“Ke Tla Dxihañ Gore ke Bolokwè?”

“KE TLA dihañ gore ke bolokwè?” Potso eno e ne ya bodiwa bogologolo ka ngwaga wa 50 C.E. ke modisa-kgolegelo kwa Filipi, kwa Makedonia. Go ne go sa tswa go nna le thoromo e kgolo ya lefatshe, mme dikgoro tsa kgolegelo e a e disang di ne di bulegile. Modisa-kgolegelo o ne a setse a batla go ipolaya, ka a ne a akanya gore magolegwa a ngwegile otlhe. Mme moaposetoloi Paulo, mongwe wa magolegwa o ne a goa a re: “Se ipolaee; gonne re hano rotlhe.”—Ditihō 16:25-30.

Paulo le legolegwa-ka-ene, Silase, ba ne ba tlile mo Filipi go tla go rera molaetsa wa poloko, mme ba ne ba le mo kgolegelong ka ntlha ya ditatofatso tsa maaka tseo di neng di dirilwe kgatlhanong le bone. A lebogela go bo magolegwa a sa ngwega, modisa-kgolegelo o ne a batla go utlwa molaetsa wa ga Paulo le Silase. O ne a tla tshwanelwa ke go dira eng gore a tle a ipelele poloko e e neng e rerwa ke barongwa ba babedi bano ba Bakeresete?

Batho gompieno ba santse ba tlhoka poloko eo Paulo le Silase ba neng ba rera ka yone. Lefa go le jalo, ka mo go sa itumediseng, ba le bantsi ba belaela kgang eno ya go bolokiwa fela thata. Ba kgobiwa marapo ke boikgodiso le bogagapa jwa batho ba bodumedi bao ba iphakang gore ba ba ruta gore ba ka bolokiwa jang. Ba bantsi ba ferosiwa sebete ke go tsewa ke maikutlo ka mo go feteletseng go go bontshiwang ke ditumelo di le dintsi tsa boefangele tseo di gatelelang kgopolo ya go bolokiwa. Mokwala-dikgang wa Moesemane Philip Howard o ne a bolela gore ba go tweng ke baefangele bao ba “tlhasela maikutlo le diatla tse di ntshang madi tsa bareetsi ba bone go na le dikakanyo tsa bone.”—Bapisa 2 Petere 2:2.

Lefa go le jalo batho bangwe ba gakgamadiwa ke diphetogo tseo ka dinako dingwe di diragalelang batho bao ba dumelang gore ba nnile le boitemogelo jwa go “bolokiwa.” Mo bukeng ya bone Snapping, Flo Conway le Jim Siegelman ba bua ka boitemogelo jo bontsi jwa ditumelo—go kopanyeletsa le jwa “go bolokiwa”—goo go ileng ga tuma mo masomeng a sekae a dingwaga a a fetileng. Ba kwadile ka “ntlha e e sa kgatlheng” ya maitemogelo a go nna jalo mme ba bolela gore batho ba “kgorometsega” go fetola botho jwa bone ka ponyo ya leitlho goo go palelwang ke go ba naya kgotsofalo le go sedifalelwa goo go solofeditsweng mme go na le moo go lere go tsietsega, go sa amogele dikgopolo tse dingwe, le go sa kgoneng go lebagana le boammaaruri. Bakwadi bao ba oketsa ka go re: “Re ka tlhalosa tiragalo eno jaaka eo e tswalang mogopolo wa motho, ya go sa akanyeng.”

Go ne go sa nna jalo fa Bakeresete ba lekgolo la ntlha la dingwaga ba ne ba itemogela go bolokiwa. Modisa-kgolegelo wa Filipi ga a ka a ‘tswala mogopolo wa gagwe’ fa moaposetoloi Paulo a ne a araba potso ya gagwe e e neng e re, “Ke tla dihañ gore ke bolokwè?” Gape Paulo le Silase ga ba a ka ba ‘tlhasela maikutlo a gagwe’ ba bo ba kopa moneelo o mogolo wa madi. Go na le moo, “ba bua lehoko ya Morèna [Jehofa] naè.” Ka go naya monna yoo mabaka, ba ne ba mo thusa gore a tlhaloganye ka phepafalo paakanyetso ya Modimo ya poloko.—Ditihō 16:32.

“Dumèla mo go Morèna Yesu”

Barongwa bao ba Bakeresete ba ne ba bula mogopolo wa modisa-kgolegelo ka boammaaruri jwa motheo kaga poloko. E ne e le jone boammaaruri joo Moaposetoloi Petere a neng a bo tlhalosa fa phuthego ya Bokeresete e ne e tlhomiwa lantlha. Petere o ne a supa kaga boemo jo bogolo jwa ga Jesu Keresete mo kgannyeng ya poloko, a mmitsa “Kgōsana ea botshelō.” Moaposetoloi yoo o ne a bua gape jaana: “Ga go nna poloka mo go ōpè o sele; le gōna ga go leina lepè le sele ha tlhatse ga legodimo, ye batho ba le neilweñ, ye re nañ le go bolokwa mo go yeōna.” (Ditihō 3:15; 4:12) Paulo le Silase ba ne ba bolelela modisa-kgolegelo yono wa Filipi ka yone Kgosana eno ya poloko fa ba ne ba mo raya ba re: “Dumèla mo go Morèna Yesu, me u tla bolokwa.”—Ditihō 16:31.

Lefa go le jalo, go raya eng go dumela mo go Morena Jesu? Ke ka ntlhayang fa go sena leina lepe kwantle ga la ga Jesu fela leo re ka bolokiwang ka lone? A kgabagare mongwe le mongwe o tla bona poloko? A baaposetoloi ba ne ba dumela kgopolo ya gore “fa fela o ka bolokiwa, o tla nna o ntse o bolokilwe”? Tseno ke dipotso tse di botlhokwa ka gonne, go sa kgathalesege ntlha ya gore batho ba bantsi ba bodumedi ba segompieno ba ile ba isa bokao jwa lefoko leno kwa tlase ka mafoko le ka ditiro, re santse re tlhoka poloko. Rotlhe re tlhoka karabo e e kgotsofatsang, e e utlwalang ya potso eno e e reng: “Ke tla dihañ gore ke bolokwè?”