Babelona—Boremelelo jwa Kobamelo ya Maaka

“BABELONA o ole, o ole: dichwancho cotlhe tse di setilwen tsa medimo ea gagwe, di robaganyedicwe ha hatshe.” Motsemogolo ono oo Isaia a neng a bolelela pele ka one a ne a le wa mofuta ofe? Eo ke ntlha e e botlhokwa e e tla re thusang go tlhaloganya botlhokwa jwa Babelona o Mogolo wa segompieno.—Isaia 21:9.

Babelona wa bogologolo o ne o itsege ka kobamelo ya one ya medimo ya boheitane le medimo ya sesadi. Mo bukeng ya gagwe Babylonian and Assyrian Religion, Moporofesa S. H. Hooke o tlhalosa jaana: “Babelona a ne e le motsemogolo o Marduk a neng a na le maemo a a kwa godimo mo medimong e e neng e obamelwa koo. . . . Ka nako ya ga Nebukadenesare II go ne go na le ditempele tse di seng kafa tlase ga masome a matlhano le boroba bobedi tse a neng a le tsa medimo e e tlhophilweng, re sa bue sepe ka ditempele tse dingwe tse dintsi tse di neng di sa abelwa epe. Ka jalo go ka bonwa gore boperesiti bo ne bo tsaya karolo e kgolo jang mo botshelong jwa motsemogolo oo.” Go bolelwa gore tempele ya ga Marduk mo Babelona a ne a na le ditempelana di le 55. Abo seno se re gopotsa ditempele tse dintsi, dikereke, le dikereke tse dikgolo tsa gompieno tseo di nang le ditempelana tsa medingwana, baitshepi, le Bo-Maria!

Babelona a ne a le boremelelo jwa kobamelo ya medimo ya disetwa ya go ineela mo medimong. Pego a nngwe a tlhalosa gore baperesiti le bangwe ba ba ikanyegang “ba ne ba tlhola ba direla ditshwantsho tse di boitshepo, ba bile ba tsaya ditshwantsho tseno tse di tlhomilweng jaaka tse di ba golaganyang le medimo. Ditshwantsho tse di tlhomilweng tseno di ne di apesiwa diaparo tse di tlhwatlhwakgolo, di kgabisiwa ka dibaga, maseka, le dipalamonwana, di ne di robadiwa mo malaong a a maphatsiphatsi mme go dirwa dipopelelo ka tsone mo lefatsheng le mo metsing, di pegilwe mo dikoloing le mo mekorong ya batho fela.”a Abo seno se tshwana fang ne le kobamelo e e direlwang medimo, baitshepi, le Bo-Maria mo Bohindung, mo Bo-Budeng, le mo Bokatoliking jwa segompieno, joo ka tsela e e tshwanang bo dirang dipopelelo ka ditshwantsho mo mebileng le kwa dinokeng le kwa lewatleng!

Jaaka sekai se sengwe gape se se bontshang go tshwana ga Babelona wa bogologolo le ditumelo tsa segompieno, a o ko o tlhokomele tlhaloso eno e e tserweng mo saetlopedieng yone eo: “Badumedi ba gagwe ba ba ikanyegang ba mmitsa ka maina a mantle: Ga se modimo wa sesadi kana lekgarebe fela mme gape ke mme yo o boutlwelobotlhoko, ene yo o reetsang dithapelo, ene yoo o buelelang batho . . . ene yoo a tsetseng lobopo le batho.” A o ko o bapise seo le thapelo e e latelang e e tswang mo go El Santo Rosario (Rosari e e Boitshepo): “Re a go leboga, Kgosigadi e e Maatla, ka lorato to re to bonang letsatsi le letsatsi go tswa mo seatleng sa gago se se molemo; nna pelonomi, Lekgarebe, o re sireletse jaanong le ka bosakhutleng.”

Go buiwa ka mang mo tlhalosong le mo thapelong eno? Ba bantsi ba tla konela ka bofefo gore ke, “Lekgarebane Maria.” Karabo eo ga a boammaaruri tota. Fano go rapelwa Maria. Lefa go ntse jalo, jaaka Las Grandes Religiones Ilustradas a re bolelela, tsopolo ya ntlha ke tlhaloso ya Ishtar, “Lekgarebe la Lorato,” eleng modimo wa sesadi wa Sebabelona wa tsalo, lorato, le ntwa. Ka dinako tse dingwe o supiwa jaaka setshwantsho sa “mme a anyisa ngwana wa gagwe wa mosimane.”b Seno ke sekai se sengwe gape se se bontshang gore ditumelo tsa segompieno di tshwana le Babelona wa bogologolo!

Gape re ka nna ra tshwantshanya Babelona wa bogologolo le ditumelo tsa gagwe tsa moya wa motho le medimo ya gagwe ya ditlhopha tsa boraro le ditumelo tsa segompieno tsa moya o o sa sweng le medimo ya boraro ya ditumelo tsa segompieno. Bosupi bo tiisa kutlwisiso ya rona ya gore “Babelona o Mogolo” ke setshwantsho se se tshwanelang sa mmuso wa lefatshe wa ga Satane wa bodumedi jwa maaka.

Babelona—Mmaba o o Boikgodiso wa Kobamelo ya Boammaaruri

Gape Babelona a ne a le mmaba o o boikgodiso wa batho ba ga Jehofa ba bogologolo, ba Iseraela, le mosotli wa kobamelo ya bone ya boammaaruri. Babelona a ne ya senya tempele ya Jerusalema ka 607 B.C.E., ya tsaya dijana tsotlhe tse di botlhokwa tsa kobamelo ya ga Jehofa, mme ya itshekolola dijana tseno mo moletlong wa ga Beleshasare.—Daniele 5:3, 4.

Ka mo go tshwanang, mo metlheng ya segompieno Babelona o Mogolo o ile a nna moganetsi yo o sa ineeleng wa kobamelo ya boammaaruri. Mo makgetlong a le mantsi ao Basupi ba ga Jehofa ba neng ba bogisiwa mo go one, baruti a ne a le bone bao ba neng ba tlhotlheletsa seno, gantsi a le ka go tsalana ga bone le babusi ba dipolotiki.

Sekai sengwe se se phepafetseng sa kganetso e e tlhotlheleditsweng ke baruti ke sa bogologolo ka 1917, mme seno se ile sa nna sa diragala gangwe le gape. Ka ngwaga oo Baithuti ba Bibela ba Merafe Yotlhe, jaaka Basupi ba ne ba itsege ka nako eo, ba ne ba gatisa buka The Finished Mystery. Baruti ba Canada le ba U.S. bao dinaga tsa bone di neng di tseneletse mo Ntweng ya Lefatshe I, ba ne ba bolela gore ditsebe dingwe di sekae tsa buka eno di ne di na le boikaelelo jwa go epa puso. Ba ne ba itlhaganelela go itsise dinyatsi tsa bone tsa sepolotiki ka buka eno. Ga felela jang? Go ya ka Moporofesa Martin Marty, mo bukeng ya gagwe Modern American Religion The Irony of It All: “Baruti bao ba ne ba tlhasela baRussell [Basupi] mme ba itumela thata fa ba ne ba utlwa gore baeteledipele ba Basupi ba ga Jehofa bao ba neng ba tshwerwe ba ne ba tlile go atlholelwa dingwaga di le masome a mabedi mo kgolegelong [ka tatofatso ya boepapuso].”

Me baruti ba ne ba itshwara jang mo dikgweding tse di latelang fa baeteledipele bao ba ne ba sa bonwe molato? “Go ne go sena boitumelo bope mo malokong a dikereke tse di tlhomilweng.” Basupi a ne a le bone fela ba le bosi ba ba neng ba emela melao-metheo ya Bibela “go ya bokgakaleng jwa go gana go nna masole a puso ka ntlha ya bodumedi jwa bone.” Basupi ba ne ba sa ikemisetsa ebile ga ba kitla ba ikemisetsa go dumela go nna ditsala tse di dumalanang le babusi ba bopolotiki mo go sengwe le sengwe, le eleng kafa tlase ga puso ya Jeremane ya Bo-Nazi kana kafa tlase ga dipuso tsa Bo-Fascist tsa Italy, Spain, le Portugal.

Babelona o Bonwa Molato le go Sotlwa

He, abo go tshwanela jang ne, he, go bo Tshenolō e bua gore Babelona o Mogolo o “tagilwe ke madi a baitshepi, le ke madi a bashupi ba ga Yesu” go bile go “hitlhelwa madi a baperofeti, le a baitshepi mo go [ene], le a botlhe ba ba bolailwen mo lehatshin.” Ditumelo tsa lefatshe di na le molato wa madi ka go bo di ile tsa tsaya karolo mo ntweng kana tsa mpampetsa ntwa le go bogisiwa ga Bakeresete ba boammaaruri goo go ileng ga tswelela ka makgolo a dingwaga.—Tshenolo 17:6; 18:24.

Babelona o Mogolo, mmuso wa lefatshe wa bodumedi jwa maaka, o ile a ipelela dikhumo le maatla go ralala hisitori. Mme moengele o ne a tlhagisa Johane ka gore seaka se segolo se ne se tla tlelwa ke letsatsi la sone. Pego eo a re bolelela jaana: “Me a tlhaeletsa ka lencwe ye le nonohilen, a re, Babelona o mogolo o ole, o ole, me o hetogile boago yoa badimo, le boicwale16 yoa mbea monwe le monwe o o mashwe, le boicwalelo yoa n6nyane nwe le nwe e e mashwe le e e ilwan.”—Tshenolō 18:2.

Babelona o tla wa leng? Kana a o setse a ole? O wa ka tsela efe? Mme seo se go ama fang? Dipotso tseno le tse dingwe tse di tshwanang le tsone di tla arabiwa mo tokololong e e tlang ya Tora ya Tebelo.

[Dintlha tse di kwa tlase]

[Setshwantsho mo go tsebe 8, 9]

Tumelo ya Babelona o Mogolo a simolotse hwa Babelona wa bogologolo