Dipotso tse di Tswang go Babadi
◼ “Losika loa semodimo” le le umakilweng mo go Malaki 2:15 ke eng?
Bontlhanngwe jwa temana e e matswakabele e eno e balega jaana: “Me a o na a se ka a diha a le moñwe hèla leha a na a na le mo go setseñ ga mōea? Me e ne e le a le moñwe hèla ka ntlha eañ? Losika lwa semodimo. “Losika” go bonala go buiwa ka morafe wa Iseraela wa bogologolo, o ka nako eo temana e neng e kwalwa ka yone o neng o le mo kotsing ya kgotlelo ya sedumedi.
Malaki o ne a bolelela-pele mo motlheng wa go senyega ga boitsholo jwa morafe oo. Banna bangwe ba Baiseraele ba ne ba sa tseye ‘bomorwadia modimo wa seeng jaaka basadi’ fela mme gape ba ne ba tlhala basadi ba bone ba ntlha ba Bajuda, ‘basadi ba bokau jwa bone,’ gongwe ba tsaya basadi ba babotlana ba baheitane. Lefa go le jalo, ga se banna botlhe ba Baiseraele ba ba neng ba dira “makgapha” ano. (Malaki 2:11, 13, 14; Duteronome 7:3, 4) Ka phepafalo a lebisitse kwa bathong ba ba neng ba gana go roba kgolagano ya bone ya lenyalo le moobamedi-kabone wa ga Jehofa, Malaki o ne a kwala jaana: “Me o ne a se ka a diha a le monyile hèla, leha a na a na le mo go setseñ ga mōea.”
“Mōea” ke moya o o boitshepo wa Modimo, o a o tshololetseng mo morafeng wa gagwe. Lefa go ntse jalo, Baiseraele ba ba senang kutlo, ba ne ba ganana, mme ka gone ba hutsafatsa moya oo. (Isaia 63:10; Ditiho 7:51-53; bapisa Baefesia 4:30.) Bangwe ba Bajuda ba ne ba ikanyega mo molaong wa Modimo, mme ka ntlha ya kutlo ya bone ba ne ba boloka mo “go setseñ ga mōea.” Baobamedi bano ba ba ikanyegang ga baa ka ba senka boitumelo jwa boikgapeledi jwa bone fela. Kaga motho wa go nna jalo Malaki o ne a kwala jaana: “O na a batla losika loa semodimo.” “Losika” lono e ne e le morafe wa Iseraele wa bogologolo, o Malaki a neng a re o ne o ‘bopilwe ke Modimo.’ ‘Popo’ eno e ne ya nna gone fa Jehofa a dira kgolagano le Baiseraele kwa Thabeng ya Sinai, a ba dira “boshwa bo chwerwe” jwa gagwe le “morahe o o boitshèpō.” “Losika” lwa boammaaruri lwa ga Aberahame le le neng le tla segofatsa batho botlhe mo lefatsheng le ne le tla nna gone ka morafe ono.—Malaki 2:10; Ekesodo 19:5, 6; Genesise 22:18.
Lefa go ntse jalo, Baiseraele ba ne ba tshwanetse go nna ba itshekile sedumeding ba sa nyalane le baditšhaba ba ba neng ba sa obamele Jehofa. Go tlhoka bomodimo ga batho bao go ne go tla ba bodisa, jaaka go ka bonwa mo seemong sa nako ya ga Esere. Ka nako eno Baiseraele ba ne “ba itsetse bomorwadia bōnè [merafe e e dikologileng], ba bile ba ba tseisitse bomorwa bōne: ke gore, losika lo lo itshepileñ [lono] lo itlhakantse le dichaba tsa mahatshe.” (Esere 9:2) Jone “boshula . . . jo bogolo” jono bo ne jwa nna gone mo malatsing a ga Nehemia, molekane wa ga Malaki. Banna ba Bajuda baba neng ba ikanyega mo Modimong ba ne ba bona ka phepafalo kotsi ya semoya mo go bone le mo baneng ba ba neng ba tsholwa ka kgolagano e e ntseng jalo. Go ne go na le kotsi ya go ntshiwa mo kobamelong ya ga Jehofa ke mosadi yo o neng a sa ineela mo go Ene. Nehemia o bile a bega gore gareng ga Bajuda ba ba neng ba nyetse ka kwantle, ‘go ne go se ope wa bana ba bone yo o neng a itse go bua Sejuda.’—Nehemia 13:23-27.
Bajuda ba ba sa ikanyegeng ba ne ba batla go itumedisa bone ba le bosi go sa kgathalesege kafa go neng go tla ama bodumedi jwa morafe wa bone, “losika loa semodimo” ka teng. Ga go gakgamatse go bo Malaki a ile a gakolola jaana: “Lo itisè mo moeeñ oa lona, mme go se nnè opè eo o dihèlañ mosadi oa bokau yoa gagwè ka bonoñwane”! (Malaki 2:15) Bajuda ba ba ikanyegang ba ne ba disa moya wa bone, kana boikutlo jwa bone, e le gore ba nne ba ikanyega mo basading ba bone ba Sejuda. Banna bano ba ne ba tlotla thata bophepa jwa Sedumedi jwa “morahe o o boitshèpō” wa bone. Ba ne ba eletsa gore bana ba bone ba bale Lefoko la Modimo le go gola ba rata Jehofa, mo go tlatseleletsang mo nonofong ya sedumedi ya morafe oo.
Gompieno Bakeresete ba ba ineetseng ba tlhoka go nna le tlhagafalo e e tshwanang mo meyeng ya bone, kana boikutlo jo bo bonalang sentle. Fa ba nyetse, batho bano ba tshwanetse go tila go tlhala balekane ba bone ka boferefere. Mme Mokeresete mongwe le mongwe o tshwanetse go utlwa kgakololo ya ga moaposetoloi Paulo ya go nyala “mo moreneñ,” a tsena mo kgolaganong ya lenyalo fela le Mosupi yo mongwe wa ga Jehofa le yo o ineetseng yo o kolobeditsweng.—1 Bakorintha 7:39.