tse di tla re goge- lang kgakala le Jehofa. Mme ‘ga re mo lefiñng ka maano a ga Satane.’​—2 Bakorintha 2:11.

Paulo o ne a bolelela Bakeresete ba Korintha gore ba ne ba ka solegelwa molemo ke go tlhatlhoba rekoto ya batlhanka ba pele ba Modimo. “Me yana dilō tse, di ba dihaletse ka mokgwa oa sekaèlō,” o ne a bua jalo ka Baiseraele, “me tsa kwalwa gore di nnè tlhagishō mo go rona ba dikhutlō tsa metlha di wetseñ mo go rona.” (1 Bakorintha 10:11) Ka mo go tshwanang, rona gompieno re ka solegelwa molemo ka go tlhatlhoba ka kelotlhoko rekoto ya Bakeresete ba pele. Ka sekai, re ka tlhokomela se se ileng sa diragala mo Korintha. Go tlhatlhanya kafa re ka bong re ile ra dira diphetso tse di siameng ka gone ka nako eo go tla re thusa go tila go dira diphetso tse di sa siamang jaanong.

Morago ga “dingwaga tsa matlhomola” tse 13 a seyo, Alice o bua jaana ka go kopanela ga gagwe ga ntlha mo Holong ya Bogosi: “Ke ne ke tshaba go bua ke tshoga gore ke tloga ke lela. Ke ne ke boetse gae​—ke le kwa gae ruri. E ne ekete ke a lora.” Ka gone o ititeye sehuba, go sa kgathalesege mathata a a ka tsogang, go tshegetsa phetso ya gago e e botlhale ya gore le ka motlha o seka wa tlogela phuthego ya ga Jehofa! Masego a gago a go kopanela le batho ba Modimo a tla totahala. Mme ga a kitla a nna le bokhutlo.​—Diane 2:10-15, 20, 21.