Nnang Pelotelele mo go Botlhe

“Me rea lo laea, ba ga echo, rea re, tlhagisañ ba ba huduañ, nametsañ ba ba lapañ pelo, pepetletsañ ba ba bokōa, lo nnè pelotelele mo go botlhe.”—1 BATHESALONIA 5:14.

1. Basupi ba ga Jehofa ba supile fa kae le kafa tlase ga maemo afe gore ba pelotelele?

ABO Basupi ba ga Jehofa ba segompieno ba tlhoma sekao se se molemo jang ne sa bopelotelele! Ba ile ba itshokela pitlagano le pogiso mo dinageng tseo pele e neng e le tsa Bo-Nazi le Bokgokgontshi le go fitlha jaanong mo dinageng tse di tshwanang le Malawi. Ba bangwe gape bao ba leng pelotelele ke ba ba leng mo malapeng a a kgaoganeng ka bodumedi.

2. Ke mabaka afe a mabedi ao a dirang gore go nne le paradaise ya semoya eo e itumelelwang ke batho ba ga Jehofa?

² Lemororo ba bogisiwa le go pitlaganngwa, batho ba ba ineetseng ba ga Jehofa ba ile ba itumelela masego a go nna mo paradaiseng ya semoya. Eleruri, dintlha di bontsha gore Bakeresete ba ba tloditsweng ba ile ba simolola go e ipelela ka ngwaga wa 1919. Ke eng seo se dirang gore paradaise eno ya semoya e nne gone? Sa ntlha, maemo ao a paradaise a gone mo gare ga batho ba ga Jehofa gonne Modimo o buseditse batlhanka ba gagwe ba ba ikanyegang kwa ‘lefatsheng’ la bone, kana mo boemong jwa bone, jwa kobamelo e e itshekileng. (Isaia 66:7, 8) Paradaise ya semoya gape e tswelela pele gonne mongwe le mongwe yo o mo go yone o supa maungo a moya wa Modimo. Bopelotelele ke nngwe ya one. (Bagalatia 5:22, 23) Botlhokwa jwa nonofo eno fa go akanyediwa paradise ya semoya bo ka bonwa mo polelong eno e e neng ya buiwa ke mokanoki William Barclay: “Ga go kake ga nna le botsalano jwa Bokeresete fa go sena makrothumia [bopelotelele] . . . Mme lebaka la seno ke fela gore—makrothumia ke nonofo e kgolo ya Modimo (Bar. 2.4; 9.22).” (A New Testament Wordbook, tsebe 84) Ee, bopelotelele bo botlhokwa tota!

Go Nna Pelotelele mo Bakaulengweng ba Rona

3. Jesu o ne a ruta Petere thuto efe kaga go nna pelotelele?

³ Go bonala moaposetoloi Petere a ne a na le bothata jwa go nna pelotelele, ka go bo o kile a botsa Jesu jaana: “Morèna, kana oa ga echo o ka nteohèla ga kaee, me ke nne ke mo ichwarele, a ke ga shupa?” Jesu o ne a mo gakolola jaana: “Ga ke gu ree gore e nnè ga shupa; me ka re, e nnè ga mashomè a shupa [le bosupa, NW] ga shupa.” (Mathaio 18:21, 22) Ka mafoko a mangwe, ga go na palo epe e e tlhomilweng ya makgetlo a o ka itshokelang ba bangwe ka one le go itshwarela ba ba re leofelang. Mo godimo ga moo, ga re kake ra akanya gore mongwe a ka nnela go bala go fitlha ka makgetlo a le 77! Lefa go le jalo, go itshwarela ka tsela e e ntseng jalo go batla bopelotelele.

4. Ke ka ntlha yang fa bagolwane segolobogolo ba tshwanela go nna pelotelele?

⁴ Fa go tla mo go supeng bopelotelele mo bakaulengweng ba rona ba semoya, ga go na pelaelo gore bagolwane ba phuthego ba tshwanetse go tlhoma sekao. Boitshoko jwa bone bo ka nna jwa lekwa gonne badumedi ba bangwe ba ka nna botlhaswa kana ba itlhokomolosa dilo. Ba bangwe ba ka nna ba tswa ba tsaya lobaka go tlogela mekgwa e e maswe. Bagolwane ba tshwanetse go ela tlhoko gore ba se ka ba galefisiwa kana ba kgopisiwa ke makoa a bakaulengwe le bokgaitsadi ba bone ba Bakeresete bonolo. Go na le moo, badisa bano ba semoya ba tshwanetse go gakologelwa kgakololo eno: “Me yana rona ba re leñ thata, re chwanetse go pepetletsa dithetelèlō tsa ba ba bokōa, me e señ go ikgatlha hèla.”—Baroma 15:1.

5. Ke eng seo re kgonang go se itshokela fa re le pelotelele?

⁵ Mme gape, go ka nna le dikgogakgogano tse di bakiwang ke go sa tshwaneng ga botho gonne batho ba le bokoa ebile ba tlhaela. Ka ntlha ya go palelwa gongwe kana go nna le mekgwa e e rileng e e sa tlwaelegang, re ka nna ra se ka ra tshwara bakaulengwe ba rona sentle, jaaka go ne go ka tualo, mme ba ka dira seo mo go rona. Ka gone, abo kgakololo eno e tshwanela jang ne: “Lo iphapaanyanè moñwe le eo moñwe, lo ichwarèlanè, ha motho moñwe a na le ñōñōrègō kaga eo moñwe; hèla yaka Morèna a lo ichwaretse, le lona lo dihè hèla yalo.” (Bakolosa 3:13) ‘Go iphapaanya mongwe le yo mongwe’ go raya go nna pelotelele, lemororo re ka tswa re na le mabaka a a utlwalang a go ngongorega ka yo mongwe.—Yakobe 5:9.

6. Ke ka ntlha yang fa go nna pelotelele e le tsela e e botlhale?

⁶ Kgakololo e e bonwang mo go Baroma 12:19 le yone e gakolola ka se se tshwanang: “Baratwa, se ipusholosetseñ, me lo thibogèlè bogale; gonne go kwadilwe, ga twe, Pusholoshō ke ea me; ke tla duèla, go bua Morèna.” ‘Go thibogela bogale’ go kaya go nna bonya go galefa, kana go nna pelotelele. O tla bo o supa botlhale fa o ka supa nonofo eno, ka go bo e solegela rona mmogo le ba bangwe molemo. Fa go na le bothata, re ikutlwa botoka fa re nna pelotelele gonne ga re senyetse dilo kwa pele. Mme le motho yo re leng pelotelele mo go ene o tla ikutlwa botoka gonne ga re mo otlhaye kana gone go ipusolosetsa ka tsela nngwe. Ga go gakgamatse go bo Paulo a ne a kgothatsa Bakeresete ba bangwe gore ba ‘nametse ba ba lapang pelo, ba pepetletse ba ba bokoa, le go nna pelotelele mo go botlhe’!—1 Bathesalonia 5:14.

Mo Lelapeng

7. Ke ka ntlha yang fa batho ba ba nyalaneng ba tlhoka go nna pelotelele?

⁷ Go ile ga nna ga bolelwa sentle fela gore lenyalo le le itumetseng le dirwa ke fa go kopane batho ba babedi ba ba itshwarelang. Seo se kaya eng? Gore batho ba ba itumetseng mo lenyalong ba pelotelele mongwe mo go yo mongwe. Batho gantsi ba a kgatlhegelana ka ntlha ya dinonofo tsa bone tse di sa tshwaneng. Dipharologano tseno di ka kgatlha tota, lefa go ntse jalo di ka tsosa dikgogakgogano tseo di oketsang go tshwenyega mo boikutlong le mathata a le jaanong a dirang gore Bakeresete ba ba nyetseng ba nne le “pitlaganō mo nameñ.” (1 Bakorintha 7:28) Ka sekai, a re re gongwe monna yo o nyetseng ga a amege thata jalo ka dilo kana ga a tlhokomele dilo kana o botlhaswa. Seno se ka utlwisa mosadi wa gagwe botlhoko thata. Mme fa e le gore mafoko a a buiwang ka bopelonomi ga a thuse, se se setseng fela ke gore a itshokele makoa a gagwe ka go nna pelotelele.

8. Ke ka ntlha yang fa banna ba ba nyetseng ba ka tlhoka go nna pelotelele?

⁸ Kafa letlhakoreng le lengwe, mosadi a ka batla gore sengwe le sengwe se dirwe ka matsetseleko mme ebile a rata go tshwenya monna wa gagwe. Seno se ka re gakolola lokwalo lono lo lo reng: “Go molemō bogolo go nna mo kgokgochoñ kwa godimo ga ntlo, bogolo go go aga le mosadi eo o ōmanañ mo tluñ e e atlhameñ.” (Diane 25:24) Fa go ntse jalo go tla tlhokega bopelotelele go dumalana le kgakololo eno ya ga Paulo: “Banna, ratañ basadi ba lona, me lo se ka loa ba ñañalèla.” (Bakolosa 3:19) Banna gape ba tlhoka go nna pelotelele gore ba kgone go dirisa kgakololo eno ya ga moaposetoloi Petere: “Hèla yalo le lona banna ba lo nyetseñ, lo agè le basadi ba lona kaha kicoñ, ka go naea mosadi tlotlō, yaka e le seyana se se señ thata, ka lo bile lo le barui mmōgō nabō ba tshegōhaco ea botshelō; gore merapèlō ea lona e tle e se ka ea kgoreletsèga.” (1 Petere 3:7) Makoa a mosadi wa gagwe ka dinako dingwe a ka utlwisa monna botlhoko thata, mme bopelotelele bo tla mo thusa gore a a itshokele.

9. Ke ka ntlha yang fa batsadi ba tlhoka go nna pelotelele?

⁹ Batsadi ba tshwanetse go nna pelotelele fa ba batla go atlega mo go godiseng bana ba bone. Basha ba ka dira diphoso tse di tshwanang kgapetsakgapetsa. Ba ka nna ba lebega ba le bogoma kana ba sa tshware dilo ka bonako mme ba ka nna ba utlwisa batsadi ba bone botlhoko ka metlha. Mo maemong a a ntseng jalo, batsadi ba Bakeresete ba tshwanetse go nna bonya go galefa, ba se ka ba galefa kana ba palelwa ke go itshwara mme ba nne ba ritibetse mme ba nitame mo melaometheong ya tshiamo. Borre ba tshwanetse go gakologelwa gore le bone ba kile ba bo ba le bannye mme le bone ba dira diphoso. Ba tlhoka go dirisa kgakololo eno ya ga Paulo: “Borra bana, se chwenyeñ bana ba lona, gore ba se ka ba shulahala pelo.”—Bakolosa 3:21.

Le Ba Ba kwa Ntle

10. Re tshwanetse go dira dilo ka tsela efe kwa tirong, jaaka re bona seno mo boitemogelong bofe?

¹⁰ Go ka nna le maemo a a sa itumediseng kwa Mokeresete a dirang gone ka ntlha ya go sa itekanelang ga batho mmogo le bogagapa. Ke tsela e e botlhale go akanyetsa dilo thata le go itshokela dilo tse di phoso gore go nne le kagiso. Boitemogelo jwa Mokeresete mongwe yoo a neng a tlhola a nna mo dikganetsanong tseo di neng di tsosiwa ke modiri mongwe yo a neng a mo fufegela bo bontsha kafa seo se leng botlhale ka gone. Ka go bo mokaulengwe a ne a se ka a tsosa kgang ka seno mme a ne a le pelotelele, fa nako e ntse e tsamaya o ne a kgona go simolola thuto ya Bibela le modiri yo a neng a tlhola a mo tshwenya yono.

11. Re tlhoka go nna pelotelele segolobogolo leng mme ka ntlha yang?

¹¹ Batho ba ga Jehofa ke bone bao segolobogolo ba tlhokang go nna pelotelele fa ba neela ba ba kwa ntle ga phuthego ya Bokeresete bosupi. Gangwe le gape, Bakeresete ba arabiwa ka tsela e e seng botsalano kana e e bobaba. A go tla bo go siame kana go le botlhale go araba ka tsela e e tshwanang? Nnyaa, seo e tla bo e se go supa bopelotelele. Tsela e e botlhale ke go gakologelwa le go latela seane se se gakololang ka botlhale seno: “Phetolō e e bonōlō e thibosa bogale: me lehoko ye le tlhokohatsañ le tle le tlhotlheletse bogale.”—Diane 15:1.

Tumelo le Tsholofelo Di A Thusa mo go Supeng Bopelotelele

12, 13. Ke dinonofo dife tse di tla re thusang go nna pelotelele?

¹² Ke eng seo se ka re thusang go supa bopelotelele le go itshokela maemo a a utlwisang botlhoko? Selo se sengwe ke go dumela ditsholofetso tsa Modimo. Re tshwanetse go dumela se Modimo o se bolelang. Dikwalo di bolela jaana: “Ga loa wèlwa ke thaèlō epè e e sa kakeñ ea ichōkèlwa ke motho: me Modimo o boikañō o o se ketlañ o lo lesa loa raèlwa ka mo go hetañ nonohō ea lona; me o tla re mo thaeloñ o lo baakanyetse kgōrō ea phalolō le eōna, gore lo tlè lo bōnè go e ichokèla.” (1 Bakorintha 10:13) Ka mafoko a mangwe go ntse fela jaaka motho mongwe yo o godileng a ne a bolela jaana: “Fa Modimo o dumela, ke tla kgona.” Ee, re ka kgona fela ka go nna pelotelele.

¹³ Sengwe se se atamalaneng thata le tumelo ke go solofela Bogosi jwa Modimo. Ka nako ya fa bo tla bo bo busa lefatshe, maemo otlhe a a maswe a a utlwisang botlhoko a tla tlosiwa. Mopesalema Dafide o ne a bolela jaana kaga seno: “Bakèla bogale, u lesè kgakalō: u se ka ua ichwenya, ka go ichwenya go tlo go ise kwa boshuleñ. Gonne badiha boshula ba tla kgaolwa; me ba ba lebeletseñ mo go Yehofa ba tla rua lehatshe.” (Pesalema 37:8, 9) Tsholofelo e e tlhomameng ya gore Modimo o tla tloga o tlosa maemo a a utlwisang botlhoko ano e re thusa go nna pelotelele.

14. Ke boitemogelo bofe jo bo re bontshang gore ke ka ntlha yang fa re tshwanetse go nna pelotelele mo molekaneng yo o sa dumeleng?

¹⁴ Re tshwanetse go dira eng fa molekane yo o sa dumeleng a re utlwisa botlhoko? Nna o ntse o kopa gore Modimo o go thuse, mme nna o ntse o solofetse gore moganetsi yono o tla nna moobamedi wa ga Jehofa. Mosadi mongwe yo monna wa gagwe e neng e le Mokeresete ka dinako dingwe o ne a gana go mo apeela dijo le go mo tlhatswetsa diaparo. O ne a dirisa puo e e maswe tota, mme o ne a nna malatsi a mantsi a sa bue nae, o bile a leka le go mo tlisetsa bomadimabe ka boloi. “Mme,” o ne a bolela, “ke ne ke leba kwa go Jehofa nako le nako ka thapelo, mme ke ne ke Mo ikanya tota gore o tla nthusa go nna le nonofo e e molemo ya bopelotelele gore ke se ka ka tlhoka go itshwara jaaka Mokeresete. Ke ne ke solofela gape gore ka letsatsi lengwe boikutlo jwa gagwe bo tla fetoga.” Mosadi wa gagwe o ne a simolola go fetoga morago ga dingwaga tse 20 a ntse a mo tshwara ka tsela eo, mme o ne a bolela jaana: “Abo ke leboga Jehofa jang ne go bo a nthusitse go tlhagolela bopelotelele jo e leng loungo lwa moya gonne jaanong ke bona maungo a gone: Mosadi wa me o simolotse go tsamaya mo tseleng ya botshelo!”

Thapelo, Boikobo, le Lorato Di Tla go Thusa

15. Ke ka ntlha yang fa thapelo e ka re thusa go nna pelotelele?

¹⁵ Thapelo ke thuso e nngwe gape e tona mo go supeng bopelotelele. Paulo o ne a kgothatsa jaana: “Lo se ka loa tlhobaediwa ke sepè; me mo diloñ cotlhe a ditōpō tsa lona di itsisiwè Modimo ka thapèlō le kokotlèlō, di na le tebogō. Me kagishō ea Modimo e e hetañ tlhaloganyō eotlhe, e tla dibèlèla dipelo tsa lona le megopolō ea lona mo go Keresete Yesu.” (Bafilipi 4:6, 7) Gakologelwa gape go latela kgothatso eno: “Latlhèla morwalō oa gago mo go Yehofa, me o tla gu kokotletsa: ga a ketla a leseletsa mosiami gopè go tshikiñwa.”—Pesalema 55:22.

16. Boikobo bo ka re thusa jang go nna pelotelele?

¹⁶ Boikobo ke thuso e nngwe gape e kgolo mo go tlhagoleleng loungo lwa moya lwa bopelotelele. Motho yo o boikgodiso o fela pelo ka bonako. O kgopisega ka bonako, o galefa ka bonako, mme ga a kake a itshokela go tshwarwa ka tsela epe fela e e sa siamang. Dilo tseno tsotlhe di kgatlhanong le bopelotelele. Mme motho yo o boikobo ga a ke a tshwenyega thata. O tla lebelela mo go Jehofa, fela jaaka Dafide a ne a dira fa Kgosi Saulo a ne a mo tsoma le fa a ne a kgopisiwa ke Shimei wa Mobenjamene. (1 Samuele 24:4-6; 2 Samuele 16:5-13) Ka gone, re tshwanetse go eletsa go tsamaya “ka boikokobeco yotlhe le bonōlō le ka bopelotelele, ka go iphapaanyana mo loratoñ.” (Baefesia 4:2) Mo godimo ga moo, re tshwanetse go ‘ingotlofatsa fa pele ga Morena, me o tla re goletsa.’—Yakobe 4:10.

17. Ke ka ntlha yang fa lorato lo ka re thusa go nna pelotelele?

¹⁷ Lorato lo lo seng bogagapa lo re thusa thata gore re nne pelotelele. Eleruri, “loratō lo ichōka ka pelotelele,” ka go bo lo re dira gore re kgatlhegele ba bangwe tota. (1 Bakorintha 13:4) Lorato lo re thusa gore re kgone go utlwela ba bangwe botlhoko, go ikutlwa jaaka ba ikutlwa. Mo godimo ga moo, lorato lo re thusa go nna pelotelele gonne “lo ichōkèla dilō cotlhe, lo dumèla dilō cotlhe, lo sholohèla dilō cotlhe, lo iphapaanya le dilō cotlhe. Loratō ga lo ko lo tlhaèla gopè.” (1 Bakorintha 13:7, 8) Ee, ke fela jaaka pina ya Bogosi ya 200 mo bukeng ya Opelelang Jehofa Dipako e bolela jaana kaga seo:

“’Rato lo bona dilo

Tsotlhe tse di Molemo.

’Rato lo pelonomi,

Go ba e leng bafosi.”

A O Ka Itumela Fa O le Pelotelele?

18. Re ka kgona jang go nna pelotelele mme re ntse re itumetse?

¹⁸ Paulo o ne a rapela gore badumedi ka ene ba ba kwa Kolosa ekete ba ne ba ka tladiwa ka kitso e e tlhomameng ya go itse go rata ga Modimo gore Jehofa a ba amogele, ba mo itumedise le gore ba bone maungo a a molemo ka tiro nngwe le nngwe e e molemo e ba e dirang. Ka gone ba ne ba tla “nonotshiwa ka nonochō eotlhe, kaha nonochoñ ea kgalalèlō ea ōna, gore [ba] nne pelotelele eotlhe le boichōkō ka boitumèlō.” (Bakolosa 1:9-11) Lefa go le jalo, motho a ka kgona go ‘nna pelotelele yotlhe le boitshoko ka boitumelo’ jang? Seo ga se ikganetse, ka go bo boitumelo jo bo umakiwang mo Dikwalong ga se fela fa pelo ya gago e thamile kana o le matlhagatlhaga. Loungo lwa moya lwa boitumelo lo akaretsa go ikutlwa o kgotsofetse tota ka go bo o dira selo se se siameng mo matlhong a Modimo. Gape lo supa fa o na le tsholofelo ya go amogela tuelo e e solofeditsweng ka go bo o ile wa nna pelotelele. Ke gone ka moo Jesu a neng a bolela jaana: “Lo [tla itumela, NW] mogañ batho ba lo kgōbañ, ba lo bogisa, ba lo pateletsa boshula boñwe le boñwe, ka ntlha ea me. Itumeleñ, lo bo lo ipelè thata: gonne tuèlō ea lona e kgolo kwa legodimoñ: gonne ba bogisitse hèla yalo baperofeti ba ba neñ ba le pele ga lona.”—Mathaio 5:11, 12.

19. Ke dikao dife tse di bontshang gore motho a ka nna pelotelele a bo a itumela?

¹⁹ Jesu o ne a na le boitumelo jo bo ntseng jalo. Eleruri, ke “eo e rileñ ka boitumèlō yo o bo beecweñ pele a ichokèla mokgōrō, a nyatsa ditlhoñ.” (Bahebera 12:2) Boitumelo joo bo ne jwa dira gore Jesu a nne pelotelele. Ka tsela e e tshwanang, akanya seo se neng sa diragala fa baaposetoloi ba ne ba itewa mme ba bolelelwa gore “ba se ka ba bua mo ineñ ya ga Yesu.” Ba ne “ba cwa ha pele ga lekgotla, ba itumèla ka ba kailwe chwanèlo ea go tlotlololwa ka ntlha ea Leina. Me ka malatsi aotlhe, mo tempeleñ le mo ma ga bōnè, ba se ka ba bakèle go ruta, le go rèra Yesu ha e le Keresete.” (Ditihō 5:40-42) Abo seno e le sekao se se molemo jang ne se se supang tota gore balatedi ba ga Keresete ba ka nna pelotelele mme ba itumetse!

20. Fa re supa bopelotelele, seo se ka ama kamano ya rona le ba bangwe jang?

²⁰ Lefoko la Modimo eleruri le naya kgakololo e e botlhale fa le re kgothaletsa gore re se ka ra ipusolosetsa, re nne bonya go galefa re ntse re solofetse go bona sengwe se se molemo—ee, re nne pelotelele! Re tlhoka go rapela ka metlha le go nna le loungo lono lwa moya wa Modimo gore re kgone go tshedisana sentle le bakaulengwe le bokgaitsadi ba rona mo phuthegong, le bamalapa a rona, batho ba re dirang le bone, le batho bao re kopanang le bone mo bodiheding jwa Bokeresete. Mme ke eng seo se ka re thusang go supa bopelotelele? Tumelo, tsholofelo, boikobo, boitumelo, le lorato. Eleruri, fa re na le dinonofo tse di ntseng jalo re tla nna pelotelele mo go botlhe.

A O A Gakologelwa?

◻ Ke ka ntlha yang fa re tlhoka go nna pelotelele gore re kgone go ipelela paradaise ya semoya?

◻ Ke ka ntlha yang fa bagolwane segolobogolo ba tlhoka go nna pelotelele?

◻ Ke ka ntlha yang fa banna ba ba nyetseng le basadi ba bone ba tshwanetse go tlhagolela bopelotelele?

◻ Ke dinonofo dife tse dingwe tse di tla re thusang go nna pelotelele?

[Setshwantsho mo go tsebe 17]

Ke kgakololo efe ya ga Jesu e e neng ya thusa Petere go nna pelotelele?