Dipotso Tse Di Tswang go Babadi

◼ Ke ka ntlhayang fa Molao wa Modimo o ne o bolela gore monna wa Moiseraele yo a neng a ka tlhakanela dikobo le lekgarebane le le sa beelediwang o ne a tshwanetse gore a mo nyale mme a sa tshwanela go mo tlhala le ka motlha?

Molao ono o re o fitlhelang mo go Ekesodo 22:16, 17 le Duteronome 22:28, 29, ke one oo batho ba bantsi ba ileng ba bolela gore o lebega o ne o sa akanyetse basadi. Mme tota, o ne o kgothaletsa ditekanyetso tse di kwa godimo tsa boitsholo mo banneng le mo basading.

Go na le melao e e farologaneng ya legae mo go Duteronome kgaolo 22. Ka sekai, e bua ka boemo joo mo go jone monna a sa tlholeng a rata mosadi wa gagwe mme a bolela gore e ne e se lekgarebane fa a kopana nae. E bolela gape ka melao ya Modimo ka boaka le go betelela. Morago ga yone re bala jaana:

“Ha monna a hitlhèla mosetsana eo o leñ kgarebane, eo o sa beèlèlwañ, me a mo chwara, a lala naè, me ba bōnwa, Hoñ monna eo o letseñ naè, a a neè rra mosetsana dishekela di le mashomè matlhano tsa selefera, me a nnè mosadi oa gagwè, ka a mo sentsè; ga a kake a mo tlhala ka malatsi aotlhe a gagwè.”—Duteronome 22:28, 29.

Seno se ne se ntse jalo malebana le go hepisiwa ka kgang le/kana go gokafala le yo mongwe ka kgang. Fa monna a ne a ikutlwa a gololesegile go tlhakanela dikobo le lekgarebane, ke lone le le neng le latlhegelwa segolo. Kwa ntle ga gore a ka nna le ngwana wa dikgora, boleng jwa gagwe jaaka monyadiwa bo ne bo ya kwa tlase, ka go bo Baiseraele ba bantsi ba ne ba ka seka ba batla go mo nyala fa e sa tlhole e le lekgarebane. Lefa go le jalo, ke eng seo se neng se tla thibela monna go tlhakanela dikobo le lekgarebane? Molao o o ‘boitshepo, o o tshiamo, o o molemo’ wa Modimo o ne o tla dira jalo.—Baroma 7:12.

Molawana mongwe wa ga Moshe o ne o letla monna go tlhala mosadi wa gagwe ka mabaka mangwe a a rileng. (Duteronome 22:13-19; 24:1; Mathaio 19:7, 8) Mme seo re se balang mo go Ekesodo 22:16, 17 le Duteronome 22:28, 29 se bontsha gore go tlhala go ne go sa letlelelwa fa go ne go dirilwe kgokafalo pele ga lenyalo. Seno, he, se ka nna sa dira gore monna (kana mosadi wa lekgarebane) a gane fa a raelwa go tlhakanela mo kgokafalong. Monna o ne a ka ikutlwa gore, ‘O montle e bile o a kgatlha, ke tla iitumedisa ka ene le eleng lefa e se mofuta wa mosadi yo ke batlang go mo nyala.’ Go na le moo, molao o ne o thibela boitsholo jo bo maswe ka go dira gore ope fela yo a neng a ka palelwa go dira seo a akanye ka diphelelo tse di tla nnang di le gone tsa kgokafalo—go nna le motho yoo botshelo jwa gagwe jotlhe.

Molao gape o ne o fokotsa bothata jwa bana ba dikgora. Modimo o ne o laotse jaana: “Ñwana oa dikgora a a se tsène mo phuthegoñ ea ga Yehofa.” (Duteronome 23:2) Jalo fa monna yo a neng a hepisitse lekgarebane a ne a tshwanetse go le nyala, he kgokafalo ya bone e ne e ka seka ya felela ka ngwana wa dikgora fa gare ga Baiseraele.

Ga re itlhokomolose gore Bakeresete ba tshela mo boemong jwa loago jo bo sa tshwaneng le jwa kwa Iseraeleng wa bogologolo. Ga re kafa tlase ga melawana ya Molao wa ga Moshe, go akareletsa le molao ono o o neng o laola gore batho ba babedi bano ba ba neng ba kopanetse mo kgokafalong ba nyalane. Lefa go ntse jalo, ga re kake ra ikutlwa gore go tlhakanela dikobo pele ga lenyalo ke selo se se sa reng sepe. Bakeresete ba tshwanetse go akanyetsa diphelelo tsa nako e telele ka bomasisi, le eleng fela jaaka molao ono o ne o tlhotlheletsa Baiseraele go dira jalo.

Go hepisa motho yo o sa nyalwang go mo senyetsa tshwanelo ya go tsena mo lenyalong jaaka lekgarebane le le phepa (e le monna kana mosadi). Kgokafalo ya pele ga lenyalo e ama gape tshwanelo ya motho ope fela yoo e neng e ka nna ene molekane wa gagwe, ka sekai, tshwanelo ya motho yoo ya go nyala Mokeresete yo o itshekileng. Mo godimo ga tseo tsotlhe, kgokafalo e tshwanetse go tilwa ka gonne Modimo o bontsha gore e phoso; ke boleo. Moaposetoloi Paulo o ne a kwala jaana: “Gonne mo ke go rata ga Modimo, eboñ boitshèpishō yoa lona, ke go re, lo ithibè mo boakeñ.”—1 Bathesalonia 4:3-6; Bahebera 13:4.