Seo Bogosi jwa Modimo Bo Ka Se Kayang mo go Wena

JESU KERESETE o ne a ruta balatedi ba gagwe gore ba rapele jaana: “Bogosi yoa gago a bo tlè.” (Mathaio 6:10) Abo bao ba ipolelang gore ke balatedi ba ga Jesu ba ile ba bolelela Modimo mafoko ao kgapetsakgapetsa jang ne!

Lefa go ntse jalo, Jesu ga a ka a ruta barutwa ba gagwe go rapelela Bogosi jwa Modimo fela. Bogosi e ne e le setlhogo se segolo se a neng a bolela ka sone mo tirong ya gagwe ya go rera. Ebile tota, Encyclopædia Britannica e bolela gore Bogosi jwa Modimo “bo lejwa ka kakaretso e le setlhogo se segolo tota se Jesu a neng a ruta ka sone.”

Balatedi ba ga Keresete ba a bo ba rapelela eng tota fa ba rapelela Bogosi? Bogosi jwa Modimo bo ka kaya eng mo go bone le mo go wena? Mme Jesu o ne a bo leba jang?

Kafa Jesu A Lebang Bogosi ka Teng

Jesu o ne a tlhola a ipitsa “Morwa Motho.” (Mathaio 10:23; 11:19; 16:28; 20:18, 28) Seno se re gakolola moperofeti Daniele fa a ne a umaka “morwa motho.” Daniele o ne a bolela jaana mabapi le tiragalo nngwe e e neng e tla diragala kwa legodimong mo isagweng: “Me ka leba mo dipōnatshegeloñ tsa bosigo, me, bōnañ, ga tla mo maruñ a legodimo moñwe eo o chwanañ le moñwe morwa motho, me a tla hèla kwa go eo mogologolo, me ba mo atametsa ha pele ga gagwè. Me a nèwa pushō, le kgalalèlō, le bogosi, gore batho botlhe ba dichaba, le ba merahe, le ba dipuō ba mo dihèlè.”—Daniele 7:13, 14.

Jesu o ne a bolelela barutwa ba gagwe jaana fa a ne a bua ka nako eno ya fa a tla bo a amogela puso: “Lona ba lo ntshetseñ moragō, e tla re . . . ha Morwa Motho a dula mo setuloñ sa gagwè sa bogosi sa kgalalèlō, le lona lo tla dula mo dituloñ tsa bogosi di le shomè le mecō mebedi.” Jesu o ne a bolela gape jaana: “Me e tla re Morwa Motho a tla ka kgalalèlō ea gagwè, . . . merahe eotlhe e tla phuthèlwa ha pele ga gagwè. Me o tla ba kgaoganya bañwe mo go ba bañwe, yaka modisa a tla a kgaoganye dinku le dipodi. . . . Bauō [ba ba sa siamang] ba tla ea mo pecoñ e e sa khutleñ: me basiami ba tla ea mo botsheloñ yo bo sa khutleñ.”—Mathaio 19:28; 25:31, 32, 46.

Go umakiwa gono mo boperofeting ga ditulo tsa bogosi le batho ba merafe yotlhe go supa gore Bogosi jono ke puso e Jesu le bangwe ba balatedi ba gagwe ba tlileng go busa batho mo go yone. Puso eo e tla bo e na le maatla a go bolaya ba ba sa siamang. Lefa go ntse jalo, ba ba ratang tshiamo ba tla amogela mpho ya Modimo ya botshelo jo bo sa khutleng fa Bogosi joo bo busa.

Go phepafetse he gore Bogosi jwa Modimo ke puso ya selegodimo e e tlhomilweng ke Modimo. Bogosi jono ga se kereke, Dikwalo le tsone ga di bolele sepe sa gore e ka nna selo sengwe sa selefatshe. Mo godimo ga moo, puso ya Modimo ga e kake ya nna sengwenyana fela se se leng mo pelong ya motho. Ereka Bogosi jwa Modimo e le puso, ga e nne sengwe se se nnang mo dipelong tsa rona fa re nna Bakeresete. Mme ke ka ntlha yang fa bangwe ba akanya gore Bogosi ke boemo bongwe jo pelo e ka nnang ka jone?

A Bogosi Bo mo Teng ga Rona?

Bangwe ba akanya gore Bogosi bo mo dipelong tsa rona ka ntlha ya tsela eo Luke 17:21 e ranotsweng ka teng mo dithanolong tse dingwe tsa Bibela. Go ya ka New International Version, Jesu o ne a bolela jaana mo go yone: “Bogosi jwa Modimo bo mo teng ga lona.”

The Interpreter’s Dictionary of the Bible e bolela jaana kaga seno: “Thuto ya gore bogosi jwa Modimo ke tsela e e kwa teng e tlhaloganyo ya motho e ntseng ka yone, kana ke tsela ya go bona poloko ka namana, e thulana le ditemana tse di dikologileng temana eno, gape le kafa T[esetamente] yotlhe E N[tšha] e bolelang ka teng ka kgopolo eno.”

Ntlhanyana e e kwa tlase e e akgelang kaga Luke 17:21 mo go New International Version e bontsha gore mafoko a ga Jesu a ka ranolwa jaana: “Bogosi jwa Modimo bo mo go lona.” Dithanolo tse dingwe tsa Bibela di balega jaana: “Bogosi jwa Modimo bo mo go lona” kana “bo mo gare ga lona.” (The New English Bible; The Jerusalem Bible; Revised Standard Version) New World Translation of the Holy Scriptures e bolela gore Jesu o ne a re: “Bogosi jwa Modimo bo mo gare ga lona.” Jesu o ne a sa kaye gore Bogosi bo ne bo le mo dipelong tsa Bafarasai ba ba ikgogomosang bao a neng a bua le bone. Go na le moo, Jesu o ne a le mo gare ga bone jaaka Mesia le Kgosi E E Tlhophilweng e e neng e sa bolo go emelwa. Mme go ne go santse go tla feta lobaka pele Bogosi jwa Modimo bo tla.

Nako ya Fa Bo Tla

Go setse go tlhophilwe balatedi bangwe ba ga Jesu Keresete go ya go busa le ene mo Bogosing jwa gagwe jwa selegodimo jaaka Mesia. Jaaka Jesu, ba swa ba ntse ba ikanyega mo Modimong mme ba tsosediwa go tshela jaaka meya kwa legodimong. (1 Petere 3:18) Fa ba bapisiwa, palo ya bone e potlana tota, ba tlile go nna dikgosi ebile e le baperesiti ba le 144 000 ba ba rekilweng mo bathong. (Tshenolō 14:1-4; 20:6) Batho bano ba ba tlileng go busa le Jesu ba akaretsa baaposetoloi ba gagwe ba ba ikanyegang.—Luke 12:32.

Jesu o ne a solofetsa jaana fa a ne a bua le balatedi ba gagwe ka nako nngwe: “Go bañwe ba bōnè ba ba emeñ ha, ba ba se ketlañ ba utlwa losho gopè, go tsamaea ba bōna Morwa Motho a tla mo bogosiñ yoa gagwè pele.” (Mathaio 16:28) Se se kgatlhang ke gore temana e e latelang e supa gore tsholofetso eo ya ga Jesu e ne ya diragadiwa malatsi a sekae fela morago ga foo. Go tswa foo o ne a tsaya bangwe ba barutwa ba gagwe ba le bararo a ya nabo kwa thabeng koo a neng a fetoga ponalo fa pele ga bone teng, mme ka tsela eo ba ne ba mmona ka ponatshegelo a le mo kgalalelong ya Bogosi. (Mathaio 17:1-9) Mme lefa go ntse jalo Bogosi ga bo a ka jwa tlhongwa ka nako eo. Seo se ne se tlile go diragala leng?

Sengwe sa ditshwantsho tsa ga Jesu se supa gore o ne a se kitla a tlhongwa ka bonako fela jaaka Kgosi ya Mesia. Re bala jaana mo go Luke 19:11-15: “A bua sechwanchō, ka go bo a le gauhi le Yerusalema, le gōna ka ba itlhoma bogosi yoa Modimo bo tla akoha bo bōnala. Ke gōna, a re, Mogolwane moñwe o kile a ètèla kwa lehatshiñ ye le kgakala, a ea go ikamogèlèla bogosi, le go ba a boea. Me a bitsa batlhanka ba gagwè ba ba shomè, a ba neèla dipondo di le shomè: me a ba raea, a re, Bapalañ ka tse, go tsamaee ke be ke tle ke tle. . . . Me ga dihala, e rile a sena go boea, bogosi yōna a bo amogetse, a laola gore batlhanka bauō ba bilediwè kwa go èna, eboñ ba o ba neetseñ madi, gore a tlè a itse kaha ba bapetseñ ka gōna.”

Mo metlheng eo motho o ne a tsaya lobaka lo loleele tota go tloga mo Iseraele go ya kwa Roma, a fitlha a leta mo motseng oo go fitlha a newa maatla jaaka kgosi, a bo a boela kwa nagagaeng ya gaabo e le kgosi. Jesu e ne e le “mogolwane” yoo. O ne a tlile go newa maatla jaaka Kgosi ke Rraagwe kwa legodimong mme o ne a se kitla a tlhomiwa jaaka Kgosi ya Mesia ka nako eo. Balatedi ba gagwe ba ne ba gweba ka go dira tiro ya go rera mafoko a a molemo a Bogosi ka lobaka lo loleele pele a boa e le Kgosi.

Kafa Bogosi bo Tlang ka Teng

Batho ba ba ratang Modimo ba a bo ba kopa eng fa ba rapelela gore Bogosi jwa gagwe bo tle? Totatota ba a bo ba kopa gore Bogosi jwa selegodimo go tseye kgato ya makgaolakgang ka go senya ditsamaiso tse di tlhomilweng ke motho tse di paletsweng ke go lere kagiso ya boammaaruri le katlego. Moperofeti Daniele o ne a kwala jaana fa a ne a gatelela selo seno se se neng se tla diragala: “Me e tla re mo metlheñ ea dikgosi tseuō, Modimo oa legodimo o tla tlhōma bogosi yo bo se ketlañ bo señwa gopè, me le mmushō oa yōna ga o ketla o tlogèlèlwa chaba e sele, me bo tla thubaganya, bo nyèlètsa magosi aouō aotlhe, me bo tla èma ka bosakhutleñ.” (Daniele 2:44) Seno se ne se tlile go diragala leng?

Jesu o ne a bolelela pele gore seno se ne se tlile go diragala mo kokomaneng ya bao ba neng ba tla bona fa dikgang tsa motho di tla bo di tlhakatlhakane ka selekanyo se se kwa godimo thata. Jesu o ne a bolela “seshupō” se se dikarolo dintsi se se mabapi le go ‘tla ga gagwe,’ se se neng se akaretsa ditiragalo tse di ka se kang tsa bapisiwa le dipe tse di tshwanang le dintwa, dithoromo tsa lefatshe, mauba, dikgogodi tsa malwetsi—ee, le go rerwa mo lefatsheng lotlhe ga mafoko a a molemo a Bogosi jwa Modimo.—Mathaio, kgaolo 24, 25; Mareko, kgaolo 13; Luke, kgaolo 21.

Boperofeti jwa ga Jesu bo bolela ka ditiragalo tse di diragalang gone fela jaanong—mo lekgolong leno la rona la bo 20 la dingwaga. Ka gone, ga go kitla go tsaya lobaka lo loleele pele Bogosi jwa Modimo bo leretse batho masego a magolo. O ka nna mongwe wa bao ba tla ipelelang melemo ya puso ya Bogosi joo. Mme tota ke eng seo Bogosi jwa Modimo bo ka se kayang mo go wena le mo go ba o ba ratang?

Masego a Puso ya Bogosi

Go tla itumelwa mo lefatsheng lotlhe. Kafa tlase ga “legodimo ye lesha”—Bogosi jwa selegodimo—go tla nna le “lehatshe ye lesha,” morafe o o boikobo wa babusiwa ba Bogosi ba ba tla bong ba le mo lefatsheng lotlhe. “Modimo ka osi o tla nna nabō,” moaposetoloi Johane o ne a kwala jalo. “Me o tla phimola dikeledi cotlhe mo matlhoñ a bōnè.” Go tla bo go na le mabaka otlhe a go itumela ka nako eo, ka go bo “ga go ketla go tlhōla go le bohutsana, leha e le selelō, leha e le botlhoko.”—Tshenolō 21:1-4.

Loso ga lo kitla lo tlhola lo nna teng. Selo seno se se bakang botlhoko ga se kitla se re amoga ditsala tsa rona le batho ba re ba ratang. “Mmaba oa bohèlō eo o tla nyèlèdiwañ ke losho.” (1 Bakorintha 15:26) Abo boitumelo bo tla nna bogolo jang ne ka nako ya fa mo boemong jwa gore go fitlhiwe baswi Modimo o tla bong o tsosa batho ba o ba gakologelwang mo baswing!—Yohane 5:28, 29.

Mo boemong jwa bolwetsi le bokoa go tla itekanelwa sentle mo mmeleng. Malao a dikokelo ga a kitla a tlala ka bao ba tshwenngwang ke malwetsi a mmele le a tlhaloganyo. Ngaka E Kgolo, Jesu Keresete, e tla dirisa boleng jwa setlhabelo sa yone sa thekololo go ‘fodisa merafe.’ (Tshenolō 22:1, 2; Mathaio 20:28; 1 Yohane 2:1, 2) Tsela e a neng a fodisa ka yone fa a ne a le mo lefatsheng e ne e le sekai fela sa se a tlileng go se dira ka Bogosi.—Bapisa Isaia 33:24; Mathaio 14:14.

Dijo di tla nna dintsi. Fela jaaka mopesalema a ne a bolela, “go tla nna letlōtlō ya mabèlè mo lehatshiñ, mo ditlhoeñ tsa dithaba: louñō loa aōna lo tla ebelèga.” (Pesalema 72:16) Boperofeti jwa ga Isaia bo oketsa jaana mo go seno: “Yehofa oa mashomōshomō o tla baakanyetsa dichaba cotlhe modihō oa dilō tse di nonneñ, modihō oa mayalwa a mafine a a itshekileñ, oa dilō tse di nonneñ tse di tletseñ mōkō, oa mayalwa a a itshekileñ a a tlhōtlhegileñ sentlèntlè.” (Isaia 25:6) Eleruri, baagi ba lefatshe ga ba kitla ba tlhaselwa ke mauba fa ba busiwa ke puso ya Bogosi.

Lefatshe lotlhe le tla nna paradaise. Ka gone go tla diragadiwa jalo seno se Jesu a neng a se solofetsa modirabosula yo a neng a ikwatlhaile a re: “U tla nna le nna kwa Paradaisa gompiyeno.” (Luke 23:43) Le wena ruri o ka itumelela go tshela ka bosakhutleng mo lefatsheng leno, lefatshe le le senang boikepo le le le fetotsweng go nna phaka e e itumedisang.—Yohane 17:3.

Dilo tseno tse di molemolemo tse di santseng di tla di beilwe fa pele ga batho botlhe ba ba boikobo gore ba di itlhophele. Lefoko le le tlhotlheleditsweng la ga Jehofa, Bibela, ke lone le re tlhomamisetsang ka dilo tse di itumedisang tseno. Mme dilo tseno tsotlhe ke sone seo Bogosi jwa Modimo bo ka se kayang mo go wena.

[Setshwantsho mo go tsebe 7]

A o dumela se Jesu a neng a se bolela kaga Bogosi jwa Modimo?