“Dilo Tseo Di Agelelang Ditebelelo Tsa Rona”

E NE e le ka moso mongwe o o mogote wa Sontaga, ka September 10, fa batho ba le 4 155 ba ne ba kopanetse mo Holong e ntle ya Dikopano ya Basupi ba ga Jehofa Jersey City, kwa New Jersey, go nna teng mo dithutong tsa kalogo tsa setlhopha sa bo-87 sa Sekolo sa Watchtower sa Bibela sa Gileade. Bao ba neng ba le teng e ne e le baithuti ba le 24 le baeng ba bone bao ba neng ba ba laleditse gammogo le maloko a lelapa la Bethele a a tswang Brooklyn le kwa dipolaseng tsa Mokgatlho.

Bareetsi ba ile ba sisibadiwa ka bonako ka 10:00 a.m. ke Albert Schroeder, yo o neng a direla jaaka modula-setulo ka letsatsi leo. Morago ga pina e e bulang, John Barr o ne a rapela. Bakaulengwe bano ka bobedi ke maloko a Setlhopha Se Se Laolang. Mokaulengwe Schroeder o ne a neela tshedimosetso e khutshwane e e sobokantsweng malebana le setlhopha seo sa baalogi mme a akgela gore baalogi bao ba ne ba “siametse go nna le seabe mo tirong ya Basupi ba ga Jehofa eo jaanong e dirwang lefatshe ka bophara, mo mafatsheng a le 210.” Morago ga moo a tswelela pele go itsise dibui tse supa.

Robert Wallen, yo o direlang mo Diofising tsa Bokaedi kwa ntlong-kgolo ya Brooklyn, o ne a theile setlhogo sa gagwe se se reng, “A Go Ratana Ga Lona Go Tuke,” mo godimo ga 1 Petere 4:8. O ne a bolela gore barongwa ba tshwanetse go thusana, mme ereka baithuti botlhe ba setlhopha seno, ba nyetse, o ne a lebisa dikakgelo tsa gagwe segolo-bogolo mo banyalaning. O ne a gakolola gore, “mosadi o tshwanetse go rata monna wa gagwe le eleng fa a ka ithuta puo e sele ka bofefo go gaisa monna wa gagwe. O tshwanetse go nna yo o tlhaloganyang le yo o bopelotlhomogi. Mme gape, o tshwanetse go leka go mo tlhaloganya fa e le letsatsi la gagwe la go apaya mo bekeng!” (Gantsi, morongwa mongwe le mongwe o abelwa letsatsi la ka metlha le o apeelang botlhe ba ba leng mo legaeng la barongwa dijo tsa letsatsi leo ka lona.) Mme morago sebui se ne sa tlhalosa ka maswabi le maitemogelo a a tshegisang ao banna bangwe ba nnang le one fa ba ithuta go apaya, jaaka boitemogelo jwa monna mongwe yo o neng a dirisa soda e e bakang go na le gore a dirise bakapuire. Mokaulengwe Wallen gape o ne a bontsha gore monna o tshwanetse go “tlhokomela ditlhokafalo tsa mosadi wa gagwe,” ereka nako e ntsi ya monna e ka nna ya bo e senngwa mo go tlhokomeleng maikarabelo a phuthego. Go banna le basadi ka bobedi, o ne a bolela jaana: “Nnang ba ba agelelang ka metlha; lo seka lwa nna le dikakgelo tse di sa siamang, le eleng mongwe go yo mongwe. Tilang go itlhaola mo go ba bangwe. Mme fa lo dira diphoso, di dumeleng.”

Sebui se se latelang, ebong Daniel Sydlik, yo eleng leloko la Setlhopha Se Se Laolang, o ne a tlhopha setlhogo se se reng: “Boloka Molelo wa Moya wa Modimo o Tuka,” se se neng se thailwe mo godimo ga 1 Bathesalonia 5:19. O ne a bolela gore “Molelo o kgona go gotetsa mme gape le go senya. Ka dinako tse dingwe barongwa ba a kgothatsa mme ka dinako tse dingwe ba tshosa ba bangwe. Monnamogolo mongwe wa Moafrika o kile a bolela jaana: ‘Butswela ka bonolo,’ jaaka o ka re o leka go tukisa tlhase! Fa o bua ka dilo tseo o ka nnang wa di bona mo kabelong ya gago—jaaka mesele ya leswe e e bulegileng, dintshi, dikoloi tse di dirang modumo, naga e ntšha, bodumedi bongwe jo bo sa tlwaelegang—bontsha tlotlo. O tshwara dintshi di le dintsi ka lomepe go feta tse o ka di tshwarang ka aseine. Ithute go ‘butswela ka bonolo’ mme o boloke molelo wa moya wa ga Jehofa o tuka.”

Morago ga moo setlhogo se se reng “Tlolela Mo Kabelong Ya Gago Ka Tlhagafalo le ka Kelotlhoko” se ne sa neelwa ke Kenneth Flodin, yo eleng molebedi wa Legae la Bethele kwa Watchtower Farms. Ereka Sekolo sa Gileade jaanong se le kwa Watchtower Farms, baalogi botlhe ba ne ba tlwaelane thata le Mokaulengwe Flodin. Go ile ga tlhalosiwa dintlha tse pedi tseo di tshwanetseng go elwa tlhoko mo puong ya gagwe: (1) go rata dilo tse di bonalang le (2) puo e e sa siamang le go akanya go go sa siamang. Kgakololo e ne e le gore “Tila go nna pelotshetlha mme o nne pelotshweu.” O ne a bolela gore, “Lebelela pele go bona boiketlo le dilo tse di itumedisang kwa lefatsheng le lesha; o seka wa di batla gone jaanong.” Go thusa baithuti go tila go akanya ka tsela e e sa siamang, sebui se ne sa tsopola Dipalō 13:28, 32. “Ka dinako tse dingwe,” o ne a bolela jalo, “batho ba ka nna ba bona selo se se tshwanang, mme ba bangwe ba nne le pono e e sa siamang, ba bangwe ba nne le pono e e siameng. Jaaka Kalebe wa bogologolo, ikanye Jehofa. Bolelela ba bangwe ka megopolo ya gago e e siameng. Mme fa go nna le puo e e sa siamang, fetola motlotlo go tila megopolo e e sa siamang.”

Lloyd Barry, yo eleng leloko la Setlhopha Se Se Laolang mme le ene e kile ya bo e le morongwa mo nakong e e fetileng, o ne a neela kgakololo e e mosola. O ne a bolela gore “Lorato, boipelo, le kagiso ke dinonofo tse di botlhokwa go barongwa ba basha. O tla lemoga makoa a ba bangwe mo legaeng la lona la barongwa, mme lebisa tlhokomelo mo makoeng a gago.” O ne a gakologelwa dinako tsa gagwe tsa bogologolo kwa Japane fa barongwa ba ne ba ipelela tlhapi letsatsi le letsatsi, mme ka nako eo ga fitlha barongwa ba basha bao tlhapi e neng e ba lwatsa. Ka jalo lenane la dijo le ile la fetolwa e le ka ntlha ya lorato go ba basha bao. O ne a gakolola gape jaana: “Boloka kgono ya gago ya go dira metlae; le ka motlha o seka wa letla letsatsi go phirima o santse o na le mathata ape a o nang nao. Boloka kagiso mo legaeng, mme o tla nna o itumetse mo botshelong jwa gago jwa borongwa.”—Baefesia 4:26.

Morago ga moo, Jack Redford, yo eleng mongwe wa batlhatlheledi ba Gileade o ne a bua ka setlhogo se se reng: “Jehofa O Tla Lo Dira Boitekanelo,” a theile dikakgelo tsa gagwe mo godimo ga 1 Petere 5:10. O ne a bolela jaana: “Jehofa a ka go thapisa ka go letlelela gore go nne le maemo ao a leng boima go ka berekana nao. Jaaka fa a ile a thapisa baaposetoloi gore ba rarabolole dikgotlhang tsa botho, o tla go thapisa jalo. O seka wa itlhoboga fa lo sa dumalane ka maikutlo le ba bangwe. Iketleeletse go fetola botho jwa gago. Boikgogomoso bo dira gore seno se nne boima, mme boikokobetso bo dira gore go kgonagale. Ithute go fetogafetoga go ya ka maemo. Jehofa gape o tla go thapisa gore o utlwane le ba bangwe. Fela ‘o seka wa tlhokomela mafoko otlhe a ba bangwe ba a buang’ ka wena.” (Moreri 7:21, 22) Go bogisiwa le gone go ka go thapisa. Barongwa bao ba ileng ba itshokela pogiso ba itumetse mme ga ba ikotlhaele sepe, ba itumelela go bo ba thapisitswe ke pogiso eo.

Ulysses Glass, eleng motlhatlheledi yo mongwe, morago o ne a neela baalogi mafoko a gagwe a bofelo. O ne a tlhomile mogopolo mo go Baefesia 4:1-3, a akgola setlhopha seo sa baalogi ka ntlha ya go bontsha ga bone dinonofo tse di bakang kutlwano tseo di tlhalosiwang moo mme a ba kgothaletsa go tswelela ba ntse ba dira jalo, a bolela jaana: “Kagiso ke selo se se bofaganyang, mme e a tlhokega gore go nne le kutlwano.” Morago ga moo o ne a tswelela pele ka Baefesia 4:4-6 mme a boeletsa kafa moya wa Modimo o boitshegang ka teng, a gakolola botlhe gore “Jehofa ke Motswedi wa maatla otlhe a a boitshegang. Re tshwanetse go mmoifa; ke selo se se boifisang go wela mo diatleng tsa gagwe.”—Bahebera 10:31.

Ditebelelo Tse Di kwa Godimo

Mme morago ga moo botlhe ba ne ba reetsa Theodore Jaracz, yo eleng leloko la Setlhopha Se Se Laolang sa Basupi ba ga Jehofa, yo o neng a bua ka setlhogo se se kgatlhisang seno: “Dilo Tseo Di Agelelang Ditebelelo tsa Rona.” A akantse ka 1 Bakorintha 2:9, o ne a bolela jaana: “Temana eno ga e bue ka mofuta wa dilo tse di bonalang, ka gonne temana e e latelang, eleng 1 Bakorintha 2:10, e bua ka ‘dilo tse di boteng tsa Modimo.’ Seno se ne se akareletsa ‘botlhale jwa Modimo’ jo bo amanang le ‘bosaitsiweng,’ ‘botlhale jwa gagwe jo bo fitlhegileng’ jo bo neng bo tswa go pota letsatsi, ngwedi le dinaledi ka kwa, ee, bo tswa go Modimo ka boena.” (1 Bakorintha 2:7) Morago ga moo bareetsi ba ne ba lebisiwa go Isaia 64:4, eo e neng e ba gakolola ‘go nna ba lebeletse’ mo Modimong le mo dilong tseo a di baakanyeditseng.

Abo batho ba Modimo eleruri ba na le ditebelelo tse dikgolo jang ne! Mokaulengwe Jaracz o ne a umaka tse di latelang: “Ka 1919 e ne ya nna go wa ga Babelona o Mogolo; ka 1922 ya nna kgothatso e e kgatlhisang ya gore go ‘itsisiwe Kgosi le Bogosi,’ ya gore go rerwe ka Bogosi jo bo tlhomilweng mo lefatsheng ka bophara; ka 1955 batho ba Modimo ba ile ba ithuta kaga bokao jwa ‘boidiidi jo bogolo’ jo bo mo go Tshenolō 7:9; ka 1943 ba ile ba bona Sekolo sa Gileade se simolola go romela barongwa kwa dikhutlong tsa lefatshe; gompieno, ka 1989, lona ba lo alogang lo na le tshiamelo ya go bolela dilo tse di molemo mo bathong ba ba leng mo dikabelong tsa lona bao ba tlhoafaletseng go utlwa.”

Morago ga fa didipoloma di sena go abiwa, mongwe wa baithuti o ne a bala lokwalo lo lo amang pelo lo lo bontshang kanaanelo lo tswa mo setlhopheng seo sa baalogi.

Mo thapameng, Lon Schilling, molebedi wa Komiti ya Watchtower Farms, o ne a tshwere Thuto ya Tora ya Tebelo e e khutshwafaditsweng. Morago ga moo baithuti ba ile ba nna le thulaganyo e e itumedisang ya mmino mme ba dira dipontsho ka maitemogelo a bone a kwa tshimong. Morago ga seno, baboledi ba lefelo leo ba ile ba tshameka terama e e mo nakong ya setlhogo se se reng: “Go Emelana le Ditiro tsa Boferefere tsa ga Satane.” La bofelo, morago ga go reetsa dipotsolotso tsa baalogi ba basha ba le barataro, setlhopha se segolo se se itumetseng seo se ile sa opela pina e e konelang mme ba itumelela go kopanela mo thapelong le mookamedi wa Sekolo sa Gileade wa dingwaga dile 96, ebong Frederick Franz.

[Lebokoso mo go tsebe 23]

MANANE-PALO A SETLHOPHA SA BAALOGI:

Palo ya dinaga tseo ba tswang kwa go tsone: 5

Palo ya dinaga tseo ba abetsweng kwa go tsona: 10

Palo ya banyalani: 12

Palogotlhe ya baithuti: 24

Palogare ya dingwaga: 30,9

Palogare ya dingwaga ba le mo boammaaruring: 13,4

Palogare ya dingwaga ba le mo tirelong ya nako e e tletseng: 9,2

[Setshwantsho mo go tsebe 23]

Setlhopha sa bo-87 sa Baalogi ba Sekolo sa Bibela sa Watchtower sa Gileade

Mo lenaneng le le fa tlase leno, mela e balwa go tswa mo pele go ya kwa morago, mme maina a rulagantswe go tswa kafa molemeng go ya mojeng mo moleng mongwe le mongwe.

(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.