Seo Bogosi jwa Modimo Bo Se Kayang mo go Ba le Bantsi
JESU KERESETE o ne a bua kaga Bogosi jwa Modimo kgapetsakgapetsa. Raditiragalo H. G. Wells o ne a kwala jaana kaga seno: “Tsela e Jesu a neng a tlotlomatsa thata ka yone dithuto tsa seo a neng a se bitsa Bogosi jwa Legodimo e kgatlha tota fa e bapisiwa le go sa nneng botlhokwa ga yone mo ditsamaisong le mo dithutong tsa dikereke tse dintsi tsa Bokeresete. Thuto eno ya Bogosi jwa Legodimo, eo Jesu a neng a e ruta, le eo e seng botlhokwa thata mo melaometheong e e kaelang Bakeresete, eleruri ke nngwe ya dithuto tse di farologaneng tota tse di kileng tsa kgona go tlhotlheletsa le go fetola tsela e batho ba akanyang ka yone.”
Ke ka ntlha yang fa dikereke di bolela go le gonnye jaana ka Bogosi jwa Modimo? Lebaka lengwe e ka nna gore ga di a tlhomamisega thata kaga Bogosi. Go ile ga nna ga akanngwa eng kaga jone?
Kafa Bogosi Bo Ileng jwa Nna jwa Lejwa ka Teng
Bangwe ba ile ba bolela gore Kereke ya Katoliki ke yone Bogosi jwa Modimo. Fa bobishopo ba sena go amogela Mmusi Constantine gore ke tlhogo ya bone kwa Council of Nicaea ka ngwaga wa 325 C.E., kereke e ne ya tsena mo dipolotiking, mme batho ba ne ba bolelelwa gore Bogosi bo setse bo tlile. Encyclopædia Britannica e tlhalosa gore go ya ka thutabodumedi ya ga Augustine (354-430 C.E.), “Bogosi jwa Modimo bo ne bo setse bo le teng mo lefatsheng leno ka go bo kereke e ne e setse e tlhomilwe” mme “bo ne bo setse bo le teng ka go dirwa ga ditiro tse di boitshepo tsa kereke.”
Batho ba bantsi ba tsaya gore Bogosi jwa Modimo bo tla leriwa ke motho. Saetlopedia yone eo e bolela jaana: “Dikereke tsa Balweladiphetogo . . . ka bonako fela di ne tsa nna dikereke tsa dikgaolo dingwe, seo se neng sa tlosa kgopolo ya go lebelela nako ya bofelo” mabapi le go tla ga Bogosi jwa Modimo. H. G. Wells o ne a kwala jaana: “Batho ba ne ba se ka ba tlhola ba letla gore bogosi jwa Modimo le botsalano jwa batho fela jwa tlholego bo tlhotlheletse matshelo a bone, go na le moo a ne a tlhotlhelediwa ke dilo dingwe tse di bonwang ka matlho, Fora le Engelane, Russia E E Boitshepo, Spain, Prussia . . . E ne e le medimo ya mmatota le e e tshelang ya Yuropa.”
Le mo metlheng eno ya segompieno Bogosi bo ile jwa tsewa e le selo sa selefatshe. Encyclopædia Britannica e tlhalosa jaana: “Selo se se senolang seno ke boikutlo jwa gore motho ka boene ke ene a tshwanetseng go baakanya batho ba ba itekanetseng ba ba tlileng go tshela mo isagweng ka tsela e e ba tlhabololang le go ba rulaganya le gore batho ba tshwanetse ba dire ka bobone go na le gore ba ‘solofele’ fela le go ‘leta.’” Fa e bua kaga “go dirisiwa ga melaometheo ya Bokeresete mo botshelong,” yone buka eo e ne ya tswelela jaana: “Mokgatlho ono o ne o leba molaetsa wa Bokeresete o o mabapi le Bogosi jwa Modimo jaaka selo se se tlhotlheletsang gore matshelo a batho a selefatshe a rulaganngwe sesha fela jaaka melaometheo ya Bogosi jwa Modimo e dira.”
Bajuda ba bantsi le bone ba ile ba leba Bogosi jaaka sengwe se se tla tlisiwang ke motho. Ka 1937 lekgotla lengwe la baruti ba Balweladiphetogo ba Bajuda ba ba sa lateleleng ngwao thata le le neng le tshwaretswe kwa Columbus, Ohio, kwa U.S.A., le ne la bolela jaana: “Re leba go dirisana mmogo le batho botlhe mo go tlhomeng bogosi jwa Modimo, botsalano mo lobopong lotlhe, tshiamiso, boammaaruri le kagiso mo lefatsheng, jaaka tiro ya rona e e botlhokwa thata. Jono ke boikaelelo jwa rona jo re bo dirang re bo gagamaletse.”
Sengwe gape se se dumelwang thata ke gore Bogosi jwa Modimo ke tsela e pelo ya motho e ntseng ka yone. Ka sekai, kwa United States, Southern Baptist Convention ya 1925 e ne ya bolela jaana: “Bogosi jwa Modimo ke fa Modimo o busa pelo le botshelo jwa motho mo go sengwe le sengwe se a se dirang, le ka mekgwa yotlhe le mo mekgatlhong epe fela e e rulagantsweng ya batho. . . . Bogosi jwa Modimo bo tla bo bo feletse fa kgopolo nngwe le nngwe le sepe fela se motho a se batlang di tla bo di dirilwe gore di dumalane le se se batliwang ke Keresete.”
Ka jalo, he, a kereke ke Bogosi jwa Modimo? A Bogosi joo bo tla tla ka matsapa mangwe a a tsewang mo lefatsheng? A ke kafa pelo ya motho e ntseng ka teng? Gone Bogosi jwa Modimo bo ka kaya eng mo go wena?