Jehofa O a Re Utlwa fa re Kopa Thuso Ka Bonako
THUSO e ne e tlhokega ka bonako. Seo se ne se supiwa ke bohutsana jo bogolo jo bo neng bo le mo sefatlhegong sa motsholaphafana. Fa a bodiwa gore molato ke eng, motsholaphafana o ne a bolela fa a hutsafaditswe ke tsela eo Jerusalema le dithako tsa yone di neng di senyegile ka yone. Go ne ga bodiwa jaana: “Ke eng se u se lopañ?” “Yalo ka rapèla Modimo oa legodimo,” Nehemia yo e neng e le motsholaphafana o ne a kwala jalo moragonyana. Eo e ne e le thapelo ya ka bonako, e rapelwa ka tidimalo, le ka bonako gore Jehofa a thuse. Mme go ne ga felela jang? Aitsane, kgosi ya Moperesia Aretaserese e ne ya letla Nehemia ka bonako fela go ya go tsosolosa dithako tsa Jerusalema!—Nehemia 2:1-6.
Ee, Modimo o utlwa dikopo tsa bao ba mo ratang fa ba kopa thuso ka bonako. (Pesalema 65:2) Ka jalo fa o bona teko e lebega e le tona thata gore o ka e itshokela, o ka rapela jaaka mopesalema Dafide a ne a rapela mo go Pesalema 70, fa a ne a tlhoka thuso ya Modimo ka bonako. Mafoko a a kwa godimo ga pesalema eno a bontsha gore boikaelelo jwa yone ke “go gopodisa.” E boeletsa Pesalema 40:13-17 mme e dira diphetogo di sekae fela. Mme Pesalema ya bo 70 e ka re thusa jang jaaka batho ba ga Jehofa?
Kopo ya go Gololwa ka Bonako
Dafide o simolola ka go kopa jaana: “Akoha, Modimo, u nkgololè; a ko u akohèlè go nthusa, Yehofa.” (Pesalema 70:1) Re ka rapela Jehofa gore a re thuse ka bonako fa re tshwenyegile. Jehofa ga a re leke ka dilo tse di bosula, mme “o itse go golola badumedi mo thaeloñ.” (2 Petere 2:9; Yakobe 1:13) Mme go tweng fa a letla gore sengwe se se re utlwisang botlhoko se tswelele, gongwe a batla go re ruta sengwe? He re ka mo kopa gore a re neye botlhale jwa go se itshokela. Fa re mo kopa ka tumelo, o re naya botlhale. (Yakobe 1:5-8) Modimo gape o re naya nonofo e re e tlhokang go itshokela diteko tsa rona. Ka sekai, ‘o a re oka fa re le mo bolaong jwa topetego.’—Pesalema 41:1-3; Bahebera 10:36.
Boleo jo bo leng mo go rona, mmogo le go nna re kopana le diteko ka metlha le maiteko a ga Diabolo a go senya kamano ya rona le Jehofa, di tshwanetse tsa re rotloetsa go rapela Modimo letsatsi le letsatsi gore o re thuse. (Pesalema 51:1-5; Baroma 5:12; 12:12) Mafoko ano a ga Jesu a thapelo ya gagwe ya sekao a kgatlha tota: “Me a u ko u se ka ua re isa mo thaeloñ, me u re gololè mo go eo o boshula.” (Mathaio 6:13) Ee, re ka kopa Modimo gore o se ka wa re lesa gore re ineele fa re raelwa go tlola melao ya gagwe le gore a thibele Satane ebong “eo o boshula.” gore a se ka a re fenya. Mme a dithapelo tsa rona tsa go rapelela kgololo re di dire mmogo le go tsaya dikgato tsa go tila maemo ao a ka re bayang mo tekong le mo diraing tsa ga Satane fela go sa tlhokege.—2 Bakorintha 2:11.
Bao Ba Reng “Ahe!”
Re ka nna ra tshwenyega thata gonne baba ba rona ba re sotla ka tumelo e re e supang. Fa seo se ka go diragalela, gakologelwa mafoko ano a ga Dafide: “Ba ba comañ mōea oa me a ba tlhaywè ke ditlhoñ, ba tseañwè: ba ba itumèlañ ha ke utlwa botlhoko a ba bosediwè kwa moragō ba tlhokisiwè tlotlō. Bōnè ba ba reñ, Ahè! Ahè! a ba bosediwè kwa moragō ka ntlha ea ditlhoñ tsa bōnè.” (Pesalema 70:2, 3) Baba ba ga Dafide ba ne ba batla go mmona a sule; ba ne ba ‘tsoma moya wa gagwe,’ kana botshelo jwa gagwe. Lefa go ntse jalo, go na le gore a leke go ipusolosetsa, o ne a supa fa a dumela gore Modimo o tla ba tlhabisa ditlhong. Dafide o ne a rapelela gore baba ba gagwe ba “tlhaywè ke ditlhoñ, ba tseañwè”—ba tlhabisiwe ditlhong, ba tseane, ba tlhakanngwe tlhogo, ba tlalelwe fa ba leka go dira maano a bone a a boikepo. Ee, a bao ba batlang go mo utlwisa botlhoko bao ba itumelelang gore a welwe ke masetlapelo ba tlhakane tlhogo mme ba tlontlololwe.
Fa re ka tswa re ne re itumelela go bona baba ba rona ba wetswe ke masetlapelo, re ne re tla ikarabela mo go Jehofa ka boleo joo jwa rona. (Diane 17:5; 24:17, 18) Lefa go ntse jalo, fa baba ba sotla Modimo le batho ba gagwe, re ka rapela gore ka ntlha ya leina la gagwe le le boitshepo, Jehofa a ‘ba busetse kwa morago a ba tlhokise tlotlo’ mo matlhong a batho bao ba batlang go itlotlomatsa mo go bone. (Pesalema 106:8) Modimo ke one o tla busolosang mme a ka tsenya le go tlhabisa baba ba gagwe le ba rona ditlhong. (Duteronome 32:35) Ka sekai, moeteledipele wa Ba-Nazi Adolf Hitler o ne a batla go nyeletsa Basupi ba ga Jehofa kwa Jeremane. Abo a ne a palelwa botlhoko jang ne, ka go bo jaanong diketekete tse dintsi tsa bone di bolela molaetsa wa Bogosi koo!
Baba ba rona ba ka bolela fela ka tshotlo jaana: “Ahè! Ahè!” Ereka ba sotla Modimo le batho ba one, a baleofi bao ba “bosediwè kwa moragō ka ntlha ea ditlhoñ tsa bōnè,” ba tlhabisiwe ditlhong. Fa re ntse re rapelela seno a re bolokeng bothokgami jwa rona mme re ipedise pelo ya ga Jehofa, gore a kgone go araba Satane le mongwe le mongwe yo a Mo sotlang. (Diane 27:11) Mme a le ka motlha re se ka ra boifa baba ba rona ba ba boikgodiso, ka go bo “eo o ikanyañ Yehofa o tla bolokèga.” (Diane 29:25) Kgosi e e boikgodiso ya Babelona ebong Nebukadenesare, yo a neng a gapile batho ba Modimo jaaka ditshwarwa, o ne a tlhabisiwa ditlhong mme o ne a tshwanela go dumela gore ‘Kgosi ya legodimo e nonofile go isa kwa tlase ba ba sepelang mo pelafalong.’—Daniele 4:37.
“A Modimo O Golediwe”
Lemororo baba ba bantsi ba ka re direla mathata, a ka metlha re goletse Jehofa mmogo le badumedi ba bangwe. Go na le gore a itetle go fekeediwa ke dilo tse di neng di mo utlwisa botlhoko, mo a neng a palelwa ke go goletsa Modimo, Dafide o ne a bolela jaana: “Botlhe ba ba gu batlañ a ba itumèlè ba ipelè mo go wèna; a ba ba ratañ poloka ea gago ba nnè ba buè ka galè, ba re, A Modimo o golediwè.” (Pesalema 70:4) Batho ba ga Jehofa ba tswelela ba itumetse gonne ba ‘itumela le go ipela’ mo go ene. Jaaka Basupi ba gagwe ba ba ineetseng le ba ba kolobeditsweng ba na le boitumelo jo bogolo tota jo bo tlisiwang ke kamano e e gaufi thata e ba nang nayo le ene. (Pesalema 25:14) Lefa go le jalo, ba ka nna ba lejwa jaaka batho ba ba ikokobeditseng ba ba batlang Modimo. Ereka e le badumedi ba ba bolokang melao ya Modimo, ba tswelela ba ntse ba batla go mo itse le go itse Lefoko la gagwe ka metlha.—Moreri 3:11; 12:13, 14; Isaia 54:13.
Jaaka Basupi ba ga Jehofa ba ntse ba rera mafoko a a molemo, totatota ba bolela jaana ka metlha: “A Modimo o golediwè.” Ba goletsa Jehofa, ba mo tseela kwa godimo tota. Ka boitumelo, ba thusa bao ba batlang boammaaruri go ithuta kaga Modimo mmogo le go mo galaletsa. Go na le go nna jaaka batho ba lefatshe ba ba ipatlelang menate fela, batho ba ga Jehofa ba ‘rata poloka ya gagwe.’ (2 Timotheo 3:1-5) Ereka ba itse kaga boleo jo bo medileng medi mo go bone, ba leboga Jehofa Modimo tota go bo a ba baakanyeditse ka lorato gore ba ka bolokelwa mo botshelong jo bo sa khutleng, joo bo dirwang gore bo nne gone ke setlhabelo sa thekololo sa Morwawe yo o rategang, Jesu Keresete. (Yohane 3:16; Baroma 5:8; 1 Yohane 2:1, 2) A o goletsa Modimo le go bontsha gore o ‘rata poloka ya gagwe’ ka go nna moobamedi wa boammaaruri yo o mmakang?—Yohane 4:23, 24.
Ikanye Yo O Bolokang
Fa Dafide a ne a itlhalosa mo pesalemeng eno, o ne a ikutlwa a tlhoka tota mo a neng a bolela jaana: “Me nna, ke humanegile, kea tlhōka; a ko u nkakohèlè, Modimo; wèna u thushō ea me, le mogolodi oa me; Yehofa, u se ka ua dièga gopè.” (Pesalema 70:5) Ereka ba tlhaselwa ke diteko tseo di tlelang batho ba ba dumelang—matshwenyego a a tshwanang le pogiso, go raelwa, le go tlhaselwa ke Satane—re ka nna ra lebega re “humanegile.” Lemororo re ka tswa re sa humanega, re lebega go se se re ka se dirang kgatlhanong le baba ba rona ba ba sa saleng melaometheo ya boitsholo morago. Lefa go ntse jalo, re ka tlhomamisega gore Jehofa o na le nonofo le gore o tla re golola jaaka batlhanka ba gagwe ba ba ikanyegang.—Pesalema 9:17-20.
Jehofa ke “mogolodi” fa re tlhoka go gololwa. Makoa a rona a ka tswa e le one a re tsentseng mo maemong a a nang le diteko. Mme fa ‘boeleele jwa rona bo theotse tsela ya rona,’ a dipelo tsa rona di se ka tsa ‘tšhatšharegela Jehofa.’ (Diane 19:3) Ga a kake a pegiwa molato mme o iketleeditse go re thusa fa re mo rapela ka tumelo. (Pesalema 37:5) Go tweng fa re kgaratlhela go tila go dira boleo bongwe? He, a re mmoleleleng ka tlhamalalo fela ka thapelo, re kopa Modimo gore o re thuse go tswelela mo tseleng ya tshiamo. (Mathaio 5:6; Baroma 7:21-25) Modimo o tla araba thapelo ya rona e e tswang pelong mme re tla gatela pele semoyeng fa re ineela mo kaelong ya moya wa gagwe o o boitshepo.—Pesalema 51:17; Baefesia 4:30.
Fa re lwa ntwa e e bokete tota e e lekang tumelo ya rona, re ka nna ra ikutlwa re sa tlhole re kgona go itshoka. Ereka nama ya rona e e boleo e le bokoa, e ka nna ya batla go gololwa ka bonako. (Mareko 14:38) Ka gone re ka kopa jaana: “Yehofa, u se ka ua diega gopè.” Re ka tlhotlheletsega go bua jaana jaaka moperofeti Daniele segolobogolo fa re amegile thata ka gore leina la Modimo le ka kgobiwa: “Morèna, a ko u utlwè; Morèna a ko u ichwarèlè; Morèna, reetsa u dihè; u se ka ua dièga; ka ntlha ea gago, Modimo oa me, ka go bo . . . batho ba gago ba bidiwa ka leina ya gago.” (Daniele 9:19) Re ka dumela gore Rraarona wa selegodimo ga a kitla a diega thata, ka go bo moaposetoloi Paulo o ne a re tlhomamisetsa jaana: “A re atameleñ setuloñ sa bogosi sa tshegōhaco ka botlhōkapoihō, gore re tlè re amogèlè butlwèlō botlhoko, re bōnè tshegōhaco e e tla re thusañ mo motlheñ o go tlhōkwañ ka ōna.”—Bahebera 4:16.
O se ka wa lebala le ka motlha gore Jehofa ke Mogolodi. Jaaka batlhanka ba gagwe, re tla solegelwa molemo fa re ka gakologelwa seno mmogo le mafoko a thapelo a Pesalema 70. Ka dinako tse dingwe re ka tshwanela go rapela kgapetsakgapetsa ka kgang nngwe e e re tshwenyang thata. (1 Bathesalonia 5:17) Bothata bongwe bo ka lebega go se kafa bo ka rarabologang ka gone, o le fa gare ga dinaka tsa nare. Mme Rraarona yo o lorato wa selegodimo o tla re nonotsha mme ga a kitla a re letla gore re lekwe go feta kafa re nonofileng go itshoka ka gone. Ka gone, o se ka wa lapa le ka motlha go ya ka metlha fa pele ga setulo sa bogosi sa Kgosi ya Bosakhutleng ka thapelo e e tswang pelong. (1 Bakorintha 10:13; Bafilipi 4:6, 7, 13; Tshenolō 15:3) Rapela o na le tumelo, mme o mo ikanye tota o sa belaele, ka go bo Jehofa o utlwa dithapelo tsa rona tsa fa re kopa thuso ka bonako.