“A Dipelo tsa Lona di se Huduege”

“A dipelo tsa lona di se huduege: lo dumèla mo Modimoñ, dumèlañ le mo go nna.”—YOHANE 14:1.

1. Ke ka ntlhayang fa mafoko a ga Jesu go Yohane 14:1 a ne a le mo nakong e e tshwanetseng?

ENE E le ka Nisane 14 ka ngwaga wa 33 C.E. Setlhophanyana sa banna bangwe se ne se kopanetse mo ntlwaneng e e kwa godimo mo Jerusalema letsatsi le sena go phirima. Moeteledipele wa bone o ne a ba fa kgakololo ya go ba sadisa sentle le kgothatso. Sengwe se a se buileng ke seno: “A dipelo tsa lona di se huduege.” (Yohane 14:1) Mafoko a gagwe a ne a lebaganye tota, ka go bo ditiragalo tse di ngomolang pelo di ne di tla akofa di diragala. O ne a tshwarwa mo bosigong joo, a sekisiwa, a bo a atlholelwa loso.

2. Ke ka ntlhayang fa letsatsi leo le ne le le botlhokwatlhokwa, mme ke eng se se neng sa thusa barutwa?

² O na le lebaka je utlwalang ja go dumela gore letsatsi leo e ne e le le le masisi thata mo ditiragalong, leo le neng le ama isagwe yotlhe ya setho. Loso lwa setlhabelo lwa Moeteledipele Jesu, le ne la diragatsa dipolelelo pele di le dintsi tsa bogologolo mme lwa baakanyetsa ka motheo wa botshelo jo bo sa khutleng mo go ba ba dumelang mo go ene. (Isaia 53:5-7; Yohane 3:16) Mme, baaposetoloi, ka go gamarisiwa le go etsaetsisiwa ke ditiragalo tse di botlhoko tsa bosigo joo, ba ne ba tlhakana tlhogo ba bo ba boifa ka lobakanyana. Petere o ne a ba a itatola Jesu. (Mathaio 26:69-75) Lefa go ntse jalo, morago ga fa baaposetoloi ba ba ikanyegang ba sena go amogela mothusi yo o solofeditsweng, ebong moya o o boitshepo, ba ne ba nna pelokgale ba bo ba seka ba tshwenyega. (Yohane 14:16, 17) Ka gone, fa Petere le Johane ba ne ba tlelwa ke kganetso e e nonofileng ba bo ba latlhelwa mo kgolegelong, ba ne ba rapela Modimo gore o ba thuse gore ba tle ba bue Lefoko la gagwe “ka pelokgale eotlhe hèla.” Thapelo ya bone e ne ya arabiwa.—Ditihō 4:1-3, 29-31.

3. Ke ka ntlhayang fa batho ba le bantsi jaana ba tshwenyegile gompieno?

³ Gompieno, re tshela mo lefatsheng leo le leng mo matshwenyegong a magolo. Bokhutlo jwa tsamaiso eno e kgologolo ya dilo bo atamela ka bofefo. (2 Timotheo 3:1-5) Dimilione tsa batho ke tseo ka sebele di amiwang kana di tshwenngwang thata-thata ke tshenyego e e masisi ya botshelo jwa lelapa le ditekanyetso tsa boitsholo, koketsego e e boitshegang ya malwetsi a a sa tlwaelesegang, dikgoberego tsa sepolotiki, tlhokego ya mebereko, ditlala, borukutlhi, le matshosetsi a ntwa ya nuklea. Dipelo tsa ba le bantsi di huduegile ka ntlha ya go boifa isagwe. Ke fela jaaka Jesu a ne a bolelela pele ‘merafe e raraanye . . . fa batho ba le mo poifong ka ntlha ya tebelelo ya dilo tse di tlang mo lefatsheng.’—Luke 21:25, 26.

4. Ke mabaka afe a a ka dirang gore Bakeresete ba nne mo khutsafalong?

⁴ Le eleng Bakeresete ba ka amiwa mo go masisi ke mabaka a a ntseng jalo a a hutsafatsang. Ba ka nna ba tsena mo tlalelong ka ntlha ya letlhoo la sedumedi kana go ganediwa ke balosika, baagelani ba bone, babereki-mmogo, balekane ba sekolo, le baeteledi pele ba puso. (Mathaio 24:9) Jalo re ka ipoloka jang re ritibetse, re sena matshwenyego, mo metlheng eno e e bokete? Re ka ipoloka jang re ritibetse mo mogopolong fa dilo di nna thata? Re ka lebagana jang le isagwe ka nitamo? Ke eng se se ka re thusang go fenya tlalelo eo e ntseng e ama mongwe le mongwe? Re mo lobakeng loo Jesu a neng a fa kgothatso e e go Yohane 14:1, jalo a re e tlhatlhobeng ka kelotlhoko.

Re ka Fenya Tlalelo Jang?

5. Ke ditlhagiso dife tse di kgothatsang tseo Dikwalo di di re neelang?

⁵ Fa a sena go fa kgothatso e e lorato ya ‘go sa huduege mo dipelong,’ Jesu o ne a raya baaposetoloi ba gagwe a re: “Lo dumèla mo Modimoñ, dumèlañ le mo go nna.” (Yohane 14:1) Dikwalo tse di tlhotlheleditsweng di re neela dikgothatso di le dintsi tse di tshwanang: “Latlhèla morwalō oa gago mo go Yehofa, me o tla gu kokotletsa.” “Pitikèla tsela ea gago mo go Yehofa; u bo u mo ikanyè, me o tla go dihatsa.” (Pesalema 55:22; 37:5) Paulo o ne a neela Bafilipi kgakololo eno e e botlhokwatlhokwa: “Lo se ka loa tlhobaediwa ke sepè; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō. Me kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona.”—Bafilipi 4:6, 7.

6, 7. (a) Nngwe ya ditsela tsa go fokotsa khutsafalo ke efe? (b) Re ka tlhagolela katamalano e e kitlaneng jang le Jehofa?

⁶ Tlhobaelo kana kamego eo e tsalwang ke mathata le boikarabelo jo bo boima fa gongwe di ka ama botsogo jwa rona le moya wa rona. Lefa go ntse jalo, motlhalefedi mongwe wa tsa kalafi, mo bukeng ya Don’t Panic, o ne a akgela ka go re: “Fa batho ba ka kgona go bua ka mathata a bone le mongwe yo ba mo tlotlang . . . , selekanyo sa tlalelo gantsi se a fokotsega thata-thata.” Fa e le gore go ntse jalo fa motho a buisanya le motho yo mongwe, a bo go ka nna le thuso e kgolwane jang ne fa motho a ka bua le Modimo. Gonne ke mang yo re ka mo tlotlang thata go gaisa Jehofa?

⁷ Ke sone seo kamano e e kitlanyeng thata le ene e leng botlhokwatlhokwa mo Bakereseteng gompieno. Batlhanka ba ba godileng ba ga Jehofa ba itse seno sentle, jalo ba itlhokomela thata gore ba tile go kopanela le batho ba selefatshe kana go senka menate eo e ka koafatsang kamano eo. (1 Bakorintha 15:33) Ba bile gape ba lemoga kafa go leng botlhokwa ka gone go bua le Jehofa ka thapelo, eseng fela gangwe fela kana gabedi ka letsatsi, mme ka metlha yotlhe. Bakeresete ba babotlana kana ba basha ke bone bao segolo bogolo ba tshwanetseng go tlhagolela popagano e e nonofileng le Jehofa ka go ithuta ka metlha le go tlhatlhanya mo Lefokong la gagwe le ka go kopanela le Bakeresete ba bangwe le tirelo. Re kgothadiwa jaana: “Atamèlañ Modimoñ, me o tla lo atamèla.”—Yakobe 4:8.

Kgakololo e Jesu a Neng a e Neela

8, 9. Ke kgakololo efe e e molemo e re ka e dirisang kaga mathata a itsholelo?

⁸ Mo dinageng di le dintsi, go tlhoka mmereko le go wela tlase ga itsholelo ke mathata a magolo a a bakang go tshwenyega. Jesu o ne a neela kgakololo e e tshwanetseng kaga dikamego tseno: “Se tlhobaeleleñ botshelō yoa lona, loa re, Re tla ya eñ, re tla nwa eñ? leha e le kaga mmele, loa re, Re tla apara eñ? Botshelō a ga bo gaise diyō, le mmele diaparō?” (Mathaio 6:25) Ee, moya le mmele, kana motho ka kakaretso, ke dilo tse di botlhokwa thata-thata go na le dijo le diaparo. Batlhanka ba Modimo ba ka tlhomamisega gore o tla ba thusa go bona ditlhokafalo tsa bone tsa konokono. Jesu o ne a fa sekai seno: “Lebañ dinōnyane tsa loapi, yaka di sa yale, le gōna di sa robe, leha e le go rorèla mo mabolokeloñ: me Rra eno oa legodimo oa di otla. Lona a ga lo tlhwatlhwa e kgolo thata bogolo go cōna?” (Mathaio 6:26) Ga se mo go utlwalang gore Modimo o ka tlamela dinonyane mme gone a tlhokomologe batlhanka ba gagwe ba batho, bao ba tlhokegang thata-thata mo go ene le bao Keresete a ileng a ba beela botshelo jwa gagwe.

⁹ Go tswa foo Jesu o ne a tiisetsa seno ka go lebisa mo dithunyeng tsa naga tseo di sa direng kana go otlha, mme lefa go le jalo “le e leñ èna Solomone, mo kgalaleloñ eotlhe ea gagwè, o na a sa kgabe yaka señwe sa cōna tseuō.” Puso ya ga Kgosi Solomone e ne e itsege ka kgalalelo. Go tswa foo Jesu o ne a botsa potso eno ka go kgothatsa: “A [Modimo] ga o ketla o apesa lona bogolo yañ?”—Mathaio 6:28-32; Sehela sa Dihela 3:9, 10.

10. (a) Mafoko a a gomotsang a ga Jesu a lebisitswe go bomang? (b) Ke kgakololo efe e a neng a e neela kaga isagwe?

¹⁰ Lefa go ntse jalo, Jesu o tswelela pele go bontsha gore seno se ama fela ba ba ‘batlang bogosi pele le tshiamo ya gagwe.’ Mo lefatsheng lotlhe, Bakeresete ba mofuta oo ba lemoga seo Bogosi jwa Modimo e leng sone tota mme ba bo eteletsa pele mo matshelong a bone. Mo go bone, kgothatso ya ga Jesu e a dira: “Se tlhobaeleleñ ka moshō: gonne ka moshō go tla itlhobaèlèla ka gosi. Letsatsi leñwe le leñwe le lekanywe ke boshula yoa yeōna.” (Mathaio 6:33, 34) Ka tsela e nngwe, seo se raya gore o dirisanye le bothata bongwe le bongwe fa bo tlhaga, mme o seka wa itshwenya go sa tlhokafale kaga isagwe.

11, 12. Bakeresete bangwe ba ile ba ikutlwa jang gore Jehofa o ile a ba thusa fa a arabela dithapelo tsa bone?

¹¹ Lefa go le jalo, batho ka bontsi ba sekametse mo go tshwenyegeng kaga isagwe, segolo bogolo fa dilo di sa tsamae sentle. Mme Bakeresete ba ka retologela go Jehofa ka tumelo mme ebile ba tshwanetse. Akanya ka Eleanor. Monna wa gagwe o ne a lwala thata, mme o ne a fetsa ngwaga a sa kgone go bereka. O ne a na le bana ba babotlana ba le babedi le rraagwe wa motsofe ba a neng a ba tlhokomela, jalo o ne a bile a sa kgone le go ka bereka tiro tsatsi lotlhe. Ba ne ba kopa Jehofa go ba thusa. Mo mosong mongwe, ka bokhutshwanyane morago ga seno, ba ne ba bona enfelopo e tsentswe kafa tlase ga lebati. E ne e na le namane e tona ya madi—a a neng a lekanye go ba thusa go fitlhelela monna a boela gape kwa tirong. Ba ne ba lebogela thata-thata thuso eno e e tlileng ka nako. Ga go na motheo ope go ya ka Bibela wa go lebelela gore selo se le sengwe se se tshwanang se tla diragalela Mokeresete mongwe le mongwe yo o tlhokang, mme re ka tlhomamisega gore Jehofa o tla utlwa boikuelo jwa rona le go re o na le kgono ya go ka re thusa ka ditsela tse di farologaneng.

¹² Motlholagadi mongwe wa Mokeresete mo borwa jwa Afrika o ne a tshwanelwa ke go batla tiro gore a tlamele bana ba gagwe ba le babedi ba babotlana. Mme o ne a eleditse thata go bereka mo sephatlong sa letsatsi e le go re a tle a kgone go bona nako ya go nna le bone. Morago ga fa a sena go bona tiro, o ne a patelesega go tlogela tiro eo fa rakgwebo a ne a dira phetso ya gore o ne a batla mokwaledi wa nako e e tletseng. Fa a sena go latlhegelwa ke tiro gape, kgaitsadi yono o ne a rapela Jehofa ka tlhoafalo gore a mo thuse. Dibeke di le tharo moragonyana, mookamedi wa gagwe wa pele o ne a mo kopa gore a boele tirong go tla go bereka ka sephatlo sa letsatsi. Abo a ne a itumela thata jang ne! O ne a ikutlwa ka gore Jehofa o ne a arabile dithapelo tsa gagwe.

Kokotlela Jehofa

13. (a) Ke eng se se bolelwang ka “mokokotlèlō”? (b) Ke dikai dife tse di mo Dikwalong tse re nang natso tsa mokokotlelo?

¹³ Tswee tswee elatlhoko gore morago ga fa a sena go gakolola ka go re, “Lo se ka loa tlhobaediwa ke sepè,” Paulo o oketsa ka go re, “me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō.” (Bafilipi 4:6) Ke eng fa “kokotlèlō” e umakiwa? Lefoko leo le raya “topo e e tlhoafetseng,” kana ‘go khubama ka thapelo.’ Go raya go kopa Modimo ka tlhoafalo e kgolo, jaaka fa motho a le mo tlalelong e kgolo kana mo diphatseng. Fa Paulo a ne a le mo kgolegelong, o ne a kopa gore Bakeresete-ka-ene ba mo kokotlelele gore a tle a kgone go rera kwantle ga poifo ‘mafoko a a molemo . . . jaaka morongwa yo o mo dikeetaneng.’ (Baefesia 6:18-20) Ramasole wa Moroma Korenelio le ene o ne a “rapèla Modimo ka metlha eotlhe.” Abo a tshwanetse a bo a ile a itumela jang ne fa moengele a ne a re: “Merapèlō ea gago, le dikacō tsa gago di tlhatlogile, di ile go nna segopoco ha pele ga Modimo.” Me abo a ile a nna le tshiamelo e e molemo jang ne go nna gareng ga Baditšhaba ba ntlha go tlodiwa ka moya o o boitshepo!—Ditihō 10:1-4, 24, 44-48.

14. Re ka itse jang fa e le gore a ke nnete gore go lopa Jehofa ka tlhoafalo go tshwanetswe go dirwa fela gangwe fela?

¹⁴ Go tshwaega sentle gore merapelo e e ntseng jalo e e tlhoafetseng go Jehofa gantsi ga e dirwe gangwe fela. Mo Therong ya ga gagwe ya mo Thabeng e e itsegeng thata Jesu o ne a ruta ka go re: “Nnang lo lope, mme lo tla newa; nnang lo batle, mme lo tla bona; nnang lo kgwanyakgwanye, mme lo tla bulelwa.” (Mathaio 7:7, NW) Dithanolelo di le dintsi tsa Bibela di kwala seno ka go re: “Lopang . . . batlang . . . kgwanyakgwanyang.” Mme Segerika sa pelepele se ntsha mogopolo wa go re ke tiro e e tsweletseng.a

15. (a) Ke ka ntlhayang fa Nehemia a ne a tlhontse sefatlhego fa a ntse a tshelela Kgosi Aretaserese beine? (b) Nehemia o ile a dira jang se se fetang fela go rapela ka bokhutshwane?

¹⁵ Fa Nehemia e ne e le motlhanka wa bojalwa jwa mofine wa ga Kgosi ya Peresia Aretaserese, kgosi e ne ya botsa gore ke eng fa a tlhontse sefatlhego. Nehemia o ne a bolela gore e ne e le ka go bo a utlwaletse gore Jerusalema o ne a le mo seemong se se swafetseng. Kgosi he ya botsa ya re: “Ke eñ se u se lōpañ?” Ka bofefo fela Nehemia o ne a kopa gore Jehofa a mo thuse, kwantle ga pelaelo a dira jalo ka bokhutshwane, le ka tidimalo. Go tswa foo o ne a kopa tetlelelo ya gore a boele Jerusalema go ya go aga sesha motse wa legae ja gagwe je le rategang. O ne a fiwa topo ya gagwe. (Nehemia 2:1-6) Lefa go ntse jalo, pele ga puisano eo e e masisi, Nehemia o ne a feditse malatsi a ntse a rapela thata-thata, a kokotlela Jehofa gore a mo thuse. (Nehemia 1:4-11) A o bona thuto e o e tshwaretsweng fano?

Jehofa o a Araba

16. (a) Ke tshiamelo efe e e kgethegileng e Aberahame a ileng a e ipelela? (b) Ke dithuso dife tse di nonofileng tse re nang natso tse di ka kopanyelediwang mo karabelong ya dithapelo tsa rona?

¹⁶ Mo pakeng nngwe, Aberahame o ne a ipelela tshiamelo ya go buisanya le Jehofa ka baengele. (Genesise 22:11-18; 18:1-33) Lemororo seo se sa diragale gompieno, re segofaditswe ka dithuso tse di nonofileng tseo Aberahame a neng a sena natso. Nngwe ya tsone ke Bibela e e feletseng—motswedi o o sa tlhaeleng wa kaelo le kgomotso. (Pesalema 119:105; Baroma 15:4) Gantsi-ntsi, Bibela e ka re fa kaelo kana kgothatso eo re e tlhokang, Jehofa a re thusa go gakologelwa ditemana tse re di tlhokang. Nako le nako, concordance kana e nngwe ya dikgatiso tse dintsi-ntsi tsa Bibela tseo Modimo a di re baakanyeditseng ka phuthego ya gagwe di ka re fa karabo. Thuso e nngwe e e botlhokwatlhokwa ke index e e kwadilweng ka maatlametlo le matsetseleko e e re thusang go bona boikitsiso joo re bo tlhokang.

17. Ke ka ditsela dife tse dingwe tseo Jehofa a ka arabang dithapelo tsa rona ka teng, mme ke jang Bakeresete ba ba pelonomi, le ba ba kutlwelo botlhoko ba ka thusang ka gone?

¹⁷ Fa re na le bothata bongwe jo bo re tshwenyang kana re ikutlwa re hutsafetse kana re kgobegile marapo, go arabiwa ga dithapelo tsa rona go ka tla ka ditsela tse dingwe gape. Ka sekai, puo nngwe ya Bibela kwa phuthegong kana kwa kopanong ya Basupi ba ga Jehofa e ka nna ya bo e tshotse one “molemo” oo re o tlhokang. Ka dinako tse dingwe, go tlotla fela le Mokeresete yo mongwe go ka re fa se re se tlhokang. Ka dinako di le dintsi bagolwane ba phuthego ba ka re fa kgothatso kana kgakololo. Le eleng gone go goromeletsa dipelo tsa rona mo Mokereseteng yo o godileng, yo o pelonomi, le yo o kutlwelo-botlhoko yo o leng moreetsi yo o molemo, gantsi go ka re dira gore re ikutlwe botoka. Seno ruri se ntse jalo fa tsala eno e re thusa go akanyetsa megopolo ya Bibela. Kgothatsano e e ntseng jalo e ka re imolola bokete mo megopolong ya rona le mo dipelong.—Diane 12:25; 1 Bathesalonia 5:14.

18. Ke tiro efe e e kgethegileng e e ka thusang Bakeresete go fenya dinako tsa fa ba hutsafetse, mme seno se ne sa thusa jang mmulatsela yo mmotlana?

¹⁸ Go na le mefuta e e tlwaelesegileng e e farologanyeng ya khutsafalo mo ‘dipakeng tseno tse di tlhokofatsang.’ (2 Timotheo 3:1) Batho ba kgobega marapo le go kotlomana ka ntlha ya mabaka a a farologaneng. Seno se ka diragalela le Bakeresete, mme e ka nna boitemogelo jo bo sa itumediseng ruri. Lefa go le jalo, ba le bantsi ba fitlhetse gore go rera mafoko a a molemo go ba thusitse go tlosa khutsafalo lefa e ka nna efe ya nakwana.b A o kile wa leka seno? Fa ka tsela nngwe o ikutlwa o kgobegile marapo, leka go tlhakanela mo mofuteng mongwe wa tirelo ya Bogosi. Go bua le ba bangwe kaga Bogosi jwa Modimo gantsi go tla go thusa go fetola mogopolo wa gago mo maikutlong a a sa tlhamalalang go ya mo go a mantle. Go bua kaga Jehofa le go dirisa Lefoko la gagwe go ka go fa boipelo—ebong leungo lwa moya wa gagwe—mme go go dire gore o ikutlwe ka tsela e e farologanyeng. (Bagalatia 5:22) Mmulatsela mongwe yo mmotlana o ne a bona gore go nna a tshwaregile mo tirong ya Bogosi go ne ga mo dira gore a lemoge gore “fa mathata a gagwe a bapisiwa le a ba bangwe, [a gagwe] tota a ne a le mabotlana ebile a le a nakwana fela.”

19. Ke jang Mokeresete mongwe yo botsogo jwa gagwe bo neng bo le bokoa a neng a fenya ka gone maikutlo a a seng mantle?

¹⁹ Ka dinako tse dingwe, boemo jo bo bokoa jwa mmele, gongwe bo gakadiwa ke matshwenyego kana mathata, di ka bakela boikutlo jwa khutsafalo. Seno se ka dira gore motho a tlhobaele boroko bosigo, jaaka go ne go tle go diragalele Mokeresete mongwe wa dingwaga tsa bogare yo o neng a le bokoa mo botsogong. Mme o ne a fitlhela gore thapelo e e tswang mo pelong e ne e mo thusa thata. Nako le nako e ne e re fa a thanya e bile a ikutlwa a hutsafetse, a rapele Jehofa ka tsela e e ritibetseng. Seno se ne sa akofa sa mo tokafatsa. Mme gape o ne a gomodiwa ke go boaboelela ka tlhogo ditemana tsa Bibela tse di gomotsang, jaaka Pesalema 23. Ka nitamo, moya wa ga Jehofa, o o dirang ka ntlha ya thapelo kana ka Lefoko la gagwe, o tla thusa go emisetsa boemo jwa khutsafalo ya mogopolo ka boitumelo. Moragonyana, monna yoo o ne a kgona go akanya ka mathata a gagwe a lekalekantse mogopolo ebile a ritibetse, a bona kafa a ka a fenyang ka gone kana a ikutlwa a tiisitswe go a sikara.

20. Ke ka ntlhayang fa karabelo mo thapelong nngwe ka dinako tse dingwe go ka bonala e diegile?

²⁰ Seno ke sekai sa kafa thapelo e ka tlisang karabelo ka gone. Mme fa gongwe go bonala go na le tiego mo go boneng tharabololo. Ka ntlhayang? Gongwe karabo e ka ne e letile nako e e tshwanetseng ya Modimo. Go bonala gore mo mabakeng mangwe Modimo o leseletsa ba ba mo lopang go bontsha boteng jwa kamego ya bone, nonofo ya keletso ya bone, le bonnete jwa boineelo jwa bone. Mopesalema mongwe o ne a nna le boitemogelo joo!—Pesalema 88:13, 14; bapisa 2 Bakorintha 12:7-10.

21. Ke ka ntlhayang fa e le tshiamelo e e molemolemo go nna mongwe wa Basupi ba ga Jehofa gompieno, mme re ka bontsha kanaanelo jang?

²¹ Lefa go le jalo, go buisana le Modimo Mothatayotlhe ka thapelo ke boitemogelo jo bo nonotshang mo tumelong jo bo ka re ntshang mo kotlomanong go nna ba ba tiileng. Abo go kgothatsa jang ne go itse gore o a utlwa ebile o a arabela! Fela jaaka Paulo a ne a kwalela phuthego ya Filipi, re tshwanetse go ntsha merapelo ya rona le mekokotlelo “di na le tebogō.” (Bafilipi 4:6) Ee, ka metlha yotlhe re tshwanetse ra goromeletsa dipelo tsa rona ka tebogo mo go Jehofa mme ‘re leboge mo dilong tsotlhe.’ (1 Bathesalonia 5:18) Seno se tla tlaleletsa mo go reng go nne le tshwaragano e e kitlaneng, e e bopelonomi mme se tla re tlisetsa kagiso. Setlhogo se se latelang se bontsha kafa seno se leng botlhokwa ka gone mo batlhankeng ba ga Jehofa mo metlheng eno e e kgoberegileng, le e e kotsi.

[Dintlha tse di kwa tlase]

O Ka Araba Jang?

◻ Ke mabaka afe a a ka dirang gore Bakeresete ba tshwenyege?

◻ Ke eng se se ka re thusang go fenya tlhobaelo?

◻ Ke ka ntlhayang fa Bakeresete ba ka tlhomamisega gore Modimo o tla ba thusa ka ditlhokafalo tsa bone tsa konokono?

◻ “Mokokotlèlō” o raya eng, mme ke jang dikai tsa nako e e fetileng di bontshang kafa Jehofa a arabelang ka gone?

◻ Ke ka ditsela dife tse di farologanyeng tse Jehofa a ka arabang dithapelo tsa rona ka tsone?

[Setshwantsho mo go tsebe 12]

‘Rraeno wa selegodimo o otla dinonyane. A ga lo di fete ka tlhwatlhwa?’