Botshelo le Bodihedi tsa ga Jesu

BAAPOSETOLOI ba ba 12 ba ipeletse loeto lwa go rera lo lo gakgamatsang go ralala Galilea. Jaanong. ka bokhutshwane morago ga go bolailwa ga ga Johane, ba boela kwa go Jesu le go bolela maitemogelo a bone a a kgatlhisang. Ka go bona gore ba lapile le gore batho ba le bantsi baa tla le go tsamaya mo eleng gore ga ba na le eleng nako ya go ja, Jesu a re: ‘A re tsweleng kwa thoko re le rosi kwa helong ha go senang batho kwa lo ka itapolosang gone.’

Ba palama mokoro wa bone, gongwe gaufi le Kaperenama, ba ya kwa lefelong le le kwa thoko, go bonala e le kwa botlhaba jwa Joredane go pota Betheseda ka kwa. Lefa go ntse jalo. batho ba le bantsi ba ba bona ba tsamaya, mme ba bangwe ba utlwalela kaga gone. Botlhe bano ba sianela kwa pele mo lotshitshing ja lewatle. Mme fa mokoro o goroga. ba setse ba emetse go ba kopantsha.

Fa a tswa mo mokorong mme a bona boidiidi jo bogolo, Jesu o tlhomoga pelo ka ntlha ya gore batho ba tshwana le dinku di sena modisa. Ka gone o fodisa balwetsi ba bone mme o simolola go ba ruta dilo di le dintsi.

Nako e feta ka bofefo, mme barutwa ba ga Jesu ba tla kwa go ene mme ba mo raya ba re: “Golō hano ke gare ga naga hèla, le letsatsi le setse le hetile: Ba phatlalatsè, gore ba eè kwa go nañ le batho, le mo metsaneñ mo tikologoñ, me ba ithèkèlè diyōnyana.”

Lefa go ntse jalo, fa Jesu a fetola a re: “Lona lo ba neeñ go ya.” Go tswa foo, ereka Jesu a ne a itse se a neng a tsile go se dira, o ne a leka Filipo ka go mmotsa jaana: “Re tla rèka kae dinkgwè, gore batho ba, ba yè?”

Go ya ka pono ya ga Filipo seemo ke se se ka sekeng se kgonege Ruri, go ne go na le banna ba ka nna 5 000 le batho ba ka feta thata 10 000 fa go balwa le basadi le bana! “Dinkgwè tse di ka rèkwañ ka dipondo di le mashomè mabedi [ponto mo metlheng eo e ne e le tuelo ya letsatsi] ga di kake tsa ba lekana, leha moñwe le moñwe a hiwa go le gobōtlana,” Filipo o ne a arabela jalo.

Gongwe e le go bontsha bokete jwa go fa batho ba ba kalo dijo Anderea o a ithaopa ka go re: “Go na le mosimane ha, eo o chotseñ dinkgwè di le tlhano tsa barele, le ditlhapi di le pedi,” a oketsa ka go re: “me tseuō e tla bo e le eñ mo bontsiñ yo bo kana kana?”

Ereka e ne e le motlha wa dikgakologo, pele fela ga Tlolaganyo ya 32 C.E., go na le bojang jobontsi jo bo talana. Ka gone Jesu o laola barutwa ba gagwe go bolelela batho gore ba rapame mo bojannyeng ka ditlhopha tsa 50 letsa 100. O tsaya dinkgwe tse tlhano le ditlhapi tse pedi, o a lelala. a ba a di segofatsa Go tswa foo o simolola go ngathoganya dinkgwe le go kgaoganya ditlhapi. O di neela barutwa ba gagwe, bao, jaanong, ba di abelang batho. Se se gakgamatsang, batho botlhe ba ja go fitlhela ba kgora!

Moragonyana Jesu o bolelela barutwa ba gagwe jaana: “Sèlañ dikabetla tse di setseñ, gore go se ka ga latlhèga sepè.” Fa ba dira jalo, ba tlatsa ditlatlana di le 12 ka masalela a tse ba di jeleng! Mathaio 14:13-21; Mareko 6:30-44; Luke 9:10-17; Yohane 6:1-13.

◆ Ke eng fa Jesu a batlela baaposetoloi ba gagwe lefelo le go senang ope mo go lone?

◆ Jesu o isa barutwa ba gagwe kae, mme ke eng fa tlhokafalo ya bone ya go itapolosa e sa diragadlwe?

◆ Fa bosigo bo atamela, barutwa ba kopa eng, mme Jesu o tlhokomela batho jang?