Go Rata Jehofa go Re Tlhotlheletsa Go Obamela ka Boammaaruri

“Lo ke lōna loratō loa Modimo, gore re bolokè ditaolō tsa ōna.”—1 YOHANE 5:3.

1, 2. Re tshwanetse ra tlhotlhelediwa ke eng gore re direle Jehofa?

SETLHOPHA sengwe sa baeti ba le 80 go tswa kwa Japane se ne se jetse nala kwa Holong ya Kopano ya Basupi ba ga Jehofa kwa California, U.S.A. Tikologo e e kgatlhang, go akaretsa le tshingwana e e tletseng mahukubu a mabududu, maphoi, le mahututu, di ne tsa ba dira gore ba ikutlwe ba atamalane thata le Mmopi wa bone yo Mogolo ebong Jehofa Modimo. Go ise go ye kae motsamaisi wa bone o ne a lemoga gore mo e batlang e le mongwe le mongwe mo setlhopheng seno o ne a direla ka nako e e tletseng jaaka mmulatsela. Ka jalo, e ne ya re moragonyana setlhopha sa bodiwa potso e e tlholang e bodiwa: “Ke ka ntlha yang fa go na le babulatsela ba bantsi jaana kwa Japane?” Go ne ga nna tidimalo ka lobakanyana. Go tswa foo lekgarebe lengwe le ne la ithaopela go araba jaana: “Ka gonne re rata Jehofa.”

² Go rata Jehofa—abo seno se re tlhotlheletsa jang ne gore re tlhagafale mo tirelong ya gagwe! Ke boammaaruri, ga se mongwe le mongwe yo o ka kgonang go bula tsela. Eleruri, bontsi jwa baboledi ba rona ba Bogosi ba ba fetang dimilione tse nne ga ba ise ba kgone go rulaganyetsa tshiamelo eno. Mme lefa go ntse jalo bao maemo a bone a ba letlang ba leka go e fitlhelela. Rona ba bangwe re ka ‘ikanya Jehofa le go dira molemo,’ re bontsha lorato lwa rona ka go nna le seabe mo tirong ya go dira barutwa. (Pesalema 37:3, 4) Mme baobamedi botlhe ba ga Jehofa ba ba ineetseng ba ka tsaya karolo mo go rotloetseng moya wa bobulatsela ka go tshegetsa ka lorato bao ba bulang tsela.—Mathaio 24:14; 28:19.

3. Ke pharologano efe e e bonalang fa gare ga bontsi jwa batho bao ba ipolelang gore ke Bakeresete le Basupi ba ga Jehofa?

³ Go farologana le bontsi jwa batho bao ba ipolelang gore ke Bakeresete, bao ba tsayang bodumedi e le karolo fela e e sa reng sepe ya matshelo a bone ba dira jalo gore bo se ka jwa ba kgoreletsa, Basupi ba ga Jehofa ba bontsha lorato lo lo boteng lwa go rata Modimo loo lo ba tlhotlheletsang gore ba tswelele ba ‘batla pele bogosi jwa gagwe, le tshiamo ya gagwe.’ Seno se ile sa tlhoka go intsha setlhabelo, mme abo e ile ya nna setlhabelo se se mosola jang ne! (Mathaio 6:33; 16:24) Se ile sa dumalana le molao ono wa ntlha o mogolo, o o neng wa bolelwa pele ke Moshe mme wa boelediwa gape ke Jesu Keresete: “Yehofa Modimo oa rona, Yehofa o moñwe hèla: Gapè, U ratè Yehofa Modimo oa gago ka pelo eotlhe ea gago, le ka mōea otlhe oa gago, le ka tlhaloganyō eotlhe ea gago, le ka thata eotlhe ea gago.”—Mareko 12:29, 30; Duteronome 6:4, 5.

4, 5. Ke bomang bao ba tshwanetseng go lejwa ba ikanyega, mme boikanyegi bo ka bontshiwa jang?

⁴ Mongwe wa badiri ba kwa ntlongkgolo ya Basupi ba ga Jehofa o ne a akgela jaana fa a ne a bua le F. W. Franz, poresidente yo o dingwaga di 98 wa Mokgatlho wa Watch Tower yo o setseng a na le dingwaga di feta 70 a le mo tirelong ya nako e e tletseng: “O ile wa nna sekao se se molemo sa boikanyegi, Mokaulengwe Franz.” Mokaulengwe Franz o ne a fetola ka go re: “Ee! O tshwanetse go ikanyega.” Kgang ke yone eo. Re ka ikanyega mo karolong lefa e ka nna epe ya tiro ya Bogosi eo re e dirang.—1 Bakorintha 4:2; Bagalatia 3:9.

⁵ Ke boammaaruri, ba le bantsi ba eletsa go dira mo go oketsegileng tota mo tirelong ya ga Jehofa, mme lefa go ntse jalo maikarabelo a a kafa Dikwalong kana mathata a botsogo a ka ba kgoreletsa ka mokgwa mongwe. Lefa go ntse jalo, bao ba sa kgoneng go bula tsela ga ba a tshwanelwa go tsewa jaaka bao ba sa ikanyegeng. Bangwe ba ile ba tswelela ba ikanyega kafa tlase ga maemo a a bokete tota ebile gantsi ba tswelela jalo ka dingwaga di le dintsintsi. Ee, ba ile ba ikanyega! Ba ile ba bontsha go rata Jehofa mme ba direla ka botlhaga ba ema dithulaganyo tsa gagwe tsa bolegodimo nokeng ka pelo yotlhe. Ba ile ba bontsha kgatlhego e e boteng mo tirong ya babulatsela gape ba ile ba kgothatsa batho bao ba ka kgonang go nna babulatsela, bao gantsi e neng e le bana ba bone, gore ba dire ka natla gore bobulatsela e nne yone tiro ya bone ya botshelo jotlhe e e gaisang tse dingwe tsotlhe.—Bapisa Duteronome 30:19, 20.

6, 7. Sekao se se kwadilweng mo go 1 Samuele 30:16-25 se dira jang gompieno?

⁶ Go utlwana ka lorato mo tirong ga batho botlhe ba Modimo gompieno go ka tshwantshiwa ka pego e e mo go 1 Samuele 30:16-25. E ne ya re fa ba lwa le Baamaleka, “go simolola ka lotlatlana louō go ea maitsiboeeñ a ka moshō Dafide a ba kgèmètha” mme a gapa dilo di le dintsi. Fa ba boela kwa bothibelelong, bangwe ba batlhabani ba ga Dafide ba ne ba kopa gore bao ba neng ba sa ya le bone kwa ntweng e e matlho mahibidu eo ba se ka ba fiwa sepe sa dilo tse di thopilweng. Mme lefa go ntse jalo Dafide o ne a araba ka go re: “Mañ eo o tla lo reetsañ mo seloñ se? gonne yaka kabèlō ea eo o ileñ tlhabanoñ e nntse, kabèlō ea gagwè eo o na a setse le dithoto e tla nna yalo: ba tla abèlwa ka go chwana hèla.”

⁷ Molaomotheo o o tshwanang o a dira le gompieno. Babulatsela ba kwa pele mo tlhabanong ya rona ya semoya. Mme ba bangwe botlhe ba ba mo phuthegong ba ba ema nokeng ka pelo yotlhe, le ka boikanyegi. Basupi botlhe ke badiri mmogo mo tirelong. Mme matswela a a molemo a tiro ya bone e e kopanetsweng ya ka 1991 a bontshitswe mo tšhateng e e mo ditsebeng tse di fetileng.

Pego E E Tlhomologileng

8. (a) Pego ya lefatshe lotlhe e senola eng kaga palogotlhe ya baboledi le diura tseo ba di sentseng mo tirelong ya ga Jehofa? (b) Ke dintlha dife tse di kgatlhang tseo o di lemogang ka dinaga tseo di simololang go tlhaga mo pegong?

⁸ Ee, ditsebe tse nne tse di fetileng tsa makasine ono di bontsha kafa maiteko a a kopaneng a baobamedi botlhe ba ba matlhagatlhaga ba ga Jehofa a ileng a dira ka gone gore go nne le koketsego e e kgatlhang ya lefatshe lotlhe ka 1991. Go begilwe tlhora e ntšha e e molemo go gaisa ya baboledi ba Bogosi ba le 4 278 820—koketsego ya 6,5-lekgolong. Bano ba ne ba senya diura di le 951 870 021 (e batlile e nna bilione!) mo tirelong. Gape ela tlhoko maiteko a magolo go gaisa a a dirwang ke bakaulengwe ba rona ba ba mo dinageng tse di sa tswang go tlhaga bosheng mo pegong ya lefatshe lotlhe—Bulgaria, Cameroon, Czechoslovakia, Ethiopia, Mozambique, Nicaragua, Rwanda, le U.S.S.R.

9, 10. (a) Babulatsela ba ile ba arabela kgwetlho ya maemo a a bokete jang? (b) Go neelwa kgothatso efe malebana le go tsenela tirelo ya bobulatsela?

⁹ Mo dingwageng tsa bosheng moya wa bobulatsela o ile wa anama go ralala lefatshe. Le eleng mo dinageng tseo di ileng tsa nna le kgololesego ya kobamelo bosheng fela jaana, dipalo tsa babulatsela di a gola. Maemo a a boima a tsa itsholelo ga a kgoreletse Basupi bano ba ba nonofileng gore ba se neele tsotlhe tseo ba nang natso mo go obameleng Jehofa. (Bapisa 2 Bakorintha 11:23, 27.) Fa re tsaya palogare ya kgwedi le kgwedi, 14 lekgolong ya baboledi botlhe ba Bogosi e ile ya bula tsela. Tlhora ya babulatsela ke 780 202, eo e leng 18 lekgolong ya baboledi.

¹⁰ Ba bangwe le bone fa ba bona boipelo jwa babulatsela, ba a kgothadiwa gore ba tsenele tirelo eno. Fa e le gore ga o ise o simolole go bula tsela, a lorato lwa gago mo go Jehofa le ka go tlhotlheletsa gore o bue jaaka fa re bala mo go Isaia 6:8 o re “Ke hano, roma nna”? A kana ka ntlha ya go ithuta Bibela ga gago ka matlhagatlhaga, Lefoko la Modimo le ka tsosa keletso e e mahehe mo pelong ya gago, mo e leng gore o tla tshwanelwa fela ke gore o tseye kgato eno ya go tsenela tirelo ya bobulatsela? Le eleng ka nako ya teko, lefoko la ga Jehofa le ne la tlhotlheletsa Jeremia gore a se ka a ikgogona.—Yeremia 20:9.

Go Direla Setho Ka Lorato

11. Tiro ya go tshwara dithuto tsa magae tsa Bibela e atlegile go le kana kang?

¹¹ Nngwe ya dilo tse di tlhomologileng tsa pego ya ngwaga ke koketsego ya palo ya dithuto tsa magae tsa mahala tsa Bibela, go tshwarwa di le 3 947 261, ka metlha kgwedi le kgwedi mo lefatsheng lotlhe. Eno ke thulaganyo e e lorato eo mo go yone Basupi ba ga Jehofa ba thusang batho ba ba kgatlhegang bao ba ba bonang mo tirong ya bone ya ka ntlo le ntlo. Re itumelela go tshwara dithuto tsa Bibela le batho ba merafe le ba ditso tse di farologaneng, re dira ka botlhaga jo bo neng jwa bontshiwa ke moaposetoloi Paulo. Kwantle ga pelaelo ‘go supetsa Bajuda le Bagerika ka botlalo’ go a neng a go dira go ne go mo tlhoka gore a rute boammaaruri ka diura tse dintsi. (Ditiho 20:20, 21) Go ntse fela jalo le gompieno. Basupi ba ga Jehofa ba thusa “batho botlhe [gore] ba bolokwè, me ba hitlhè mo kicoñ ea boamarure.”—1 Timotheo 2:4.

12-14. Go tla dipego dife tse di ipedisang go tswa kwa Yuropa?

¹² Abo dipego tsa go ithuta Bibela mo go oketsegileng kwa Yuropa Botlhaba di kgatlha jang ne! Bakaulengwe ba rona ba koo ba ne ba tshwanelwa ke go kopana ka ditlhotshwana ka masomesome a dingwaga, gongwe ba na le sekaelo se le sengwe fela fela sa moriti wa Tora ya Tebelo e kgologolo gore ba se dirise botlhe jaaka setlhopha. Mme jaanong go thelegela letlotlo la Dibibela le dibuka tsa Bibela mo dinageng tseo. Seno se re gopotsa Sehela sa Dihela 2:4, “[Keresete Jesu] o na a nkisa mo tluñ ea meletlō [ya semoya], me sekhukhu sa gagwè godimo ga me e ne e le loratō.” Ereka motho ka namana a na le dikaelo tsa gagwe tsa dimakasine, ba le bantsi jaanong ba ntse ba tlhomelelwa sentle go tshwara “lehoko ya boamarure ka tshiamō.”—2 Timotheo 2:15.

¹³ Phuthego nngwe ya baboledi ba le 103 kwa St. Petersburg, kwa Russia, e ne ya re bosheng ya bega dithuto tsa magae tsa Bibela di feta 300. Maungo a a neng a bonwa ka boiteko jono jwa go nna le dithuto tsa Bibela e nne ya nna gore go kolobediwe Basupi ba basha ba le 53 mo dikgweding di le robedi fela. Batho ba ba fetang halofo ya phuthego ba na le lobaka lwa dikgwedi di le robedi kana kwa tlase ba le mo boammaaruring! Le gone ga ba na bagolwane—ba na le motlhanka wa bodihedi a le mongwe fela yo o tlhokometseng gore ba gatele pele semoyeng.

¹⁴ Mmoledi mongwe wa Bogosi kwa Estonia o ne a bodiwa ke mongwe yo o ithutang Bibela gore a o ka laleletsa bangwe ba ditsala tsa gagwe kwa thutong. Fa Mosupi a goroga kwa legaeng leo beke e e latelang, o ne a fitlhela go phuthegile batho ba feta 50! Ke boammaaruri, go ne ga tlhokega dithulaganyo tse di kgethegileng gore batho bano botlhe ba ba kgatlhegang ba tswelele pele ba tlhokomelwa.

15. Ke eng seo se ka bolelwang kaga palo ya bao ba neng ba le kwa Segopotsong le bao ba kolobeditsweng?

¹⁵ Batho ba le bantsi ba ba ithutang e ne e le la ntlha ba kopanela mmogo le Bakeresete ka nako ya fa ba ne ba tlile kwa Segopotsong sa loso lwa ga Jesu. Mo ngwageng o o sa tswang go feta ono, palo ya batho ba ba nnileng gone e ne ya feta 10 000 000 e le la ntlha, batho ba le 10 650 158 ba kopane lefatshe lotlhe mo diphuthegong di le 66 207 ba phuthaganetse tiragalo eno e e ipedisang. Mo dinageng di le dintsi tsa Latin-America, Afrika, le Yuropa Botlhaba, go ne go tla batho ba palo ya baboledi ba Bogosi e menagane gararo kana gane. Jaanong re tshwanetse ra simolola go baakanyetsa Segopotso seo se tla tshwarwang monongwaga ka Labotlhano, April 17. Go solofelwa gore palo e e kwa godimo ya baithuti ba basha ba Bibela bao ba nnang gone kwa Segopotsong ba tla tswelela ba dira kgatelopele go ya kolobetsong. Fa e le ka ba ba kolobeditsweng, ka 1991 re ne ra boa gape ra bona batho ba feta 300 000 ba bontsha gore ba ineetse go Jehofa Modimo ka go inwa mo metsing.

Batho Ba Ba Ratang Kgololesego ya Bomodimo

16. Ke dipego dife tse di kgatlhang tse di tswang kwa Dikopanong tsa Kgaolo tsa “Batho Ba Ba Ratang Kgololesego”?

¹⁶ Karolo e e tlhomologileng ya ngwaga wa tirelo wa 1991 e ile ya nna motseletsele wa Dikopano tsa Kgaolo tsa “Batho Ba Ba Ratang Kgololesego,” tseo jaanong di setseng di fetile kwa Hemisefereng e e kwa Bokone mme di tla tswelela le ka 1992 mo Hemisefereng e e mo Borwa. E ne e le la ntlha thulaganyo e e feletseng ya kopano e neelwa mo dinageng di le mmalwa tsa Yuropa Botlhaba, koo bakaulengwe ba rona ba ipelelang go dirisa kgololesego ya bone eo ba sa tswang go e bona ba e dirisetsa go baka Jehofa. Ka October 1991 palogotlhe ya batho bao ba neng ba le gone eo e setseng e begilwe mo dikopanong tsa ntlha tse 705 tseo di neng di tshwaretswe mo dinageng di le 54 e ne e le 4 774 937.

17, 18. (a) Ke kgololesego efe eo baobamedi ba ga Jehofa ba nang le yone ebile ba lebile pele go tla ba bona efe? (b) Kgololesego ya bomodimo e farologana jang le kgololesego ya lefatshe?

¹⁷ Jesu o ne a bolelela barutwa ba gagwe jaana: “Boamarure bo tla lo golola.” (Yohane 8:32) Gompieno, boammaaruri jwa Bibela bo golotse dimilione tsa batho mo dithutong tsa Labokeresete. Batho bano ba ba dimilione ba ile ba ithuta gore setlhabelo sa ga Jesu sa thekololo se Jehofa a se ntshitseng se tla dira gore setho se kgone go “gololwa mo botlhankeñ yoa go bōla, [se] isiwa mo kgololesegoñ ea kgalalèlō ea bana ba Modimo.” (Baroma 8:19-22) Abo seo e tla bo e le tshiamelo e e molemo jang ne—go tshelela ruri mo lefatsheng la paradaise kafa tlase ga ditaolo tse di tshwanetseng tseo Jehofa a di tlhomang ka lorato!—Isaia 25:6-8; bapisa Ditiho 17:24-26.

¹⁸ Kgololesego eo Basupi ba ga Jehofa jaanong ba e ipelelang, ebile ba solofetse gore ba tla e ipelela ka botlalo le go feta mo tsamaisong ya Modimo e ntšha ya dilo, e tswa kwa Modimong wa rona, Jehofa. (2 Bakorintha 3:17) Ga e laolwe ke tsamaiso epe ya bopolotiki kana lekgotla la batlisadiphetogo. (Yakobe 1:17) E le gore ntlha eno e tlhaloganngwe sentle, dibetšhe tsa kopano ya 1991 tseo di neng di aperwe ke Basupi ba ga Jehofa mo dinageng dingwe tsa Yuropa Botlhaba di ne di na le mafoko a a reng “Batho Ba Ba Ratang Kgololesego ya Bomodimo” eseng “Batho Ba Ba Ratang Kgololesego” fela.

Go Rata Jehofa ka Lorato lo lo Boteng

19. Go atamelana le Jehofa ka thapelo go ka re tshegetsa jang?

¹⁹ Go rata Jehofa ga rona le go mo ikanya go tla dira gore re nne re atamelane le ene ka thapelo. Go atamelana gono le Jehofa ka thapelo ke gone go ileng ga thusa bakaulengwe ba rona gore ba itshokele mathata a mantsi le dipogiso tse dintsi. (Dipesalema 25:14, 15) Ka nako ya fa a ne a lekwa thata, Jesu o ne a nna a atamelane le Rraagwe ka thapelo. (Luke 22:39-46) Setefane o ne a tshegediwa ke go atamelana le Jehofa jalo ka thapelo fa a ne a le mo botlhokong jwa go swela tumelo. E ne ya re a tloga a kgobotlediwa ka maje go fitlha a swa, a lelalela legodimong a re: “Bōnañ, ke bōna magodimo a atlhamologile, le Morwa Motho [Jesu] a eme kaha lecogoñ ye legolo ya Modimo.”—Ditiho 7:56.

20-22. Boitemogelo bongwe bo bontsha jang gore Modimo o utlwa dithapelo?

²⁰ Jaaka fa baobamedi ba ga Jehofa gantsi ba ile ba lemoga, Jehofa o araba dithapelo tseo di dumelanang le thato ya gagwe. Ka sekai, mo nageng nngwe kwa Afrika koo tiro ya Basupi e thibetsweng gone, mmulatsela yo o kgethegileng yo o neng a sepela ka bese go ya bokone o ne a na le kgetse e kgolo ya dibuka tsa Bogosi le makwalo ao a neng a a isa kwa go beng ba one. Motlhokomedi yo o neng a pega dilwana mo beseng o ne a botsa mokaulengwe a re: “Kgetse eno e na le eng?” Mokaulengwe o ne a bua selo seo se neng sa tla pele mo mogopolong wa gagwe: “Makwalo.”

²¹ Mo tseleng, bese e ne ya feta fela e sa eme fa lefelong leo ka metlha go phuruphudiwang dikoloi mo go lone, mme mapodisi a pharakano a ne a e leleka a bo a e emisa, ba belaela gore e rwele dilwana tse di sa letlelelwang. Ba ne ba laela gore bapalami botlhe ba fologe mo beseng le gore dilwana tsotlhe di phuruphudiwe. A kotsi ruri! Mokaulengwe o ne a tsamaela kgakajana le boidiidi jwa batho ba ba ngunangunang, a wa ka mangole, a rapela Jehofa. Fa a boela gape kwa bathong, dilwana tsa motsamai mongwe le mongwe di ne di bulwa di bo di sekasekwa ka kelotlhoko e kgolo. Fa go tla gore kgetse ya mokaulengwe e bulwe, o ne a rapelela Jehofa mo pelong gore a mo thuse.

²² “Kgetse e ke ya ga mang, le gone e na le eng?” ga goa lepodisi. Pele ga fa mokaulengwe a ka bula molomo wa gagwe, motlhokomedi wa bese o ne a araba jaana: “Ke makwalo a a tswang kwa posong ya ———— a ya kwa posong ya ———— .” “Go siame,” ga rialo motlhankedi. A tsholetsa kgetse a e neela motlhokomedi. “O tlhomamise gore o e baya mo lefelong le le sireletsegileng thata mo mosepeleng,” a mo laela. Mmulatsela yo o kgethegileng o ne a wela fa fatshe gape ka mangole a leboga Moutlwi wa thapelo.—Pesalema 65:2; Diane 15:29.

23. Jehofa o ile a bontsha eng, mme ke ka ntlha yang fa ka dinako tse dingwe a lesa pogiso gore e tswelele pele go fitlha kwa bokhutlong jwa yone?

²³ Lefa go ntse jalo, seno ga se reye gore baobamedi ba ga Jehofa le ka motlha ba ka se welwe ke ditiragalo tsa matlhotlhapelo. Tlase ga maemo mangwe, mo dinakong tsa go kwalwa ga Bibela le gompieno, Jehofa o ile a bontsha gore a ka kgona go golola batho ba gagwe. Mme lefa go ntse jalo go dumelana le go rarabolola kgang ya go boloka bothokgami, ka dinako tse dingwe o lebega a lesa pogiso gore e tswelele go ya kwa bokhutlong jwa yone. (Bapisa Mathaio 26:39.) Gape, Jehofa ga a sireletse batho ba gagwe ka kgakgamatso fela mo dikotsing, mo dintweng tse di lowang ke banni fela ba motse, kana mo bokebekweng, lemororo go ka tlhokega go dirisa botlhale jo bo thailweng mo Bibeleng. (Diane 22:3; Moreri 9:11) Lefa go ntse jalo, re ka tlhomamisega gore lefa re ka gololwa mo maemong a a bokete kana re ka se gololwe, go ikanyega ga rona go tla duelwa, lefa e ka nna ka go tsosiwa fa e le gore go a tlhokega.—Mathaio 10:21, 22; 24:13.

24. Ke dimpho dife tse di bontshang lorato tseo Jehofa a di re neetseng, mme re ka arabela jang lorato lwa gagwe?

²⁴ Abo dimpho tse di lorato tsa ga Jehofa di le dintle jang ne! Mpho eo a e fileng setho ebong lefatshe leno le tsotlhe tse di mo go lone ke pontsho e e tlhomologileng ya lorato lwa gagwe. (Pesalema 104:1, 13-16; 115:16) Mme mpho ya Modimo ya boutlwelobotlhoko ya go ntsha Morwawe, Jesu Keresete gore a rekolole setho mo sebeng le mo losong ke mpho e e lorato go feta tsotlhe tse di kileng tsa fiwa. “Loratō loa Modimo lo bōnatshedicwe rona ka gōna mo, ka Modimo o romile Morwa ōna eo o tsecweñ a le esi mo lehatshiñ, gore re tshelè ka èna. Loratō lo mo, e señ go re, re ratile Modimo, ha e se go re, o ratile rona, me oa roma Morwa ōna go tla a nna seletlanyō se se ntshedicweñ dibe tsa rona.” (1 Yohane 4:9, 10) Go arabela lorato loo, a re tlhatswegeng pelo gore “go le losho, go le botshelō, go le baengele, go le magōsana, go le dilō tse di leeoñ, go le dilō tse di tla tlañ, go le dinonohō, go le bogodimo, go le boteñ, leha e ka bo e le sebopiwa señwe se sele, ga go ketla go nonoha sepè go re kgaoganya le loratō loa Modimo, lo lo mo go Keresete Yesu Morèna oa rona.”—Baroma 8:38, 39.

Go Boeletsa Setlhogo Seno

◻ Go ikanyega go kaya eng?

◻ Re ka bontsha go rata Jehofa mo dikarolong dife tsa botshelo?

◻ Ke dikarolo dife tsa pego ya ngwaga wa tirelo tseo di go kgatlhileng go gaisa?

◻ Re ka bontsha jang gore re anaanela dimpho tse di lorato tsa ga Jehofa?

[Lebokoso mo go tsebe 15]

KE KA NTLHA YANG FA GO NA LE BABULATSELA BA LE BANTSI JAANA? [Setshwantsho mo go tsebe 16]

Go ya ka dipego, Bajapane ba ne ba obamela dikgosikgolo tsa bone ka matlhagatlhaga ka lobaka lwa dingwaga tse 2 600. Mo dintweng tse di lolweng mo lekgolong leno la bo 20 la dingwaga fela, masole a Bajapane a feta dimilone tse tharo a ne a ntsha matshelo a one ditlhabelo, ka ba ne ba akanya gore ga go na tlotla epe e e fetang go swela modimo wa bone yo e neng e le kgosikgolo. Mme ka Ntwa ya Lefatshe II tsamaiso ya sesole ya Bobuda le Bo-Shinto e ne ya fenngwa, mme morago ga moo kgosikgolo ya ipolela gore ga se modimo. Phatlha eno e e bulegileng ya bodumedi e ne e ka tladiwa ka eng? Se se itumedisang ke gore, dithuto tsa magae tsa Bibela tseo di neng di tshwarwa ke barongwa ba Basupi ba ga Jehofa le ke baagi ba koo moragonyana di ne tsa thusa batho ba le bantsi gore ba bone Modimo wa boammaaruri, Jehofa, le gore ba neele matshelo a bone mo go ene. Boineelo jono bo raya go le gontsi mo Basuping bao ba Bajapane. Fa e le gore mo nakong e e fetileng ba ne ba ka intshetsa modimo wa kgosikgolo setlhabelo, abo ba ka dira ka matlhagatlhaga le go feta jaanong jang ne jaaka ba dirisa maikatlapelo a bone jaaka babulatsela mo kobamelong ya Modimo o o tshelang ebile e le Mmopi wa lobopo—Morena Molaodi Jehofa!

[Tšhate mo go tsebe 10-13]

PEGO YA BASUPI BA GA JEHOFA LEFATSHE KA BOPHARA YA NGWAGA WA TIRELO WA 1991

(See bound volume)

[Setshwantsho mo go tsebe 16]

Batho ba ba ratang kgololesego ya bomodimo—baobamedi ba ga Jehofa mo kopanong kwa Prague, ka August 9-11, 1991