A O Tla Tswelela O Ntse O Tsamaya mo Boammaaruring?
“GA KE na boitumèlō bopè yo bo hetañ yo, . . . ha bana ba me ba nntse ba tsamaea mo boamarureñ.” (3 Yohane 4) Moaposetoloi Johane o ne a bua jalo fa a setse a atametse kwa bokhutlong jwa botshelo jwa gagwe jo boleele. O ne a tla itumela tota fa ‘bana ba gagwe’ bao a ba tsentseng mo “boamarureñ” ba ne ba ka tswelela ba itshokile. Jehofa le ene o a itumela fa baobamedi ba gagwe ba nna mo boammaaruring. O tshwanetse a bo a itumela jang ne gompieno fa a bona phuthego ya gagwe e kgolo, e balwa ka dimilione, e latela tsela e e botlhale eo!—Diane 27:11.
Lefa go ntse jalo, fa batho ba Modimo ka kakaretso ba ngaparetse boammaaruri ba nonofile, Bakeresete ba bangwe bone ba a koafala kana le eleng gone go tlogela kobamelo e e itshekileng. Ga se selo seo re ka se keng re se solofele, ereka go ne ga diragala fela jalo le mo lekgolong la ntlha la dingwaga. (2 Timotheo 4:10; Bahebera 2:1) Lefa go ntse jalo, lebaka la go bo ba bangwe ba koafala le gatelela botlhokwa jwa gore botlhe ba nne ba ntse ba tlhomile bomoya jwa bone leitlho. Paulo o ne a kgothatsa Bakeresete botlhe a re: “Itekeñ ka losi bo lo mo tumeloñ.” (2 Bakorintha 13:5) Mokeresete mongwe le mongwe o tshwanetse go ipotsa potso eno: ‘Nka tlhomamisega jang gore ke tla nna ke ntse ke tsamaya mo boammaaruring?’
Bangwe ba ile ba koafala kana le eleng gone go tlogela go tsamaya mo boammaaruring ka gonne ba ne ba kgobegile marapo—gongwe ka ntlha ya bolwetsi, kana dikgotlhang tsa botho. Bangwe ba ne ba koafala ka gonne ba ne ba kgoreletsega. Ba batla go ipelela maungo mangwe a tsamaiso eno ya dilo fa e santse e le teng. Re ka tila jang gore re se ka ra koafala? Go araba seno, a re sekasekeng sekao seo Jesu a neng a se re tlogelela.
Latela Sekao sa ga Jesu
Jesu o ne a lebane le maemo a mantsi a a bokete. O ne a tshwanela go rarabolola dikgotlhang tsa go sa tshwaneng ga botho tsa balatedi ba gagwe, mmogo le go itshokela letlhoo le go sotliwa ke baba ba gagwe. O ne a tshwanela gape go itshokela dithaelo tsa lefatshe leno. Eleruri, o ne a bolelelwa gore o tla newa khumo le maemo a a kwa godimo ao eleng batho ba sekae fela ba ba kileng ba a bona. (Mathaio 4:8-11; Yohane 6:14, 15) Lefa go le jalo, Jesu o ne a ganelela mo go tsamayeng mo boammaaruring. Ke eng se se neng sa mo thusa go dira seno?
Moaposetoloi Paulo o re bolelela jaana: “A re sianeñ ka bopelotelele tshianō e re e beilweñ pele, Re nntse re lebile kwa go Yesu, mosimolodi le mowetsi oa tumèlō ea rona, eo e rileñ ka boitumèlō yo o bo beecweñ pele a ichokèla mokgōrō, a nyatsa ditlhoñ, me a dula kaha ntlheñ ea lecōgō ye legolo ya setulō sa Modimo sa bogosi.” (Bahebera 12:1, 2) Jesu o ne a thusiwa go nna a ntse a tsamaya mo boammaaruring ka go nna a akanya ka “boitumèlō yo o bo beecweñ pele,” eleng tuelo e kgolo e e neng e mo emetse. “Boitumèlō yo o bo beecweñ pele” jono bo ne bo feta kgakala go kgobega marapo gope go a neng a ka go utlwa ka lobakanyana kana dilo tse di neng di itaya tsebe tse a neng a tshwanetse go lebana le tsone.
Go nna re akantse ka tuelo ya rona go ka re thusa gore re itshoke, fela jaaka go ne ga thusa Jesu. (Tshenolō 22:12) Go tshwantsha, akanya ka moeng yo o tsamayang mo tseleng e go seng motlhofo go tsamaya mo go yone mo thabeng. O a lapa le go kgobega marapo. Kgato nngwe le nngwe e a e tsayang e bokete, mme tsela le yone e lebega e le telele. Fa a fitlha kwa godimo o bona motse o a yang kwa go one kwa kgakajana. Ka bonako fela o utlwa go nna motlhofo. Go bona kwa a yang gone sentle go mo lebatsa kafa a lapileng ka gone. Mokeresete ka mo go tshwanang o tla fitlhela go le motlhofo go tsamaya mo boammaaruring fa a nna a akantse sentle ka lefelo leo a yang kwa go lone ka phepafalo.
Etsa Moaposetoloi Paulo
Mongwe yo a neng a itshoka thata yo a neng a ka kgobega marapo e ne e le moaposetoloi Paulo. O ne a tshwanela go rarabolola dikgotlhang le dikgogakgogano tsa go sa tshwaneng ga botho mo bakaulengweng, mmogo le go itshokela bolwetsi jo bo botlhoko jwa mmele, pogiso, dilo dingwe tse di utlwisang botlhoko, le mathata le eleng go ganediwa mo diphuthegong. (1 Bakorintha 1:10; 2 Bakorintha 10:7-12; 11:21-29; 12:7-10) Ke ka ntlhayang fa Paulo a se kile a kgobega marapo go fitlha a bo a ineela? O tlhalosa jaana: “Nka diha dilō cotlhe ka èna eo o nnonotshañ.” (Bafilipi 4:13) Ga a ka a leka go rwala morwalo wa gagwe a le nosi. Go na le moo, Paulo o ne a lebelela gore Jehofa o tla mo tshegetsa.—Pesalema 55:22.
Motswedi oo wa bomodimo wa nonofo oo Paulo a neng a kopa gore o mo thuse go itshoka o santse o le gone le gompieno. Bibela e bua jaana: “[Jehofa] o naea baidibadi thata; le èna eo o senañ thata o mo totisetse nonohō. Ba e leñ makau ba tla idibala, ba lapa, le makolwane a tla phuaganèla rure: Me ba ba lebèlèlañ mo go Yehofa ba tla shahatsa thata ea bōnè; ba tla tlhatloga ka diphuka yaka boncwi ba ba tona; ba tla siana, ba sa lape; ba tla tsamaea ka dinaō, ba sa idibale.” (Isaia 40:29-31) Fa re kopa Jehofa gore a re neye nonofo ka go ithuta ka namana, go ya dipokanong, go dira tiro ya Bokeresete ka botlhaga, le—segolobogolo—ka thapelo, re tla kgona go emelelana le diteko le go kgobega marapo gope fela go go ka nnang gone nako le nako.—Pesalema 1:1-3; Baroma 10:10; 1 Bathesalonia 5:16, 17; Bahebera 10:23-25.
Dimilione di Ipaakanyetsa go Tshela mo Paradaiseng
Satane ke modimo wa tsamaiso eno ya dilo, eo mo go yone Bakeresete tota eleng baeng, bajaki fela. (2 Bakorintha 4:4) Ka gone, ga re a tshwanela go gakgamala fa ka dinako dingwe re ka nna ra kgobega marapo kana fa re tlelwa ke dilo tse di ka re itayang tsebe. Paulo o ne a kwala jaana mo bukeng ya Bahebera: “Gonne mono ga re na motse o o tlhōmameñ, me re batla ōna motse o o tla tlañ.” (Bahebera 13:14) Go gakologelwa gore tsholofelo ya rona ga e mo lefatsheng leno mme e mo go le le tla tlang le gone go ka re thusa gore re se ka ra koafala.
Bakeresete ka ditsela tse dintsi ba tshwana le batho ba ba tlogang mo lefatsheng le ba tsholetsweng mo go lone ba ya go senka botshelo jo bo botoka felo gongwe. Gantsi eno ke kgato e e bokete tota. E akaretsa go paka dilwana tsa gagwe kana go aba dilo tsotlhe tsa gagwe le go tloga mo legaeng le o le tlwaetseng thata, mmogo le go tlogela ditsala le balosika. Go akaretsa gape le go ya kwa lefatsheng le o sa le itseng, go tshela mo bathong bao ba ka nnang ba se ka ba go amogela, le go ithuta puo e ntšha le mokgwa o o sa o tlwaelang wa botshelo. Lefa go le jalo, bontsi bo tsaya kgato eo ka tsholofelo fela ya go tokafatsa seemo sa bone sa dilo tse di bonalang mo lefatsheng.
Bao ba fudugang, jaaka go ne go ka bolelwa, mo tsamaisong eno e kgologolo ya dilo mme ba nna karolo ya batho ba Modimo ba lebana le dilo tse di tshwanang tse di gwetlhang. Ba fetola mekgwa ya bone ya go tshela ba bo ba tshela tumalanong le ditekanyetso tse di phepa tsa Lefoko la Modimo mme ba ithuta “puō e e itshekileñ” ya boammaaruri. (Sefania 3:9; 1 Bakorintha 6:9-11) Ba dira ka natla gape go direla Kgosi e kgolo ya Bogosi jwa Modimo, Jesu Keresete. Mo godimo ga moo, gantsi balosika lwa bone le ditsala tsa bone tsa pele ba kgaogana le bone, mo totatota, ba tshwanelang go ba raya ba re salang sentle.
Mme go na le dilo tse dintsi tse Bakeresete ba di bonang go feta bao ba fudugang ka mabaka a itsholelo. Selo se segolo ke gore ba tla mo tikologong ya batho ba ba ba ratang le ba ba amegang ka bone. (Luke 18:29, 30) Se se botlhokwa le go feta, ba nna le kamano e e gaufi thata le Jehofa, Modimo wa lobopo. Ba nna le kagiso mo megopolong le go ikanya mo go se isagwe e se tshotseng jaaka ba lebeletse pele go diragadiwa ga ditsholofetso tse di molemolemo tsa Modimo. (Bafilipi 4:8, 9) Bao ba anaanelang dintlha tseno ka tshwanelo ga ba kitla ba letla dilo dipe tse di ka ba itayang tsebe kana tse di kgobang marapo gore di ba dire gore ba se tlhole ba tswelela. Ga ba kake ba tlosiwa mo tseleng e tshesane e e isang kwa botshelong.—Mathaio 7:13, 14; 1 Yohane 2:15-17.
Tlhokomela Boitekanelo jwa Gago jwa Semoya
Fa re nna ka metlha re tlhokometse boitekanelo jwa rona jwa mmele, re ka kgona go emelelana le malwetsi botoka. Mme fa go diragala gore re tsenwe ke bolwetsi re fola ka bonako. Ka mo go tshwanang fa re tlhokomela boitekanelo jwa rona jwa semoya, re nna re akantse ka masego a re a ipelelang jaanong le ao a re emetseng ka phepafalo, mme fa re ithuta go ikaega ka maatla a ga Jehofa go na le go ikaega ka a rona, re tla kgona go rarabolola mathata a re ntseng re nna le one botoka. Ga re kake ra tila dilo tse di ka gapang tlhokomelo ya rona kana maemo a a kgobang marapo gotlhelele. Mme fa re ile ra tlhokomela boitekanelo jwa rona jwa semoya sentle pele ga nako, dilo tse di ntseng jalo ga di kitla di re fekeetsa.
Gakologelwa gore Jehofa o a itumela fa baobamedi ba gagwe ba itshoka. Ka jalo a re itumediseng pelo ya gagwe ka go tswelela re tsamaya mo boammaaruring.